28/05/2021
ရန်ကုန်မြို့နေ ပြည်သူများထံသို့ ပြောက်ကျားတော်လှန်ရေး တပ်သားများက မေတ္တာရပ်ခံချက်ထုတ်ပြန်၊ အခွန်မဆောင်ရန်နှင့် နေအိမ်ပြင်ပ မထွက်ခွာရန် အသိပေး
ရန်ကုန်၊ မေ ၂၈
ရန်ကုန်မြို့နေ ပြည်သူများအနေဖြင့် မဖြစ်နေ လိုက်နာရန် ပြောက် ကျား တော်လှန်ရေး တပ်သားများအမည်ဖြင့် မေတ္တာရပ်ခံချက်တစ်စောင်ကို ယနေ့ နေ့စွဲဖြင့် ထုတ်ပြန်ပြီး အဆိုပါ မေတ္တာရပ်ခံချက်တွင် အချက် ၄ ချက်ကို အဓိက မေတ္တာရပ်ခံထားကြောင်း သိရှိရသည်။
အဆိုပါ မေတ္တာရပ်ခံချက်တွင် ရန်ကုန်မြို့နေပြည်သူများလိုက်နာရန်ဟု ဆိုကာ အချက် ၄ ချက်ကို ဖော်ပြထားရာတွင်
၁။ အာဏာသိမ်းစစ်ကောင်စီသို့ အခွန်ပေးဆောင်ရန် အတွက် စုဝေးခြင်း များ မပြုလုပ်ရ။ (ဥပမာ -မီတာဆောင်ခြင်း)
၂။ လိုအပ်မှု မရှိဘဲ နေအိမ် ပြင်ပသို့ ထွက်ခွာခြင်းမပြုလုပ်ရ။
၃။ စစ်ခွေး၊ရဲခွေးများနှင့် စကားပြောဆိုခြင်း၊ ကူညီဆောင်ရွက်ခြင်းများ မပြုလုပ်ရ၊
၄။ စစ်ကောင်စီ၊ ဒလန်များ၏ သားသမီးများဆွေမျိုးများနှင့် တွေ့ဆုံခြင်း အတူတကွ နေထိုင်ခြင်းများမပြုလုပ်ရ တို့ပါဝင်သည်။
"ကျနော်တို့ ပြည်သူတွေကို ဒါက မေတ္တာရပ်ခံတာပါ။ ဒါတွေက မဖြစ်မနေ လိုက်နာဖို့ လိုပါတယ်" ဟု ပြောက်ကျားတော်လှန်ရေးတပ်သားများ ခေါင်း ဆောင်တစ်ဦးက ပြောဆိုသည်။
ရန်ကုန်မြို့တော်တွင် အကြမ်းဖက်စစ်ကောင်စီတပ်များကို ပစ်ခတ်မှုဖြစ်စဉ် တောက်လျောက်ဆိုသလို ဖြစ်ပေါ်နေချိန်တွင် အဆိုပါ မေတ္တာရပ်ခံချက် ထွက်ပေါ်လာခြင်းဖြစ်သည်။
