08/10/2016
فمَ شاب صغير (18 سنة) اصيل المطوية, عبقري في الإعلامية حب يعبر على رايه بطريقته في الوضع المزري للصحة و للمستشفيات في الجنوب فإستعمل موهبته و اخترق موقع وزارة الصحة و بعث للوزير (السابق) برسالة "نسيتنا...ياخي الزوالي ماعنداش الحق في الصحة" (وهكذا نشر الخبر في ذلك الوقت : تعرّض اليوم الاحد 19 جوان 2016 موقع وزارة الصحة على الأنترنات لعملية قرصنة، وترك القراصنة رسالة موجّهة إلى وزير الصحة سعيد العايدي انتقدوا فيها ما اعتبروه تجاهلا و تهميشا للمؤسسات الصحية بالمناطق الداخلية، داعين إيّاه الى الالتفات الى هذه المناطق و العناية بها.)
السيد الوزير السابق تقلق... لا لا لا متفهمونيش بالغالط وتقولوا تقلق على الناس هذي ... تقلق كيفاش طفل صغير يقلو هكا وكيفاش نجَم يغلب المهندسين الي في الوزارة... هذاك علاش قرر ان يقوم بانجازات عظيمة لفائدة الجنوب ... ويقدم قضية بهذا الشاب الي قاعد يتحاكم توا !!!
سيدي الوزير عنا مستشفى جهوي واحد كانو يجوه تقريبا من الجنوب الكل و توا فيه اشغال قرابة 10 سنوات لين ستانسنا عدي في البريفي ولا اقعد هكاكا و هاك شفت في الفترة هذيكا المرا الي تمشي باش تولد تروَح في صندوق.
سيدي الوزير نعرفو الي عندك الجنسية الفرنسية ووقتلي تمشي تعدي في "باغي" تلقى كل شي باهي اما حاول تحس بينا ... في الدول الغربية وقتلي يلقو موهبة هكا يأطروها بش معادش تغلط وينتفعو من الامكانيات الي عنده وينتدبوه كان الزم كي يتخرج على خاطر يفوق المهندسين الي عندهم ... موش يحطوه في الحبس و يزيد ينقم على البلاد.
