My EduNotes

แชร์

📚💭

12/03/2026

Duolingo challenge

✅ 500 day streak

06/03/2026

Words for Women ပေးစာကဏ္ဍအတွက် အွန်လိုင်းကနေ ပေးပို့လာတဲ့ Cherry May ရဲ့စာလွှာကို Day 3 အတွက် ရွေးချယ်ဖော်ပြလိုက်ပါတယ်။ တာဝန်ကိုယ်စီ ထမ်းပိုးရင်း ပင်ပန်းနေကြတဲ့ အမျိုးသမီးလေးတွေအတွက် ကိုယ့်ကိုယ်ကိုယ်မမေ့လျော့ကြဖို့ အားပေးထားတဲ့ စာလွှာလေးဖြစ်ပါတယ်။ ✨💜

“လူ့အဖွဲ့အစည်းက ပုံသေကားကျသတ်မှတ်ထားတဲ့ အမျိုးသမီးဆိုတဲ့ခေါင်းစဉ်အောက်မှာ စိတ်ပင်ပန်း၊ လူပင်ပန်းဖြစ်နေကြရပြီလား အမျိုးသမီးတို့ရေ……

အမျိုးသမီးတို့အားလုံးမှာ သန်မာရတဲ့အခါရှိမယ်၊ ရဲရင့်ရတဲ့အခါရှိမယ်၊ ဦးဆောင်ရတဲ့အခါရှိမယ်၊ မှီခိုရတဲ့အခါရှိမယ်၊ အားငယ်ရတဲ့အခါရှိမယ်၊ ပေးဆပ်ရတဲ့အခါရှိမယ်၊ စွန့်လွှတ်ရတဲ့အခါရှိမယ် စသဖြင့်ပေါ့…..အမျိုးသမီးဆိုတာလည်း လူသားတစ်ယောက်ပါပဲလေ။ သင်ဟာ တန်ဖိုးရှိတယ်၊ အစားထိုးလို့မရတဲ့လူတစ်ယောက်ဖြစ်ပါတယ်။ သင်ကအရေးပါတဲ့သူဆိုတာကို မေ့မထားပါနဲ့။ ယခုအချိန်ထိ လျှောက်လှမ်းလာခဲ့တဲ့ဘဝခရီးကို ပြန်ကြည့်လိုက်ပါ။ တော်တော်လေးခရီးရောက်ခဲ့ပါပြီ။ ကိုယ့်ရဲ့ကြိုးပမ်းအားထုတ်မှုတွေကို ပြန်လည်အမှတ်ရပြီး ကိုယ့်ကိုယ်ကိုယ် ဂုဏ်ပြုပေးလိုက်ပါ။ သင်အကောင်းဆုံးကြိုးစားခဲ့ပြီးပါပြီ။

အတိတ်နေ့ရက်များနဲ့ အနာဂတ်မှာဖြစ်လာမယ့်အရာတွေကို ဘယ်သူကမှ ပြောင်းလဲပြင်ဆင်ပေးလို့မရပါဘူး။ ဒါပေမဲ့ လက်ရှိပစ္စုပ္ပန်ကတော့ ကိုယ့်လက်ထဲမှာရှိနေပါတယ်။ လက်ရှိမှာဖြစ်နေတာတွေကလည်း အတိတ်ကာလက ကိုယ်ပြုလုပ်ခဲ့တာတွေရဲ့ အကျိုးဆက်လည်း ဖြစ်ကောင်းဖြစ်နိုင်ပါတယ်။ အနာဂတ်မှာ ဘာတွေဖြစ်လာမယ်ဆိုတာကလည်း လက်ရှိမှာဘာတွေလုပ်နေတာလဲဆိုတဲ့အပေါ် မူတည်ပြီး အပြောင်းအလဲဖြစ်သွားနိုင်ပါတယ်။ ဒါကြောင့် လက်ရှိပစ္စုပ္ပန်ကိုပဲ အာရုံစိုက်ပြီး ကိုယ်လိုချင်တဲ့ဘဝကို ကိုယ်တိုင်ပုံဖော်နိုင်ကြပါစေ အမျိုးသမီးတို့ရေ…..

