رُجوى من الله

التربية الجنسية 1 ♥️

______
المرحلة الأولى بتكون من عمر 0 وحتى 3 سنوات ...
بما إننا كلنا كبشر لنا تحفظات و خجل رهيب من إننا نتكلم في الدائرة دي بس هي حق من حقوق أطفالنا علينا .
زي ما دائما بنقول إنه كل حاجة بتعلموها الصغار بالاستكشاف يعني حأعرف حأعرف لو منعتني حألف من وراك وأعرف ما عناد ولكن فطرة
ف طالما كدا كدا هم حيعرفوا إذاً لازم نحن ك أباء نكون مدركين و قادرين نوصل المفاهيم بصورة صحيحة و كل حاجة بالخطوات و الجرعات اللي بتناسب كل عمر بالطريقة والمفهوم اللي حيوصل لهم الموضوع بصورة واعية جدا ♥️

____
خلونا نتفق أول حاجة على إنه الطفل من عمر يوم و حتى 3 سنوات هو غير مدرك وغير واعي لأنه جسمه دا عبارة عن شنو .نحن واحدة واحدة بنحاول نسمي له أعضاؤه ككل
دي عيونك يا بابا دي يدك يا ماما دي رجلك يا حلوة وهكذا
وفي الفترة دي أغلب الوقت إن لم يكن كل الوقت الطفل لابس بامبرز ف المنطقة دي بالنسبة له ما مكشوفة او هو ما قادر يستوعب إنها تابعة له أصلا
ف حتى لمن يوصل لمرحلة إنه ممكن يلمس أعضاؤه بيده ما مفروض نديه رد فعل بإنه غلط
هو ما فاهم اصلا اذا غلط ولا صاح بل حتة في جسمه عايز يكتشفها و بالنسبة له هي و يده أو رجله حاجة واحدة
ف نكون واعين ونسمي المنطقة بأسماءها الصحيحة " ق**ب ..مهبل وهكذا " نبعد من الاسماء اللي بقولوها الناس عامة .لا تقال بأسماءها الحقيقية ✨

_الهوية الجنسية :-
و دا اللي كتير من الناس ما بدوه اهتمام و هو اللي جايب لخبطة كثيرة في الوقت الحالي
لازم نتكلم مع الطفل و نصنف له الناس اللي حولينه و يكون مدرك سوى بصور او إنكم تشرحه له على الأشخاص اللي موجودين حوليكم بإنه في نوعين للبشر
ذكر و إنثى
بابا ذكر .بابا ولد .. بلبس قميص و بنطلون و تيشيرت
ماما أنثى ..ماما بنت .. بتلبس فستان و طرحة ♥️
لو في اخوان ذكور و إناث وهكذا

_أخطاء لازم نداركها من بدري:-
ممنوع نبدل ملابسنا قدام طفل و ما نقول إنه تحت 3 سنوات هو ما مدرك
ما فاهم . هو ما فاهم انه دا عيب عشان كدا حيعمله ومهما تاني حاولنا نزرع جواه فكرة
إنه ممنوع تبدل ملابسك قدام شخص ما حيدي الكلام أهمية نسبة لأنه بتعامل بالأفعال اللي بتحصل قدامه

_نحافظ على خصوصية الطفل . ممنوع نبدل لهم ملابسهم قدام اي شخص حتى لو شخص قريب .. لا يكون في مكان معين يتعود عليه انه بس هنا و مع ماما أو بابا أنا حابدل ملابسي

_في فيديوهات كثيرة منتشرة بتوضح كيف توصلوا لأطفالكم الفرق بين اللمسة اللطيفة واللمسة الخبيثة
وانه لمن يحس بضيق لازم يقول لا و يتكلم

_نبعد من الملابس الضيقة اللي ممكن تعمل إثارة " عصبية وليست جنسية"
و الاثارة العصبية اللي ممكن يحس به بتترجم في رأسه إنها احساس حلو زي الطبطبة و الحضن واي تلامس جسدي بريء بينك وبين طفلك

_ ما نعصب ونصرخ اذا اثناء تبديل الملابس هو لمس أعضاؤه بيده
نتعامل مع الموضوع بصورة عادية و نحاول نلهيه.. وكلما اتقدم في العمر بنفهمه انه المكان دا خاص و له وظائف معينة و ممنوع كل شوية نلمسه لانه بتلوث زي ما ممنوع
نحك العيون بيدنا عشان ما توجعنا
ممنوع ندخل اي حاجة في الفم عشان ما نتألم . اول ندخل اي أداة في الاذن عشان ما نتأذى

_لازم المعاشرة الزوجية تكون في غرفة منفصلة

بس دا كل المطلوب في المرحلة دي
_____

ما تضخموا الامور و تدخلوا في عيالكم خوف وهلع من أجسامهم
ولا تكبدوا إكتشافهم .عشان هم كدا كدا حيعرفوا فأحسن نبدأ الموضوع خطوة خطوة عشان المعلومات توصل و تترجم بمعناها الصحيح ♥️

اتقوا الله فيما رزقكم و لا تهملوا فيما أعطاكم واحمدوا الله حمدا تستديم به النعم ♥️



