UNPAZ MEDIA Center, timor leste, Dili (2026)

19/08/2026

𝐔𝐍𝐏𝐀𝐙 𝐇𝐎 𝐁𝐍𝐂𝐓𝐋 𝐒𝐄𝐋𝐄𝐁𝐑𝐀 𝐀𝐊𝐎𝐑𝐃𝐔 𝐀𝐒𝐄𝐒𝐔 𝐁𝐀 𝐒𝐄𝐑𝐕𝐈𝐒𝐔 𝐍𝐎 𝐏𝐑𝐎𝐃𝐔𝐓𝐔 𝐈𝐇𝐀 𝐁𝐍𝐂𝐓𝐋

Dili, 18 Agustu 2026 — Universidade da Paz (UNPAZ) selebra ofisialmente akordu ho Banco Nacional de Comércio de Timor-Leste (BNCTL) kona-ba asesu ba servisu no produto iha BNCTL. Akordu ne'e asina direta husi Magnífiku Reitór UNPAZ, Dr. Adolmando Soares Amaral, Lic. Eco., MM, ho Diretór Divizaun Kreditu BNCTL, Alcino Monteiro, iha Salaun Reuniaun Prof. Rama Metan, Lantai III.

Objetivu prinsipál husi akordu ne'e mak atu fasilita Universidade da Paz nia asesu ba servisu no produtu ne'ebé BNCTL sei oferese, hodi haforsa kapasidade finanseira no sustentabilidade institusaun nian.

Iha ninia intervensaun, Magnífiku Reitór esplika katak molok to'o momentu ida ne'e, UNPAZ ho BNCTL kolabora ona durante tempu naruk. Maibé, ho asinatura akordu ohin loron, ofisialmente BNCTL sai parseria estratéjiku no importante tebes ba Universidade da Paz.

Nia realsa mós katak dokumentu ne'ebé asina entre UNPAZ ho BNCTL hetan testemuña husi estrutura tomak, hodi asumi responsabilidade ba oin no garante nafatin sustentabilidade parseria ne'e nian.

Serimónia asinatura ne'e akompaña husi Senadu Universidade no Senadu Fakuldade, Diretór no Xefe Unidade sira hotu husi Universidade da Paz, no Komisaun Ezekutivu BNCTL ne'ebé sai testemuña ba momentu istóriku ne'e.

-UNPAZ #

18/08/2026

𝐔𝐍𝐏𝐀𝐙 𝐊𝐎𝐍𝐕𝐎𝐊𝐀 𝐑𝐄𝐔𝐍𝐈𝐀𝐔𝐍 𝐄𝐒𝐓𝐑𝐔𝐓𝐔𝐑𝐀́𝐋 𝐇𝐎 𝐒𝐄𝐍𝐀𝐃𝐔 𝐔𝐍𝐈𝐕𝐄𝐑𝐒𝐈𝐃𝐀𝐃𝐄 𝐍𝐎 𝐅𝐀𝐊𝐔𝐋𝐃𝐀𝐃𝐄

Dili, 18 Agustu 2026 — Universidade da Paz (UNPAZ), liuhusi Gabinete Reitoria, realiza reuniaun importante ne'ebé estrutura Senadu Universidade, Senadu Fakuldade, Diretór no Xefe Unidade sira. Reuniaun ne'e lidera direta husi Magnífiku Reitór UNPAZ, Dr. Adolmando Soares Amaral, Lic. Eco., MM, iha Salaun Reuniaun Prof. Rama Metan, Lantai III.

Reuniaun ne'e hala'o ho objetivu prinsipál tolu ne'ebé importante tebes ba dezenvolvimentu institusionál no akadémiku UNPAZ nian.

Premeiru, Magnífiku Reitór esplika kona-ba planu UNPAZ atu asesu kreditu ka impréstimu husi Banco Nacional de Comércio de Timor-Leste (BNCTL), hodi haforsa kapasidade finanseira no sustentabilidade institusaun nian.

Segundo, nia fó atualizasaun kona-ba prosesu aprendizajen iha semestre 2, 4, no 8, atu asegura kualidade ensinu-aprendizajen nafatin la'o tuir planu ne'ebé mak define ona.

