01/10/2024
هذا مقال في شكل نصيحة وتوجيه باش الولي ينظم وقت صغيره خلال السنة الدراسية ويتفادى الضغط والجري و التلميذ خاصة يخدم مرتاح وهكه تكون نتائجه باهية
1- تنظيم الوقت : من الافكار الباهية و الي تساعد على تنظيم و ربح الوقت و أيضا التركيز هي الاعتماد على جدول أوقات العمل يحتوي على المواد الي باش يراجعها الصغير في الدار و الوقت المخصص للعب و التفرهيد و شوية تلفزة (ديما نذكروا ما نفوتوش 25 دق في أقصى الحالات ) و نجموا نشركوا الصغار في اعطاء افكارهم و الاوقات الي تساعدهم و بعد يتم الامضاء من طرف الولي و التلميذ باش يبقى كما العقد حتى طرف ما عنده الحق باش يخالفوا
2-الخدمة à jour كما كل عام تنفرجوا في التلفزة على المتفوقين في المناظرات الوطنية و كلمة السر الي تتعاود عندهم الكل هي "نخدم à jour" يعني التلميذ كيف يروح للدار يعاود يخدم الدرس الي شافو في نفس اليوم في الدار .
3-أهمية التلخيص ننصح الصغار باش كل نهار يعمل تلخيص صغير حتى بسطرين لكل مادة قراها في النهار هذا .مثلا اذا قرا ليوم حساب ايقاظ تاريخ و قواعد لغة في الليل يعمل تلخيص للايقاظ باستعمال الرسوم و يكتب قواعد الحساب مع تطبيق و الا اثنين و في مادة التاريخ يكتب اهم الاحداث و التاريخ متاعو قدامو بلون مميز و بالنسبة للغة يكتب القاعدة الي شافها مع مثال و الا زوز و هكه الصغير من ناحية يزيد يرسخ المعلومة في الذاكرة متاعو بطرق مختلفة (السمع النظر و الكتابة) و في فترة الامتحانات يكفي انه ياخو التلاخيص يقراهم لتنشيط الذاكرة و هكه نربحوا برشة وقت في المراجعة النهائية و الصغير يتخلص من الضغوطات و تبدا عنده ثقة في نفسه و في مكتسباته و يدخل قاعة القسم مرتاح وما نقعدوش نتجاراو من واحد الواحد باش يفهمنا الدرس ليلة الامتحان و الامهات على اعصابهم و تولي حالة طوارئ في الدار و يكثر التنرفيز على أقل كلمة و الا سوء تفاهم. مالا من ليوم الاولياء تحرص انه صغارها تراجع كل نهار و نهارو باش في الأخير نرتاحوا الناس لكل .
ان شاء الله بالتوفيق
هالةبن صادق
