أنجز يا زول - Anjz Ya Zool

خديجة واحدة من اشطر السودانيين في مجال إدارة الموارد البشرية، زوله حقانية وداعمه جدا وعندها بال طويل شديد في كل تعاملاتها مع الموظفين ما شاء الله تبارك الله 💚
الورشة دي مهمة لكل زول عنده اهتمام بمجال إدارة الموارد البشرية. حتستفيدو منها جدا وحتديكم معلومات ثريه عبارة عن خلاصة خبرات واسعة 👌🏾

حتساعدكم في فهم الوصف الوظيفي، حتلاقو منها الزيت والزيتونه، وحتخليكم تتجنبو ال Cases الممكن تحصل بسبب الوصف الوظيفي الخاطئ وده من عشرات (كان ما مئات🤣) مشاكل الموظفين الحلتها.

المهم إستمتعو 😇
ألحق سجل في الرابط ده 🔥

▪︎رابط الورشة:
https://meet.google.com/pit-shxi-hpd

🚀 تعلم مجان كتابة البريد الإلكتروني والتقارير الإدارية الإحترافية بنفسك وبمساعدة الذكاء الاصطناعي مجـــانًا! ✨

✉️ من أهم المهارات الناعمة في العمل هي التواصل المهني، ويعد التواصل عبر الإيميل من أبرز تلك المهارات.
📊 مع البرنامج التأهيلي لكتابة البريد الإلكتروني وكتابة التقارير الإدارية المقدم من مركز أنجز يا زول للتدريب، ستتمكن من تطوير مهارات التواصل مع زملائك في العمل!

💻 البرنامج أون لاين لمدة 4 أيام

📱 للتسجيل: الانضمام لمجموعة الواتساب: https://chat.whatsapp.com/Kny7UMi8PoFEFLSXalbNiH
أو التواصل واتساب على الرقم:
https://wa.me/+249112659999
⏳ إنت جاهز تبدأ! إنت جاهز تنجز!
🚫 ما تفوت الفرصة!

خلال فترة شغلنا في مركز أنجز يا زول - Anjz Ya Zool
اتعرفنا على شباب كتار عندهم إمكانيات ومعرفة وخبرات ممتازة ممكن يستفيدو منها لو بس إتعلمو كيف ينقلو المعلومة والخبرة العملية دي لغيرهم 💚
وكان بالنسبة لينا تحدي حقيقي كيف نصمم ليهم برنامج تدريبي في الوضع الحالي ده، وكيف نساعدهم على تعلم نقل المهارة دي أون لاين!
وأخيرا بعد جهد جهيد حيكون عندنا شراكة ذكية مع شركة Hitex_solutions ويحكونوا شريك وداعم لبرنامجنا التدريبي:
دورة تدريب المدربين - Trainh f the v and ing Of Trainer (TOT) البرنامج ده حيستفيد منه شريحة كبيرة من أصحاب الخبرات العملية العندهم رغبة يدخلو مجال التدريب والتطوير 😇.
📌البرنامج مجان تمااااما 💪
📌 مدة البرنامج 50 ساعة تدريبية، اون لاين 💪

🔸 مع الدورة دي، حتتعلم كيف تصل إلى عقول وقلوب جمهورك بفعالية، سواء في العالم الواقعي أو الإلكتروني.

إنت جاهز تبدأ؟ إنت جاهز تنجز؟
سجل الآن مجان 🔥
📞 للتواصل مع https://wa.me/+249112659999
📲 انضم الآن إلى مجموعة الدورة التدريبية:
https://chat.whatsapp.com/C1ULExNew5NLucZjUakyZB

لو بتبحثو عن فرصة تدريب و تعليم ثري بشهادة معتمدة قابلة للتوثيق في الخارجية

البرنامج المتكامل في إدارة الأعمال...
- فيه 11 محور تدريبي بغطي كافة جوانب إدارة الأعمال بتدريب عملي مكثف.
- فيه محور إضافي لاستخدام الذكاء الاصطناعي في مجال التسويق الرقمي
- البرنامج حيكون مرن و اون لاين محاضراته مسجلة عبر تليجرام وفيهو متابعة مباشرة مع المدرب

🎓 شهادة معتمدة وقابلة للتوثيق من الخارجية السودانية 🤩
🎉 نظام تخفيض لأول 5 متدربين!
📞 للتسجيل أو الاستفسار:
https://wa.me/+249112659999

ركز وصحصح 👌🏾

مفيش شخص رياضي هيسخر منك لما "تبدأ" تلعب رياضة..

