Departamento Saúde Anímal, UNTL

Vice Diretor DSA-UNTL, Drh. Alipio de Almeida sai nu’udar únika oradór iha semináriu sientífiku ida ne’ebé organizadu husi Instituto Politécnico de Timor-Leste iha Betano, Munisípiu Manufahi.
Iha okaziaun ida-ne’e, Drh. Alipio partilla ninia matenek no esperiénsia kona-ba aplikasaun téknolojia 𝐈𝐧𝐬𝐞𝐦𝐢𝐧𝐚𝐬𝐚𝐮𝐧 𝐀𝐫𝐭𝐢𝐟𝐢𝐬𝐢𝐚𝐥, ne’ebé importante atu mellora sistema reprodusaun no produsaun animal iha Timor-Leste.
Nu’udar espesialista iha área ida-ne’e, nia konsolida ona esperiénsia liuhusi tinan barak hanorin iha UNTL no mós liuhusi 𝑀𝑒𝑡𝑖𝑛𝑎𝑟𝑜 𝐵𝑟𝑒𝑒𝑑𝑖𝑛𝑔 𝐶𝑒𝑛𝑡𝑒𝑟, ne’ebé nia estabelese atu aplika téknolojia reprodutiva modernu hanesan dalan ida atu aumenta produsaun fahi iha Timor-Leste.

𝐒𝐄𝐑𝐈𝐌𝐎𝐍𝐈𝐀 𝐀𝐒𝐈𝐍𝐀𝐓𝐔𝐑𝐀 𝐊𝐎𝐍𝐓𝐑𝐀𝐓𝐔 𝐏𝐄𝐒𝐊𝐈𝐙𝐀 𝐇𝐎 𝐈𝐍𝐂𝐓

Ohin loraik, ekipa peskizador husi DSA-UNTL lideradu husi Abrao Pereira, ho Acacio Amaral, Adelaide Cristovão, Nicodemos Lonai, no alumnus Cristibela dos Santos, asina kontratu ba bolsu peskiza kompetitivu husi INCT.

Projetu ida-ne'e sei investiga 𝐁𝐨𝐯𝐢𝐧𝐞 𝐓𝐮𝐛𝐞𝐫𝐜𝐮𝐥𝐨𝐬𝐢𝐬 (𝐛𝐓𝐁) iha karau iha zona fronteira iha Bobonaro no Covalima.

𝐓𝐁 mak problema boot iha Timor-Leste – ita okupa pozisaun 𝟕º iha mundu ba taxa 𝐓𝐁 aas liu. Maibé ita seidauk hatene: kazu TB hira mak mai husi animal?

Iha nasaun sub-dezenvolvidu sira, ±𝟏𝟎% kazu 𝐓𝐁 ema mai husi 𝐛𝐓𝐁 iha karau. Maibé, Timor-Leste iha peskiza limitadu tebes kona-ba 𝐛𝐓𝐁. Nune’e, ho apoiu INCT, ami sei halo investigasaun atu:

✅ Determina prevalensia bTB iha karau
✅ Identifika fatór risku lig aba tranzmisaun 𝐛𝐓𝐁 ba ema

𝐓𝐁 iha ema + 𝐛𝐓𝐁 iha karau = problema ida ne'ebé tenke haree hamutuk. Ne'e mak One Health.

𝐒𝐞𝐥𝐞𝐛𝐫𝐚𝐬𝐚𝐮𝐧 𝐖𝐨𝐫𝐥𝐝 𝐕𝐞𝐭𝐞𝐫𝐢𝐧𝐚𝐫𝐲 𝐃𝐚𝐲 𝟐𝟎𝟐𝟔

Tradisionalmente, komunidade veterinária iha mundu tomak selebra 𝐖𝐨𝐫𝐥𝐝 𝐕𝐞𝐭𝐞𝐫𝐢𝐧𝐚𝐫𝐲 𝐃𝐚𝐲 iha semana ikus fulan Abril. Iha kontestu ida-ne’e, Departamentu Saúde Animal (DSA), UNTL organiza atividade selebratóriu ida horseik liuhusi Semináriu Nasional ho tema global: “𝐕𝐞𝐭𝐞𝐫𝐢𝐧𝐚́𝐫𝐢𝐮: 𝐆𝐮𝐚𝐫𝐝𝐢𝐚𝐮𝐧 𝐛𝐚 𝐀𝐢𝐡𝐚𝐧 𝐧𝐨 𝐒𝐚𝐮́𝐝𝐞.”

