Dayib-Gurey Secondary School

Kulanka Wasiirka Waxbarashada Jsl iyo Maamulka Dugsiga Sare ee Dayib Guray

Maamulaha Dugsiga Sare ee Dayib Guray, Mudane Abdinajib Aadan Axmed, iyo Maamule Ku-xigeenka dugsiga, Mr. Cabdikariim Xuseen Maxamed, ayaa maanta kulan muhiim ah oo qiimo badan kula yeeshay xafiiskiisa Wasiirka Wasaaradda Waxbarashada iyo Barbaarinta Somaliland, Mudane Prof Ismaaciil Ducaale Cadhoome

Kulankan ayaa diiradda lagu saaray horumarinta dugsiga, falanqaynta baahiyaha guud ee haysta dugsiga, iyo sidoo kale qorshaha horumarineed ee mustaqbalka.

Wasiirka ayaa maamulka dugsiga u ballanqaaday in uu si dhow ula garab istaagi doono wax ka qabashada baahiyaha aasaasiga ah ee dugsiga, isaga oo sidoo kale sheegay in Dugsiga Sare ee Dayib Guray ay wasaaraddu siin doonto mudnaan gaar ah oo ku aaddan qorshayaasha horumarineed.

Dhanka kale, maamulka, macallimiinta iyo ardayda Dugsiga Sare ee Dayib Guray ayaa si weyn u bogaadiyay dadaallada horumarineed ee ka socda dugsiga, iyo doorka muuqda ee Wasaaradda Waxbarashada Somaliland ee ku aaddan tayeynta iyo horumarinta waxbarashada.

Koox mutadawiciin ah oo ka socotay ururka aan dawliga ahayn ee Somaliland Community Initiative for Development (SOCIFORD), kana shaqeeya arrimaha deegaanka iyagoo si mutadawacnimo ah ula shaqeeya Wasaaradda Deegaanka iyo Isbedelka Cimilada ee Jamhuuriyadda Somaliland, ayaa hawlo isugu jiray wacyigelin iyo dhir-beeris ka fuliyay Dugsiga sare ee Dayib-Gurey.

Maamulaha dugsiga, Mr. Cabdinaajiib Aadan Axmed, ayaa si diirran u soo dhaweeyey hawshan qiimaha badan leh ee kor u qaadaysa bilicda iyo deegaanka dugsiga. Sidoo kale, waxa uu uga mahadceliyey mutadawiciinta ururka SOCIFORD iyo Wasaaradda Deegaanka iyo Isbedelka Cimilada doorka muuqda ee ay ka qaateen hawshan.

Maamuluhu waxa uu si gaar ah u xusay muhiimadda ay dhir-beeristu u leedahay ilaalinta deegaanka, yaraynta saamaynta isbedelka cimilada, iyo kor u qaadista muuqaalka goobaha waxbarashada, isaga oo ku boorriyey ardayda inay ka qayb qaataan ilaalinta iyo daryeelka dhirta la beeray.

Maamulka Dugsiga Sare ee Dayib-Gurey, oo uu ugu horreeyo Maamulaha Dugsigu, ayaa kulan sagootin iyo dardaaran ah la qaatay ardayda Form Four, iyadoo imtixaankii shahaadiga ahaa foodda inagu soo hayo.

Kulankan waxa ardayda lagu siiyey dhiirrigelin, talooyin iyo dardaaran muhiim u ah diyaar-garowgooda imtixaanka.

Waxaan u rajaynaynaa dhammaan ardayda guul iyo natiijooyin wanaagsan insha Allah..

KULANKA SAGOOTINTA IYO DARDAARANKA ARDAYDA FORM FOUR 2026

Maadaama uu foodda inagu soo hayo Imtixaanka Shahaadiga ah ee Fasallada Afraad, maamulka Dugsiga Sare ee Dayib-Gurey, oo uu ugu horreeyo Maamulaha Dugsigu mr. Abdinajiib Aadan Gabyaw waxa uu maalinta Isniinta ah ee 08-JUNE-2026 la yeelan doonaa ardayda Form Four kulan sagootin,duco, dardaaran iyo dhiirrigelin ah.

Kulankan waxa lagu xoojin doonaa kalsoonida, dadaalka iyo diyaar-garowga ardayda, iyadoo la siin doono talooyin muhiim ah oo ka caawinaya inay si wanaagsan uga faa’iidaystaan wakhtiga ka hadhay imtixaanka.

Waxaan ardayda u rajaynaynaa guul, tawfiiq iyo natiijooyin wanaagsan.

“Dadaalkiinnu maanta ha noqdo guushiinna berri.”

Hargeisa,Somaliland, Salaasa 02-JUNE-2026

Dugsiga Sare ee Dayib-Gurey waxa sharaf weyn u ah in maanta uu booqasho iyo kormeer shaqo ku qaabilo Wasiir Ku-xigeenka Wasaaradda Waxbarashada, Barbaarinta iyo Sayniska Somaliland Mudane MAXAMED MUUSE XAAJI CABDI (Gallaydh) iyo masuuliyiin kale oo ka tirsan Wasaaradda Waxbarashada.

