Universidade Nacional Timor Lorosa'e

𝐔𝐍𝐓𝐋-𝐄𝐌𝐁𝐀𝐗𝐀𝐃𝐀 Í𝐍𝐃𝐈𝐀 𝐇𝐀𝐌𝐄𝐓𝐈𝐍 𝐊𝐎𝐎𝐏𝐄𝐑𝐀𝐒𝐀𝐔𝐍 𝐈𝐇𝐀 𝐃𝐄𝐙𝐄𝐍𝐕𝐎𝐋𝐕𝐈𝐌𝐄𝐍𝐓𝐔 𝐓𝐈𝐂

Universidade Nacional Timor Lorosa’e (UNTL) nia Magnífiku Reitór, Profesór Dr. Joviano António da Costa, M.Eng, enkontru ho Embaixador India, Mr. Mahendra Singh Patiyal, iha Videokonferénsia, UNTL (03/06).

Enkontru ne'e realiza ho objetivu atu hametin kooperasaun entre UNTL no Governu Índia, liuliu iha área TIC (Teknolojia Informasaun no Komunikasaun), liuhusi estabelesimentu Sentru TIC, fornesimentu ekipamentu teknolójiku no treinamentu ba formadór Timoroan sira.

Aleinde ne'e, foku mós espasu atu promove interkámbiu iha área edukasaun, kultura no komunikasaun, hodi hasa'e kapasidade rekursu umanu iha Timor-Leste liuliu dosente ho estudante.

Partisipa husi Proreitór ba Asuntu Kooperasaun (PRAC), Profesór Cristovão dos Reis, Ph.D, Proreitór ba Asuntu Informatizasaun Digital no Inovasaun (PRAITDI), Eng. Frederico Soares Cabral, M.Eng.; Vise-Dekanu I Faculdade de Engenharia, Ciência e Tecnologia (FECT), Mestre José Soares Pinto, no tékniku sira.

03 Juñu 2026

Media UNTL📝 Abrão do Rosário

Foto 📸 : Abrão do Rosário

𝐔𝐍𝐓𝐋-𝐑𝐓𝐓𝐋 𝐃𝐈𝐒𝐊𝐔𝐓𝐄 𝐊𝐎𝐍𝐓𝐈𝐍𝐔𝐈𝐃𝐀𝐃𝐄 𝐊𝐎𝐎𝐏𝐄𝐑𝐀𝐒𝐀𝐔𝐍 𝐁𝐀 𝐅𝐔𝐓𝐔𝐑𝐔

Universidade Nacional Timor Lorosa’e (UNTL), liuhusi Proreitór ba Asuntu Kooperasaun (PRAK), Profesór Dr. Cristovão dos Reis, ho Diretór Nasionál Informasaun no Atualidade Radio Televizaun Timor-Leste (RTTL) Horacio Afonso de Fátima Babo akompaña husi ekipa diskute kona-ba kontinuidadu kooperasaun.

Reuniaun ne’e lokaliza iha VideoKonferénsia, Díli (3/06), durante diskusaun foku ba programa no atividade sira ne’ebé bele inklui iha akordu kooperasaun atu reforsa servisu hamutuk no dezenvolve atividade sira iha área formasaun, komunikasaun, peskiza no edukasaun iha futuru.

Partisipa husi Diretora Instituto Nacional de Linguística, Profesora Rosa da Costa Tilman; Diretora Departamento de Comunicação Social, Dra. Constancia S. C. B. de Jesus, Profesora Dulce Da Silva Martins, Xefe Departamento Media e Comunicação UNTL Adelaide M. F. da Cunha, dosente DCS no ekipa tékniku sira.

03 Juñu 2026


Media UNTL📝 Agostinho da Cruz

Foto 📸 : Domingos Amaral

𝐔𝐍𝐓𝐋-𝐔𝐍𝐏𝐀𝐃 𝐃𝐄𝐒𝐊𝐔𝐓𝐈 𝐊𝐎𝐍𝐀-𝐁𝐀 𝐊𝐎𝐍𝐓𝐈𝐍𝐔𝐀𝐒𝐀𝐔𝐍 𝐊𝐎𝐎𝐏𝐄𝐑𝐀𝐒𝐀𝐔𝐍 𝐈𝐍𝐒𝐓𝐈𝐓𝐔𝐒𝐈𝐎𝐍Á𝐋

Universidade Nacional Timor Lorosa'e (UNTL) nia Magnífiku Reitór Profesór Dr. Joviano Antonio da Costa, M. Eng, ho Profesór Ir. Anas,M.Sc. Ph.D husi Universitas Padjajaran (UNPAD) deskute asuntu kontinuasaun kooperasaun institusionál, iha Videokonferénsia, Díli (03/04).

