17/11/2025
*{حكاوي البلد}*
هذة القصة علي لسان
سعادة اللواء/احمد سليمان
*عمنا كمكل و رحلة الحج*
المرة دي عمنا كمكل ركب الطيارة عديييل و متوجه الي بيت الله الحرام لأداء فريضة الحج وذلك في العام 1997.
لكن بس ما عرفنا هل أتذكر سؤال صحبه حسن الناظر في المحكمة :
(الطيارة عندو بوري ولا ما عندو بوري)
روى لنا هذه الرحلة أخونا العزيز السر علي النور ربنا يطراه بالخير ويمد في ايامه ان شاء الله
قال نوينا الحج و مشينا مطار الخرطوم اتصادفنا مع مجموعة كبيرة من ناس القدار ومن ضمنهم عمنا كمكل رحمه الله رحمةً واسعة
ركبنا الطيارة وكان طيران السعودية ودي اول مرة اركب فيها الطيارة قعدت عمنا كمكل ناحية الشباك وانا قعدت جمبو وصادف مقاعدنا قصاد جناح الطيارة وطبعا الزول اول مرة بيكون ملاوز شويه. جات التوجيهات بربط الاحزمه ربطت حزامي وحزام عم كمكل طوالي قال اصلو نحن قاعدين كده بنطير مربطننا قدر ده كلو (طبعا كلامه بالرطانة)بعد ربطنا الاحزمه كل الناس في حالة شوق وترقب ورهبة ،مشاعر مختلطة فجأة عمنا كمكل قال لي انت تعرف يا ولدي الطيارة ده ما بيقوم ،الطيارة ده ماااابيقوم بالساهل قلت ليه كيف يا حاج؟قالي انت شفت الجناح!!الجناح ما في المنشية قلت ليه ان شاء الله بيباصروا. قلت في نفسي سبحان الله عم كمكل ده جاء الخرطوم متين و عرف المنشية متين
علي كل حال اقلعت الطائرة وأثناء الاقلاع حصل مطب هوائي خفيف كلنا خفنا وشعرت عم كمكل خايف شديد قلت ليه انت خفت يا حاج ولا شنو ؟
قال كيفن ما بخاف يا ولدي ،قلت ليه انت ماشي الحج تخاف كيف!!
قال ده ما ياهو سبب الخوف ذاااتو نحن يادوب ماشين اذا كان راجعين من الحج ما كان بخاف يا ولدي. يا ولدي نحن الشايلنوا ما تقييل غير الله ما يعلم بيه (يا سلااااام اعتراف بالتقصير ويقين راسخ بان فريضة الحج يمحو الله بها الذنوب والخطايا ويعود المرء كيوم ولدته امه)
الحمدلله تجاوزنا مرحلة الاقلاع بسلام و اضاءة اشارة فك الاحزمة فكيت حزامي قال لي فك حقي ده كمان زي ما ربطو.
حضر طاقم الضيافة وزع مناديل معطرة وبعد شوية وزعوا الحلوي قال بالله شوف يا ولدي الناس ديل من هنا اكرمونا كيف ادونا الحلاوة و المناديل بي ريحتو السمح ده معناها نحن ماشين لي خير كتير ان شاء الله (تفاءلوا بالخير تجدوه)
وبعد شوية جابوا الجرائد عمنا كمكل قال لي انت وقت شلت الابيض هو انا كمان شلت الاخضر ده كُتُر من حقك عشان تقراهم الاتنين طبعا نحن ما ناس قرايه وكانت جريدة الشرق الاوسط (كلمة كُتُر تعني [مختلف])بعد شوية وزعوا وجبة الفطور لاحظت الناس فتحوا الطاوله من المقعد الامامي انا كمان فتحت حقتي وحقت عم كمكل قال بالله الشي ده فيه طربيزة كمان والله الناس ديل شداد شدة. وزعوا وجبة الفطور وجبة ما شاء الله تمام عمك كمكل اتبسط قال بالله في الجو الخير راقد زي ده ساعة ننزل في الواطه يكون كيف يعني ،بالله شوف عثمان حديد جننا جن خلانا نخمخم الحاجات ساكت بلا سبب ما عندو خبر الخير ده كلو وعثمان كان من ضمن مرافقي عم كمكل في هذه الحجة(رحمك الله رحمةً واسعة اخي و صديقي و جاري العزيز عثمان حديد)المهم بعد فطرنا قلت ليه محتاج اي حاجة زياده قال لا لا والله جايبنوا مزبوط تقول مُعَبِرنوا عِبَار. بس انت تعرف يا يحي انا ما عندي طبع واحد بالحييل كعب ،قلت ليه كيف قال انا بعد الاكل اما شربت الشاي بتعب تعب شديد (يحي هو الشقيق الأكبر لي السر علي النور وعادي جدا الناس الكبار يخلطوا بين الاخوان. ومن هنا نحي الزعيم يحيى علي النور وربنا يديه الصحة والعافية.