Terseiru, nia mós ko'alia kona-ba situasaun funsionáriu no dosente sira ne'ebé foti lisensa ba asuntu família, no buka hamutuk solusaun ne'ebé apropriadu tuir nesesidade ida-idak nian.

Liuhusi reuniaun ne'e, lideransa UNPAZ hakarak reforsa koordenasaun no komunikasaun entre estrutura universitária sira, hodi haforsa jestaun institusionál no kualidade akadémiku.

-UNPAZ #

17/08/2026

𝐄𝐒𝐓𝐔𝐃𝐀𝐍𝐓𝐄 𝐂𝐀𝐍𝐎𝐒𝐀 𝐅𝐀𝐒𝐈𝐋𝐈𝐓𝐀 𝐅𝐎𝐑𝐌𝐀𝐒𝐀𝐔𝐍 𝐁𝐀 𝐄𝐒𝐓𝐔𝐃𝐀𝐍𝐓𝐄 𝐒𝐈𝐑𝐀 𝐈𝐇𝐀 𝐔𝐍𝐏𝐀𝐙 𝐂𝐎𝐕𝐀𝐋𝐈𝐌𝐀

Covalima, 17 Agostu 2026 — Universidade da Paz (UNPAZ), liuhusi Klase Normal Munisípiu Covalima, realiza programa formasaun rua ba estudante sira, ho objetivu atu hakle’an konesimentu no kapasidade estudante sira iha era digitalizasaun ohin loron.

Programa formasaun rua ne’e kompostu husi Formasaun Komputador Báziku, Internet Saudável, Inteligénsia Artifisiál (AI) no Kursu Língua Inglesa, nível Báziku Intermediáriu. Programa ne’e fó oportunidade ba estudante sira atu aumenta konesimentu no abilidade ne’ebé relevante ba nesesidade edukasaun no merkadu servisu iha futuru.

Diretor UNPAZ Klase Normal Munisípiu Covalima, Silvester Ferreira, Lic. Eco., MG. MM, iha nia intervensaun, hato’o agradese wa’in ba fasilitadór sira husi estudante estajiáriu CANOSA (IPDC) ne’ebé hili UNPAZ Covalima nu’udar fatin atu fahe konesimentu no esperiénsia, liuliu iha área Komputador Báziku, Internet Saudável no Inteligénsia Artifisiál.

Nia enfatiza katak, dezenvolvimentu konesimentu iha siénsia no teknolojia la bele para. Aprende liuhusi prosesu formal iha instituisaun edukasaun importante tebes, maibé estudante sira mós presiza kontinua hakle’an konesimentu iha área sira seluk ne’ebé relevante, hanesan teknolojia informasaun, komputador no Língua Inglesa.

“Iha tempu agora, estudante sira tenke badinas aprende no tenke aprende barak, atu labele sai vítima iha futuru,” dehan Diretor UNPAZ Covalima, hodi enkoraja estudante sira atu aproveita oportunidade formasaun ne’e.

Iha okaziaun hanesan, Diretor UNPAZ Covalima hato’o mós agradese wa’in ba Reverenda Madre Emelita M. J. Lopes, SOM, husi Congregasaun Irmãs da Misericórdia, tanba nia vontade diak no kontribuisaun hodi haboot no dezenvolve Kampus UNPAZ Covalima, liuhusi fahe esperiénsia no konesimentu iha área Língua Inglesa.

Diretor UNPAZ Covalima husu ba estudante sira atu aproveita didi’ak oportunidade ne’ebé iha, tanba tempu no oportunidade aprendizajen tenke uza ho responsabilidade hodi prepara an ba futuru. Iha momentu ne’e, Diretor UNPAZ Covalima mós halo abertura ofisiál ba programa formasaun rua refere.

Iha sorin seluk, Reverenda Madre Emelita M. J. Lopes, SOM, nu’udar formadora Língua Inglesa, hato’o mensajen ba participante sira katak kooperasaun importante tebes atu atinje objetivu hamutuk.

“Bainhira ita hotu iha kooperasaun diak, ita bele atinje mehi hotu ne’ebé ita hakarak,” dehan Reverenda Madre Emelita.