Sorumutu ne’e ho objetivu hodi deskuti kona-ba kontinuasaun kooperasaun institusionál ne'ebé durante ne'e la'o ona kona-ba sosializasaun bolsa-estudu iha grau mestradu ba funsionáriu no dosente sira.

Partisipa iha sorumutu ne'e Pró-Reitor Para os Assuntos de Cooperação Profesór Dr. Cristovão dos Reis, Ph.D, dosente no asistente tékniku sira.

03 Juñu 2026

Media UNTL📝 Natividade Siqueira (estajiária)

Foto 📸 : Domingos Amaral

𝐑𝐄𝐈𝐓Ó𝐑 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐒𝐄𝐋𝐄𝐁𝐑𝐀𝐒𝐀𝐔𝐍 𝐋𝐎𝐑𝐎𝐍 𝐍𝐀𝐒𝐈𝐎𝐍Á𝐋 𝐅𝐔𝐍𝐒𝐀𝐔𝐍 𝐏Ú𝐁𝐋𝐈𝐊𝐀

Universidade Nacional Timor Lorosa’e (UNTL) nia Magnífiku Reitór Profesór Dr. Joviano António da Costa, M.Eng, partisipa abertura jogu mini soccer hodi komemora Loron Nasional Funsaun Públika ne’ebé sei realiza iha 15 Jullu 2026.

Abertura ba jogu ne’e realiza iha Jardim Largo Lecidere, Díli (02/06), ho modalidade mini soccer , voleiból no basketból ne’ebé envolve husi instituisaun públiku, akadémiku no sosiedade sivíl, hodi valoriza no promove unidade nasionál.

Eventu ne’e organiza husi Provedor dos Direitos Humanos e Justiça (PDHJ) koopera ho Comição Anti Corupção (CAC) no Comição da Função Pública (CFP).

Iha jogu dahuluk ne'e, ekipa mane husi UNTL konsege halakon adversariu PDHJ ho Skor 6-1.

Partisipa husi Reprezentante Konsellu-Ministru, Secretario Estado Comunicação Social nian, S.E Expedito Loro Dias Ximenes, Provedor de Direitos Humanos e Justiça Sr. Virgílio da Silva Guterres “Lamukan”, Prezidente Comição da Função Pública nian, Sr. Agostinho Letêncio de Deus, funsionáriu konvidadu sira.

3 Juñu 2026

Media📝: Leonia de Araújo da Costa
Foto📷: João Freitas & Gelazio Gusmão (estajiáriu)

𝐔𝐍𝐓𝐋-𝐕𝐑𝐀𝐄 𝐄𝐍𝐒𝐄𝐑𝐀 𝐅𝐎𝐑𝐌𝐀𝐒𝐀𝐔𝐍 𝐃𝐄𝐙𝐄𝐍𝐕𝐎𝐋𝐕𝐈𝐌𝐄𝐍𝐓𝐔 𝐊𝐀𝐑𝐑𝐄𝐈𝐑𝐀

Universidade Nacional Timor Lorosa’e (UNTL) nia Vice-Reitora para os Asuntos Estudantis (VRAE) Profesora Bia Ble Hitu Carvalho de Jesus, halo enseramentu ba formasaun dezenvolvimentu karreira liuhusi Programa Youth Employment and Entrepreneurship Skills (YESS), iha Eskritóriu Biblioteka CLP, Díli (1/06).

Iha diskursu VRAE Profesora Bia Ble Hitu Carvalho de Jesus dehan, estudante iha vontade di’ak no badinas hodi kompleta formasaun ne’e tanba ne’e estudante sira bele aproveita ho di’ak ba opurtunidade ne’e.

“Ha’u espera imi bele aprende ho di’ak durante loron tolu (28 Maiu to’o 1 Juñu) ne’e. Imi hetan ona esperiénsia foun atu kapasita imi iha futuru no formasaun ida ne’e la hotu iha ne’e sei kontinua fali ba fakuldade sira seluk tanba ne’e imi ne’ebé partisipa ona bele fahe fali esperiensia ba imi-nia maluk sira”, Dehan VRAE.