#منتسوري

ما أنا إلا إنعكاس لك ♥️
____

الطفل أول ما يتولد بنقول عليه كائن ممزق ما بعرف نفسه و لا بكون مدرك لأنه كتلة واحدة الا بحضن أمه و لمسها له .. كذلك لمن يكبر شوية و يبدأ يعاين في المراية تلقائيا حتلقاه بعاين للكائن دا و يحول نظره لأمه او أبوه عشان يوضحوا له انه دا انت يا بابا .. ايوا انت ♥️
ومن هنا الطفل بصدق أهله و بيؤمن جدا بنظرتهم له لانه الإنسان اللي عرفني على نفسي مستحيل يغلط في تصنيفه إذاً كل حاجة حيقولها هي الصح
___
الانسان عموما تركيبته بتنشأ من 3 قابليات

1_هو وفطرته السليمة( كإنسان ميزه الله بصفات ومواهب و جينات و غيرها من التراكيب اللي بتخصه هو واحده ومتفرد بها ) و دي هي "البذرة"

2_المحيط اللي حولينه ( أهل أب ..أهل أم ..جيران.. بيئة سكن.. بيئة دراسية وغيرها) ودي هي "التربة"

3_ انعكاس الأبوين ( ودي كل حاجة بقدموها الأبوين لطفلهم.. سلوك ..تربية ..معاملة .. تعاملهم هم مع بعض .. مفاهيم و حتى نظرتهم لنفسهم ) ودي هي " ماء السقيا"

أي خلل في 2 ..3 حيأثر على 1 بصورة أو بأخرى

ندي مثال بسيط:-

طفل اتولد و شعره كيرلي البيئة اللي موجود فيها بتتنمر عليه بكل الطرق و أهله ساكتين أو أسلوبهم كان هجومي على التنمر
هنا مافي مشكلة اتحلت.. لأنه مافي تعزيز من الأبوين على جين مميز لطفلهم ف ترجم للطفل انه اللي هو عليه غلط و ش*ذ و هو لازم يسكت أو يهاجم
على عكس اللي والدينه حببوه في شكله و انه انت مميز و سعوا في انهم يوروه انه الشعر الكيرلي ربنا حباك به عشان هو حلو مع ملامح وجهك ♥️
_______

بيكبر الطفل على انه كل الرجال بابا وكل النساء ماما
ف تعامل الطفل مع الآخرين بتتولد من تعامل والدينه مع بعض

ونظرته اتجاه الناس بتتولد من نظرة والدينه لنفسهم
اللي اتربى على يد إمرأة عاملة وعندها كرير حيكون مدرك لمكانة المرأة في المجتمع وانه عندها حياة مستقلة
اللي والده بتعامل مع والدته برحمة ومحبة حيكون عطوف وحنين و قادر يدي الحب و العاطفة
و اللي شاف المساندة المادية والمعنوية في بيته حيكون معطى و مشارك ومحب للحاجة دي

اللي اتربى في بيت كريم . حيكون جواد و محب للعطاء ♥️
لكن ما ننسى انه الأطفال ما بتربوا بالكلام لا بالأفعال
و كمان عندهم حاسة بقدروا يدركوا بها حتى أفعالك دي انت مؤمن بها ومصدقها و بتعملها من قلبك بالجد ولا لا
على فكرة الحاجة دي مهمة جدا . لانه في كثير من الأبناء بكون جواهم مذبذب" بين انه أهلي فعلوا الشيء الفلاني لكن ما كانوا مؤمنين به ف هو حيكبر ما مدرك لأنه الفعل دا صح ولا لا"

ودائما خلوا كلامكم متناسق مع افعالكم
ف مثلا " ما تكلم طفلك عن الثقة بالنفس وانه لازم يحب نفسه وانه يستحق .. لكن انت أفعالك وتعاملك و نظرتك لنفسك خالية من الثقة "

___

جهاد النفس يصبح أسهل اذا ما كان أخره أبناء سويين ♥️
ف إن زرعتهم ف أحسنوا الزرع والحرث والرعاية لتقر أعينكم بحصاد يرضي الله ويرضيكم♥️



#منتسوري

Ma Queen ❤
____
للأمهات و المتزوجات وغير المتزوجات

شنو الحاجات اللي بتعمليها وبتطوريها في نفسك عشان تكوني قدوة رهيبة لأولادك؟ ❤

وشنو الحاجات اللي قومتي نفسك فيها وغيرتيها عشان ما تنقليها لهم ؟❤

وعايزة أولادك يشوفوك كيف ؟ ويتعاملوا معك على أي أساس ؟ النهج اللي عايزة تتبعيه معاهم ؟❤

أنت تبحث عن شيء لا وجود له ♥️

____

في آخر ورشة حضرتها واحدة من الحضور سألت الكوتش- ليه المخطوبين بكذبوا على بعض و بتكون دائما فترة الخطوبة أحلى من الزواج مليانة مشاعر و حب و مواقف وكله بتغير بعد الزواج هسي راجلي دا لمن كان خطيبي ما كان بخلي مطعم الا ونمشي له .. من بعد شهر العسل قال لي شوفي مطبخك بوين -🤭

