UNPAZ MEDIA Center

21/09/2026

𝐔𝐍𝐏𝐀𝐙 𝐂𝐎𝐕𝐀𝐋𝐈𝐌𝐀 𝐇𝐀𝐋𝐀’𝐎 𝐒𝐎𝐒𝐈𝐀𝐋𝐈𝐙𝐀𝐒𝐀𝐔𝐍 𝐁𝐀 𝐄𝐒𝐓𝐔𝐃𝐀𝐍𝐓𝐄 𝐅𝐈𝐍𝐀𝐋𝐈𝐒𝐓𝐀 𝐒𝐈𝐑𝐀 𝐈𝐇𝐀 𝐙𝐔𝐌𝐀𝐋𝐀𝐈

Covalima, 18 Setembru 2026 — Universidade da Paz (UNPAZ) Klase Normal Munisípiu Covalima, liuhusi Ekipa Komisaun Organizadora Atividade Sosializasaun, kontinua hala’o atividade sosializasaun no fahe informasaun ba estudante finalista sira iha Escola Secundária Geral Públika de Zumalai, Munisípiu Covalima.

Atividade ne’e hala’o ho objetivu atu fó informasaun ba estudante finalista sira kona-ba ezisténsia UNPAZ Klase Normal Munisípiu Covalima, prosesu no rekizitu inskrisaun, despeza eskolar, programa estudu no oportunidade sira ne’ebé universidade oferese ba estudante sira ne’ebé hakarak kontinua sira-nia estudu superior.

Reprezenta Xefe Komisaun Organizadora Atividade Sosializasaun, Artur Aquino Flores, Lic. Eco., hamutuk ho Reverenda Madre Emelita M. J. Lopes, SOM, Albina Ferreira, Lic. SP., Anjelita Noronha, Lic. Ed., no membru ekipa sira seluk, partisipa iha atividade ne’e. Atividade mos envolve estudante sira no ekipa UNPAZ Klase Normal Covalima.

Iha oportunidade ne’e, Diretor UNPAZ Klase Normal Munisípiu Covalima, Silvester Ferreira, Lic. Eco., MG.MM., hamutuk ho korpu dosente no funsionáriu sira, hato’o agradese wa’in ba Diretor Escola Secundária Jerál Públika de Zumalai no korpu dosente sira hotu tanba kolaborasaun di’ak no apoiu ne’ebé fó ba UNPAZ Covalima atu bele hala’o atividade sosializasaun iha eskola ne’e.

Objetivu prinsipál husi atividade sosializasaun ne’e mak atu asegura katak estudante finalista sira hetan informasaun ne’ebé loos no kompletu kona-ba oportunidade atu kontinua sira-nia estudu superior iha UNPAZ Klase Normal Munisípiu Covalima.

Prezensa UNPAZ iha Munisípiu Covalima konsidera hanesan oportunidade ida ba estudante sira iha munisípiu ne’e, liuliu ba sira ne’ebé remata ona nivel ensinu sekundáriu no hakarak kontinua ba nivel ensinu superior. Ho prezensa universidade iha Covalima, estudante sira bele konsidera opsaun estudu ne’ebé besik ho sira-nia hela-fatin no bele ajuda família sira hamenus gastus relasionadu ho estudu iha Dili.

Iha parte ikus, UNPAZ Covalima enkoraja estudante finalista sira atu halo desizaun kona-ba kontinuidade estudu ho konsiderasaun ba sira-nia interese akadémiku, kapasidade no apoiu husi família, nune’e bele hili opsaun edukasaun ne’ebé apropriadu ba sira-nia futuru.

UNPAZ Klase Normal Munisípiu Covalima kontinua komprometidu atu fó oportunidade ba jovem sira iha Covalima atu asesu ba edukasaun superior no dezenvolve sira-nia kapasidade akademika no profisionál.

-UNPAZ #

21/09/2026

20/09/2026

𝐅𝐍𝐌 𝐇𝐀𝐌𝐔𝐓𝐔𝐊 𝐇𝐎 𝐕𝐈𝐒𝐄-𝐑𝐄𝐈𝐓Ó𝐑 𝐍𝐎 𝐃𝐄𝐊𝐀𝐍𝐔 𝐔𝐍𝐏𝐀𝐙 𝐕𝐈𝐀𝐉𝐄𝐍 𝐁𝐀 𝐁𝐀𝐋𝐈 𝐇𝐎𝐃𝐈 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐀𝐓𝐈𝐕𝐈𝐃𝐀𝐃𝐄 𝐀𝐊𝐀𝐃É𝐌𝐈𝐊𝐀

Dili, 20 Setembru 2026 — Fundasaun Neon Metin hamutuk ho Vise-Reitórtores Universidade da Paz (UNPAZ), hamutuk ho Dekanu sira husi fakuldade, ohin halo viajen ba Bali, Indonézia, hodi partisipa iha atividade akadémika ne’ebé sei realiza iha loron 21 fulan Setembru tinan 2026.