Kormeerkan ayaa qayb ka ahaa qiimaynta heerka diyaar-garowga ardayda fasallada 4-aad ee sanadkan u fadhiisan doona Imtixaanaadka Shahaadiga ah ee Qaranka. Masuuliyiintu waxay warbixin ka dhegaysteen maamulka dugsiga oo uu igu horeeyo maamulaha dugsiga Abdinajiib Aadan Gabyaw iyagoo sidoo kale la kulmay ardayda una jeediyey dardaaran iyo dhiirrigelin ku saabsan dadaalka waxbarashada.

Maamulka, macallimiinta iyo ardayda Dugsiga Sare ee Dayib-Gurey waxay uga mahadcelinayaan Wasiir Ku-xigeenka iyo masuuliyiintii la socotay booqashadan qiimaha badan, taas oo dhiirrigelin u ah bulshada dugsiga isla markaana xoojinaysa dadaallada lagu horumarinayo tayada waxbarashada.

Guul iyo gobannimo ayaan u rajaynaynaa dhammaan ardayda u diyaar-garowga imtixaanaadka shahaadiga ah.

Shalay oo kale, kuna beegnayd 31-kii May 1988, ayay ciidamada SNM soo galeen magaalada Hargeysa, iyaga oo bilaabay hawlgalkii taariikhiga ahaa ee dib-u-xoreynta magaalada. Marxuum Mujaahid Maxamed Axmed Ibraahim (Dayib Gurey) wuxuu ka mid ahaa halgamayaashii hormuudka u ahaa hawlgalkaas, isaga oo ahaa ku xigeenkii Muj ibraahim dhagaweyne oo ahayd guutadii ugu horraysay ee gudaha u gashay magaalada Hargeysa xilligii dagaalka.

Dayib Gurey waxa uu ahaa madax ka mid ah hawl-wadeennadii iyo hoggaamiyeyaashii qorsheeyey isla markaana fuliyey hawlgalladii lagu galay magaalada. Waxaa si weyn loogu xasuustaa geesinimadiisii, kartidiisii hoggaamineed iyo kaalintii uu ka qaatay halgankii SNM iyo dib-u-xoreyntii dalka.

Sidoo kale, wuxuu ahaa siyaasi iyo maskax-tuujiye door muuqda ka soo qaatay isu soo dhawaynta, midaynta iyo isku haynta garabyadii siyaasadeed iyo saraakiishii kala duwanaa ee SNM. Waxa kale oo uu xilal wasiirnimo ka soo qabtay xukuumadihii kala dambeeyey ee Somaliland.

Alle ha u naxariisto Mujaahid Maxamed Axmed Ibraahim (Dayib Gurey), jannatul Firdowsana haka waraabiyo. Aamiin.

Dugsiga Sare ee DAYIB GURAY SECONDARY SCHOOL ayaa maanta si heer sare ah ugu dabaaldegay munaasibadda qaran ee 18-ka May, taas oo ku beegan sannad-guurada 35-aad ee dib-u-la soo noqoshada madax-bannaanida Jamhuuriyadda Somaliland.

Xaflad si qurux badan loo soo agaasimay oo ka dhacday xarunta dugsiga ayaa waxaa kasoo qayb galay maamulka dugsiga, macallimiinta, ardayda, masuuliyiin ka socday Wasaaradda Waxbarashada, Agaasimayaal iyo marti sharaf kale.

Ardayda dugsiga oo ku lebisnaa astaanta calanka Somaliland ayaa soo bandhigay barnaamijyo kala duwan oo muujinayay waddaniyad, midnimo, iyo qiimaha ay maalintani u leedahay shacabka Somaliland.

Maamulka dugsigu waxa uu ardayda ku dhiirrigeliyey ilaalinta nabadda, qarannimada, iyo horumarka dalka, iyagoo xusay in dhalinyaradu yihiin tiirka mustaqbalka qaranka.

Hambalyo Somaliland.
18 MAY – MAALINTA QARANKA JSL.
DAYIB GURAY SECONDARY SCHOO

Waxaa si sharaf iyo farxad leh u soo gabagaboobay barnaamij aqooneed ay Jaamacadda Al-Huda u qabatay ardayda fasallada 4aad ee Dugsiga Sare Dayib-Guray, gaar ahaan hablaha.

Barnaamijkani waxa uu diiradda saaray horumarinta aqoonta iyo xirfadaha sayniska, iyada oo ardaydu fursad u heleen tababar toos ah oo shaybaadh ah, taas oo si weyn u xoojisay fahamkooda iyo kartidooda waxbarasho.

Waxaan si gaar ah ugu mahadcelinaynaa Jaamacadda Al-Huda dadaalka iyo taageerada ay siiyeen ardaydeena.

Dhamaan ardayda, waalidiinta, macalimiinta iyo shaqaalaha dugsiga Dayib-Gurey Secondary School waxa la ogaysiinayaa in uu fasax yahay dugsigu maalinta berri ah.

Fasaxan wuxuu ku beegan yahay Maalinta Shaqaalaha Adduunka (1-da May). Hambalyo dhammaan shaqaalaha .

Waxbarashadu waxay dib u bilaaban doontaa maalinta Axada, Insha Allah.
Mahadsanidiin.