Psychologie & coaching

متقلق ؟ تحس اللي ماكش فاهم روحك؟؟ أفكارك مشتتة و تفكيرك مشوش 😕😕 و ماكش عارف آش تعمل؟ عندك صعوبة في وضع أهداف و تنفيذها ؟ تحس في برشا ضغط نفسي و قلق و ممكن تحس روحك مكتئب؟ لاحظت اللي وليت حساس و دقة الشوكة تبكيك؟ لاحظت على روحك أعراض نفسية ماكش فاهمها و ماكش عارف المصدر متاعها ولا لوين باش تهزك؟
مالأخر تحس روحك تبدلت و معادش تعقل روحك و ماكش عارف آش تعمل ولالشكون باش تتوجه؟
ما عليك كان تتصل بيا و أنا كمختصة في مجال الصحة النفسية و بالتحديد أخصائية نفسية نرشدك للحل و نعاونك باش تفهم روحك و تلقى حل للقلق اللي عندك من خلال حصص علاج نفسي و لا نوجهك و نقلك لشكون لازمك تمشي.

برشا ناس ما يفرقوش بين الطبيب النفسي psychiatre و الأخصائي النفسي psychologue، الحاجة هذه لاحظتها من خلال مهنتي ولا حتى في حوارات عادية مع عامة الناس، كي نطرح السؤال الآتي: "تعرف الفرق بين psychologue et psychiatre ولا؟" ، الإجابة اللي نسمعها عامة، هي "لا أما ماهو الزوز psy" 🥴
زيد عليهم les coachs عاد!! الأمور دخلت بعضها و خرجت عالسيطرة ، و الناس ولاو يسمحو لأي شخص باش يتدخللهم في صحتهم النفسية و هذا ناتج على قلة معرفة الأشياء، إظافة إلى قلة الوعي.....
الطبيب النفسي psychiatre : هو شخص بعد ما تحصل على شهادة الباكالوريا توجه لدراسة الطب بإحدى كليات الطب بالجمهورية التونسية، مبعد إختار باش يتخصص في الطب النفسي. في ما معناه أنو متحصل على شهادة معترف بيها في تونس من قبل وزارة الصحة و وزارة التعليم العالي و خارج تونس. الطبيب النفسي يعطي الدواء.
الأخصائي النفسي psychologue : هو شخص بعد ما تحصل على شهادة الباكالوريا توجه لدراسة علم النفس بكلية العلوم الإنسانية و الاجتماعية بتونس 9 أفريل أو بالمعهد العالي للعلوم الإنسانية إبن شرف، في كلتا الحالتين هو متحصل على شهادة معترف بيها في تونس من قبل وزارة الصحة و وزارة التعليم العالي وخارج تونس. لممارسة هذه المهنة، الأخصائي النفسي يقرى أقل حاجة 5 سنوات بعد الباكالوريا ، زيد عليهم التربصات. الأخصائي النفسي ما يعطيش الدواء.
نجيو توا لمدرب التنمية الذاتية coach de vie : ما فما حتى هيكل حكومي ولا خاص يمنح شهادة coach de vie, معناها في كتاب التوجيه اللي ناخذوه بعد الباكالوريا ما فماش شعبة اسمها تنمية ذاتية، في ما معناه le coach de vie موش متحصل على شهادة معترف بيها من قبل وزارة الصحة و وزارة التعليم العالي. مع العلم أنو بعض الهياكل و المنظمات في البلدان المتقدمة طلبت رخص و تحصلت عليها ،الرخص هذه تتمثل في أنها تولي مختصة في تكوين مدربي التنمية الذاتية، تكوين يدوم أشهر و شهائد معترف بيها.
مدربي التنمية الذاتية في بلادنا قاعدين يتحصلو على شهايدهم من خلال دورات تكوينية تلقاوها من عند مدربين أخرين اللي هوما بيدهم تلقاو دورات تكوينية من عند مدربين أخرين ..... و هكذا دوليك، إلا من رحم ربي، و الدورات التكوينية هذه لا تدوم إلا بضعة أيام، مع العلم أنو حتى شخص ما كملش قرايتو و ما عندو حتى مستوى دراسي ينجم يشارك في هته الدورات التكوينية.
في الأخير نحب نقدم نصيحة: أعرفو وين تحطو ساقيكم ، أعرفو شكون الشخص اللي باش تسمحولو أنو يدخل في صحتكم النفسية ، و إذا نهار واحد يتوجه ل coach de vie ، ميسالش أطلب باش تشوف الشهادة متاعو، مع العلم أنو كي نحكيو على شهادة ما نقصدوش بيها diplôme ، بالأحرى هي certification.

