20/09/2024
لح بلش بأسلوب الاستطراد وحأحكي باللهجة العامية أو الدارجة وليس الفصحى كونه هالمنشور ناتج عن صفنة بعد غدوة مرتبة . (يعني كملوا البوست للأخير لتعرفوا شو قصدي بما سبق )
المهم هاد يا جماعة الخير بزمناتي من زمان كتير كنت عم اتفرج عالاشخاص يلي بيحضرو ورشة عن ريادة الأعمال وقتها يلي لفتني انو هدول الاشخاص مفكرين أنو الواحد ليكون رائد أعمال لازم يكون عنده فكرة فضائية وإذا ساوا فكرة عادية معناتا هاد واحد فاشل وما بيفهم بريادة الأعمال ...ليجي وقتها المحاضر اللي كان عم يعطي الورشة وبيقول يا ولادي : حطو ببالكن أنو حتى البسطة هي مشروع ريادي
المغزى كيف تساوي بسطتك أحسن بسطة بالسوق وتخليها مميزة ,طبعا الكلام لهلق بيتردد ببالي بكل مشروع بشارك فيه وكل فكرة بأسسها ,بغض النظر عن التجربة اللطيفة وقتها وهالمعلومة اللي غيرت حياتي فعليا
بيومنا هاد منلاحظ أنو فئة الشباب عنا صارو اتكاليين بشكل فظيع وفكرة أنو يبلشوا بشي خاص الهن جدا ضئيلة طبعا هالشي مبني على نتائج دراسة صغيرة مبدأية عملتا من فترة وتفكير الشباب للأسف صاير كارثي جدا
طنشوا ما سبق منجي لموضوعنا ..
بيقلولك وقت تأسس مشروع جديد أهم شي تختار فريقك بشكل صحيح هالنقطة اللي أغلب الرياديين بيعانوا منها وطبعا هالشي هو اللي بيخلق مشاكل مستقبلية كبيرة جدا جدا ,طب مشاكل متل كيف مثلاً؟
يعني مثلا تختار حدا يكون معك وتحط قبل اسمه مؤسس وهو يكون بالمعنى الحرفي رجل كرسي بالفريق يعني بالمشرمحي لا بيقدم ولا بيأخر بس جاية يسمع ويبني مجد عكتاف صاحب الفكرة الرئيسية بدون ما يقدم ولو حتى كلمة وحدة بتفيد الفريق أو المشروع ..غالبا هالشخص بيكون حدا من الرفقات اللي بيستحي صاحب الفكرة الرئيسية أنو يقلو خود الباب بطريقك وبيضل بيسعى ليطور من هالشخص أو يعطيه فائدة بس سلامتك صبة الباطون المسلح الفوقانية معلقة ومو حابة تطور حالها إذا عندك هيك شخص بفريقك فقلو من البداية عشغلات أساسية لازم يعلمها ليخلق استمراريته بمشروعك وإلا شو بدك فيه فهمني فيا صديقي رائد الأعمال حلو جدا جدا يكون معك أصدقائك بمشروعك تأسسوا سوا وتكبروا سوا بس انتبه عكلمة سوا مو عكتافك اوعا ها
تاني أهم شغلة بنظري بالمشاريع الريادية هي توقيت ومكان إطلاق المشروع ,التوقيت المناسب لإطلاق مشروعك جدا مهم فمثلا أكيد ما حتطلق مشروع بيحتوي عمنتجات بتخص فصل الصيف بالأشهر شديدة الحرارة بوقت عم تنزل فيه التلوج حواليك (طبعا هون بيكون القياس لمدى ملائمة المنتج والفكرة للوقت الراهن والأمر بيرجع لعدة عوامل وهاد مثال بسيط لا أكثر )والمكان طبعا ما حتطلق مشروع تطبيق الكتروني لمستحضرات التجميل بمكان ما فيه شبكة انترنت أو بمكان فيه مجاعات مثلا متل بعض مناطق الصومال
شغلة تانية مترابطة بالزمان و بفريق العمل في شغلة جدا جدا مهمة أنو وقت تقرر تأجل مثلا إطلاق مشروعك ويطلعلك حدا من الأشخاص اللي حاكي عنهن المثال السابق - تبع صبة الباطون المسلح - وتجي تقوم عليك (طبعا هنن ما بيكونوا فهمانين شي بس كيف توقف مشروع عم يطلع فيه اسمهن عكتافك) هون بتتحرك عندهن كتلة الاسمنت المسلح وبيبلشوا فوق مانك وآسف عالمصطلحات بس فوق مو عاطيهن قدر بيتكبروا بزيادة وحتى علاقة الصداقة اللي أنت بسببها مفوتهن عفريقك بينزعوها وما بيعتبرولا قيمة ..تجنبا لحدوث هذا الأمر أو إذا صار معك الأمر بعد قرار تأجيل إطلاق مشروعك فهون يا صديقي مو بس شو بدك فيه هون صار الباب بيفوت جمل و بهل الحالة بتكون فعليا فرصة الك لتعمل تغيير نوعي وتكمل مع فريق بيتناسب مع فكرتك وأشخاص تخلي نجاح فكرتك من نجاحهن ..
كتير من الأخطاء المذكورة بيكون بسبب أنو مافي دراسة موسعة عن المشروع وفكرته ومين جمهورو المستهدف وشو الشغلات اللي المشروع عنجد بيطلبها إن كان من أصول بغض النظر حقيقية او مووو حقيقية أو من عقول شغالة مو صبات باطون مسلح مقاوم للزلازل
فكمان نصيحة تانية قبل إطلاق أي مشروع ادرسه منيح وحاول أمن الحد الأدنى من المتطلبات لإطلاقه لتتجنب انو يوقع بعد فترة و ما يكون فيه استمرارية
وأخيرا وليس آخرا إذا فشلت بشي مشروع هاد ما بيعني تعمل شلال أحزان و ديما دموع وتبلش توصف حالك بالفاشل .شوف وين الفجوة ووين كانت الأخطاء اللي خلتكك تفشل وحاول طور أكتر وبلش من جديد
وما بينخاف عليك يا بطل.............. اي يا بطل
هاد الحكي دايما موجود و شفت و سمعت عن مواقف بعدد شعر راسي و خليكن صاحين من الأشخاص الظراف الموجودين حوالينا اصحاب الصبات (صحي صديقي انتبه من الناس المسمومة هدول شيات اللي ما بيقدموا ولا بيأخروا وبيضحوا فيك عند أصغر هفوة) شيلك منن اي؟
