17/05/2026
အထက်တန်းဆင့်သိပ္ပံဘာသာရပ်တွေကိုမြန်မာလိုသင်ဖို့လိုပြီလား....?
ဆိုတော့
သိပ္ပံဘာသာရပ်တွေကို ကျွန်တော်တို့နိုင်ငံမှာ ဘယ်အတန်းလောက်ကစပြီးသင်နေကြသလဲဆိုတာအားလုံးသိကြမှာပါ။
Grade1 အဆင့်မှာကလေးတွေပတ်ဝန်းကျင်စူးစမ်းလေ့လာတတ်စေဖို့၊သက်ရှိသက်မဲ့အကောင်လေးတွေ၊ကုန်နေရေနေသတ္တဝါလေးတွေကိုသိရှိစေနိုင်ဖို့နဲ့လေးခြင်းပေါ့ခြင်းသင်ခန်းစာလေးတွေကအစ လက်တွေ့နဲ့ပေါင်းစပ်ပြီးသင်နေကြတာမျက်မြင်ကိုယ်တွေ့ပါ။
တဖြည်းဖြည်းနဲ့အတန်းလေးတွေမြင့်လာလေလေသင်ယူမှုနယ်ပယ်ဟာပိုကျယ်ဝန်းလာပါတယ်။ဒါကလည်းသင်ရိုးညွှန်းတမ်းတစ်ခုဆိုတာက ခရုပတ်နည်းအရအသက်အရွယ်နှင့်ဉာဏ်ရည်အတန်းအဆင့်လိုက်ဆွဲကြရတာပါ။ယခုလက်ရှိသင်ရိုးသစ်Grade5 မူလတန်းဆင့်ကိုတစ်ချက်ကြည့်လိုက်ပါဦး။ကျွန်တော်တို့ကျောင်းသားဘဝGrade10အဆင့် ဇီဝဗေဒမှာသင်ရတဲ့ "အစေ့မှအပင်ပေါက်ခြင်းအဆင့်များ"ဆိုတဲ့သင်ခန်းစာတွေကစလို့ ၊ဒြပ်ဝတ္ထုအကြောင်းတွေ၊ကျောရိုးရှိကျောရိုးမဲ့နှင့်ပတ်သက်လို့အရိုးဖွဲ့စည်းပုံတွေပါမကျန် ပျော်ရည်၊ဖျော်ရည်၊ပျော်ဝင်ပစ္စည်း၊သံလိုက်အကြောင်းတွေကိုပါထည့်သွင်းရေးဆွဲထားပါတယ်။
အလယ်တန်းအဆင့်ကိုလည်းတစ်ချက်ရှိုးကြည့်လိုက်ပါဦး။
ဓာတုဗေဒအခြေခံတွေဖြစ်တဲ့ ဒြပ်စင်များအကြောင်း၊အက်တမ်တည်ဆောက်ပုံများအကြောင်း၊အလှည့်ကျဇယား(periodic table)၊ဓာတ်ငွေ့ထုတ်ဖော်ခြင်းသင်ခန်းစာများထည့်သွင်းထားသလို။
ရူပဗေဒအခြေခံတွေဖြစ်တဲ့ သက်ရောက်အား၊ဖိအား၊အရှိန်၊အဟုတ်သင်ခန်းစာများကစလို့ (mechanic)မက်ကဲနစ်၊(electronic)အီလက်ထရောနစ် ပိုင်းများ၊အာကာသနှင့်စကြာဝဠာ၊သံလိုက်အကြောင်းအရာများကိုလည်းစုံစုံလင်လင်ထည့်သွင်းထားတာကိုတွေ့ရပါတယ်။
ဒါ့အပြင်ဇီဝဗေဒအခြေခံတွေဖြစ်တဲ့ သက်ရှိများ၊ဆဲလ်များ၊ခန္ဓာကိုယ်ဖွဲ့စည်းတည်ဆောက်ပုံများနှင့်အလုပ်လုပ်ပုံများ၊ဘဝစက်ဝန်းများ၊အပင်အမျိုးအစားများအကြောင်းများစွာကိုအကျယ်တဝင့်လေ့လာကြရမှာဖြစ်ပါတယ်။ဒါ့အပြင်