رد الكوتش لها إنه نحن دائما بزرعوا فينا مفهوم انه الخطوبة دي أجمل فترة و فيها كل حاجة جميلة وربطوا عندنا الزواج بإنه قاسي جدا وحياته صعبة ومافي حاجة حلوة فيه عبارة عن مسؤولية ومشاكل مع الزوج وأهله والعكس فبقينا مبرمجين على الفهم دا و عايشين على أساسه .. المخطوبين ما بكذبوا بدافع الكذب او الخداع لا ... هم بكذبوا عشان دا الوهم الحلو اللي نحن عايزين نكمله كله في الخطوبة ليه؟ عشان مافي حلو بعد الزواج 🤭 يلا نكمل طاقتنا الحبكانية كلها عشان لازم لازم ندخل على الحياة الزوجية جاهزين نضرب بعض بالجز*م
وحكاية إنك ترجعي من الشهر العسل تدخلي المطبخ ف دا الطبيعي والحياة المتزنة والعادية بتمشي كدا .بس انت حسيتي بها نوع من عدم الحب عشان انت اصلا مبرمجة أنه اي حاجة بعد الزواج سيئة واي حاجة هو حيقولها باب لفتح خلاف ومشكلة .. وبنفضل في صراع منو يفرض وجعه اكتر و ما ينكسر للطرف التاني 💔

_______
انتو عارفين المشكلة وين ؟ إننا ما بنفكر ولا بنتعامل بالمنطق و راضحين لمسلمات موجودة وما راضين نطلع برا الصندوق و نشوف الحياة بطريقتنا نحن
ليه لازم كل البيوت تكون شبه بعض ؟ وقائمة على نفس الفكرة والمبدأ؟ وليه أقلد طريقة فلانة في معاملتها و تربيتها لعيالها و أكون بس مسيرة تبع أفكار قد تكون مغلوطة
وايه ما أعيش فترة الخطوبة زي ما انا حابة و أرسم مع شريكي طريقة المعاملة اللي بتخصنا نحن بس ؟
ومنو اصلا ربط فكرة السعادة بمرحلة معينة او موقف معين

.هل في سعادة أصلا في الحياة الدنيا ؟؟
لا .. السعادة قرار انت بتتخذه وأسلوب بتعيش به كل صغيرة وكبيرة في حياتك ♥️

_____
🔸كيف أربي أولادي على السعادة ؟

إستشعار نعم ربنا في كل كبيرة وصغيرة حتوصل أطفالك عن طريقها للرضا و القناعة ♥️
وإنه كل حاجة بنعملها لازم نستمتع بها الدقيقة اللي بتمشي من عمرنا ما حترجع خالص ..عشان كدا ما نتحسر ولا نندم ولا نحقد ولا نسمع لأي فكرة سيئة عايز المجتمع يرسخها في عقلنا


طالما انت منتظر السعادة او رابطها بمرحلة معينة يبقى عمرك ما حتفرح ولا ترتاح
استمتع بطفولتك ومراهقتك و دراستك وشغلك وفترة الخطوبة و بعد الزواج و في المشاكل و الضغوطات و عند أول طفل و عند التاني و كل واحد فرحته غير . في النجاح والفشل و التقدم في العمر
في الانكسار والوجع و التخبطات
عيشوا السعادة و خلوها تخلل كل لحظات عمركم وابدا ما تنتظروا إنكم توصلوا لشيء معين عشان تفرحوا♥️

_____
عيشوا مع عيالكم تفاصيل كتيييرة ومهما كان الموقف بسيط حاولوا اتصنعوا الفرح لحدي ما يبقى لهم عادة وأسلوب حياة
و احتفلوا بكل صغيرة وكبيرة احتوهم وطبطبوا عليهم وادوهم حب كثير .. خلوا بصمتكم فيهم حلوة
طلعوا أطفال مفرهدين وقادرين يمتصوا سوء العالم ويحولوه لفرح ♥️ طلعوا أطفال بشوشين بحبكم وبحبوا الحياة 🥺♥️



#منتسوري

سنة ونصف _ سنتين ♥️
_____

كائن بقى فعال شديد وعنده رأيه المستقل و شخصيته اللي حتبدأ تظهر من هنا وعشان كدا لازم نركز لأنها فترة متعبة شوية بس لذيذة شديد 🥺♥️

🔸التطور الحركي :-
القدرة على المشي بصورة أفضل بكثير وكمان ممكن يطلع الدرج بمساعدة شخص كبير . أكتر حاجة بحبها في الفترة دي هي فتح اي حاجة مقفولة وخصوصا دواليب المطبخ و الملابس و هو نوع من الاستكشاف و المعرفة للحاجات المخبئة ♥️
وكمان المرحلة دي مرحلة الاعتماد على النفس فحتلقيه عايز يأكل براه و يلبس جزء من ملابسه لوحده ( نحاول نجيب شرابات وأحذية أكرمكم بدون أربطة ونخليه يلبسهم لوحده)♥️
كمان بكون قادر انه يغسل أسنانه