ဒီခရီးကို တစ်ယောက်တည်းလျှောက်နေရတာမဟုတ်ဘူးဆိုတာကိုလည်း သတိရပေးပါ။ ကိုယ့်ဘက်မှာဘယ်သူမှမရှိဘူးလို့ ခံစားရပြီး အားငယ်ရတဲ့အခါတိုင်း၊ တစ်စုံတစ်ယောက်ရှိနေပေးရင်ကောင်းမှာပဲလို့တွေးမိတဲ့အခါတိုင်း ဒီစာလေးကို သတိရပေးပါ။ ဘယ်သူမှမရှိရင်တောင် ခုစာရေးနေသူကတော့ အမြဲတမ်းရှိပေးနေမှာပါ။”

ဒီစာလေးမှာ အမျိုးသမီးလေးတွေအတွက် စိတ်ခွန်အားဖြစ်စေမယ့် စကားလေးတွေအပြင်၊ လက်ရှိမှာနေထိုင်ဖို့နဲ့ မိမိကိုယ်ကိုယ်ဂရုစိုက်ပေးဖို့ကိုလည်း အမှာပါးထားပါတယ်။

မနက်ဖြန်တွေမှာလည်း နောက်ထပ် မျှဝေပေးမယ့် စာလွှာလေးတွေကို စောင့်မျှော်ဖတ်ရှုပေးရင်း...မတ်လ ၈ ရက်နေ့မှာ ပြုလုပ်မယ့် Goethe-Institut Myanmar ရဲ့ အမျိုးသမီးများနေ့ အစီအစဉ်တွေမှာလည်း ဒီလိုနွေးထွေးတဲ့ အလင်းရောင်လေးတွေ အတူတကွ လာရောက်ဖလှယ်ဖို့ ကြိုတင်ဖိတ်ခေါ်ပါရစေ။ 💛

05/03/2026

Online Learning Pathways in UK Higher Education (သိပြီးသားသူတွေလည်း သိပြီးဖြစ်မှာပါ။)

မြန်မာနိုင်ငံအတွက် နိုင်ငံတကာဗီဇာ တင်းကျပ်မှုတွေများလာနဲ့အမျှ higher education မှာ online learning pathway ကလည်းပိုမိုရွေးချယ်လာကြမယ့် လမ်းကြောင်းတစ်ခုပါ။ လက်ရှိမှာလည်း higher education နယ်ပယ်မှာ online learning pathway ကတွင်တွင်ကျယ်ကျယ်ရှိနေပြီးသားပါ။

US, UK, Aussie နိုင်ငံတွေက တက္ကသိုလ်တွေမှာ မြန်မာတွေအတွက် online learning စကောလာရှစ်ပိုပေးတာမျိုး access ပိုဖွင့်ပေးသင့်တယ်လို့မြင်ပါတယ်။ (ဗီဇာပိတ်လိုက်တော့ ပညာရေးအခွင့်အရေးဆုံးရှုံးသွားတဲ့ ကျောင်းသားတွေအတွက် ပိုဖွင့်ပေးစေချင်တာပါ။) တက္ကသိုလ်က ဘယ်လိုအကျိုးအမြတ်အတွက်ကြောင့် ဖွင့်ပေးသင့်သလဲမေးရင်တော့ မပြောတတ်ပါဘူး။ အဲ့လို access မျိုးရလာအောင်လည်း မြန်မာဘက်ကနေ လုပ်လို့ရတာရှိရင်လည်း ကြိုးစားကြည့်ရမယ်ထင်ပါတယ်။ ဗီဇာဆိုင်ရာမူဝါဒကိုပြောင်းလဲပေးဖို့ ကြိုးစားပေးနေကြတဲ့သူတွေကိုလည်း အသိအမှတ်ပြုအားပေးသလို UK/US/Aussie တက္ကသိုလ်တွေဆီကနေလည်း မြန်မာကျောင်းသားတွေအတွက် အွန်လိုင်းကနေသင်ယူခွင့်ရရှိအောင် တစ်ဖက်တစ်လမ်းကနေကြိုးစားကြဖို့ လိုအပ်တယ်ထင်ပါတယ်။

Limitation အနေနဲ့က တက်ချင်တဲ့ program တိုင်းက online learning option မရှိပါဘူး။ တက္ကသိုလ်တိုင်းလည်း online learning option မပေးပါဘူး။ အွန်လိုင်းတက်ချင်တယ်ဆိုရင်တော့ on-campus လောက်ရွေးချယ်စရာမရှိဘူးဆိုတာက ဝမ်းနည်းစရာ လက်ရှိအခြေအနေဖြစ်နေပါတယ်။ online learning ကများသောအားဖြင့် အလုပ်လုပ်နေတဲ့သူတွေအတွက် flexible learning အတွက်ရည်ရွယ်ပါတယ်။ ယူကေမာစတာဆိုရင် အများအားဖြင့် တစ်နှစ်ပဲတက်ရတာမလို့ အွန်လိုင်းသင်ကြားရေးက ပိုအဆင်ပြေနိုင်တယ်။ ဒါကြောင့် ၃/၄ နှစ်တက်ရမယ့် undergraduate တွေအတွက် အွန်လိုင်းကရွေးချယ်စရာ သိပ်မရှိတတ်ပါဘူး။