و إن شاءالله ديما لباس.

إيمان الشبوح
أخصائية نفسية

عسلامة الناس الكل
فما حاجة قاعدة نشوف فيها تتعاود في les groupes و بصراحة أنا كأخصائية نفسية ما عجبتنيش و اليوم قررت باش نشارك معاكم منشور نحاول نقدم فيه بعض النصائح ....
ساعات تجي قدامي publication في واحد ما les groupes ، يبدا membre يلوج على أخصائي نفسي ولا طبيب نفسي. و إذا بيهم ينهمرو عليه بل les commentaires من نوع "فك عليك" "ما ننصحكش" والمنصوح بيه عاد هوما les coachs،معناها هكا ، واحد يلوج في طبيب، تنصحوه ب coach !!!!!! 🤨🤨
سيبو الناس يهديكم، راهو اللي حس روحو مستحق أخصائي نفسي ولا طبيب نفسي معناها راهو مستحق بلحق و لازمو يمشي، كيما وقت توجعو زرستو يمشي لطبيب الأسنان ولا كي يتقلق في معدتو يمشي لطبيب المعدة، مهواش جاي ياخو في رايكم ، كان جاء حاشتو ب coach راهو قال نلوج على coach !!! عيشكم يزيو من التاثير السلبي على الناس ،ساهلة برشا 🙂
نحكي هكا من منطلق اطلاعي على الأشياء، و من منطلق آش يقول العلم، راهو فما أمراض نفسية ما تبرا كان بالدواء، ولا بعض اظطرابات الشخصية لازمها الدواء و لازمها علاج نفسي.
و لاحظت زادة اللي برشا ناس تنصح باش يسمع بودكاست و فيديوهات على اليوتيوب ، ولا باش ينظم افكار بالورقة و الستيلو....
كان خدمة الطبيب النفسي و الأخصائي النفسي تتلخص في الحاجات هذوما ، علاش مجعولين هوما و علاش قراو من اصلو 😒 أكيد موش باش الكوتش اللي قاعدين تنصحو بيه يعوضهم ، راهو الكوتشينغ حاجة متاحة للجميع ، أي انسان حتى ما عندوش مستوة دراسي يمشي يحضر دورة تدوم بضع ساعات مقسمة على 3/4 أيام مبعد ياخو attestation و يخرج يحل بيها cabinet و يسمي روحو مستشار نفسي، و ردو بالكم راهو موش diplôme اللي يتحصل عليه . أهم حاجة لازم أي انسان يعرفها هو أنو الكوتش يتعامل كان مع الاسوياء نفسيا ، الحلات المرضية تتوجه لأهل الإختصاص.