__ المرحلة دي حنخصصها لتنمية المهارات الحركية الدقيقة .اللي هي اكثرها موجودة في اطراف الاصابع بالانشطة التالية :-
1_الصلصال :- وحنبدأ مع الطفل في أنه يلعب به بس بدون ما نجبره انه يشكل و دي في حد ذاتها كويسة شديد..شوية بشوية حنبدأ نستغل الصلصال في التعليم زي اننا نعلم الطفل الألوان والأشكال و اي حاجة ممكن نشكلها بالصلصال وتكون وسيلة للمعرفة ووقت حلو نقضيه معاه ♥️ .. نكون حريصين كمان أنه ما يأكله . وممكن نعمل الصلصال في البيت ♥️
2_ الخرز والخيط :-
والنشاط دا بزيد من فعالية الحركات الدقيقة وكمان بساعد على التركيز ويفضل أنه الخرز يكون كبير عشان ما يبلعه الطفل .. ممكن نستبدل الخرز بالمعكرونة اللي بتكون فاتحة من الجهتين أو الاعمدة اللي ممكن ندخل عليها حلقات دائرية بمختلف الاحجام ♥️
3_المهام المنزلية:-
الطفل في العمر دا بحب المشاركة او الاحساس بالفعالية وأنه موجود و دوره ملموس . ف حاولي حولي المهام المنزلية لأنشطة وألعاب يستفيد منها الطفل . زي انه يساعدك في وضع الملابس في الغسالة او تنسيق الملابس وكمان المسح و التنظيف بإنك تحددي له مكان يمسحه او يهتم به او كمان يدخل ألعابه في مكانها المخصص ♥️ الحاجة دي بتزيد من قوة شخصيته و علاقته بك و بتخلق ذكريات حلوة شديد للطفل معك او مع والده ♥️

🔸التطور اللغوي :-
ذخيرة الكلمات للطفل في العمر دا بتكون كثيرة شديد و المفردات عنده كثيرة بس ما بقدر يكون جمل طويلة بس في الاخير هو قادر يوصل المعلومة سوى بكلمتين او ثلاث ♥️

🔸التطور الاجتماعي والعاطفي :-
بقدر الطفل يعبر عن مشاعره ودا بعتمد على طريقتك انت في توصيل المشاعر والتعبير عنها بصورة واضحة .. ممكن بغلب أوقات في انه يوضح مشاعره بصورة كويسة ودا بينتج وبظهر في صورة نوبات غضب فنحاول نداركها ونفهم غرضه ♥️
كمان بكون ما بحب تغير الروتين و بستاء لمن ينام في وقت غير وقت نومه او يعمل نشاطات في الوقت المخصص للنوم . فنحرص إننا ما نتأخر برا البيت او نجبره على حاجات هو ما بحبها او ما مستعد لها ♥️

🔸الاستيعاب :-
حيبدأ يستوعب الأوامر الموجهة له . وكمان انه يحدد او يفهم الازمنة الصباح والمساء واليوم وانبارح وبكرا .. هو قد ما يقدر يوصل لك بالكلام بس هو مدرك للازمنة اللي انت بتحدديها في كلامك ♥️

حيقدر يعبر لك و يكلمك بالحاجات اللي هو بحبها سوى اشخاص او ألعاب او حتى في انواع الاكل و بيبقى قادر لقول لا للحاجة اللي هو ما متقبلها او ما بحبها ♥️

حنستغل كمان الفترة دي ف إننا نطلع من الطفل شخص مؤدب ومهندم بإننا نعلم الادب والاستئذان و التعابير اللفظية الحلوة مثلا ( تدقي الباب قبل ما تدخلي عليه و تستأذني منه ممكن ألعب معك .طيب شكرا . جزاك الله خيرا وهكذا )

_____
حاجة مهمة شديد بتحصل في المرحلة دي ولو ما اتعاملنا معها بصورة كويسة ممكن تحول الطفل من شخص مستقل لشخص انطوائي خايف 💔
وهي ..الثبات على رد الفعل :-
كيف يعني ؟؟؟

مثلا لو طفلك عمل فعل معين زي انه طلع ملابسه من الدرج وانت اول مرة صرختي عليه .وثاني مرة لميتيهم بدون ما تتكلمي وثالث مرة ضربته ورابع مرة ضحكتي على فعلته وهكذا
ف هو كثرة ردات الفعل حتلخبط الكهرباء عنده في المخ والتوصيلات العصبية حتبدأ تتشربك ياربي انا لو طلعت الملابس تاني حيحصل فيني شنو ؟؟
والحاجة دي بتنشط في المخ حتة بسموها مخ الزواحف او مخ السحلية.. وهو انه الطفل حيبطل يفكر بالقشرة الدماغية المسؤولة من التفكير الإبداعية والحساب والمنطق . ويكون شغال بجزء كل همه انه يتفادى ردات الفعل ويفكر في كل حاجة على اساس انها ما ثابتة ولا عندها ضمان و حتى قراراته لقدام حتكون متذبذبة لأنه اصلا هو ما عارف يحدد هو عايز شنو بالزبط 💔

عشان كدا لازم تكون ردود أفعالنا ثابتة و قادرين نتحكم في نفسنا بصورة او بأخرى ♥️
ودا حيكون موضوع لوحده إن شاء الله ♥️

_____
ما تحرموا أطفالكم العيش بصورة طبيعية هم جوا لعالمنا عشان يتعايشوا معه ما عشان تقفلوهم في قوقعة وتحرموهم حتى أبسط سبل المعرفة و الاكتشاف ♥️ ما تحبسوهم وأنتو فاكرين انكم بتحموهم. عشان مصيرهم يطلعوا للعالم وساعتها ما حيعرفوا يتصرفوا بصورة طبيعية ♥️



