Crèche Berceau magique Tunisie

قدّاش نحنا فخورات بمِهنتنا…
مربّيات أطفال… وفخورات برشة.
مهنة تشبه الضوء،
تعبها في الجسم كامل: ذهني، عقلي وجسدي، أمّا نورها يسكن القلوب ويخلّيها تدفى.
وقت اللي نكونوا مع صغيراتنا،
نحسّوا رواحنا نزرعوا فرحة في الأرض،نضحكوا معاهم،
نكبّروا أحلامهم بشوية بشوية،
وننساو التعب كيف نشوفوا عينيهم تلمع بالبراءة…
نعلّموهم أوّل خطوة،أوّل كلمة،
وأوّل معنى للحبّ والأمان…
نكونوا الحضن قبل ما يكونوا الكلمات،والقلب اللي يسمع حتى كان ما يتقال شي.
والأجمل شفناه اليوم،في خرجة مزيانة…
الدنيا الكل تحبّنا نكونوا قريبين منها،
وجوه تضحك، عيون تبارك،
وإيدين تتحلّ بحبّ لصغارنا.
وين ما نمشيو، الفرحة تمشي معانا،
بملائكة الرحمان…
يوصل يوقفك إنسان ويقولك:
“قدّاش نقدّركم ونقدّر خدمتكم، قداش نحترمكم …مالاّ إنسانية… ما أحلاكم!”
عباد ما نعرفوهمش يقرّبوا ويقولولنا:
“ربي يفضلكم يباركلكم و يقوّيكم… ما أحلاكم وما أحلاهم صغيراتكم.”
حتى السياّح، وبكل اللغات:
إيطالية، فرنسية، إنقليزية…
الي تواصلنا معاهم يبتسموا ويورّيو صغارهم فينا،بكل حب و بكل عفوية
كأننا صورة حبّها تتشاف و هنا سأصمت قليلا كلنا فخر و اعتزاز بالصورة الجميلة الي خليناها …
موش واحد، موش اثنين، موش ثلاثة…
هو مشهد صغير، أما يحكي حكاية كبيرة .
عباد تدعيلك من قلبها،
دعوة دافية تمسّ روحك قبل وذنك،
وترجّع فيك الرّوح.
ونرجعوا ديما نقولو:
التعب يوفى،أما الأثر يبقى…
في ضحكة طفل، وفي قلب يكبر وهو مطمّن.
هاذي موش خدمة أكهو،
هاذي رسالة نكتبوها كل نهار بصبر،
وتتقرا في عيون الصغار…
حبّ، أمان، وحياة.
مع حبي… أنيستي فريال و كامل الفريق التربوي لمحضنة المهد السحري💙