03/08/2026
🚨 أخطر جملة تنجم تقولها لولدك... من غير ما تشعر:
"شوف ولد عمك..."
يمكن بالنسبة ليك انت قاعد تحفز فيه وتعملوا في "دزة" خفيفة باش تشجعو...
أما بالنسبة ليه :
💔 قيمتي عند بابا وماما موش في شكون أنا... قيمتي في قداش ننجم نشبه لغيري
المشكلة أنوا المقارنة عندنا موش مجرد تصرف عابر...
موجودة في كلامنا اليومي...وبطريقة مكثفة زادة
للأسف...وكانها ولات ثقافة...
من نهار اللي يتولد الصغير تبدأ المقارنات..ونبداو نبرمجوا في الام باش تغزر لولدها على انوا ما يشبهش لغيروا
👶 "شوف ولد خالتك تكلم قبلك."
🚶 "شوف بنت جارتك مشات قبلك."
📚 "شوف ولد عمك جاب معدل خير منك."
وكأنوا النجاح عندو طريق واحد... وكأنوا الأطفال الكل لازم يمشيو بنفس النسق... وبنفس السرعة ...وفي نفس الوجهة.
🧠 في علم النفس... تفسر نظرية المقارنة الاجتماعية التي قدّمها عالم النفس Leon Festinger سنة 1954 ..أنوا الإنسان يميل إلى تقييم قدراته وآرائه من خلال مقارنتها بالآخرين.. خاصة وقت اللي يبدأ ما عندوش repere objectif باش يقيم
وبصراحة الموضوع هذا تحكا عليه برشا مرات في العديد من الكتابات ...كيما كتاب "المقعد البرتقالي" لماجي الشافعي:
"ليست كل الطرق صالحة للجميع، وليست كل النجاحات تُقاس بمعايير واحدة. كما أن الطائر لا يحتاج أن يغرق ليُثبت أنه قادر على التنفس تحت الماء، وكما أن الزرافة لا تحتاج إلى المخاطرة بحياتها لتتسلق الأشجار، فإن أبناءنا لا يحتاجون أن يكونوا نسخًا مكررة ممن سبقهم أو ممن حولهم."
✨ هذا بالضبط اللي ننساوه
يمكن ولدك ما جابش معدل كيما انت تحب
اما يمكن عنده ذكاء اجتماعي يخليه قائد
يمكن عنده حسّ فني
يمكن يعرف يحتوي الناس
يمكن عنده خيال وإبداع ما تقيسهم حتى ورقة امتحان
🌱 التربية موش أنك تحاول تخلي ولدك يشبه لغيره...
التربية هي أنك تكتشف البصمة الخاصة اللي ربي حطها فيه، وتعاونوا باش ينميها
وإذا كان تحب تقارن...
قارن ولدك بروحوا، موش بغيره.
في بلاصة ما تقول:
❌ "شوف ولد عمك وين وصل."
قول:
✅ "شوف قداش تقدمت مقارنة بروحك العام اللي فات."
المقارنة مع الآخرين تزرع الشك...
المقارنة مع الذات تخليه يتطور
💚شنوّة أكثر جملة سمعتها وإنت صغير..والا سمعتها تتقال للصغيرات وكانت مبنية على المقارنة؟
#تربية #اطفال #تونس