Semináriu ne’e fó oportunidade atu diskute no partilla kona-ba papél importante veterináriu sira iha ligasaun entre saúde animal, saúde públiku no seguransa aihan.
Iha semináriu ida-ne’e, ami honra atu simu oradór sira ne’ebé exsperiente mai husi instituisaun importante sira:

🎤 𝑑𝑟 𝑁𝑒𝑟𝑖 𝑀𝑎𝑐ℎ𝑎𝑑𝑜 – Epidemiolojista husi Instituto Nacional de Saúde Pública de Timor-Leste (INSPTL)
🎤 𝑆𝑟 𝐴𝑛𝑔𝑒𝑙𝑜 𝐵𝑒𝑙𝑜 – Diretór DPORAL husi Autoridade de Inspeção e Fiscalização da Atividade Económica, Sanitária e Alimentar (AIFAESA)
🎤 𝑑𝑟ℎ 𝐽𝑜𝑎𝑛𝑖𝑡𝑎 𝐽𝑜𝑛𝑔 – Diretóra Veterinária husi Ministério da Agricultura, Pecuária, Pesca e Florestas

Semináriu ne’e hetan partisipasaun husi dosente sira, estudante DSA, alumni paraveterinariu sira, no mos konvidadu sira seluk ne’ebé interesadu iha área saúde animal no saúde públiku.

Atividade hanesan ida-ne’e importante tebes atu haforsa kooperasaun entre setór sira no prepara jerasaun veterináriu foun atu kontribui ba saúde komunidade no seguransa ai-han iha Timor-Leste.




🐄🐕🌾

Estudante ativu sira no estudante foun periodu 2026, favor tuir guiaun ida-ne'e atu halo rejistu online.

Atu kuñese liután kona-ba 𝐃𝐞𝐩𝐚𝐫𝐭𝐚𝐦𝐞𝐧𝐭𝐮 𝐒𝐚𝐮́𝐝𝐞 𝐀𝐧𝐢𝐦𝐚́𝐥 (𝐃𝐒𝐀) iha Fakuldade Agrikultura, 𝐔𝐍𝐓𝐋 — iha-ne’ebé futuru profisionál paraveterináriu sira hetan formasaun liuhusi aprendizajen prátika, siénsia, no servisu ba komunidade sira iha Timor-Leste, 𝑐ℎ𝑒𝑐𝑘 BROXURA tuirmai:

💊 𝐀𝐈𝐌𝐎𝐑𝐔𝐊 = 𝐏𝐑𝐎𝐓𝐄𝐒𝐀𝐔𝐍 𝐊𝐀 𝐕𝐄𝐍𝐄𝐍𝐔?

Bainhira uza aimoruk, ita hotu hakarak halo di'ak ba individu ne'ebé ita fo aimoruk. Maibé iha área saúde animal, uza sala aimoruk bele lori risku boot.

Uza aimoruk ho loloos bele:

🐄 Ajuda trata moras
🐓 Halo animal rekopera lalais
👨‍👩‍👧 Proteje família nia saúde
💰 Asegura hakiak-na'in sira nia rendimentu

Maibé uza SALA bele sai VENENU no mos bele kauza:
⚠️ Rezisténsia antibiótiku
⚠️ Resídu aimoruk iha hahan (naan, susubeen, manu-tolun)
⚠️ Risku ba ema nia saúde

🚫 𝐋𝐚𝐛𝐞𝐥𝐞 𝐮𝐳𝐚 𝐚𝐢𝐦𝐨𝐫𝐮𝐤 𝐞𝐦𝐚 𝐧𝐢𝐚𝐧 𝐛𝐚 𝐚𝐧𝐢𝐦𝐚𝐥 𝐬𝐢𝐫𝐚. Di'ak liu, konsulta ho veterináriu ka tekniku veterináriu sira antes uza aimoruk, no halo tuir:

✔ Doze loos
✔ Durasaun tratamentu
✔ Períodu retirada (bainhira mak bele fa’an ka oho animal depoizde tratamentu)

📚 Poster edukativu ida-ne’e prepara husi grupu estudante sira iha Departamentu Saúde Animal, Fakultade Agrikultura – UNTL, nu’udar parte husi atividade aprendizajen iha matéria Farmakolojia Veterinária.