အွန်လိုင်းသင်ယူမှုနဲ့ UK တက္ကသိုလ်မှတက်ချင်တယ်ဆိုရင်
University of London
University College London
University of Nottingham
University of Birmingham
University of Edinburgh
University of Manchester စတဲ့ UK ရဲ့ ထိပ်တန်းတက္ကသိုလ်တွေမှာ အွန်လိုင်းပရိုဂရမ်တွေကို ရှာဖွေကြည့်နိုင်သလို တခြားတက္ကသိုလ်တွေမှာလည်း ရှိပါတယ်။

ကျောင်းပြီး၊ အလုပ်ဝင်ပြီး နောက်ထပ်ကျောင်းတက်ဖို့ ဖြစ်လာတယ်။ On-campus တက်လို့ရတာကို ရွေးချယ်ချင်ခဲ့ပေမဲ့ နောက်ဆုံး online learning ပဲ တက်ဖြစ်သွားတယ်။ အဲ့ထဲကမှ ခုတက်နေတဲ့ University of Edinburgh မှာတော့ အွန်လိုင်းမာစတာကို ၂၀၀၅ လောက်ကတည်းက စတင်ခဲ့ပါတယ်။ UK မှာ ဒစ်ဂျစ်တယ်သင်ကြားရေးကို စွန့်ဦးတီထွင်တဲ့တက္ကသိုလ်တွေထဲမှာ တစ်ခုအပါအဝင်ပါ။ ၂၀၂၆ QS world ranking မှာ ကမ္ဘာ့အဆင့် ၃၄ ရှိပြီး Times and Sunday Times Good University Guide မှာ Education ဘာသာရပ်မှာ UK ရဲ့နံပါတ် (၁) ဖြစ်နေပါတယ်။

အွန်လိုင်းသင်တန်းကနေ သင်တန်းတွေတော့အများကြီးတက်ဖူးပေမဲ့ အွန်လိုင်းမာစတာဆိုတော့ အစတုန်းကတော့ စိုးရိမ်မှုတွေရှိခဲ့ပေမဲ့ ကိုယ်ယူလိုက်တဲ့ program က တက်ကြည့်လိုက်မှထင်ထားတာထက်ကို ပိုကောင်းနေတဲ့အတွက် အရမ်းစိတ်ကျေနပ်မှုရှိပါတယ်။ (တော်တော်တော့ လိုက်ကြိုးစားနေရပါသေးတယ်။) အွန်လိုင်းလား on-campus လားဆိုတာကတော့ personal preference နဲ့ပဲပိုသက်ဆိုင်ပါတယ်။ အွန်လိုင်းသင်ကြားရေးဆိုလို့ လူကိုယ်တိုင်သင်ကြားရေးအတိုင်းပဲ coursework, assessment, credits တွေက အတူတူပဲမလို့ credential အပိုင်း ဘွဲ့ပေးတဲ့အခါမှာလည်း အွန်လိုင်းကနေကျောင်းပြီးလို့ဆိုပြီး in-person တက်တဲ့သူတွေထက် လျော့ပြီးရတာဘာမှမရှိပါဘူး။ (campus life, social life အပိုင်းမှာ on-campus က အားသာချက်ရှိတာကတော့ ချွင်းချက်ပါ။) တက္ကသိုလ်ရဲ့ facilities အပြည့်အစုံ၊ library, training, student support, career support စတာတွေကို အပြည့်အဝထပ်တူ ခံစားခွင့်ရှိပါတယ်။ ခုတက်နေတဲ့ program ဆိုရင် on-campus အတန်းကိုမဖွင့်ထားပါဘူး။ အပြင်မှာတက်ချင်တယ်ဆိုရင်တောင် မဖွင့်ထားပါဘူး။