#منتسوري

الولاء الخفي والتكرار القهري ✨
(Invisible loyalty)
______

المرة دي كلامي ما حيكون عن أساليب التربية والأبناء.. حأتكلم عن حاجة أعمق وأكبر ولو قدرنا نتخلص منها حنكون بعدها مدركين و قادرين نتقبل كل تغير بيحصل لعيالنا و كل تغير بيحصل حولينا واننا عشان نربي تربية صح لازم نهذب نفسنا أول و نكسر حلقة مفرغة بنلف فيها بدون وعي ..نقيف شوية و نفكر بصوت عالي ♥️

_الولاء الخفي ؟ يعني شنو ؟
هو اخلاص وولاء في العقل الباطن اللاواعي لتكرار تجارب أهلنا و العيش بنفس ردات الفعل كنوع من الاقتداء او الرأفة أو القهر المكبوت

بصورة مبسطة .هو إنه في عوائل بتعيش نفس النمط من قديم الزمان وبصورة او بأخرى بنقلوها لأولادهم و هكذا لحدي ما نوصل لجيل عايش بمفاهيم و بتصرف بطريقة غير مبررة .لو جيت سألت واحد ليه اتصرفت كدا؟ إجابته حتكون ..هذا ما وجدنا عليه أباءنا 🤷🏻‍♀️
زي البنت اللي اتزوجت راجل كويس بس بتعامله بكل السوء او بتخاف منه وهي اصلا ما شافت منه حاجة سيئة هي بتمارس نفس رد فعل والدتها او تعاملها مع والدها اللي كان سيء وصعب والعكس

أو مثلا فكرة الختان للبنات .. هي عادة سيئة وبتضرر منها الأم بصور بشعة جدا وهي عانت و عاشت العذاب وبدل ما تكسر الحلقة بتاعت ختان البنات لا بتجي وتمارسه على بنتها لمفهوم ف رأسها مزروع من زمان أنه هي كدا بتعف بنتها ؟
حتسألها طيب انت ما اتعذبتي؟ تقول ايوا هو عذاب بس دا اللي في عيلتنا ومجتمعنا 💔
وغيرها وغيرها من الأفعال غير المبررة بالمرة لازلنا بنمارسها اتجاه نفسنا واولادنا وعيونا مليانة غشاوة
___

كذلك في التربية مفروض اي أم وأب يقعدوا و يشوفوا متطلبات الحياة شنو وهم نفسهم يربوا عيالهم كيف ؟ وكيف يقوموهم ويزرعوا فيهم مباديء ومفاهيم تخليهم يجاروا ويواجهوا الحياة وسرعتها و مشاكلها
ودا ما بيحصل الا لو اتخلوا عن فكرة الولاء الخفي و قعدوا مع نفسهم و عرفوا يكسروا و ينقوا ويفلتروا الأسس والمفاهيم و المباديء اللي عندهم هل هي بالجد صح ولا نحن بس منقادين وراها ؟ هل تنفع لعيالنا ولا حتضرهم؟
____
أنا ما بقول أنه اللي اتربينا عليه غلط وما ينفع للجيل الهسي بالعكس في صفات حلوة شديد لازم ننقلها ونزرعها. لكن كمان ما نكون عميانين بالطريقة اللي تخلينا نفقد أولادنا عشان بس ما نطلعهم من دائرة الولاء الخفي. اللي قد يكون اصلا عقدة نفسية لجد كبير جدا نقلها لأولاده على أساس انها الطريقة الصح للعيش ومواجهة الحياة 💔
______

قولوا لا لأي حاجة حتخليكم تفقدوا عيالكم .قولوا لا لأي مفهوم حيضر عيالكم قولوا لا لأي عادات وتقاليد بتقهر عيالكم ..قولوا لاااا بالفم المليان لكل فعل غير مبرر اتقال لكم هو الصح ..اقعدوا مع نفسكم و حللوا و شوفوا شنو اللي ينفع وشنو لا ♥️



#منتسوري

سنة _سنة ونصف♥️

______
الله الله النوم انتظم و البيبي كبر وشوية كدا ارتحنا من السهر والبكاء و الطبع اللي ما مفهوم 💃🏼
ودخلنا في مرحلة يااااا علوش براحة حتقع حبيبي بشويش يا روحي ما تجري 😭 يلا بدأ يمشي ويجري ويتحرك واللي ما كان بيوصل له بالزحف هسي قادر يمشي عليه😎
يلا يا ماميز نأمن كل حاجة ونبعد أي حاجة خطر و نوفر مساحة واسعة وأمنة له عشان ما نكبد نموه و حركته
_في الفترة دي على الاقل لازم يمشي طفلك 6ساعات معناها القعدة على التلفزيون والتلفون غللللط❌
____
🔸حنختار أنشطة وألعاب حركية و التفاعل فيها كثير .. من أرهب الالعاب وابسطها هي الكرة . ويفضل تكون كرة فلين وحجمها متوسط وممكن نضيف كمان الكور الصغيرة الملونة ♥️

_ حنسيب الطفل يلعب بها بشكل عشوائي انه يشوتها ويرميها ويجري بوراها وبكدا نقوي كل العضلات والمفاصل
كمان ممكن نلعب معه بالتبادل ودا بزيد عنده التركيز وانه يقيف وين و يأخد الكرة كيف
شوية بشوية نجيب كرات ملونة ونعلمه التطابق( الكرات اللي لها نفس اللون تكون مع بعض وشوية بشوية نسيبه يخت اللي بشبهوا بعض في بوكس واحد )
كمان نبدأ نعمل معه تجارب فيزيائية 🤔( عشان لمن يكبر ما يتعقد منها 😭) نجيب كرة و حجر و أي حاجة عليها موية و نعمل تجربة ونرمي الاتنين في الموية الحجر حينزل والكرة حتطفو و اشرحي له انه الكرة خفيفة وكثافتها اقل والحجر عكس . وكرريها وهو حيرتبط عنده الكلام دا ويبدأ يخزنه وكلما كبر المعلومات حتثبت له بصورة أحسن.