သိပ္ပံဘာသာရပ်အကြောင်းဆိုတော့ "ပထဝီဝင်"ဘာသာရပ်ကိုလည်းချန်ထားခဲ့လို့မရပါဘူး။သင်ရိုးသစ်မှာသဘောအကျဆုံးက Grade9 ပထဝီဝင်ဘာသာရပ်ပါ။လေတိုက်နှုန်း၊အိုက်ဆိုဘား၊မိုးလေဝသခန့်မှန်းချက်များ၊မြေပုံကြည့်၍ခန့်မှန်းခြင်းများဟာကျွန်တော့်အတွက်အင်မတန်စိတ်ဝင်စားဖို့ကောင်းတာမို့ အထူးတလည် သေသေချာချာလေ့လာမိတဲ့သင်ခန်းစာဆိုလည်းမမှားပါဘူး။
ကဲ...စပါပြီ။
ဒီလို..ဒီလို..အကြောင်းအရာကဏ္ဍမျိုးစုံကို မူဆင့်နှင့်လယ်ဆင့်မှာ ကျယ်ကျယ်ပြန့်ပြန့်လေ့လာပြီး အပြန်ပြန်အလှန်လှန်ဆွေးနွေးခဲ့ကြတဲ့ကျောင်းသားတွေဟာ အထက်တန်းအဆင့်လည်းရောက်ရော ဆယ်ကျော်သက်အရွယ်စိတ်ကစားတာတွေရော၊ဖုန်း၊ဂိမ်းစွဲလမ်းကြတာတွေရောကြောင့် Grade10မှာ စတင်ပျက်စီးကြပါပြီ။နဂိုကမူဆင့်၊လယ်ဆင့်မှာတော်ပြီးထူးချွန်ခဲ့တဲ့ကလေးတွေဟာ အထက်တန်းအဆင့်မှာအကြောင်းအမျိုးမျိုးနဲ့ ပျက်စီးသွားကြတာကြောင့်ရော၊သင်ရိုးအားလုံး(မြန်မာစာ၊ဘောဂ)မှလွဲပြီး
English လိုသင်ရတာကြောင့်ရော နဂိုကတည်းက "ပျက်စီးချင်ရက်လက်တို့"ကလေးတွေဟာ စာမလိုက်နိုင်တော့ပါဘူး။GRADE12ပြီးရင် CC(completion certificate)ရရင်ပြီးရောဆိုပြီး ဆူငေါက်ခံတက်နေကြတဲ့ကလေးတွေသာများလာပါတယ်။ကိုယ့်တစ်ကျောင်းတည်းလားလို့ စုံစမ်းကြည့်တော့ အခြားကျောင်းက ကလေးအများစုဟာလည်းအဲ့လိုပဲဆိုတော့ ငါတို့မျိုးဆက်သစ်တွေတော်တော်ပျက်စီးနေကြပါလားလို့တောင်တွေးမိပါတယ်။ပျက်စီးဆို ယောက်ျားလေးဆို ဆေးလိပ်၊ဘီယာ၊ကွမ်းယာ ပါမကျန် ကိုယ်မသိနိုင်တဲ့လက်လှမ်းမီတဲ့အရာတွေပါအကျန်အကုန်တတ်နေကြသလို၊မိန်းကလေးတွေကလည်း စာမှာအာရုံမရှိတော့ဘဲ