Iha fatin hanesan fasilitadora Sra. Liria da Silva husi UNDP hatete, formasaun ne’e partilla kona-ba hakerek karta aplikasaun no kurrikulum vitae no oinsa atua aplika ba bolsu-estudu sira.

“Formasaun ida ne’e halo atu kapasita estudante sira hodi hasa’e abilidade atu oinsa hakerek karta aplikasaun no kurrikulum vitae, koñese sira-nia abilidade no molok atu aplika ba bolsa ka servisu sira. Espera imi bele aproveita di’ak, maske formasaun hotu ona buat ruma ne’ebé imi presiza bele kontaktu ami halo akompañamentu no fó apoiu nafatin”, Dehan Sra. Liria.

Formandu husi Faculdade Educação e Humanidades (FEH) Jacob Lemos hatete, formasaun ne’e tulun sira atu bele prepara aan ba futuru bele aplika iha vaga sira no bolsa hodi hasa’e kapasidade estudante sira-nia atu bele kontribui ba dezenvolvimentu nasaun nian.

“Ha’u sente kontente tebes, tanba bele partisipa iha formasaun ne’e hodi aprende di’ak liutan kona-ba oinsa hakerek CV no karta aplikasaun hodi aplika ba servisu no bolsa sira, liuliu tulun mós ami halo auto avaliasaun hodi identifika ami ida-idak nia abilidade no esperiensia sira ne’ebé mak ami iha nune’e bele konkore ba vagas ruma hili tuir buat ne’ebé ami iha ona”, Dehan Jacob.

2 Juñu 2026

Media📝: Laurindo da Cruz Gomes
Foto📷: Gelazio Gusmão & João Freitas

𝐃𝐈𝐉𝐈𝐓𝐀𝐋𝐈𝐙𝐀𝐒𝐀𝐔𝐍 𝐇𝐀𝐃𝐈𝐀 𝐄𝐅𝐈𝐒𝐈𝐄́𝐍𝐒𝐈𝐀 𝐉𝐄𝐒𝐓𝐀𝐔𝐍 𝐏𝐀𝐓𝐑𝐈𝐌𝐎́𝐍𝐈𝐔 𝐈𝐇𝐀 𝐔𝐍𝐓𝐋

Universidade Nacional Timor Lorosa’e (UNTL), liuhusi Diresaun Nasionál Lojístika no Manutensaun (DNLM), nia Xefe Departamentu Patrimóniu no Bens, João Bosco Vilanova , hatete katak dijitalizasaun Sistema Gestão Património (SGP) fasilita tebes prosesu rejistu, verifikasaun no atualizasaun dadus ho efisiente, lalais no transparente liu.

“Antes ne’e ita uza sistema manuál, prosesu buka dadus no halo kontrolu la fasil. Agora, liuhusi dijitalizasaun ne’e, ami bele jere no kontrola dadus ho efisiente liu. Sistema ne’e fasilita ami atu prepara relatóriu anual no relatóriu ba períodu tinan lima. Aleinde ne’e, sistema ne’e mós ajuda tebes iha área lojístika, liuliu ba jestaun kombustível, monitorizasaun utilizasaun sasan no rejistu dadus sira ne’ebé bele asesu no akompaña diretamente iha SGP”, hatete João Bosco iha Kampus Sentral, Díli (22/06).

Xefe Departamentu Patrimóniu no Bens ne’e hatutan katak, dadus ne’ebé utiliza atu rejista ba sistema bazeia ba lista Receiving and Inspection Report (RIR) ne’ebé utiliza husi Ministériu Finansas.

“Dadus hotu-hotu ne’ebé rejista iha sistema bazeia ba formatu RIR, nune’e informasaun sira tama tuir padraun no prosedimentu ne’ebé estabelese ona. Dezafiu prinsipál ne’ebé Departamentu Patrimóniu no Bens hasoru durante implementasaun sistema ne’e mak limitasaun rekursu no asesu ba liña internet ne’ebé seidauk estável,” hatutan Bosco.

Sistema Gestão Património (SGP) ne’e instala husi Gabinete Pro-Reitór ba Asuntu Informatizasaun, Transformasaun Dijitál no Inovasaun (PRAITDI), no lansa ofisialmente iha loron 13 Marsu 2024.

