Centre de revision Lobna Friji

تلميذ يكتب: فرحانين بمقاطعة امتحانات الثلاثي الثاني؟
"نعرف إلي برشة منّا فرحانين بمقاطعة امتحانات الثلاثي الثاني، ويمكن حتى يعتبروا الوضع «راحة» ويقولوا: “ما فماش فروض، ما ثماش سترس، رتحنا”
أمّا قبل ما نفرحو، يلزم نوقّفو دقيقة ونفكّرو بعقلانية: شنوّة باش يصير لو فعلاً ما نعدّيو حتى امتحان في الثلاثي الثاني؟
أولاً:
إذا نوصلو لشهر مارس وما صارت لا فروض مراقبة ولا تأليفية، وبعدها ندخلو للعطلة… هذا يعني إنّو الوقت الي يبقى بعد العطلة قصير برشة، وخاصة تلامذة الباكالوريا، خاتر الثلاثي الثالث مدته قصيرة برشا,
ثانياً:
المعروف، واللي شفناه في سنوات سابقة، إن الوزارة والنقابة ديما يتفاهمو في الدقيقة 90 و يلقاو حل قانوني جاهز:
اعتماد معدّل الثلاثي الأول والثالث فقط في التقييم.
هذا موش كلام فارغ، هذا صار قبل، وصار أكثر من مرّة وينجم يضر برشا تلامذة.
ثالثاً:
هوني يلزم تفكّر مليح في وضعك:
إذا كنت جايب مثلاً 7 في الثلاثي الأول، هذا يعني إنّك باش تكون مجبر تجيب حوالي 12 في الثلاثي الثالث باش تنجح. فرق كبير، وثقل كبير عليك، خصوصاً إذا تكون في وقت هو أصلاً مضغوط ومليان التزامات. وفرصة التدارك تكون شبه منعدمة مع ضيق الوقت,
رابعاً:
الواقع يلزمنا نواجهوه:
– التلميذ اللي يقرى بانتظام ما يضرّو حتى سيناريو.
– التلميذ المتوسط ينجم يتدارك إذا كان مركز.
– أما التلميذ الضعيف الي، وما يخدمش بالاستمرارية… هو أول واحد ينضرب بالقرار هذا، ويتحوّل الموضوع من "مقاطعة" لــ"إعادة عام".
وهوني نحب نقول حاجة مهمّة برشة:
القراية في الثلاثي الأول موش كماليات… هي ضمان.
ضمان ضد أي قرار مفاجئ. ضد أي سيناريو. ضد أي تعطيل. ضد أي وضعية كيما اللي قاعدين نشوفو فيها.
الي يخدم من الأول، ما يتهزّش. والي يتكلّ على الظروف… هو اللي يدفع الثمن.
خامساً (والأهم):
راهو الهدف موش نخوّف حد، ولا نعمل ضغط. الهدف هو التشجيع على المسؤولية:
إنت تلميذ، معنتها مستقبل، والمعادلة بسيطة:
كل ما تخدم تاو، ترتاح غدوة.
كل ما تبني نقاطك من الأول، تكون في أمان مهما تبدّل القرار.
وكل ما تخلّي مستواك واضح وثابت، تضمن روحك وما تتعلّقش بمفاجآت آخر لحظة.

في النهاية، ماناش ضد المقاطعة ولا معاها…
احنا ضدّ إنك تفرح بحكاية يمكن تضرّك وماكش منتبه لها.

نصيحة من تلميذ كيفكم:
اخدم على روحك، حضّر روحك، وما تخلّيش المستقبل متعلّق بمفاوضات آخر لحظة.
إنت وحدك اللي تنجم تضمن نجاحك… مش الظروف."

سنة خامسة
فرنسية

علوم الحياة و الأرض سنة ثامنة

علوم الحياة و الأرض سنة 8

انقليزية 7 اساسي