အွန်လိုင်းတက်ခြင်းကြောင့် တခြားအကျိုးကျေးဇူးတွေလည်းရှိပါတယ်။ online part-time တက်ရင်း အလုပ်လုပ်လို့ရသလို တခြားအစီအစဉ်တွေမှာလည်း ပါဝင်လို့ရတယ်။ မာစတာတက်ဖို့ဆိုရင်တော့ အွန်လိုင်းသင်ယူမှုက ပိုကောင်းတဲ့ ရွေးချယ်မှုဖြစ်နိုင်ပေမဲ့ တက္ကသိုလ်ခုမှ စတက်မယ့်သူတွေအတွက်ကတော့ on-campus ကိုပဲ ပိုတက်ချင်ကြမယ်ဆိုတာကို စာနာနားလည်မိပါတယ်။

ရွေးချယ်စရာများထဲက တစ်ခုကို စဉ်းစားဖို့ အထောက်အကူပြုစေဖို့သာ မျှဝေပေးခြင်းဖြစ်ပါတယ်။

04/03/2026

📣မြန်မာနိုင်ငံက ဆရာ၊ ဆရာမများအခမဲ့လျှောက်လို့ရတဲ့ အစီအစဉ်တစ်ခု

ASEFEdu ကနှစ်စဉ်ကျင်းပနေကျ အစီအစဉ်တွေထဲကတစ်ခုဖြစ်တဲ့ ၁၉ ကြိမ်မြောက် ASEF Classroom Network ကို Future Ready Teaching: Human Agency in the Age of AI ခေါင်းစဉ်နဲ့ ကျင်းပပြုလုပ်သွားမှာဖြစ်ပါတယ်။ နောက်ဆုံးအဆင့်ထိ အရွေးချယ်ခံရရင် ဩစတီးယားနိုင်ငံအထိ သွားရောက်ရမှာဖြစ်ပြီး အစီအစဉ်အစအဆုံး ဧပြီလကနေ အောက်တိုဘာလအထိကြာမြင့်မှာဖြစ်လို့ အချိန်ပေးနိုင်ဖို့တော့ လိုအပ်ပါတယ်။ ASEF အစီအစဉ်တွေက ပါဝင်ခွင့် အခမဲ့ဖြစ်ပြီး နိုင်ငံရပ်ခြားသွားရတဲ့ အစီအစဉ်ကတော့တစ်နှစ်နဲ့ တစ်နှစ်စီစဉ်ပေးမှုမတူတာမလို့ ဆက်သွယ်ဖို့ပေးထားတဲ့ email ကိုမေးမြန်းနိုင်ပါတယ်။ အသေးစိတ်လိုအပ်ချက်တွေကို သေချာဖတ်ရှုပြီး လျှောက်ထားနိုင်ဖို့ မျှဝေပေးလိုက်ရပါတယ်။

01/03/2026

Daffodils ကဗျာကိုမှတ်မိကြသေးလား……

အကြိုက်ဆုံးကဗျာလေးထဲကတစ်ပုဒ်
ဆောင်းအကုန်မှာပွင့်တဲ့ပန်းလေးအကြောင်းကို ဖော်ကျူးရေးသားထားတာတွေ့လို့ ဘာသာပြန်ပေးလိုက်ပါတယ်။

မတ်လအစပြုတာနဲ့ ရာသီတစ်ခုစာစောင့်ရကျိုးနပ်စေတဲ့အဝါရောင် daffodil ပန်းလေးတွေက သက်သေပဲဖြစ်ပါတယ်။ Daffodil ပန်းက ပြန်လည်မွေးဖွားခြင်း၊ မျှော်လင့်ခြင်းနဲ့ တိတ်ဆိတ်ငြိမ်သက်စွာ ပြန်လည်စတင်ခြင်းတို့ရဲ့ လှပတဲ့ပြယုဂ်တစ်ခုဖြစ်ပါတယ်။

အအေးဒဏ်ကိုအန်တုပြီး ရှင်သန်ပေါက်ဖွားလာတယ်။ ကြမ်းတမ်းတဲ့ လေဒဏ်ကို အန်တုပြီးနောက် ပေါက်ဖွားလာတယ်။ ရှည်လျားတဲ့ညတွေကို ကျော်လွန်ပြီးနောက် ပွင့်လန်းလာတယ်။ ရာသီတစ်ခုလုံး မြေအောက်မှာပုန်းကွယ်နေပြီးနောက် ပေါ်ထွက်လာတယ်။