مفيش صاحب بيزنس "هيسخر" منك لما تبدأ مشروعك..

مفيش مُتعلم هيسخر منك لما تبدأ رحلتك التعليمية..

مفيش حد بياكل بنظام هيسخر منك لما تبدأ "تظبط" أكلك..

بس "الفشلة" هما اللي دايمًا عندهم حاجة يقولوها.

#منقول

الطب في السنين الأولى بتكون مواده مشتركه أو متشابهة، فإنك شلتي مادة، ده ما مقياس تخلي يأثر علي قرارك من البداية كده 🌹
حاليا انسي انك شلتي مادة وركزي في إنك عايزه شنو ودي رحلة دايره منك فتيش وبحث 👌🏾
إنتي عايزة شنو (اختيارك) هو الحيركز مجهودك بدون الحيرة دي وحيخليك تنجزي..
راجعي الإستشارة المرفقه في الرابط تحت، حتعملي المقارنه بين تخصص الطب والجراحة وبين طب الفم وجراحة الأسنان 🙏🏾
https://www.facebook.com/share/p/34ES1ybedMnnN8d7/?mibextid=oFDknk

ولو إحتجتي لينا ما تترددي تتواصلي معانا عبر الواتساب💚
+249112659999

#اسألنا

عشان نديك إجابة وتوجيه صحيح بنحتاج تجاوب لينا أسئلة تدينا تفاصيل اكثر وتخلينا نفهم وضعك كويس🙏🏾

نتمنى صاحب الاستشاره دي يرسل لينا في رقم المركز على واتساب: +249112659999

واسفين على التأخير 🌹
#اسألنا

لأنك طلبت نصيحة حنخلي النصيحة دي عامة شديد ومركزه على مجالين إنت حددتهم هم: علوم الحاسوب، و سلاسل التوريد (ادارة المخازن تحديدا) 🌹
اولا:
الحمد لله إنت عملت خبرة ما بطاله في المجالين وقضيت فيهم زمن فهمك طبيعة العمل فيهم ودي حاجة كويسه وممتازه.

ثانيا:
لازم تحاول تطلع على الحاجات الجديده في كل المجالين وتشوف نفسك مستعد تستقر وتركز على اي مجال وتمشي فيهم.
مثلا:
- مجالات عمل علوم الحاسوب حاليا بقت الوظائف الاكثر طلبا فيها المبرمجين والمتخصصين في هندسة البيانات والذكاء الاصطناعي وتعلم الآلة، والمجالات دي بتحتاج ناس محترفة ومرتباتها عالية في منطقة الشرق الاوسط وشمال افريقيا والعالم كله بقى متوجه عليها.
ف السؤال: كيف خلفيتك البرمجيه وهل عندك استطاعه تدخل المجال ده وتجتهد فيهو ؟ بتحتاج تقريبا عملية التدريب والتطوير البتطلعك محترف بين سنه الى سنتين، فيها تعليم وكورسات وتدريب عملي وفترات تدريبية في شركات وكمية مشاريع تزيد احترافيتك.
- مجال إدارة سلاسل التوريد او ما يعرف بال Supply Chain وإنت اتخصصت فيهو إدارة مخازن ودي حاجه كويسه، المجال ده بنفسه ممتاز جدا لانه العالم حاليا بعاني وبفتش في طرق إدارة كويسه لسلاسل التوريد.
فإنت إذا شايف إنه خبرتك في ادارة المخازن ممتازه، بننصحك إنك تجتهد وتبدأ تحضر لحصولك على الشهادات المهنية الإحترافية ودي بتحتاج منك قرايه وتركيز وإمتحان ولو اتحصلت عليها حتكون عندك فرصة كويسه جدا في تطورك المهني 💚
أهم حاجه تكون بتقدر تتعامل مع السوفت ويرز البتشتغل بيها الشركات وتكون متابع الحاجات البتطلع جديده في المجال وتحاول تتمرن عليها.
بنشوف إنك اصلا بتعرف تستخدم الحاسوب بصورة كويسه لطبيعة قرايتك وعملك، فلازم جدا تكون متميز في جانب استخدام السوفت ويرز المتعلقة بإدارة سلاسل التوريد 💪

