16/07/2026
Tokiwa Campus, Ube-shi, Yamaguchi Prefecture, 14 Jullu 2026.
Magnífico Reitor UNTL, Prof. Dr. JOVIANO António da Costa ho delegasaun vizita Yamaguchi University (YU) iha Japaun.
Delegasaun kompostu husi Magnífico Reitor, Pro Reitor Asuntu Kooperasaun nian, Prof. Dr. CRISTOVÃO dos Reis, Dekano FECT, Prof. ADALFREDO G. da Costa Ximenes, Asistente Adminstrasaun ba Gabinete Reitoria, Sra. FATMAWATI Piliang, no Project Coordinator JICA nian iha FECT, Sr. Kenichiro KOMATSU.
Iha vizita nee, Magnifico Reitor ho delegasaun hasoru malu ho nia homólogu President of YU, Dekanu Fakuldade Enjeñaria no Inovasaun Teknolojia-YU, Diretur Departamentu Enjiñaria Sivil no Ambiente-YU. Inklui mos hasoru malu ho professor sira husi YU ne'ebé envolve iha JICA-Japan collaborating universities program.
Objetivu husi vizita nee, atu hato'o agradesimentu direita ho funan wa'in ba kooperasaun no kolaborasaun ne'ebé liu ona tinan 20 resin no sei kontinua to'o ohin loron. No mós hodi hare tan aréa pontensial sira seluk ne'ebé sei inklui iha kooperasaun sira tuir mai. No ikus liu,
hodi hare besik situasaun real iha Kampus YU núdar parseiru prinsipal ba Departamentu Enjeñaria Sivìl-UNTL nian. Tamba ho sira nia tulun mak Departamentu Enjiñaria Sivíl sai úniku no primeira Departamentu iha UNTL ne'ebé hetan akreditasauan A husi ANAAA, Timor-Leste.
Iha vizita ida nee mos realiza sorumutu entre delegasaun ho staff UNTL sira ne'ebé dadaun halo hela treinamentu ba kurtu no longu prazu nian, inklui mos Estudante Timor-oan sira ne'ebé estuda hela iha YU.
Atividade refere, konklui ho jantar hamutuk entre professor sira husi YU, delegasaun UNTL, hamutuk ho staff UNTL no Estudante Timor-oan sira.
Visita ida ne'e realiza tamba suporta husi JICA no UNTL.