သင်လည်းယခုလိုအနေအထားမှာ ဖြစ်ကောင်းဖြစ်မှာပါ။ ပြီးနောက်မှာပေါ့….
စိတ်ပျက်စရာပြီးနောက်….
အသည်းကွဲစရာပြီးနောက်….
ကိုယ့်ကိုယ်ကိုယ် သံယယဝင်ပြီးနောက်….
ပြီးတော့ daffodil ပန်းလေးလိုပွင့်လန်းလာဖို့ မရဲသေးတာ မစွန့်စားရဲသေးတာလည်း ဖြစ်ကောင်းဖြစ်မှာပါ။ ဒါပေမဲ့ daffodil ပန်းလေးကတော့ လွတ်မြောက်ရှင်သန်ခြင်းရဲ့ သက်သေ၊ ရှင်သန်ခြင်းဆိုတာ ဖြစ်နိုင်သေးတယ်ဆိုတဲ့ သက်သေပဲဖြစ်ပါတယ်။ Daffodil ပန်းလေးလိုပဲ ပွင့်လန်းနိုင်ခဲ့ရင် သင်က သင်တွေးထားတာထက် ပိုပြီးသန်မာပါတယ်။

မတ်လကို daffodil ပန်းလေးလိုပွင့်ဖူးနိုင်အောင် လုပ်ဆောင်ကြရအောင်။ အရာအားလုံးက လွယ်ကူနေလို့မဟုတ်ပါဘူး။ ငါတို့လုပ်နိုင်ပြီဆိုတာကို သိနိုင်ဖိုအတွက် တောင့်ခံထားခဲ့ပြီးမလို့ဖြစ်ပါတယ်။

ဒီရာသီက daffodil ပန်းလေးလို့ ပွင့်လန်းရမယ့် သင့်ရဲ့ရာသီပဲဖြစ်ပါတယ် 🌼

မူရင်းပို့စ်ကို ကိုးကားပြီးဆီလျော်သလို ဘာသာပြန်ထားပါတယ်။ https://www.facebook.com/share/18NquWpxFb/?mibextid=wwXIfr

Image credit to the rightful owner.

26/02/2026

မနေ့က ကျောင်းမှာ ELM Town Hall လုပ်တော့ ELM မှာ GPT-3.5-turbo နဲ့ GPT-4 models တွေကို chat ကနေ ဖယ်ရှားလိုက်ပြီး Open AI Models 5.1 နဲ့ 5.2 (Chat+API) သုံးလို့ရပြီလို့ ကြေညာသွားပါတယ်။ တခြား updates တွေလည်းပါပါတယ်။

ကျောင်းစတက်တုန်းက Digital Skills Program ကစီစဉ်ကပေးတဲ့ သင်တန်းတွေထဲက
Generative AI: Introduction to responsible use of Generative AI and ELM for students ဆိုတဲ့ sharing session ကိုတက်တော့ UoE မှာ ELM /အယ်လ်/ လို့ခေါ်တဲ့ ကိုယ်ပိုင် platform ရှိတယ်ဆိုတာကို စသိတယ်။ ELM ဆိုတာ UoE ရဲ့ AI ဆန်းသစ်တီထွင်မှု ပလက်ဖောင်းဖြစ်ပြီး Large Language Models (LLMs) တွေကိုအသုံးပြုပြီး GenAI ကို ပိုမိုလုံခြုံစွာ အသုံးပြုနိုင်ဖို့လုပ်ထားပေးတာဖြစ်တယ်။

ELM နဲ့ပတ်သက်ပြီး အချို့ဖော်ပြချက်ပါ။
-ELM က OpenAI နဲ့ zero data retention agreement ချုပ်ထားတဲ့အတွက် OpenAI က အချက်အလက်တွေကို မသိမ်းထားနိုင်ပါဘူး။
-Data တွေကို UoE ရဲ့ကိုယ်ပိုင်ဒေတာစင်တာတွေမှာလုံခြုံစွာ သိမ်းထားတာဖြစ်တဲ့အတွက် ChatGPT ကိုတိုက်ရိုက်သုံးတာထက် ပိုမိုလုံခြုံပါတယ်။
-GenAI တွေက သဘာဝပတ်ဝန်းကျင်တွေကို ထိခိုက်စေတာမလို့ ELM မှာ စွမ်းအင်အသုံးပြုတာတွေကို လျှော့ချဖို့၊ ဒေသတွင်း အသုံးပြုနိုင်ဖို့ ရည်ရွယ်ပါတယ်။
-GPT model အသစ်တွေကစျေးကြီးတာဖြစ်တဲ့အတွက် ကျောင်းသားတွေနဲ့ ဝန်ထမ်းတွေအားလုံး အခမဲ့အသုံးပြုနိုင်အောင် စီစဉ်ပေးထားတယ်။
-အသုံးပြုဖို့ပေးထားသလို guidelines နဲ့ training တွေလည်းပေးပါတယ်။
-ELM ကို academic/research အတွက် train ထားတာဖြစ်တဲ့အတွက် တခြား GenAI ထက် ပညာရေး၊ သုတေသနအတွက် ပိုမိုသင့်လျော်တယ်လို့ဆိုပါတယ်။