_كمان ممكن تلصقي الكور بشريط لاصق وتخليه يفكه ..
_أو ينقل الكرات واحدة واحدة بملعقة كبيرة من بوكس للتاني والمسافة ما تكون بعيدة

_كمان ممكن حركة كرة السلة تسيبي بوكس على مسافة من الطفل وتخليه يرمي الكرة بحيث انه لازم يدخلها في البوكس ♥️
_الألعاب دي كلها حتزيد من تركيزه و تقوي عنده fine motor skills and cross motor skills

فكلما بديتي بدري كلما فتحتي مخه و قويتي استيعابه♥️

بفضل جدا من عمر السنة وطالع .انك كل فترة تجيب لعبة وحدة بس وتستخدموها بأكتر من طريقة (زي ما علمنا مع الكرة) الحاجة دي حتنمي فيه روح الابداع والاختراع

_ كمان لعبة البازل كويسة جدا .جيبي اللي بتكون فيه الصورة مكونة من 3 ل4 قطع فقط و سيبيه يكون الصورة ♥️

🔸تسمية الأشياء بإسمها وتوضيح وظيفتها :-
مثلا الله ياروحي دي عيون (وتأشري عليها) نحن بشوف بها الحاجات اللي حولينا
وانت بتحميه حاولي وريه انت ماسكة اي جزء واسمه . وشوية بشوية حيتعود ع الاسماء حتى لو ما نطقها بس لمن تجي تقولي له هات يدك أغسلها حيمد يده .لف أغسل ظهرك حيلف ♥️
كمان الحاجات اللي حوليه واللي بستخدمها . السرير للنوم . والملعقة للأكل
ودي حاجة بتزيد الحصيلة اللغوية عنده + بتزيد تركيزه و ربطه لكل حاجة ووظيفتها ♥️
_كمان نعتمد على المجسمات (زي الحيوانات بدل رسم لا يكون مجسم و يلمسه ويتحسس تفاصيله )

_ دائما اي شخص بصحى بالمود اللي نام به . ف فترة قبل النوم حاولي خليها حلوة شديد
و اقعدي احكي له حصل شنو خلال اليوم وهو عمل شنو . لو بكى مثلا خلال اليوم حاولي ترجمي له الشعور وانت بتحكي( قبيل النهار يا روحي لمن بكيت انت كنت زعلان عشان وقعت ) او قبيل لمن بابا جاء من الشغل جاب لك شوكولا انت بتحبها وانت فرحت وكنت فرحان وسعيد ♥️ احكي له اليوم كان عامل كيف و بوسيه و احضنيه و حيصحى فرحان وموده كويس خالص 🥺♥️

_______

أنا يا مامي بحبك و حأقولها لك كل يوم .شغبك ولعبك حتى بهدلة البيت على قلبي زي العسل ♥️ أنت بس أكبر وفرهد ♥️



#منتسوري

التربية الدينية 2♥️
____

المرحلة الثانية وهي من عمر 3سنوات _6سنوات
زي ما وضحنا في المرحلة اللي فاتت اننا بس نكرر و نخلق الجو الديني اللي الطفل يحس به ويحبه ♥️

في المرحلة دي حنعتمد على التوضيح و استشعار ربنا في كل حاجة في حياتنا و نزرع في أطفالنا حبه وحب الأنبياء والرسل وحب الدين الإسلامي ككل ♥️
___

نعتمد على الحاجات اللي بشوفها ونوضح عن طريقها عظمة ربنا
_شوف يا قلبي ياالله السماء كبيرة وحلوة ولونها جميل . ربنا اللي خلقها
والجبال كمان والأشجار .. حتى في جسمه .الله سبحانه وتعالى خلقنا في أحسن تقويم .عيونا جميلة وشعرنا حلو ..شوف حتى الايادي والاصابع دي كلها لها فائدة وربنا أكرمنا بها 🥺♥️ الله عظيم وجميل