🤝 Mai hamutuk uza aimoruk ho responsabilidade atu proteje animal, proteje família, no asegura rendimentu agora no iha futuru.

𝐎𝐫𝐢𝐞𝐧𝐭𝐚𝐬𝐚𝐮𝐧 𝐄𝐬𝐭𝐮𝐝𝐚𝐧𝐭𝐞 𝐅𝐨𝐮𝐧 – 𝐃𝐞𝐩𝐚𝐫𝐭𝐚𝐦𝐞𝐧𝐭𝐮 𝐒𝐚𝐮́𝐝𝐞 𝐀𝐧𝐢𝐦𝐚𝐥, 𝐅𝐀𝐆𝐑𝐈-𝐔𝐍𝐓𝐋

Horseik, Departamentu Saúde Animal, Fakuldade Agrikultura (FAGRI-UNTL) realiza sesaun orientasaun ba estudante foun atu marka hahú jornada akadémika iha área saúde animal.

Iha sesaun ida-ne’e, estudante foun hamutuk 𝟒𝟖 partisipa, ho apoiu husi dosente balun no staff administrasaun iha DSA ne’ebé fó introdusaun kona-ba programa estudu, vida akadémika, no oportunidade sira iha departamentu.

Sesaun ne’e mos hetan vizita badak husi Reitór UNTL ho ninia ekipa ezekutivu, hamutuk ho Dekanu Fakuldade Agrikultura, ne’ebé mai fó motivasaun ba estudante sira atu aprende ho seriedade no prepara-an sai profisionál saúde animal iha futuru.

Benvindu ba estudante foun sira!

DSA nu’udar uma ba estudante sira ne’ebé iha paixaun ba saúde animal, produsaun animal no protesaun saúde públika. Iha ne’e, durante tinan 3, imi sei halo jornada transformasaun husi estudante ba paramédiku veterinária ne’ebé kompetente, responsavel no prontu atu servisu ba komunidade.

𝐒𝐞𝐬𝐚𝐮𝐧 𝐈𝐧𝐟𝐨𝐫𝐦𝐚𝐬𝐚𝐮𝐧 𝐤𝐨𝐧𝐚-𝐛𝐚 𝑨𝒖𝒔𝒕𝒓𝒂𝒍𝒊𝒂 𝑨𝒘𝒂𝒓𝒅𝒔 𝑺𝒄𝒉𝒐𝒍𝒂𝒓𝒔𝒉𝒊𝒑𝒔 𝐢𝐡𝐚 𝐅𝐀𝐆𝐑𝐈-𝐔𝐍𝐓𝐋

Ohin loron, estudante sira husi Departamentu Saúde Animal, Fakuldade Agrikultura (FAGRI-UNTL) partisipa sesaun informasaun kona-ba 𝑨𝒖𝒔𝒕𝒓𝒂𝒍𝒊𝒂 𝑨𝒘𝒂𝒓𝒅𝒔 𝑺𝒄𝒉𝒐𝒍𝒂𝒓𝒔𝒉𝒊𝒑𝒔, ne’ebé fasilita husi ekipa Australia Awards Timor-Leste iha salaun FAGRI nian iha Hera, Dili.

Sesaun ida-ne’e envolve partisipante >60 ne'ebe kompostu husi maioria estudante husi Saúde Animal, no mós estudante, staff, no alumni balun husi FAGRI, nu’udar kandidatu potensial ba bolsa estudu ne’e.

Durante sesaun, ekipa Australia Awards fahe informasaun kona-ba oportunidade estudu iha Austrália, prosesu aplikasaun no kriteriu selesaun, hodi ajuda estudante sira prepara-an atu hetan oportunidade estudu internasionál.

𝑨𝒖𝒔𝒕𝒓𝒂𝒍𝒊𝒂 𝑨𝒘𝒂𝒓𝒅𝒔 iha istória naruk iha investimentu ba Timor-Leste, liuhusi apoiu edukasaun no dezenvolvimentu rekursu umanu.

Ami agradese ba Australia Awards Timor-Leste tanba fó oportunidade ida-ne’e atu inspira no prepara estudante sira ba lideransa no kontribuisaun ba dezenvolvimentu setór saúde animal no agrikultura iha Timor-Leste.