ကျောင်းမှာ GenAI အသုံးပြုမှုဆိုင်ရာ guidelines ကိုချမှတ်ပေးထားပါတယ်။
https://information-services.ed.ac.uk/computing/comms-and-collab/elm/generative-ai-guidelines-for-students
သက်ဆိုင်ရာဘာသာရပ်/အတန်းအလိုက် guidance တွေ သီးသန့်ထပ်ရှိပါတယ်။
Assignment တင်တဲ့အခါမှာလည်း GenAI အသုံးပြုသည်ဖြစ်စေ၊ မသုံးသည်ဖြစ်စေ declare လုပ်ရပါတယ်။ Academic integrity ကိုအလေးထားကြတာမလို့ GenAI ကို သုံးတယ်ဆိုရင် ဘယ်လောက်အတိုင်းအတာထိ ဘယ်လိုအသုံးပြုပါတယ်ဆိုတဲ့ transparency ရှိမှုကိုပြသခိုင်းပြီး guidance မှာခွင့်ပြုထားတာထက် ကျော်လွန်ပြီးအသုံးပြုမယ်ဆိုရင်တော့ academic misconduct အဖြစ်အစစ်ဆေးခံရနိုင်ပါတယ်။

GenAI tools တွေက သူတို့ထုတ်ပေးလိုက်တာတွေကို သူတို့ကိုယ်တိုင်နားလည်နိုင်စွမ်းမရှိပါဘူး။ Language Models ကိုအခြေခံထားတာကြောင့် language patterns တွေကိုပဲ train ထားတာမလို့ ဘယ်စကားလုံးပြီးရင် ဘာထပ်လာမယ်ဆိုတာကိုပဲ ခန့်မှန်းပြီး အဖြေထုတ်ပေးသွားတာပါ။ ဒါကြောင့် GenAI က ပေးတဲ့ အချက်အလက်တွေက တိကျမှန်ကန်မှုမရှိတတ်ဘူး။ Bias တွေပါတတ်တယ်။ မရှိတဲ့ paper တွေ reference တွေကို ကိုးကားဖော်ပြတတ်တယ်။

AI ကို အရမ်းမှီခိုအားထားတဲ့အခါ ကိုယ်ပိုင်စဉ်းစားတွေးခေါ်နိုင်စွမ်းတွေလျော့ကျနိုင်တယ်။
Cognitive Offloading - ကိုယ်တိုင်မစဉ်းတော့ဘဲ နည်းပညာတွေနဲ့ပြင်ပနည်းကိရိယာတွေကို အားကိုးရာကနေ သိမှုဆိုင်ရာအားနည်းလာမယ်၊ ဆင်ခြင်သုံးသပ်နိုင်စွမ်းတွေကျဆင်းလာမယ်။
Metacognitive Laziness - ကိုယ့်အတွေးတွေကို မဆန်းစစ်တော့ဘူး၊ အပေါ်ယံသာလေ့လာပြီး နက်နက်နဲနဲ မစဉ်းစား၊ မသုံးသပ်တတ်တော့ဘူး။
Critical Thinking Capacity Reduction - ဝေဖန်ပိုင်းခြားစဉ်းစားနိုင်စွမ်း လျော့နည်းတာ စတာတွေ ဖြစ်နိုင်တယ်ဆိုပြီး သတိပေးထားပါတယ်။

တစ်နေ့ကမျှဝေပေးထားတဲ့ သင်တန်းကြော်ငြာစာမှာလည်း assignment တင်တဲ့အခါ AI အသုံးပြုမှုနဲ့ plagiarism ကိုလုံဝလက်မခံကြောင်း ဖော်ပြထားပါတယ်။ Academia တွေမှာ Academic integrity ကိုပိုအလေးထားကြပါတယ်။ ကျောင်းပြီးရင် ရသွားရမယ့် academic skills တွေဖြစ်တဲ့ ဥပမာ - critical thinking, reasoning, research and analytic skills, problem solving, academic integrity စတာတွေကို လေ့ကျင့်ပျိုးထောင်ပေးဖို့ ရည်ရွယ်တာမလို့ GenAI ကို အကန့်အသတ်နဲ့သာ တာဝန်သိစွာသုံးတတ်ဖို့ အားပေးပါတယ်။ GenAI ကိုအရမ်းမှီခိုအားထားတာကို အားမပေးပါဘူး။ တာဝန်သိသိနဲ့ စနစ်တကျသုံးတတ်ဖို့ကို တိုက်တွန်းအားပေးပါတယ်။