02 Juñu 2026
Media📝: Gelagio Gusmão
Foto📷: Foto: Agostinho da Cruz & Arkivu Departamentu Patrimóniu no Bens

𝐔𝐍𝐓𝐋-𝐅𝐎𝐊𝐔𝐏𝐄𝐑𝐒 𝐇𝐀𝐋𝐀’𝐎 𝐒𝐄𝐍𝐒𝐈𝐁𝐈𝐋𝐈𝐙𝐀𝐒𝐀𝐔𝐍 "𝐊𝐀𝐌𝐏𝐔𝐒 𝐒𝐄𝐆𝐔𝐑𝐔 & 𝐉𝐄́𝐍𝐄𝐑𝐔 𝐁𝐀 𝐄𝐒𝐓𝐔𝐃𝐀𝐍𝐓𝐄 𝐅𝐂𝐒𝐏

Universidade Nasional Timor Lorosa'e (UNTL) liuhusi Gabinete Vice-Reitóra para os Assuntos Estudantís (VRAE) servisu hamutuk ho Centro Estudo de Género (CEG), ho FOKUPERS (Forum Komunikasaun ba Feto Timor-Leste), hala’o sensibilizasaun kona-ba kampus seguru no violénsia bazeia ba jéneru ba estudante Faculdade de Ciências Sociais e Políticas (FCSP).

Iha diskursu VRAE Profesora Bia Ble Hitu Carvalho de Jesus hateten, kampaña sensibilizasaun ne’e hodi bele garante estudante sira hotu hala’o estudu livre husi asédiu sexual no violénsia bazeia ba jéneru.

"Atividade ne’e halo atu prevene kazu asédiu seksual no violénsia bazeia ba jéneru no ida-ne’e sai hanesan responsabilidade husi komunidade akadémika tomak nian, tanba ne’e, parte hotu-hotu tenke kontinua promove ambiente ne’ebé seguru, respeitu malu, livre husi violénsia, laiha diskriminasaun no ita hotu la tolera asédiu seksual no violénsia iha kampus", Dehan VRAE iha Auditórium FCSP Caicoli, Dili (29/05).

Iha fatin hanesan Diretora CEG Professora Dulce Martins da Silva hateten, igualdade jéneru no protesaun ba dignidade humana sai hanesan baze importante ba exelénsia akadémika no dezenvolvimentu sosiál.

"Ami kompromete atu hametin polítika sensibilizasaun no mekanizmu apoiu sira ne'e hodi proteze vítima sira no promove respeitu, responsabilidade iha komunidade universitáriu nia laran no ami mós enkoraza partisipante hotu atu envolve an ativamente iha diskusaun ne’e hodi fahe ideia atu aprende ba malu hodi sai embaixadór ba kultura universitáriu ida ne’ebé seguru no valorizadu, protezidu no iha kapasidade atu konfia aan”, Dehan Profesora Dulce.

Diretora FOKUPERS Sra. Domingas Afonso Amaral hateten, atividade ba estudante sira bele aprende hodi kombate ba hahalok asédiu sira iha kampus atu bele livre hodi hala’o estudu iha universidade.

"Atividade ne’e fó oportunidade ba ema hotu ne’ebé iha interese no vontade atu kontribui diretamente liuhusi servisu hamutuk, troka hanoin no diskusaun konstrutivu atu bele muda karater ema nian husi hahalok sira. Espera katak relasaun entre estudante, dosente no bele sai forte liután no kontribui ba dezenvolvimentu akadémiku no sosiál iha ambiente universitáriu", Dehan Diretora FOKUPERS.

Atividade ne’e realiza tanba servisu hamutuk GVRAE ho Centro Estudo de Género, FOKUPERS no hetan apoiu husi Gabinete de Apoio Sociadade Civíl (GASC). Enkuantu formasaun fasilita husi Asosiasaun Juventude Hakbiit Justisa Timor Leste (AJHJ-TL).

2 Juñu 2026

Media📝: Regina Martins (estajiária)
Foto📷: Laurindo da Cruz Gomes

𝐔𝐍𝐓𝐋-𝐅𝐌𝐂𝐒 𝐑𝐄𝐀𝐋𝐈𝐙𝐀 𝐖𝐎𝐑𝐊𝐒𝐇𝐎𝐏 𝐅𝐎𝐊𝐔 𝐁𝐀 𝐂𝐇𝐈𝐑𝐎𝐏𝐑𝐀𝐂𝐓𝐈𝐂

Universidade Nacional Timor Lorosa’e (UNTL) nia Faculdade de Medicina e Ciência da Saúde (FMCS) servisu hamutuk ho parseiru sira hodi realiza Workshop hodi foku ba Chiropractic ho tema “Fortalecimento da Capacidade dos Recursos Humanos na Área de Reabilitação e Promoção da Educação, e Investigação e Serviço em Chiropratic em Timor-Leste”.