Enkuantu ne’e, Responsável Estudante Estajiáriu IPDC, Lucas Gusmão do Nascimento, hato’o agradese wa’in ba UNPAZ Covalima tanba fó oportunidade ba estudante estajiáriu sira atu fasilita formasaun kona-ba Komputador Báziku, Internet Saudável no Inteligénsia Artifisiál.

Nia esplika katak, iha era digital ohin loron, estudante sira presiza kompriende no uza teknolojia ho responsabilidade. Internet Saudável signifika katak, bainhira ema asesu ba internet, tenke iha kapasidade atu identifika, kompriende no uza informasaun ne’ebé saudável no útil, no evita kontéudu ne’ebé bele prejudika an no komunidade.

Lucas Gusmão do Nascimento mós informa katak, iha futuru, liuhusi programa ne’e, sei iha atividade sira seluk, inklui semináriu ne’ebé sei konvida estudante sira husi eskola sekundária sira atu partisipa, hodi aumenta asesu ba konesimentu no preparasaun digital ba jerasaun jovem.

Programa formasaun ne’e espera bele sai parte ida husi esforsu UNPAZ Covalima no estudante CANOSA/IPDC hodi promove aprendizajen kontínua, dezenvolvimentu kapasidade no preparasaun estudante sira atu enfrenta dezafiu iha era digitalizasaun.

-UNPAZ #

17/08/2026

Job Vacancy:

As we are now preparing to expand our business activities in Timor-Leste, we are looking for a capable local staff member who can work closely with us and support our operations.

We would greatly appreciate it if UNPAZ could introduce suitable graduates who are currently looking for employment or interested in a new career opportunity.

We are particularly looking for candidates with the following qualifications:

* Graduate of UNPAZ
* Good English communication skills
* Proactive and able to work independently
* Positive, motivated, and willing to take on new challenges
* Female
* 25 years old or above
* Single
* Currently looking for employment or interested in a new job opportunity

We are not only looking at previous work experience. More importantly, we are looking for someone who is proactive, responsible, energetic, and willing to take initiative.

If you know any graduates who may meet these conditions, we would greatly appreciate the opportunity to interview them.

We are planning to develop our business activities in Timor-Leste on a long-term basis, and we hope to find someone who can eventually become a key member of our local team.

We would be very grateful if the University could recommend suitable graduates to us.

15/08/2026

𝐔𝐍𝐏𝐀𝐙 𝐂𝐎𝐕𝐀𝐋𝐈𝐌𝐀 𝐊𝐎𝐍𝐓𝐈𝐍𝐔𝐀 𝐒𝐎𝐒𝐈𝐀𝐋𝐈𝐙𝐀 𝐈𝐍𝐅𝐎𝐑𝐌𝐀𝐒𝐀𝐔𝐍 𝐁𝐀 𝐅𝐈𝐍𝐀𝐋𝐈𝐒𝐓𝐀 𝐄𝐒𝐊𝐎𝐋𝐀 𝐂𝐑𝐈𝐒𝐓𝐀𝐋 𝐃𝐄 𝐒𝐔𝐀𝐈

Covalima, 15 de Agostu de 2026 — Universidade da Paz (UNPAZ) Klase Normal Munisípiu Covalima, liuhusi ekipa Komisaun Organizadora, kontinua hala’o atividade sosializasaun informasaun ba estudante finalista husi Eskola CRISTAL de Suai.

Atividade ne’e nu’udar parte husi esforsu UNPAZ Covalima hodi fahe informasaun kona-ba oportunidade kontínua estudu iha ensinu superior, liuliu ba estudante finalista sira ne’ebé besik remata sira-nia estudu sekundáriu.

Reprezenta Komisaun Organizadora, Artur Aquino Flores, Lic. Eco., iha ninia intervensaun, hato’o agradesimentu ba Diretor UNPAZ Klase Normal Munisípiu Covalima, Silvester Ferreira, Lic. Eco., MG.MM, tanba fó autorizasaun no apoiu ba realizasaun atividade sosializasaun refere.