الاخ يحي واخوانه لهم إسهامات كبيرة في خدمة البلد نسأل الله ان يتقبل منهم وان يزيدهم من فضله)
لسه ما خلصنا كلامنا الجماعة ظهروا يوزعوا الشاي والقهوة كمان
عمك ما صدق وقال انت تعال يا يحي الشي ده كلو بالقروش ولا مجان ولا حسابو كيف اصلو ؟؟؟
قلت ليه الشي ده كلو حسابو في التذكرة قال ده كلو في التذكرة!!! والله الشي ده بيخسر معاهم (شوف عمنا كمكل شايل هم ناس الطيران وخايف انهم يخسروا …بالله في طيبة اكتر من كده!!!)
بعد شربنا الشاي والقهوة و الحمد لله الامور كلها طيبه الجماعة تاني ظهروا عمك قال يا يحي بالله قول للجماعة ديل نحن تاني ما دايرين اي حاجة والله الناس ديل خجلونا عديل وفعلا ظهورهم الاخير ده كان عشان يجمعوا الحاجات الفاضيه.
الحمد لله هبطت الطائرة بسلام في مطار جده نزلنا وقفنا في صف الجوازات
حضر واحد سعودي لابس قطره وطوالي ساق عمنا كمكل وراجل كبير تاني كده مشي جلسهم في كراسي واداهم مويه بارده وخلص لهم اجراءات الجوازات في دقيقتين وفيما بعد عرفت الزول التاني كان ياهو شيخ الهديه رئيس جماعة انصار السنه المحمديه
المهم طلعنا الصاله بره عمنا كمكل قال اها يا يحي انا من هنا تاني معاك.
قلت ليه لكن يا حاج كمكل من هنا كل مجموعه بيكونوا في فوج واحد بيمشوا مع بعض ونحن في فوج تاني ما معاكم هنا عم كمكل اتاسف وقال والله كنا دايرين رفقتك قلت ليه ان شاء الله نتلاقا قدام طوالي قال يازول عديله وربنا يسهل لينا كلنا ان شاء الله
افترقنا من المطار ومشينا المدينه وتاني ما لاقيت حاج كمكل الا في مكه و كانت لقاءات عابره ما اخدنا راحتنا معاهو في الونسه. لكن سالتو كيف لقيت الحج يا عم كمكل قال والله يا يحي نحن ما ودرنا زمنا ساكت والله المحل ده مفروض كان نجيه تلتميات المرات لكن هسه كمان الحمد لله الجينا ربنا يقبل ان شاء الله.
الحمدلله انتهينا من مناسك الحج وعدنا بالسلامه وبقت هذه الرحله الجميله الممتعة مع عم كمكل علاقة قوية لا أنساها ابداً وهي دوما في الذاكرة.
نسال الله ان يتقبل حجة عمنا كمكل هذي وان يجعلها ذخرا له يوم القيامة يوم لا ينفع مال ولا بنون الا من أتى الله بقلب سليم.
وان يتقبل من اخونا العزيز السر علي النور.
وان يرزق كل المتابعين لهذا المقال زيارة بيت الله الحرام
وان يتقبل من الجميع صالح الاعمال
اخوكم/احمد سليمان دردق
20/09/2025
18/07/2025