ممكن بسألك .."أين الله ؟ وليه ما بنشوفه؟"
السؤال دا كتير جدا بواجهنا من الأطفال بس للأسف اجاباتنا له غير منطقية ولا بتشبع فضوله .. فنكون جاهزين للسؤال دا
وألطف إجابة :-
🔸 الله سبحانه وتعالى موجود في السماء و هو شايفنا وبحبنا و بدبر لنا أمرنا و خالق لنا الدنيا دي كلها عشان نسعد فيها و نعبدوه . ولمن ندبر كلامه ونفذ ما امرنا به حيكون جزاءنا اننا نشوفه وننعم في جنات الخلد♥️
🔸طيب كيف هو قادر يشوفنا كلنا ونحن لا ؟
حبيبي في حاجات كتيرة بتكون موجودة بس نحن ما بنقدر نشوفها .هي ايوا موجودة بس حدود نظرنا ما بتجيبها .
واعملي تجربة بسيطة ..
أمسكي لعبة ووريها له شوف هسي اللعبة دي انت قادر تشوفها لأنها في حدود بصرك لكن لو جينا ختيناها وراء الكنبة ما حتقدر تشوفها.. طيب تعال انا أرفعك في مكان عالي ..كدا حتقدر تشوفها وتشوف حاجات تانية انت ما كنت شايفها ..ليه لأنه كلما كنت عالي حدود بصرك كانت اكبر
فالله سبحانه وتعالى موجود في السماء العالية دي ف هو قادر يشوفنا كلنا ويعرف نحن محتاجين شنو وبنعمل في شنو ♥️
(دي أبسط حاجة ممكن توصل له في العمر دا انه الله موجود وانه للسبب اللي ذكرناه ما بنقدر نشوفه بس هو شايفنا ..ما محتاجين اكتر من كدا لأنه عقله بس حيستوعب بالشكل دا لا بالحجة ولا بالمنطق)
____

🔸حاجات لازم نزرعها في الطفل :-

1.استشعار مراقبة الله عز وجل :-
نعزز الحاجة دي بالآيات القرآنية في كل المواقف
لمن يقول كلام وهو صادق فيه أثني عليه وقولي "إن الله يحب الصادقين"
لمن تحثيه على انه لازم يكون نظيف والمكان اللي هو فيه نظيف عززي كلامك ب "إن الله يحب المتطهرين"
وهكذا
وخدي كمان من السنة الشريفة و خلي الرسول صل الله عليه وسلم قدوته ♥️
عشان يحس انه الله شايفنا و بحب لمن يلقانا بنعمل حاجة حلوة و مجهز لنا هدية وهي الجنة وحاولي وصفيها له بحاجات هو بحبها
وانه كمان ربنا ممكن يعاقبنا لو عملنا حاجة غلط و انه في حاجة اسمها النار ♥️ كدا حيعمل كل حاجة محبة لله وخوف من عذابه

2_تعليم الإيمان قبل القرآن :-
عشان تبدي تحفظي ابنك القرآن وتخليه بالنسبة له مفهوم و متقبل .لازم تزرعي جواه حب الإيمان و تخليه فاهم للاحكام عشان لمن تقابله وهو بحفظ يكون مدرك لها وانه ربنا وضح لنا الطريق الصحيح في القرآن و انه لازم يحبه قبل ما يحفظه عشان ما يحس إنه تقيل عليه
يعني مثلا .. قولي له لاحظت اني لمن اكون في البيت بكون بدون حجاب بس لمن نطلع او يجي راجل انا بلبسه كمان لمن اكون عايزة اصلي
يلا الحجاب دا ربنا ذكره في القرآن و وضح لنا انه عن طريقه بنحافظ على نفسنا ونتجمل به ♥️

3_ الراحة بقرب الله :-
ماما انا زهجان و مليت من ألعابي والايباد .
طيب ياروحي ما تجي نصلي الرسول صل الله عليه وسلم كان بقول " يا بلال أرحنا بالصلاة " وكمان "وجُعلت قرة عيني الصلاة"
بعدما تصلوا اقعدوا ادعوا و اقروا قرآن
الحمدلله يا روحي على الطمأنينة والسكينة اللي حصلت لنا بعد الصلاة ♥️ كدا حيتعود أنه لمن يضايق يلجأ لرب العالمين

4_العلم الشرعي والحث على العبادات:-
اختاري حكم او درس فقهي بسيط و اشرحه له خصصي ايام .. يعني يومين للفقه والأحكام .. و باقي الايام يحفظ فيها القرآن
وممكن تبدي بالبسيط
اللي هي آداب الاستئذان والطعام والنوم وغيرها ..واتكلمي له عن أخلاق الرسول صل الله عليه وسلم و كم موقف وكيف يقدر يتعامل فيهم ♥️

_____

نحن أطفالنا بربونا حرفيا وبقومونا.. بخلونا نعرف عن الدين والحياة أكتر عشان نضمن إنه المعلومة اللي توصل لهم صحيحة وكاملة ♥️
انت ممكن تستغل تربيتك لطفلك في تهذيبك لنفسك وخليهم يكون سبب في صلاحك و تغيرك للأحسن♥️



#منتسوري

معلومة على الطاير ❤

___
عادي جدا بعد الولادة الحليب ما يفرز على طول نسبة لأنه كان في هرمونات اثناء الحمل بتفرزها المشيمة مانعة لعمل هرمون الحليب (prolactin) .. و بتقيف الهرمونات دي بعد الولادة من 4 ل6 ساعات
عشان نحفز ادرار الحليب في طريقتين :-
_الرضاعة الكثيرة
_electrical or manual breast pump

❌لو حتأخدي حبوب منع حمل ..اتأكدي انها بتحتوي على بروجسترون فقط .. لأنه الاستروجين بوقف انتاج الحليب ❤

❌لو اثناء فترة الحمل . كان في افراز للحليب . لازم تقابلي الطبيب على طول . لأنه من اهم اسبابه موت الجنين ( الله يحفظ كل من في الارحام )