Nia mós hato’o agradesimentu ba Diretor Eskola CRISTAL de Suai, Goaldino dos Santos Pereira, Lic. Eco., M.Ed., hamutuk ho estrutura eskola tomak, ne’ebé fó biban no apoiu ba Komisaun Organizadora UNPAZ Covalima hodi hala’o atividade sosializasaun ba kandidatu estudante foun.

Objetivu prinsipál husi atividade ne’e mak atu sosializa no fahe informasaun kona-ba ezisténsia no dezenvolvimentu UNPAZ Klase Normal Munisípiu Covalima, ne’ebé hahú ona husi tinan 2007 to’o ohin loron. Liuhusi atividade ne’e, estudante finalista sira hetan oportunidade atu hatene liután kona-ba UNPAZ Covalima no oportunidade atu kontinua sira-nia estudu ba nível ensinu superior iha sira-nia munisípiu rasik.

Konseitu “Kontinua Estudu iha Covalima” iha razaun fundamentál ida, mak UNPAZ hakbesik ba sosiedade Covalima no bele ajuda inan-aman sira hodi hamenus despeza no gastu ne’ebé normalmente presiza bainhira oan sira tenki ba Dili atu kontinua estudu.

Iha parte seluk, molok atividade hahú, Diretor Eskola CRISTAL de Suai halo abertura no iha ninia intervensaun hateten katak, sira mak parte husi estudante sira ne’ebé hahú estudu iha UNPAZ Covalima bainhira kampus ne’e foin loke. Iha tempu ne’ebá, kondisaun no situasaun sei difísil, maibé ho lideransa no matenek husi Prof. Dr. Lucas da Costa, SE., MSi, nu’udar Reitor primeiru, UNPAZ Covalima bele kontinua eziste no dezenvolve to’o ohin loron.

Nia mós refere katak, UNPAZ ohin loron kontinua lidera husi Magnífiku Reitor atual, Dr. Adolmando Soares Amaral, Lic. Eco., MM., no kontinua fó oportunidade ba juventude Covalima atu hetan ensinu superior besik ba sira-nia família no komunidade.

Diretor Eskola CRISTAL de Suai mós husu atensaun ba estudante finalista sira atu, depois de remata sira-nia estudu sekundáriu, konsidera UNPAZ Covalima hanesan ida husi opsaun atu kontinua sira-nia estudu superior.

Reprezenta estudante sira, Madre Emelita M. J. Lopes, nu’udar estudante atual husi Fakuldade Saúde Públika, Departamentu Saúde Públika, hateten katak kontinua estudu iha UNPAZ Covalima bele ajuda inan-aman sira, liuliu iha aspetu gastu no despeza, kompara ho estudante sira ne’ebé tenki ba Dili.

Enkuantu Albina Ferreira, Lic. Sp., halo komparasaun kona-ba kustu estudu iha Dili no Covalima. Tuir nia, bainhira estudante ba Dili, la’ós de’it propina eskola mak presiza selu, maibé mós tenki konsidera kustu kos, transporte, bemo no nesesidade seluk. Tanba ne’e, kontinua estudu iha UNPAZ Covalima bele sai alternativa ne’ebé diak atu ajuda hamenus todan ekonomia ba família.

Vice-Senadu UNPAZ Covalima, Januario Maia, nu’udar estudante ativu Fakuldade Ekonomia, Departamentu Jestaun, Semester VI, reforsa katak edukasaun importante tebes ba futuru.

Nia hato’o mensajen ba estudante finalista sira, liuliu ba juventude Covalima, katak: “Hanesan Covalima oan, ita mak tenki kontribui no ita mak tenki eskola hodi haboot Kampus UNPAZ Covalima.” Tuir nia, estudu iha UNPAZ Covalima permite estudante sira kontinua sira-nia edukasaun sem lakon buat barak, hanesan oportunidade servisu, tempu ho família no relasaun ho komunidade.

Iha ikus, reprezentante Komisaun Organizadora hato’o agradesimentu ba parte Eskola CRISTAL de Suai no estudante sira hotu tanba kooperasaun diak ne’ebé permite atividade sosializasaun ne’e lao ho susesu.