အရွယ်မတိုင်ခင်အိမ်ထောင်ပြုတဲ့လမ်းကိုဦးတည်ပြီး အားအားနေ မှန်၊ဘီး၊မိတ်ကပ်အစုံအလင်နဲ့ "ကိုသာဂိ အလှပြင်ခန်းမ"လား စာသင်ခန်းလားတောင်မနည်းခွဲယူရတဲ့အဖြစ်ပါ။ဟော...နွေလည်းကျောင်းပိတ်ရော "ဆရာ..သား/သမီးတို့ မင်္ဂလာဆောင်လာဦးနော်"လို့တောင်ခပ်တည်တည်နဲ့ဖိတ်သွားကြတော့ "ကိုယ့်မှာစိတ်နာနာနဲ့ ခြံဝမှာ ပပဝင်းခင်လို ဖိတ်စာကိုတောင်ဆွဲဖြဲချင်စိတ်တွေတဖွားဖွားပေါ်လာ"တော့တာပါပဲ။
စကားရှည်သွားပါပြီ။
ဆိုတော့ကာ ဒီလိုလမ်းလွဲနေတဲ့အမိ မြန်မာပြည်ရဲ့ဆယ်ကျော်သက်အရွယ်ကျောင်းသား/သူ လူငယ်လေးတွေဘာလို့စာကိုစိတ်မဝင်စားကြတော့တာလဲဆိုတာတွေးရင်း..."တပည့်ရင်းလူဆိုးတစ်သိုက်"ကိုမေးကြည့်တော့-
"ဆရာရယ်..သားတို့မှEngစာမှမရတာ၊အကုန်လုံးEngလိုချည်းဆိုတော့သားတို့မလိုက်နိုင်တော့ဘူးဆရာ။ဆရာတို့တုန်းကတော့မသိဘူး။သားတို့သင်ရတဲ့စာတွေကတအားခက်တာပဲ...လာမဲ့နှစ်သားတော့ကျောင်းထွက်ပြီဆရာ။အပြင်အလုပ်ပဲလုပ်တော့မယ်။စာမေးပွဲတိုင်း အခန်းထဲမှောက်အိပ်နေရတာလည်းဆရာတို့ကိုအားနာမိပြီ"
ဆိုတဲ့ ရင်ထဲကစကားသံတွေကြားရတော့လည်းစိတ်မကောင်းရုံကလွဲဘာတတ်နိုင်မှာလဲ။
သူတို့ပြောတာလည်းမမှားပါဘူး။သူတို့ပေးဆပ်ရတဲ့အချိန်တွေနဲ့ရလာမဲ့ရလာဘ်က မကာမိတော့ကျောင်းထွက်ချင်တာမဆန်းပါဘူး။Grade10လောက်မှာ မသိသာပေမဲ့ Grade11ရောက်တဲ့အခါ ဘာသာရပ်တိုင်းက ဆရာတွေတောင်အင်မတန်လေ့လာရတာမို့ နှစ်ဝက်လောက်ဆိုသူတို့မှာကျောင်းထွက်ချင်လာကြပါပြီ။သူတို့နောက်တစ်နှစ်ဆိုတာကို ဆက်လက်သည်းခံနိုင်စွမ်းတွေကုန်သွားကြပြီထင်ပါတယ်။
ဒါဆိုရင် ကျွန်တော်တို့လူကြီးတွေအနေနဲ့ကမျိုးဆက်သစ်လူငယ်တွေအတွက်
-Englishစာစွမ်းရည်ပိုမြှင့်ပြီးသင်ပေးရမှာလား
-Physics,Chem,Bio စတဲ့သိပ္ပံဘာသာရပ်တွေကို မြန်မာလိုပြောင်းလဲဖို့လိုနေသလား ဆိုတာ
စာဖတ်သူတို့ဝင်ရောက်ဆွေးနွေးပေးသွားကြပါဦးခင်ဗျာ။
မှတ်ချက်။ ။အပြုသဘောဆောင်သောcommentများကိုသာလက်ခံပါသည်။နိုင်ငံရေးကိုငြိစွန်းစေသောအမုန်းစကားများ၊ဆဲရေးတိုင်းထွားချင်းများပြုခဲ့သော် မိမိ၏ ကိုယ်နှုတ်အမူအရာကြောင့်သာတန်ပြန်ခံစားရပါမည်။
ဆရာမျိုးကို(မြန်မာစာ)