Viajen ida-ne’e nia objetivu mak atu partisipa diretamente iha atividade akadémika UNPAZ, liuliu serimónia ne’ebé relasiona ho atribuisaun no otorgamentu titulu Professor, ne’ebé sei simu Magnífiku Reitór UNPAZ no Vise-Reitór Asuntu Akadémiku iha Bali, Indonézia.

Partisipasaun Fundasaun Neon Metin hamutuk ho Vise-Reitóres no Dekanu sira iha atividade ne’e hatudu komitmentu Universidade da Paz atu kontinua hametin dezenvolvimentu akadémiku no kualidade ensinu superior, liuliu liuhusi valorizasaun ba akademisian no profissional sira.

Atividade akadémika ida-ne’e mos sai nu’udar oportunidade importante atu hametin relasaun no kooperasaun akadémika, no promove partilha koñesimentu entre akademisian sira.

UNPAZ kontinua komprometidu atu dezenvolve kualidade ensinu superior no fó kontribuisaun ba dezenvolvimentu edukasaun, rekursu umanu no sosiedade iha Timor-Leste.

20/09/2026

KOMISAUN ORGANIZADORA KONTINUA HALA’O EZAME BA ESTUDANTE SIRA

Dili, 19 Setembru 2026 — Universidade da Paz (UNPAZ), liuhusi Komisaun Organizadora ne’ebé responsabiliza ba prosesu ezame, kontinua hala’o ezame médiu ba estudante sira husi Semester II, IV, VI no VIII, ne’ebé mai husi fakuldade hitu (7) iha UNPAZ.

Estudante sira ne’ebé tuir ezame médiu ne’e kompostu husi estudante husi Fakuldade Ekonomia, Fakuldade Saúde Públika, Fakuldade Direitu, Fakuldade Agríkola, Fakuldade Floresta, Fakuldade Ciências Sociais no Humanas, no Fakuldade Ciências Médicas.

Maski ezame tama ona iha semana ikus, estudante sira kontinua hatudu komitmentu no responsabilidade atu tuir prosesu ezame ho di’ak. Iha prosesu ne’e, estudante sira mós tuir orientasaun no regra sira ne’ebé determina husi ekipa Vigilánsia, atu garante katak prosesu ezame lao ho orden, disiplinu no integridade.

Ezame médiu ne’e hala’o nu’udar parte ida husi prosesu avaliasaun akademika UNPAZ, ho objetivu atu avalia koñesimentu, komprensaun no preparasaun akademika estudante sira, tuir matéria, programa no semestre ida-idak.

Komisaun Organizadora hein katak prosesu ezame bele kontinua lao ho di’ak to’o remata, ho partisipasaun estudante sira no apoiu husi comunidade akademika UNPAZ.

-UNPAZ #

19/09/2026

𝐑𝐄𝐈𝐓Ó𝐑 𝐍𝐎 𝐕𝐈𝐒𝐄-𝐑𝐄𝐈𝐓Ó𝐑 𝐔𝐍𝐏𝐀𝐙 𝐕𝐈𝐀𝐉𝐄𝐍 𝐁𝐀 𝐁𝐀𝐋𝐈, 𝐈𝐍𝐃𝐎𝐍𝐄𝐒𝐈𝐀

Dili, 19 Setembru 2026 — Universidade da Paz (UNPAZ) nia Magnífiku Reitór, hamutuk ho Vise-Reitór Asuntu Akadémiku no Vise-Reitór, hala’o ona viajen ba Bali, Indonézia, atu prepara no partisipa iha atividade akadémika ne’ebé sei realiza iha loron Segunda-feira, 21 Setembru 2026.

Vise-Reitór Asuntu Akadémiku UNPAZ, Prof. Dr. Joaninho Xavier Hei, Lic.CSH., M.Ed., hateten katak viajen ida-ne’e iha objetivu prinsipál atu halo preparasaun ba serimónia posse Professor ne’ebé sei realiza iha Bali.

“Objetivu husi viajen ida-ne’e mak ami hamutuk ho Magnífiku Reitór no Vise-Reitór sira seluk ba Bali atu halo preparasaun ensaiu ka gladi, hodi asegura katak preparasaun hotu-hotu la’o di’ak antes serimónia posse iha Segunda-feira, 21 Setembru 2026,” dehan Vise-Reitór Asuntu Akadémiku.