نصيحة من عندي كأخصائية نفسية ، ما تسمعش كلام اللي يقلك فما برشا بودكاست عاليوتيوب ، و ما تسمعش كلام اللي يقلك أبقى بينك و بين روحك و خوذ ورقة و ستيلو....ولا اللي يقلك ما تستحق حد تعلم حب روحك...
حد ما عاش اللي عشتو انت، و حد ماهو قاعد يعيش في بلاصتك ، و حد ماهو قاعد يحس فلي تحس فيه انت. إذا إنت وصلت خممت باش تمشي لطبيب نفسي و الا لأخصائي نفسي انا نقلك vas y, ما دامك خممت، معناها تستحق تمشي، معناها عندك تراكمات و ممكن حتى صدمات نفسية لازمك تتشافى منها و تحرر مشاعرك، عن تجربة في مهنتي ك psychologue سمعت برشا حكايات و برشا وجايع من عند برشا ناس، اللي سمعتو أنا تلقاه هو يبدو حكاه لصديق و لا لامو و لا لحد مالعايلة... و الجملة اللي ديما نسمعها "والله ارتحت، برغم اللي الشيء هذا حكيتو لفلان، برغم اللي كنت نفرغ قلبي في الكتيبة، برغم اللي ديما نسمع فيديوات و نتفرج في les coachs يحكيو..."
لكن الفرق هوني بين انك تحكي لانسان عادي و تحكي لمختص, هو أنو المختص باش يسمعك دون اصدار أحكام ، من غير ما يعطيك رايو، من غير ما يقلك أنا كان جيت في بلاصتك، احمد ربي و اغزر النعم اللي عطاهالك، شوف غيرك، بزي بربي مركبها بروحك راك ... و من غير ما يخليك تحس بالذنب.
بينما الانسان العادي باش تسمع من عندو هذوكم الكل و يزيد الطين بلة خاتر باش يخليك تحس بتأنيب الضمير و الذنب.
ما نحكيوش عاد عالورقة و الستيلو اللي وقت يبدى انسان متقلق نفسيا يزيدو يقلقوه و ممكن يخلقو عندو اظرابات نفسية....
و لا البودكاست و الفيديوهات ساعات يجوجمو الانسان و يخليوه يحس بالنقص و يقول بينو و بين روحو شبيني موش هكا...
خليو الناس تتوجه للي تحب هي من فضلكم 🙂
إن شاءالله ديما لباس

إيمان الشبوح
أخصائية نفسية

حكينا قبل على الطبيب النفسي و الأخصائي النفسي و le coach de vie و وضحنا الفرق بيناتهم، في المنشور هذا باش نحكيو بأكثر دقة على الكوتشينغ.
الكوتشينغ هو عبارة على صقل الفكر لدى الشخص المستفيد.
هو زادة حاجة تخليه يكتشف ذاته و يكون واعي بيها أكثر، و تخليه زادة يعرف قدراته و مهاراته بهدف تحسين آدائه، مضاعفة قدراته و إمكانياته الشخصية و المهنية، و حل المشكلات.
و هذا من خلال اثارة التفكير و توجيه الشخص عن طريق الأسئلة.
"الكوتشينغ هو مساعدة الناس على مساعدة انفسهم"

السؤال المطروح هو وقتاش نتوجه لل coach de vie ؟؟؟

في حالة:
~قلة وعي بالذات
~وجود تحديات و معيقات

إذا كنت ترغب في:
~تنظيم أفكارك
~تحديد الأهداف بدقة
~كتابة خطة شخصية تساعدك في تحسين آدائك على الصعيد الشخصي و المهني
~إتخاذ القرارات و الإختيار بين البدائل
~الرغبة في تسريع النتائج و تجويدها
~رفع الآداء و تحسينه
~زيادة الإنتاجية و النمو المستدام.

Deux studios à usage professionnel à louer
Chaque studio se compose de deux pièces et salle d'eau.
Les activités : médecin, dentiste, expert comptable, huissier, kinésithérapeute, bureau de société ect ....
Contact 55 228 753

قام المدرس بتوزيع 50 بالونة🎈 على 50 تلميذ
وطلب منهم أن ينفخوها، ثم طلب من كل تلميذ أن يكتب اسمه على البالونة، ثم جمع المدرس البالونات في غرفة صغيرة فملئتها، ثم طلب من كل تلميذ خلال خمس دقائق أن يجد البالون الذي يحمل اسمه.. !!

انتهت الخمس دقائق ولم يستطع أي تلميذ أن يجد بالونته

طلب منهم أن يأخذ كل تلميذ أي بالون و يعطيه لصاحب الاسم المكتوب على البالون فتمت العملية خلال دقيقة
واحدة.
وأصبح مع كل تلميذ البالون الذي يحمل اسمه
وأصبح الجميع سعداء ☺️

عندها قال المدرس: البالونات تمثل سعادتنا التي نبحث عنها.
عندما كنا نبحث عن سعادتنا فقط استحال علينا أن نجدها ولكن عندما قدمنا السعادة للآخرين منحونا السعادة وفرحنا جميعا.

امنحوا السعادة للآخرين.. تسعدوا ♥️⁩