လုပ်ငန်းခွင်တွေမှာတော့ scale, efficiency, effectiveness တို့ကိုပိုအလေးထားတာမလို့ GenAI အသုံးပြုမှုကို ပိုအားပေးတယ်လို့ထင်ပါတယ်။

-နည်းပညာ၊ AI tools တွေလွှမ်းမိုးမှုပိုရှိလာတာနဲ့အမျှ စာသင်ခန်းတွေနဲ့ သင်ကြားသင်ယူမှုမှာ ဘယ်လိုသက်ရောက်မှုတွေ ရှိလာပါသလဲ။
-စာသင်ကြားနေကြတဲ့ ဆရာ၊ ဆရာမတို့အနေနဲ့ Digital/GenAI အသုံးပြုမှုဆိုင်ရာ လမ်းညွှန်မှုတွေကို ဘယ်လိုလုပ်ဆောင်ကြလဲဆိုတာ လေ့လာချင်ပါတယ်။

Ref: အချို့အချက်အလက်များကို UoE GenAI လမ်းညွှန်ချက်များနှင့် ELM အကြောင်းဖော်ပြချက်များကနေ ကောက်နုတ်ဖော်ပြထားပါတယ်။

24/02/2026

UNESCO APCEIU ရဲ့ GCED Online Campus မှ ဖွင့်လှစ်ထားတဲ့ Glocal Justice and Peacebuilding သင်တန်း

❔ GCED Online Campus က educators တွေအတွက်ရည်ရွယ်ပြီး ဖွင့်လှစ်တဲ့သင်တန်းတွေဖြစ်ပါတယ်။ Global Citizenship Education ဆိုင်ရာ အသိပညာနဲ့ နားလည်မှုကိုရရှိစေတဲ့ အခြားနေရာတွေမှာ ပေးလေ့ပေးထမရှိတဲ့ သင်တန်းတွေဖြစ်ပါတယ်။ စိတ်ဝင်စားတဲ့သူမည်သူမဆို လေ့လာနိုင်ပါတယ်။

🗒️ သင်တန်းဘယ်လိုတက်ရမလဲ
GCED Online Campus မှာ အကောင့်တစ်ခုအရင်ဖွင့်ပါ။ တက်‌ရောက်လိုတဲ့သင်တန်းကို register လုပ်ပြီးတက်ပါ။ Instructor-led course တွေက လူဦးရေကန့်သတ်ထားပြီး သင်တန်းအစအဆုံး တစိုက်မတ်မတ် အချိန်ပေးတက်ရောက်ဖို့လိုအပ်တာမလို့ လျှောက်လွှာအရင်တင်ပြီးမှ သင်တန်းစီစဉ်သူတွေက ပြန်လည်ရွေးချယ်ပါတယ်။အမှန်တကယ်စိတ်ဝင်စားကြောင်းဖော်ပြနိုင်ရင် သေချာပေါက်အရွေးခံရပါတယ်။

📆 သင်တန်းအချိန်
GCED Online Campus က ဖွင့်လှစ်တဲ့ သင်တန်းတွေအားလုံးက အခမဲ့ဖြစ်ပါတယ်။ Open courses တွေဆိုရင် တစ်နှစ်ပတ်လုံး အချိန်အကန့်အသတ်မရှိ အဆင်ပြေတဲ့အချိန်မှာ ဝင်ရောက်လေ့လာနိုင်ပါတယ်။ Courses by registration က သင်ကြားတဲ့သူဦးဆောင်တဲ့ သင်တန်းမလို့ တစ်နှစ်မှတစ်ကြိမ်သာဖွင့်လေ့ရှိပြီး သတ်မှတ်ထားတဲ့အချိန်အတွင်း လျှောက်လွှာတင်ပြီး ရွေးချယ်ခံရရင် သတ်မှတ်ထားတဲ့အချိန်ဇယားအတိုင်း တက်ရောက်ရမှာဖြစ်ပါတယ်။

