14/09/2021
على قريب العودة المدرسية ونرجعو للمراجعة والخدمة في الدّار...
الصراحة بعد نهار كامل بين المدرسة والحضانة( اللي هي موتّرة و متعبة برشة) الصغير يروّح في حالة يعلم بيها كان ربّي لذا ماتكمّلش عليه بالغش والصياح والضرب..
📚أول حاجة لازم يكون عنّا روتين للقراية ياحبّذا يكون في نفس الوقت، نفس المكان وبصفة يومية...(النظام يعاون على التركيز)
📚نختارو الوقت المناسب: موش مالطبق لبيت النار.. كي يروّح خليه يرتاح يلعب شوية، ياكل لمجة.. (التلفزة لا)..
نختارو بلاصة هادية، ونجيبو اللي لازمنا الكلّ.. مانعديش الوقت اني مشيت نجيب في مقص، نسيت ستيلو..
📚كلّ يوم نتبّع صغيري ونراجعلو حتى 20 دقيقة.. (ماتعملّش عالقارد والدروس الخصوصية) باش ما تندمش بعد مايفوت الفوت..
📚إذا كان يحبّ يتحرّك سيبو على راحتو..(ماهواش يعدّي في ربطية 😒) تنجّم تعطيه طرف صلصال في يدو/ كورة antistress...
📚بعد مانكملو المراجعة مافيها باس كلمة حلوة.. يعيّش ولدي أنا فخورة بيك..فرحانة بيك (حتّى لو كان إنت تحسّ في العكس)
على فكرة الكلام الإيجابي وإنّك تحسس صغيرك بقيمة الشي اللي يعمل فيه خير برشة من المكافآت المادية.. وعندهم نتيجة على المدى البعيد..