Iha enseramentu, Diretor Eskola CRISTAL de Suai hato’o mós agradesimentu ba UNPAZ Covalima tanba bele mai fahe informasaun kona-ba oportunidade ba estudante sira atu, depois de remata ensinu sekundáriu, kontinua sira-nia estudu iha UNPAZ Covalima.

Nia mós hato’o mensajen importante ba estudante sira: “Sukat o nia moris husi o nia inan-aman nia moris.” Mensajen ne’e sai hanesan apelu ba estudante sira atu konsidera situasaun no kondisaun ekonomia família bainhira hili fatin atu kontinua estudu, no konsidera UNPAZ Covalima nu’udar alternativa ne’ebé bele ajuda hamenus todan ba inan-aman.

Programa tuir mai sei hala’o atividade desportiva, inklui jogu futsal mane no feto, no volleyball mane no feto, nu’udar jogu amizade entre parte rua. Atividade desportiva ne’e sei sai meiu ida atu haforsa liután lasu amizade, kooperasaun no relasaun diak entre UNPAZ Covalima ho Eskola CRISTAL de Suai, ba ohin no ba futuru.

-UNPAZ #

15/08/2026

𝐔𝐍𝐏𝐀𝐙 𝐑𝐄𝐀𝐋𝐈𝐙𝐀 𝐀𝐁𝐄𝐑𝐓𝐔𝐑𝐀 𝐄𝐙𝐀𝐌𝐄 𝐏𝐑𝐎𝐆𝐑𝐀𝐌𝐀 𝐌𝐄𝐒𝐓𝐑𝐀𝐃𝐔 𝐀𝐃𝐌𝐈𝐍𝐈𝐒𝐓𝐑𝐀𝐒𝐀𝐔𝐍 𝐏𝐔́𝐁𝐋𝐈𝐊𝐀

Dili, 15 Agustu 2026 – Universidade da Paz (UNPAZ), liuhusi Programa Mestradu, hala’o serimónia abertura ba Ezame Programa Mestradu Administrasaun Públika tinan akadémiku 2026.

Serimónia ezame ne’e hahú ho estudante Pedruco Capelao, ne’ebé aprezenta nia tema/títulu investigasaun ho títulu: “Análize Implementasaun Valór Jestaun Públika Foun (NPM), Kultura Organizasaun Tradisionál no Partisipasaun Públika iha Efetividade Administrasaun Públika.”

Ezame ne’e hala’o ho partisipasaun husi painel ezaminadór ne’ebé kompostu husi Magnífiku Reitór UNPAZ, Dr. Adolmando Soares Amaral, Lic. Eco., MM, nu’udar Ezaminadór Dahuluk.

Enkuantu Ezaminadór Daruak mak Vise-Reitór Asuntu Programa Mestradu no Doutoramentu, Dr. Martinus Nahak Lino, AMKL, Lic. SP., M.AP., M.SP. No Ezaminadór Terseiru mak Dr. Albertino de Jesus, Lic. CSH., M.AP.

Abertura ezame ne’e diretamente lidera husi Vise-Reitór Asuntu Programa Mestradu no Doutoramentu, akompaña husi membru painel ezaminadór sira no estudante sira husi Programa Mestradu Administrasaun Públika UNPAZ.

Atividade ne’e sai nu’udar parte importante husi prosesu akadémiku iha nível pós-graduasaun, liuliu hodi avalia kapasidade estudante sira iha halo investigasaun sientífika, análize no dezenvolve argumentasaun akadémika kona-ba problema sira ne’ebé relevante ba dezenvolvimentu administrasaun públika iha Timor-Leste.

Entertantu Programa Mestradu Administrasaun Públika UNPAZ kontinua kompromete an atu promove kualidade akadémika, investigasaun sientífika no dezenvolvimentu rekursu umanu ne’ebé iha kompeténsia atu kontribui ba dezenvolvimentu instituisaun no administrasaun públika iha futuru.

