Les Vers Luisants

عن متفقد الطفولة أنيس بن عبد الله

تصحيح لبعض المصطلحات و روا كل مصطلح منهم وراه ممارسات و مضامين و أهداف تختلف عن الاول،
في الروضة مثلا:
ما نقلوش ايقاظ علمي ، نقولوا أنشطة ايقاظية،
ما نقولوش حساب، نقولو انشطة رياضية منطقية ،
ما نقولوش كتابة و قراءة ، نقولو أنشطة التهيئة للكتابة و القراءة ،
أنيستي في الروضة هي اللي تصمم و تنفذ المشاريع التربوية و توظف فيها مختلف الاستغلالات البيداغوجية ، ما عناش استاذ مختص لكل نشاط ...
حفل ٱخر السنة هو تتويج للي خدموه الانيسات و الأطفال على امتداد السنة التربوية ، و الفريق التربوي بالمؤسسة هو اللي ينشط و يسير الحفلة و يضبط مضامينها ...
مضامين الحفلة ما همش نتاج عروض تخدمو في 15 يوم و قتلنا فيهم الاطفال ، هو تتويج لخدمة و مجهود عام كامل ...
انيستي دورها موش القارد ، انيستي دورها التنشيط ،
انيستي تعرف تنظم المفاهيم و توزعهم بالتدرج حسب صعوبتهم من اول العام لٱخر العام ،
ثمة تدرج في المضامين و المفاهيم ، بين عامين و نص و حتى نوصلو لخمس ست سنوات ، ما نخدموش بعلي ، ثمة تخطيط واعي و تدرج و مرحلية واضحة في الانجاز،
انيستي تعرف الطفل شنوة لازمو يتعلم في الروضة - التعلمات و المفاهيم الأساسية معروفين و واضحين ...
أنيستي ما تحملش والدي فوق طاقتهم و تخدم عالصورة و البهرج و كل شهر تظاهرة وفلوس و مستلزمات ووو ، أنيستي الهدف متاعها الاول انها تساعدني عالنمو و التعلم و تخليني طفل مرتاح متوازن و سعيد في الروضة ..
في روضتنا ما فماش طفل يتعدى للقراءة و الكتابة و الحساب ، قبل ما يتعلم انواع الخطوط ، و يتعلم الاتجاهات، و التمركز في الفضاء ، و التوازن ، و الاشكال ، و الالوان، و الفرز و الترتيب ، و التصنيف ... و قبل ما ينمي قدراتو الحسية الحركية من خلال عديد الانشطة الهادفة ...
وقت تدخل لروضتي ما تلقاش، كان كرارس و كتب و ستيلوات، و ما تلقاناش ديما قاعدين مكتفين ايدينا ، في روضتي تلقى مواد تنشيط و معلقات تربوية و رزنامات إيقاضية، و تلقاهم معلقين انتاجاتي موش الحاجات اللي صنعتهم أنيستي...
تلقى فضاء مبهج و ثري و حركي ، تلقى أصوات تلقائية و فرحانة ...
أنيستي الحقيقية تراعي مختلف حاجاتي في هالمرحلة ( حركة ، لعب ، استكشاف ، راحة ، مراوحة ، تعلم حسي حركي و لعبي ...) و تراعي زادة مستوى قدراتي في كل مرحلة ...
مالا باش أنيستي مختصة .... خاطرها تفهم اش معناها طفل و تفهم في برامج الروضة و قادرة كمختصة تفهم امي و بابا خصائص هالمرحلة و وين تكمن مصلحتي الحقيقية ...
تحية لكل أنيسة تفهم و متمسكة بهذا الكل ...
تحية لكل مربي حقيقي يراعي ضميرو و يعلي مصلحة الاطفال فوق كل اعتبار ...

يعطيك الصحة اماني على العمل الجميل 💚🩷🥰😘❤️

💚🥰❤️🩷😍😘💓💜