Iha viajen ida-ne’e, Magnífiku Reitór no Vise-Reitór Asuntu Akadémiku, Delegasaun UNPAZ sei partisipa iha atividade sira ne’ebé relasiona ho serimónia no agenda akadémika durante sira-nia estadia iha Bali.

Serimónia posse ba Professor ne’e sei sai mós nu’udar momentu importante ba UNPAZ, liuliu iha área dezenvolvimentu no valorizasaun akademisian sira, no sei reforsa relasaun akadémika entre instituisaun ensinu superior iha Timor-Leste no Indonézia.

18/09/2026

𝐔𝐍𝐏𝐀𝐙 𝐄𝐍𝐒𝐄𝐑𝐑𝐀 𝐄𝐒𝐓𝐀𝐉𝐈𝐔́ 𝐄𝐒𝐓𝐔𝐃𝐀𝐍𝐓𝐄 𝐒𝐈𝐄́𝐍𝐒𝐈𝐀𝐒 𝐌𝐄́𝐃𝐈𝐊𝐀𝐒 𝐈𝐇𝐀 𝐇𝐎𝐒𝐏𝐈𝐓𝐀𝐋 𝐑𝐄𝐅𝐄𝐑𝐀́𝐋 𝐒𝐔𝐀𝐈

Covalima, 17 Setembru 2026 — UNPAZ Klase Normal Munisípiu Covalima, liuhusi Fakuldade Siénsias Médikas, hala’o serimónia aprezentasaun kaju no enseramentu atividade estajiú ba estudante Semester V iha Hospital Referál Suai.

Atividade ne’e marka remata períodu estajiú estudante sira ne’ebé durante fulan tolu hala’o aprendizajen prátiku no hetan orientasaun hosi profissionais saúde iha Hospital Referál Suai.

Iha serimónia ne’e, reprezentante estudante estajiadu hato’o agradecimentu ba Diretor Ezekutivu Hospital Referál Suai no estrutura ospitál tomak, liuliu ba CI Klinika sira, tanba sira-nia apoiu, orientasaun no akompañamentu durante prosesu estajiú.

Reprezentante estudante sira mós hato’o deskulpa ba diresaun no profissionais Hospital Referál Suai, karik durante períodu estajiú iha atitude ka liafuan ruma ne’ebé la tuir expetativa no halo ofensa ba parte ruma.

Diretor Ezekutivu Hospital Referál Suai, Domingos de Fátima Oliveira Lemos, Lic. SP., iha nia intervensaun hato’o agradecimentu ba UNPAZ no estudante estajiadu sira. Nia hateten katak, maski iha inísiu iha situasaun kona-ba deslocamentu estudante estajiadu sira, to’o agora estudante hamutuk 132 kontinua hala’o estajiú ho kondisaun ne’ebé di’ak.

Nia subliña katak, prezensa estudante Fakuldade Siénsias Médikas UNPAZ-TL durante fulan tolu iha Hospital Referál Suai fó apoiu no kontribuisaun ba atividade servisu iha ospitál.

Diretor Ezekutivu mós enfatiza katak, estajiú iha papel importante atu hadi’a maturidade akadémika estudante sira. Tanba ne’e, estudante sira presiza kontinua hadi’a mentalidade akadémika, kapasidade profisionál no responsabilidade, atu iha futuru bele fó servisu di’ak no kontribui ba atendimentu no salvamentu pasiente.

Iha parte seluk, reprezentante Dekanu Fakuldade Siénsias Médikas no Diretor UNPAZ Klase Normal Munisípiu Covalima, Silvester, Lic. Eco., MG.MM., hateten, pertensaun no separasaun iha atividade akademika sempre iha signifikadu rasik.

Nia hato’o agradesimentu ba Diretor Ezekutivu Hospital Referál Suai no CI Klinika sira hotu tanba kooperasaun ne’ebé di’ak ho UNPAZ-TL. Nia mós husu ba estudante sira atu uza esperiénsia no koñesimentu ne’ebé hetan durante estajiú nu’udar baze atu kontinua hakle’an sira-nia koñesimentu iha área Siénsias Médikas.

Koordenador CI Klinika Hospital Referál Suai, Alberto Coli, mós hato’o agradecimentu ba UNPAZ-TL no Governu Timor-Leste, liuliu Hospital Referál Suai, tanba kooperasaun no servisu hamutuk ne’ebé permite atividade estajiú bele hala’o to’o remata.