-UNPAZ #

15/08/2026

𝐔𝐍𝐏𝐀𝐙 𝐂𝐎𝐕𝐀𝐋𝐈𝐌𝐀 𝐒𝐈𝐌𝐔 𝐕𝐈𝐙𝐈𝐓𝐀 𝐊𝐎𝐑𝐓𝐄𝐙𝐈𝐀 𝐇𝐔𝐒𝐈 𝐄𝐒𝐓𝐔𝐃𝐀𝐍𝐓𝐄 𝐄𝐒𝐓𝐀𝐉𝐈𝐀́𝐑𝐈𝐔 𝐂𝐀𝐍𝐎𝐒𝐀

Covalima, 15 Agostu 2026 – Universidade da Paz (UNPAZ) Klase Normal Munisípiu Covalima simu vizita kortezia husi estudante estajiáriu CANOSA hodi halo diskusaun kona-ba kalendáriu implementasaun Programa Kursu Komputador Baziku no programa sira seluk ne'ebé sei fasilita durante períodu estajiu fulan ida iha Kampus UNPAZ Covalima.

Programa kursu ne'e sei involve partisipasaun husi estudante sira husi fakuldade lima ne'ebé eziste iha UNPAZ Covalima. Tuir rezultadu diskusaun, kursu komputador baziku ne'e gratuitu, no estudante sira ne'ebé partisipa ho di'ak to'o remata programa sei hetan sertifikadu hanesan rekonesimentu ba sira nia partisipasaun.

Iha oportunidade ne'ebé hanesan, parte rua diskute mós kona-ba realizasaun jogu futsal amizade entre estudante estajiáriu CANOSA no ekipa FC Ba Paz UNPAZ Covalima, ho objetivu atu hametin relasaun amizade, kooperasaun no solidariedade entre instituisaun rua.

Iha sorin seluk, estudante sira husi Fakuldade Saúde Públika UNPAZ Covalima hala'o atividade pratika hodi halo kuek husi produtu lokal. Fortunato Gusmão, estudante finalista ida, lidera atividade refere no uza ingrediente lokal hanesan fehuk, trigu, koto, nuu parut, masin-midár no mina goreng hodi produs kuek ho qualidade di'ak.

Depois remata jogu futsal ne'ebé termina ho rezultadu FC Ba Paz UNPAZ Covalima 3–4 CANOSA, ho arbitrájen husi Afonso Pereira, atual Senadu Estudantil UNPAZ Covalima, ekipas rua fila ba kampus hodi prova hamutuk kuek sira ne'ebé prepara husi estudante Fakuldade Saúde Públika.

Atividade tomak lao ho di'ak no susesu, no reforsa espiritu kooperasaun, amizade, no dezenvolvimentu kapasidade estudante sira liuhusi programa estajiu, atividade akadémika no atividade desportiva.

-UNPAZ #

15/08/2026

𝐄𝐒𝐓𝐔𝐃𝐀𝐍𝐓𝐄 𝐔𝐍𝐏𝐀𝐙 𝐏𝐀𝐑𝐓𝐈𝐒𝐈𝐏𝐀 𝐏𝐀𝐋𝐄𝐒𝐓𝐑𝐀 𝐍𝐄'𝐄𝐁𝐄́ 𝐎𝐑𝐆𝐀𝐍𝐈𝐙𝐀 𝐇𝐔𝐒𝐈 𝐂𝐀𝐒𝐀 𝐒𝐈𝐕𝐈𝐋 𝐏𝐑𝐄𝐙𝐈𝐃𝐄𝐍𝐒𝐈𝐀 𝐑𝐄𝐏𝐔́𝐁𝐋𝐈𝐊𝐀 𝐓𝐈𝐌𝐎𝐑-𝐋𝐄𝐒𝐓𝐄

Dili, 14 de Agustu 2026 – Estudante sira husi Universidade da Paz (UNPAZ) partisipa iha Siklu Palestra Prezidensiál (Presidential Lecture Series) ne'ebé organiza husi Casa Sivil Prezidénsia Repúblika Timor-Leste.

Atividade ida ne'e ninia objetivu mak promove debate akadémiku, refleksaun estratéjika no aumenta koñesimentu estudante universitáriu sira kona-ba asuntu nasionál, rejionál no globál, hodi prepara jerasaun foun ne'ebé iha kapasidade atu kontribui ba dezenvolvimentu nasaun.