Create and stimulate ♥️

_______
زي ما اتفقنا انه الأطفال في اول حياتهم ما بفهموا الأوامر و الكلام ولا بقدروا يترجموه بصورته الصحيحة . خصوصا الاطفال من عمر سنة لحدي 3سنوات عقلهم بنسميه "العقل الماص " اي انه بشوف كل فعل وبعمل زيه بالزبط وبفهم أكتر عن طريق حواسه وانه يعمل الحاجة اكتر من انه يعبر عنها بالكلام ♥️
حاجة تانية انه الذاكرة في العمر دا ضعيفة جدا وبعتمد في التذكر على العقل اللاوعي ..كيف الكلام دا ؟
بمعنى انه التذكر عنده ما بكون ناضج لدرجة انه يتذكر ويحفظ الكلام لكن بتترجم عنده بالفعل و ادراكه وبتتخزن في العقل الباطن .عشان كدا بنلقى الاطفال في العمر دا بكرروا الحاجة اكتر من مرة
يعني لو قلتي له لا ما ترمي المساند من الكرسي . حيرجع يكررها مرة تانية لأنه ما مدرك لكلامك
لكن لو استبدلتيها بانه لمن يرميها . تقولي له دي مكانها هنا على الكرسي ما على الارض حيفهم ♥️
_كمان الطفل في المرحلة دي بجرب ردات الفعل .. بمعنى انه بكرر نفس الفعل اكتر من مرة وبشوف رد فعلك ثابت ولا لا ( 😂 بختبرونا العيال والله )
ف مثلا حتلقيه لو عمل حاجة حلوة وانت حضنتيه . حيكررها تاني عشان يعرف هل رد فعلك ثابت ولا بتغير
ف انتبهوا وخلوا ردود أفعالكم ثابتة و لازم يكون منطقي عشان يولد للطفل صورة ثابتة وما يكون مزعزع في تقبله و ردود فعله لمن يكبر ♥️

_____
🔸طيب يعني شنو نظام create and stimulate
اللي هو اختلاق المواقف و تحفيز الفعل :-
يعني حنستبدل الكلام والاوامر بالافعال و انه ندرب الطفل كيف ممكن يتصرف و شنو هو التصرف الصحيح
أمثلة :-
🔸لو لقيتي طفلك بشخبط على الحائط و صرختي عليه و منعتيه..حتلقيه بلف ويرجع تاني يشخبط
طيب اللي حتعمليه انك
حتجيبي دفتر و القلم و تقيفي جمب الحائط . وتقولي له
نحن من المفروض والصاح اننا نرسم على الدفتر شوف الله في رسومات حلوة جرب ارسم عليه
لكن الحائط ما للرسم . هو عشان يحمينا و ممكن نزينه بطريقة تانية زي مثلا نعلق عليه لوحة ♥️

🔸لو حابة تدربيه على المشاركة .لازم تقعدي معه و تمثلي انك صديقته و دربيه انه عادي ممكن تلعبي معه او لو قاعدين بتأكلوا انه ممكن تتشاركوا الاكل والحاجات اللي انتو بتحبوها ♥️ عشان يعرف انه المشاركة حاجة حلوة وممتعة

🔸 عشان يعرف يعبر عن مشاعره و ما يكتمها و تتحول لعنف وسلوك مؤذي ..
لمن يعمل حاجة غلط .. قولي له طبعا انا زعلت منك عشان كسرت لعبتك و انه ما كان مفروض تكسرها لمن نكون زعلانين بنتكلم ما بنكسر.. تعال وقول لي انك زعلان زي ما أنا عملت هسي .
شفت لمن زول يكون مضايق مفروض يتكلم و يعبر ♥️

🔸 خليه يكون مقدام . واديه مهمة قبل كدا دربتيه عليها . مثلا مثلوا انكم في محل ايسكريم و انت الطفل وهو البائع
لو سمحت يا عمو أنا عايز ايسكريم بنكهة الفانيلا
وبعدما يديك له
قولي له شكرا ربنا يديك العافية ♥️
كدا خلاص هو فهم هو مفروض يتصرف كيف
ولمن تطلعوا بالفعل خليه هو يطلب ودي حاجة بتساعده شديد في تقوية شخصيته ♥️

وغيرها وغيرها من المواقف اللي لازم تختلقيها و تدربيه عليها و تحفيز عقله على ردات الفعل اتجاه اي فعل ♥️

الموضوع دا ممكن تبدوه من اول ما الطفل يعرف يتكلم وتستمروا عليه لبقية عمره .. مع المراعاة لكل مرحلة محتاجة اي نوع من التدريب + تحاولوا تشوفوا شنو المواقف اللي بتمر به او ممكن تمر به في السن المعين و تدربوه على تقبلها و إظهار رد فعل اتجاهها♥️

_____

دائما كونوا النسخة الافضل من نفسكم وفي كل مرة حاولوا صلحوا من أفعالكم و ادعوا ربنا يصلحكم لتكونوا أباء وأمهات قدوة♥️
ربنا يعينكم على التربية ورحلتها الممتعة المتعبة♥️

واتذكروا إنكم..كلكم راع وكلكم مسؤول عن رعيته .. يعني ربنا حيسألكم من عيالكم وتربيتكم
ف قوموا نفسكم و ركزوا على التربية السليمة بصورة أكثر ♥️



#منتسوري