Nia hateten prezensa estudante Fakuldade Siénsias Médikas UNPAZ-TL iha Hospital Referál Suai hatudu ona dezenvolvimentu iha área koñesimentu no kapasidade estudante sira, nune’e sira bele prepara an atu atende pasiente ho responsabilidade iha futuru.

Alberto Coli mós hato’o mensajen ba estudante estajiadu sira katak sira-nia prezensa iha Hospital Referál Suai la’ós de’it atu aprende, maibé mós fó ona kontribuisaun no apoiu ba profissionais saúde, inklui iha prosesu atendimentu pasiente.

Serimónia ne’e hetan prezensa hosi Diretor Ezekutivu Hospital Referál Suai, reprezentante Dekanu Fakuldade Siénsias Médikas, reprezentante Diretor UNPAZ Klase Normal Munisípiu Covalima, Koordenador Jerál CI Klinika, Diretora Apoiu Diagnóstiku, Diretor Administrasaun, Finansas no Logístika, Xefe Departamentu Emerjénsia no Laboratóriu, Xefe Gabinete Kontrolu Kualidade Sosial, CI Klinika no profissionais Hospital Referál Suai.

Atividade remata ho foto hamutuk entre estudante estajiadu, direção UNPAZ no estrutura Hospital Referál Suai, nu’udar símbolu husi kooperasaun no servisu hamutuk entre instituisaun edukasaun no instituisaun saúde.

-UNPAZ #

18/09/2026

UNPAZ fó parabéns ba Professor Na’in Rua, Prof. Dr. Adolmando Soares Amaral, Lic.Eco., MM no Prof. Dr. Joaninho Xavier Hei,Lic.CSH.,M.Ed.PhD nu’udar apresiasaun ba dedicação no kontribuisaun sira iha área akademika.
Rekonesimentu ida-ne’e reflete kompromisu atu hametin qualidade edukasaun superior iha Timor-Leste.”

18/09/2026

UNPAZ no FESCA HABELAR OPORTUNIDADE BA ESTUDANTE TIMOR-OAN APRENDE NO SERVISU IHA JAPAUN

Dili, 18 Setembru 2026 — Universidade da Paz (UNPAZ) hamutuk ho FESCA – Foreign Employment Support Center Association, liuhosi parseria ho Kazu Global Enterprises Unipessoal, Lda, oferese oportunidade ba estudante Timor-oan atu aprende língua Japonesa, hetan esperiénsia profisionál no buka oportunidade servisu iha Japão.

Informasaun ne’e hatudu katak programa ne’e sei hahú iha 12 Outubru 2026, liuhosi Department of Japanese Language – Faculty of Education iha UNPAZ. Programa ne’e inklui aprendizajen língua Japonesa, oportunidade estájiu no esperiénsia servisu, ho objetivu atu prepara estudante sira ba futuru profisionál iha Japão.

Tuir informasaun FESCA, parseria ho UNPAZ inklui edukasaun língua Japonesa, esperiénsia prátika iha Japão, dezenvolvimentu rekursu umanu no apoiu ba estudante sira atu hetan oportunidade servisu. FESCA mós konfirma katak iha 10 Jullu 2026, FESCA no UNPAZ asina Memorandu Entendimentu (MoU) kona-ba programa international internship.

Além programa língua Japonesa, parseria ne’e mós fó atensaun ba setor agrikultura. Estudante husi Fakultade Agrikultura UNPAZ sei iha oportunidade atu aprende diretamente kona-ba teknika no esperiénsia agrikultura Japonesa, ho esperansa atu aumenta koñesimentu prátiku ne’ebé bele uza iha sira nia karreira iha futuru.

UNPAZ rasik iha Fakuldade Teknolojia Agrikultura no Programa Mestradu Agrikultura, no universidade afirma katak nia kurríkulu fó atensaun ba aprendizajen prátiku no preparasaun estudante ba nesesidade merkadu servisu.

Programa ne’e la limita de’it ba Japão. Materiál promosionál ne’ebé publika husi UNPAZ/FESCA mós hatudu objetivu atu dezenvolve oportunidade ba jovem Timor-oan iha Japão no, iha futuru, merkadu servisu Europa.

Inisiativa ne’e tau énfaze ba prinsipiu “Learn, Experience and Work Globally” — estudante sira aprende iha UNPAZ, hetan esperiénsia internasionál no prepara an ba oportunidade servisu iha liur.

UNPAZ, nu’udar universidade privada iha Dili, mós fó atensaun ba dezenvolvimentu karreira, estájiu no ligasaun estudante ho oportunidade profisionál.