Iha palestrante sira nia intervensaun, personalidade no peritu sira fahe hanoin, esperiénsia no análize kona-ba tema estratéjiku sira ne'ebé importante ba Timor-Leste. Atividade ne'e mos sai nu'udar espasu diálogu nivel aas entre komunidade akadémika Timoroan no desizór polítiku sira, hodi hametin kultura debate, pensamentu krítiku no partisipasaun sivika.

Partisipasaun estudante UNPAZ iha programa ida ne'e reflete komitmentu universidade atu fó oportunidade ba estudante sira hodi aprende diretamente husi lideransa nasional no peritu sira, atu bele hasa'e sira-nia kapasidade akadémika, profisionál no lideransa ba futuru.

-UNPAZ #

14/08/2026

𝐀𝐓𝐈𝐕𝐈𝐃𝐀𝐃𝐄 𝐊𝐎𝐍𝐉𝐔𝐍𝐓𝐀 𝐄𝐍𝐓𝐑𝐄 𝐔𝐒 𝐏𝐀𝐂𝐈𝐅𝐈𝐂 𝐏𝐀𝐑𝐓𝐍𝐄𝐑𝐒𝐇𝐈𝐏 𝐇𝐎 𝐔𝐍𝐈𝐕𝐄𝐑𝐒𝐈𝐃𝐀𝐃𝐄 𝐃𝐀 𝐏𝐀𝐙

Dili, 14 Agostu 2026 – Universidade da Paz (UNPAZ), liuhusi Faculdade Saúde Pública no Faculdade Ciências Médicas, realiza atividade konjunta ho US Pacific Partnership ho tema “Fortalese Kooperasaun ba Dezenvolvimentu Institusional liuhusi Interkâmbiu Rekursu Humanus, Teknolojia no Dijitalizasaun”, iha Kampus Sentral UNPAZ, Dili.

Prezidente Komisaun Organizadora, Cipriano do Rosário Pacheco, AMG., Lic. SP., M.Kes, hateten atividade ne'e realiza tuir rezultadu diskusaun no vizita entre UNPAZ ho US Pacific Partnership iha tinan kotuk. Kooperasaun ida-ne'e reforsa kompromisu hodi dezenvolve relasaun akadémika no profesional entre instituisaun rua.

Tuir nia, programa ne'e inklui konsertu múzika, exibisaun artezanatu no atividade akademika husi kada fakuldade no departamentu. Atividade sira-ne'e fó oportunidade ba ekipa médiku husi US Pacific Partnership atu besik liu tan kapasidade no kontribuisaun UNPAZ iha área saúde no edukasaun.

Aleinde exibisaun no konsertu, sei realiza mós teaching class ba estudante sira husi Faculdade Saúde Pública no Faculdade Ciências Médicas durante loron rua, hahú segunda to’o tersa. Programa ida-ne'e hakarak hasa'e kapasidade estudante sira liuhusi fahe esperiénsia no koñesimentu husi peritu internasional sira.

“UNPAZ la'ós hanorin de’it estudante sira iha sala aula, maibé liuhusi atividade hanesan ida-ne'e bele hametin liu tan parseria institusionál, tantu iha nivel nasional no internasional,” dehan Prezidente Komisaun Organizadora.

Serimónia abertura lidera husi Reprezentante Magnífiku Reitór UNPAZ, Vise-Reitór ba Asuntu Akademiku, Joaninho Xavier Hei, Lic. CSH., M.Ed., Ph.D., ho prezensa Prezidente Konsellu Administrasaun Fundasaun Neon Metin, José Menezes, M. Food.Tech. Partisipa mós estrutura universidade no fakuldade sira, reprezentante Embaixada Estados Unidos iha Timor-Leste, ekipa US Pacific Partnership, membru F-FDTL, PNTL, no estudante sira husi Universidade da Paz.

Atividade ne'e sai nu'udar parte husi esforsu UNPAZ atu haforsa kooperasaun internasionál, promove inovasaun iha edukasaun superior, no prepara rekursu humanu ne'ebé kompetente atu responde ba dezafiu dezenvolvimentu nasional no global.