📗 သင်ကြားမှုပုံစံ
အပတ်စဉ်ကြိုတင်လေ့လာဖတ်ရှုရတဲ့ reading list ရှိပြီး discussion forum မှာပေးထားတဲ့ guided questions အပေါ်အခြေခံပြီး ဝင်ရောက်ဆွေးနွေးရပါတယ်။ ပြီးရင်တစ်ပတ်တစ်ခါ ဆရာနှင့် တွေ့တဲ့အတန်းမှာလည်း ဖတ်ထားတဲ့အကြောင်းအရာတွေကို ပြန်လည်ဆွေးနွေးတာ ဆရာက ရှင်းပြတာ အမေးအဖြေစတာတွေကို လုပ်ဆောင်ကြပါတယ်။ ဆရာက တစ်ဦးချင်းဆွေးနွေးချက်ကို feedback သေချာလေးပြန်ပေးပါတယ်။ သင်တန်းတက်ရောက်သူတွေက နယ်ပယ်အသီးသီးမှာ အတွေ့အကြုံရှိကြတဲ့သူတွေများတာမလို့ အားလုံးဆီကနေလည်း လေ့လာသင်ယူရပါတယ်။

✅ သင်တန်းနဲ့ပတ်သက်ပြီး အကြိုက်နှစ်သက်ဆုံးအချက်တွေက
- သင်တန်းတွေအားလုံးက အခမဲ့ဖြစ်တဲ့အပြင် Instructor-led course တွေက ဝါရင့်ဆရာတွေ သက်ဆိုင်ရာ ဘာသာရပ်မှာ အတွေ့အကြုံများစွာရှိတဲ့ ဆရာတွေက စေတနာနာပါပါနဲ့ သေချာလေးစီစဉ်သင်ကြားပေးတာပါ။
- ဆရာဦးဆောင်တဲ့ သင်တန်းတွေမှာ အကြောင်းအရာတစ်ခုကို တစိုက်မတ်မတ်နဲ့ အချိန်တစ်ခုပေးပြီး လေ့လာရတာဖြစ်လို့ ပိုထိရောက်ပါတယ်။
- သင်ကြားမှုပုံစံက နိုင်ငံတကာပညာရေးအတွေ့အကြုံမရှိခဲ့တဲ့ ကျွန်မအတွက် အတွေ့အကြုံအသစ်တစ်ခုဖြစ်စေပြီး၊ အဆင့်မြင့်ပညာရေးဘက်ပြန်ကူးတဲ့အချိန်မှာလည်း အထောက်အကူအများကြီးဖြစ်စေခဲ့ပါတယ်။
- တစ်ယောက်ချင်းစီရဲ့ဆွေးနွေးတင်ပြချက်တွေကို feedback လေးသေချာပြန်ပေးတာကိုတော့ အကြိုက်ဆုံးပါ။ ဆရာတွေက မြန်မာဆိုတာကိုလည်းသိပြီး feedback ပြန်ပေးတဲ့အခါမှာလည်း မြန်မာနဲ့ဆိုင်တာလေးတွေ ပြန်လည်ဆွေးနွေးမျှဝေပေးပါတယ်။
- ဒီသင်တန်းကနေတစ်ဆင့် နိုင်ငံပေါင်းစုံက သူငယ်ချင်းမိတ်ဆွေအသစ်တွေလည်း အများကြီးရခဲ့ပါတယ်။

🗞️ သင်တန်းပြီးရင် ဘာတွေရမလဲ
အပေါ်ကအချက်တွေနဲ့တင် သင်တန်းတက်ခွင့်ရတာ အရမ်းတန်ဖိုးရှိနေပါပြီ။ သင်တန်းကသတ်မှတ်ထားတဲ့ ပြီးစီးရမယ့်လိုအပ်ချက်တွေနဲ့ကိုက်ညီရင် သင်တန်းပြီးစီးကြောင်းလက်မှတ်ရပါတယ်။

အရင်နှစ်တုန်းကလည်းတစ်ခါရေးဖူးပေမယ့် ဒီနှစ်အတွက် batch အသစ်ထပ်ခေါ်နေပြီမလို့ စိတ်ဝင်စားတဲ့သူတွေ လိုအပ်တဲ့သူတွေအတွက် အကျိုးရှိမယ်ထင်လို့ ထပ်ပြီးမျှဝေလိုက်ပါတယ်။

GCED Online Campus >> https://lnkd.in/gKpYmYSU

Course poster credit to the rightful owner.

hashtag hashtag hashtag hashtag hashtag