Parseria UNPAZ–FESCA ne’e iha objetivu atu liga edukasaun universitária ho esperiénsia prátika no merkadu servisu internasionál, liuliu ba jovem Timor-oan ne’ebé iha interese atu aprende língua Japonesa, agrikultura no servisu iha Japão.

17/09/2026

𝐔𝐍𝐏𝐀𝐙 𝐋𝐎𝐊𝐄 𝐄𝐙𝐀𝐌𝐄 𝐏𝐑𝐎𝐏𝐎𝐒𝐓𝐀 𝐌𝐄𝐒𝐓𝐑𝐀𝐃𝐔 𝐀𝐆𝐑𝐈𝐊𝐔𝐋𝐓𝐔𝐑𝐀 𝐓𝐈𝐍𝐀𝐍 𝟐𝟎𝟐𝟔

Dili, 17 Setembru 2026 — Universidade da Paz (UNPAZ) realiza serimónia abertura Ezame Proposta Programa Mestradu Agrikultura Tinan Akademiku 2026, ne’ebé hala’o iha Aula Mestradu UNPAZ, Dili.

Serimónia abertura ne’e lidera husi Vise-Reitor ba Asuntu Programa Mestradu no Doutoramentu, Dr. Martinus Nahak Lino, AMKL, Lic. SP., M.AP., M.SP., no partisipa mós husi ezaminadór/a sira no kandidatu sira husi Programa Mestradu Agrikultura UNPAZ.

Iha nia diskursu, Vise-Reitor hatete katak atividade ezame proposta ne’e sai momentu importante ida ba kandidatu sira husi Programa Mestradu Agrikultura, tanba reprezenta pasu importante ida iha prosesu akadémiku atu finaliza sira-nia estudu iha Universidade da Paz.

“Orgullu ba ita boot sira, kandidatu Mestradu Agrikultura UNPAZ, tanba ita to’o ona iha faze importante ida atu finaliza ita nia estudu iha programa mestradu iha Universidade da Paz,” dehan Vise-Reitor.

Vise-Reitor mós hato’o apelu ba kandidatu sira atu nafatin aproveita tempu ho di’ak, aumenta esforsu no komitmentu akademiku, tanba tempu kontinua la'o no tuir kalendáriu akademiku UNPAZ, iha fulan Dezembru sei tama ona ba faze graduaun.

Nia mós subliña katak, kandidatu sira presiza nafatin halo esforsu atu bele termina sira-nia estudu ho kualidade akademika, nune’e koñesimentu no kapasidade ne’ebé hetan durante prosesu formasaun bele kontribui ba sosiedade, liuliu ba dezenvolvimentu nasional iha Timor-Leste.

Ezame proposta ne’e hala’o ho abertura direta husi Vise-Reitor ba Asuntu Programa Mestradu no Doutoramentu, Dr. Martinus Nahak Lino, AMKL, Lic. SP., M.AP., M.SP., ne’ebé akompaña husi ekipa ezaminadór/a sira no kandidatu sira husi Programa Mestradu Agrikultura UNPAZ.

Atividade ne’e reprezenta mós kompromisu Universidade da Paz atu kontinua promove kualidade edukasaun aas, dezenvolvimentu rekursu umanu no formasaun profisionál, liuliu iha área agrikultura, ne’ebé iha papel importante ba dezenvolvimentu sustentável no seguransa ai-han iha Timor-Leste.

-UNPAZ #

16/09/2026

UNPAZ KONTINUA REALIZA EZAME MÉDIU BA ESTUDANTE SIRA

Dili, 16 Setembru 2026 — Universidade da Paz (UNPAZ) kontinua hala’o ezame médiu ba estudante regulár no estudante extensão sira husi Semester II, IV, VI no VIII, ne’ebé mai husi fakuldade hitu (7).

Estudante sira ne’ebé tuir ezame médiu ne’e kompostu husi estudante husi Fakuldade Ekonomia, Fakuldade Saúde Públika, Fakuldade Direitu, Fakuldade Agrikola, Fakuldade Floresta, Fakuldade Ciências Sociais no Humanas, no Fakuldade Ciências Médicas.

Tuir observasaun Média iha terenu, estudante sira kontinua hatudu interese, vontade no ativu iha prosesu ezame. Durante ezame, estudante sira mos tuir orientasaun no regra sira ne’ebé fó husi ekipa Vigilánsia, to’o prosesu ezame remata ho di’ak.

Ezame médiu ne’e realiza nu’udar parte husi prosesu avaliasaun akademiku UNPAZ, ho objetivu atu avalia estudante sira nia koñesimentu no preparasaun akademika tuir programa no semestre ida-idak.