-UNPAZ #

14/08/2026

𝐅𝐀𝐊𝐔𝐋𝐃𝐀𝐃𝐄 𝐃𝐈𝐑𝐄𝐈𝐓𝐔 𝐔𝐍𝐏𝐀𝐙 𝐇𝐀𝐊𝐀𝐓 𝐃𝐀𝐇𝐔𝐋𝐔𝐊 𝐁𝐀 𝐄𝐙𝐀𝐌𝐄 𝐌𝐎𝐍𝐎𝐆𝐑𝐀𝐅𝐈𝐀 𝐓𝐈𝐍𝐀𝐍 𝐀𝐊𝐀𝐃𝐄́𝐌𝐈𝐊𝐔 𝟐𝟎𝟐𝟔

Dili, 14 Agostu 2026 – Universidade da Paz (UNPAZ), liuhusi Fakuldade Direitu, ofisialmente hakat dahuluk ba serimónia abertura Ezame Monografia ba Tinan Akadémiku 2026 iha Kampus Sentral UNPAZ, hanesan etapa ikus iha prosesu formasaun akadémika ba estudante finalista sira.

Iha nia intervensaun, Dekanu Fakuldade Direitu, Dr. Leonito Ribeiro, SH., MH., hateten katak, ezame proposta no ezame monografia mak parte integrante husi kuríkulu universidade nian, ne'ebé bazeia ba polítika no orientasaun husi Ministériu Ensinu Superior ba instituisaun sira. Nune'e, prosesu ida ne'e sai ona hanesan kultura akadémika ne'ebé kontinua dezenvolve iha Universidade da Paz.

Dekanu mos reforsa katak, desde Fakuldade Direitu harii iha tinan 2004 to'o 2026, fakuldade ne'e produz ona alumni liu husi 2.000 ema, ne'ebé oras ne'e servisu no asumi knaar importante iha governu, ministériu, instituisaun estadu no setor privadu sira iha Timor-Leste. Tanba ne'e, nia motiva estudante finalista sira atu nafatin badinas estuda no le'e, tamba ezame monografia mak etapa ikus atu prova kapasidade no kompeténsia akadémika antes remata kursu.

Nia mos subliña, Fakuldade Direitu UNPAZ sai hanesan ida husi fakuldade direitu ne'ebé iha prestíjiu no esperiénsia boot iha Timor-Leste, ho alumni barak ne'ebé kontribui ba dezenvolvimentu nasaun. Tanba ne'e, estudante finalista sira tenke defende reputasaun ne'e liuhusi hatudu kualidade, kapasidade analítika no konesimentu siéntífiku durante prosesu ezame monografia.

Dekanu husu ba dosente orientador no ezaminador sira atu hametin komunikasaun efetivu ho estudante finalista sira, atu asesora no orienta sira durante prosesu peskiza no hakerek monografia.

Entertantu Dekanu mós dehan, ezame monografia sei remata iha fulan Setembru, no lista graduadu sira sei submete ba Ministériu Ensinu Superior iha fulan Novembru.

Ba estudante finalista sira, Dekanu husu atu hakbesik an ba dosente orientador bainhira hasoru difikuldade ruma durante prosesu peskiza no hakerek monografia, tanba dosente sira iha responsabilidade no kompeténsia atu fó orientasaun tuir padraun siéntífiku no akadémiku.

Iha oportunidade ne'e, Xefe Departamentu Finalista relata, iha tinan 2026, estudante finalista hamutuk 405 ema, maibé estudante 356 ema de'it mak konsege remata ezame proposta no kontinua ba ezame monografia. Estudante 49 ema seidauk remata etapa proposta, nune'e sei kontinua iha tinan akadémiku tuir mai no la bele partisipa iha graduasaun tinan ida ne'e.

Serimónia abertura Ezame Monografia ne'e partisipa husi estrutura Fakuldade Direitu, dosente sira, orientador, ezaminador no estudante finalista sira husi Fakuldade Direitu Universidade da Paz.

-UNPAZ #

UNPAZ MEDIA Center

19/08/2026

18/08/2026

17/08/2026

17/08/2026

15/08/2026

15/08/2026

15/08/2026

15/08/2026

14/08/2026

14/08/2026

Endereço

Telefone

Website

Notificações

Atalhos

Compartilhar

Categoria

Pedido de remoção do anúncio