Magnífiku Reitór Profesór Dr. Joviano António da Costa, M.Eng, iha diskursu apresia ba Chiropratic ne’e hanesan parte ida husi reabilitasaun saúde no kuidadu saúde, husi Workshop ne’e importante tebes tanba bele kapasita estudante sira kona-ba reabilitasaun ba pasiente sira-nia saúde.

“Espera husi workshop ne’e bele haforsa kooperasaun ho parseiru sira iha peskiza no kapasitasaun no treinamentu klinikal no servisu ba komunidade sira”, dehan Reitór iha Workshop Akadémiku ba Chiropratica, iha Salaun Pusat Budaya Indonesia, Díli (1/06).

Dekana FMCS nian, Dra. Lídia Gomes hatete, objetivu husi workshop ne’e, atu loke diskusaun akadémiku ho parseiru internasional sira, nune’e tulun estudante sira atu bele komprende diak kona-ba edukasaun saúde nian no oinsa fortalese sistema saúde iha futuru.

“Ohin ita realiza Workshop ne’e nu’udar dialogu akadémiku ho parseiru sira, tanba ita presiza explora esperiensia internasional sira, hodi prepara no fortalese sistema saúde ida di’ak iha futuru” dehan Dekana FMCS.

Partisipa husi Reprezentante Organizasaun Saúde Mundial iha Timor Leste nian, Dr. Arvhin Mathur, Diretór Policlinica Universitaria UNTL nian, Dr. Artur Natalino Corte Real, dosente, estudante no konvidadu internasional no nasionál sira.

1 Juñu 2026

Média UNTL 📝: Leonia de Araújo da Costa
Foto 📸: Valeria da Costa (estajiária)

𝐑𝐄𝐈𝐓Ó𝐑 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐈𝐍𝐀𝐆𝐔𝐑𝐀𝐒𝐀𝐔𝐍 𝐆𝐑𝐔𝐓𝐀 𝐃𝐎𝐑𝐌𝐈𝐓Ó𝐑𝐈𝐔 𝐅𝐄𝐂𝐓

Universidade Nacional Timor Lorosa'e (UNTL), nia Magnífiku Reitór Profesór Dr. Joviano António da Costa, M.Eng, hamutuk ho estrutura Faculdade de Engenharia Ciência e Tecnologia (FECT), halo inagurasaun ba rehabilitasaun Gruta Nossa Senhora Maria Auxiliadora nu'udar mahein ba Dormitóriu FECT nian.

Iha diskursu Magnífiku Reitór, agradese ba FECT liuliu ba dekanu ho estrutura, senadu fakuldade no estudante sira, liuhusi amizade apoiu malu ho orasaun bele halo reabilitasaun ba Gruta Na'in Feto nian.

"Fakuldade Enjeñaria la'ós aprende de'it siénsia, maibé tenki hola parte mós iha atividade relijiozu no hasa'e orasaun no agradese ba Maromak", Dehan Reitór iha Kampus FECT-Hera, Díli (31/05).

Iha sorin seluk, Prezidente Asosiasaun Interinu AAE-FECT, Pio Jackelly de Jesus hatete, inagurasaun ne'e hanesan testamuña ba servisu hamutuk, unidade no domin ne'ebé liuhusi inisiativa furak husi estudante rezidente sira hatudu, hodi konstrui no halo rehabilitasaun ba moru protesaun ba Gruta Na'in Feto nian.

"Inagurasaun ba gruta ne'e hanesan testamuña ba ita-nia servisu hamutuk entre dosente no estudante sira, no espera liuhusi gruta ne'e ita bele hametin liután fiar no fé ba Maromak, hodi bele hasa'e orasaun. Ha'u mós hato'o agradese ba parte hotu ba apoiu moral, finansial no material sira”, dehan.

Partisipa iha serimónia ne'e, Dekanu FECT, Profesór Adalfredo Ximenes, Estrutura FECT, Dosente, Funsionáriu no Estudante sira.

01 Juñu 2026

Média UNTL 📝: Denilson Amandio Barros
Foto 📸: Nelvio Freitas da Silva & Cedelisio da Silva (estudante FECT)