Better Life_With Jimmy

23/11/2025

من أفضل تعاريف القبول هو يلي مر معي بمسلسل (قلم حمرة)
بيقوله عابد فهد بدوره الطبيب نفسي (تيم)...
بيقول: "شو يعني قبول؟
يعني أنت ماعندك مانع تكون غنمة وتعيش بهالمجتمع وبهالحياة يلي عايشينها من غير ماتعترض على شي."
بدها صفنة عميقة 😉

20/11/2025

فكرت بكل الصراعات يلي بتصير بالحياة
فكرت بمشاكلي الشخصية أنا
فكرت بالحروب
فكرت ..وفكرت.. وفكرت
والنتيجة كانت...
" لم يخذلني الشخصُ بل خذلَتني الفكرةُ."
الفكرة هي أساس كل شي... من البداية حتى النهاية.
جميلة الملا

02/11/2025

28/10/2025

الشمس أكتر شي بالحياة بيخليني حس إني بخير
حتى لو كنت عم عاني ومالي بأفضل حالاتي
مجرد إني أشعر بأشعة الشمس عم تلامسني رح حس بالهدوء والراحة
هي نور... النور يلي بيخلينا ننولد من جديد بكل لحظة
وفي عنا أنواع للنور بالحياة متل نور العلم، نور المعرفة، نور الحبّ، نور الأصدقاء الحقيقين ، نور عم يسطع من جواتنا يا منعطيه فرصة يظهر للآخر أو منطفيه بأيدنا ومننسى إنه هاد جزء منا متله متل أي عضو بالجسم بس لأنك مو حاسس بألم البتر عم تنسى ترجع تتفاعل معه لكن الروح هي لي حاملة كل الألم، هاد بيشبه... أو لاء يمكن جزء من (نور الشمس)
تخيل معي
اسم بسيط من 3 أحرف ش، م، س اجتمعوا وكونوا اسم يحمل
ولادة الكون بذاته بكل يوم عم تطلع فيه الشمس

27/10/2025

كلام يُقال منك وإليك 😉
🪻🪻🪻

26/10/2025

اليوم فيه ذكرى حلوة من اختياري
قررت إنه يكون هاد اليوم صحي بامتياز من A to Z
وطبعاً ضليت أسأل حالي "شو بدي بالضبط أعمل لحافظ على هدفي؟"
ببداية الأمر اعتمدت نظام غذائي صحي
فقت بكير ورح نام بكير طبعاً لأنه من ضمن الروتين الصحي هو النوم السليم.
نويت إني حافظ على راحة مشاعري و أتجنب القلق أو التوتر أو التعصيب تماماً بهاد اليوم
نويت غذي عقلي واستثمرت صباحي ببودكاست ونقاش علمي
استقبلت من الكون كل شي منحني إياه بمقابل أو مجاناً بيخدم مصلحتي وشعرت إنه بيحمل رسالة خاصة إليّ
~ الروتين الصحي يلي أنا شخصياً ببحث عنه لا يعتمد فقط على غذاء الجسد ونوعية الطعام، بل هو أوسع وبرأيي لازم يشمل العقل والروح بنفس درجة الأهمية.
بعد تأملي لليوم أضفت بعض القيم المهم أخذها بعين الاعتبار أثناء التحدي، متل: الوعي، الإدراك، العلم، الطبيعة، نوعية العلاقات، اللغة.
مو معقول بهيك يوم ألتقي بشخص ينكدلي عيشتي🤣
فكروا بهيك روتين من قبل؟
جميلة الملا

25/10/2025

كل شي بالحياة قائم على الاحتمالات
والإنسان اللي بده يفهم بيضل عم يطرح أسئلته وتساؤلاته
في أمور باستطاعتنا نبحث عنها ولكن بتبقى الإجابة ضمن مجموعة من الاحتمالات، فعلياً ماحدا بيعرف شي عن الحقيقة بس كله متمسك بفكرته ومعتقده ورأيه كأنه الحقيقة الوحيدة
هي غير لما نقتل بعض، ونتهم بعض، وننعت بعض بالغباء
أمر مضحك بباطنه، لكن القشرة الخارجية عبارة عن دراما تراجيدية بين قوسين يعني مأساوية
بتسأل: "ليش؟"
وإذا كنت ذكي رح تكتشف إنه ماحدا فهمان ولاحد عرفان السبب الحقيقي لكل هاد🤭
مع إنه ببساطة الجواب هو الإنغلاق الفكري لكن ماحدا عنده الشجاعة يعترف بزيته العكر.🙂
جميلة الملا

21/10/2025

لما بحكي عن الحب أغلب المسجات يلي بتوصلني من نوع " أي حب"، " حب أيه لي أنت جاي تقول عليه.." ،"عايشين بواقع الحب فيه حرام" " مين عشقانة؟...."
أنا شخصياً لما بحكي عن الحب بحكي عنه كقيمة مطلقة
وليس حب مخصوص بشريك حياة أو شخص معين
الحب بقيمته المطلقة يعني إنك تحب كل شي حوليك وتتفاعل معه
متل حب العمل، حب المعرفة، حب أي شي بيخص الطبيعة، حب الأصدقاء، حب الذات، حب الشتاء/ الصيف، حب فنجانك القهوة
حب دراستك، حب صوت فيروز، حب الليل، ....
الحب في جوهره أوسع مما علمونا أياه
عيد تفكيرك، وتأمل النعم بحياتك بامتنان هاد بداية طريق معرفتك الحب الحقيقي😉
جميلة الملا.

20/10/2025

مَن قالَ أنّ الحُبّ لا يُطعِم الخبزَ هو في الحقيقة يجهل الحكمة ويجهل الحياة ويجهل الحب.
لأنَّ الحب قادر على أن يبني القصور داخل أرواحِنا ويصنع جنات في قلوبنا...
دائما الحل موجود في الحب.
جميلة الملا

15/10/2025

من أجمل التدريبات وبتشكر أستاذ محمد يامن لتواجده معنا منحنا معلومات ونقاشات علمية مهمة أثناء الجلسات
وشكر للقمر الطفلة بيسان 😍