الخلاصة:
حدد إنت داير تتخصص في شنو، واتوكل على الله، وابدأ فتش عن مسار تطور مهني بتناسب مع اوقات شغلك وابدأ طوالي

وبنعتذر للرد التأخر 🌹

#اسألنا

أحيانا الزول ما بكون عارف الخير الراجيهو ومنتظرو وين وهو شنو!
كتير الإنسان بكون عنده هدف معين عايز يصل ليهو وأثناء رحلته دي تتغير وجهته لحاجة تانيه يكون فيها خير أكتر بالنسبة ليهو، والحاجة دي ممكن يكون أسبابها إنه الإنسان ده ما كان عنده معرفة كافية بطريقه ورغبته وأثناء رحلته إكتشف الحاجة دي

مجرد إنك محدد إنت عايز شنو، ومتوفره عندك ال Tools الأساسية الحتساعدك تبدأ دي نعمة كبيره جدا تحمد الله عليها 💚
إختيارك كمان موفق، لأنه تخصص التسويق الرقمي وصناعة المحتوى بقت جزء مهم لأي مشاريع صغيره أو متوسطة أو كبيره (الشركات) وكمان بقى مصدر إهتمام المنظمات وجزء مهم في أي قسم تسويق، يبقى التحدي إنت كيف تقدر تصل مرحلة الابداع والتفكير خارج الصندوق، وحنوريك طريق لو سلكته وصبرته فيه بإذن الله حتقدر تطلع قروش كويسه عن طريق تلفونك.
اول خطوة:
فتش على كورس تدريبي كويس ومتكامل، لازم المحاور بتاعته تغطي ليك:
- مفاهيم التسويق وعن علم التسويق وتطوره (اي يعني مقدمة كويسه كده تديك فكرة عن عام التسويق)
- التسويق الرقمي وانواعه، واعرف انت داير تتخصص في شنو فيه.
- تحديد الجمهور المستهدف وكيف تحدد العميل المثالي.
- خوارزميات مواقع التواصل الاجتماعي كلها. (حتتخصص في اي منصة بالزبط).
- كتابة المحتوى التسويقي والمحتوى الإعلاني في مواقع التواصل الإجتماعي (كل موقع على حدى) لازم يكون متوافق مع خوارزميات مواقع التواصل.
- تكتيكات و الخدع البتساعدك تكتب محتوى يتوافق مع مواقع التواصل الإجتماعي.
- تطبيقات عملية في كل جزء، لازم تتأكد إنك إستوعبت كويس التطبيقات دي وقدرت تنفذها.
ملاحظة مهمة:
لازم المدرب الحيشتغل البرنامج ده يكون زول عنده خبره واسعة.

ثاني خطوة:
فتش فرص تدريب حتى لو غير مدفوع القيمة في شركات بغض النظر عن إنها صغيره أو كبيره، ما تنزل مع جهة ما عندها فريق تسويق او اضعف الايمان تنزل ويكون مسؤول منك خبير في المجال، عشان لمن تشتغل تقدر تأخد وتدي معاهو في الإستشارات
أو
إذا عندك بزنس ممكن تبدأ تطبق الاتعلمتو في قنواتك الرقمية وتقدر تستفيد من الخبرة الحتتعلمها اثناء شغلك لمشورعك وفي نفس الوقت تستفيد من عمليات البيع الممكن تحققها.
أو
تبدأ تعمل بروفايل على لينكدان وتبنيهو بناء كامل على إنك مختص تسويق رقمي، اشتغل فيهو محتوى تسويقي واعتبرو مشروعك الانت مفروض تقعد تجهز ليهو حملة لمدة ٣ او ٤ شهور على الاقل، المحتوى الانت حتجيبو حيكون بإجتهادك في بحثك وقرايتك وكمية المعلومات الكتيره الإنت حتجيبها. وبعد داك ممكن تبدأ تعلن عن خدماتك للشركات وأصحاب المشاريع. الغرض الاساسي من الحاجه دي إنك تعمل لنفسك قصص نجاح تقدر تسوق بيها لخدماتك الحتقدمها.

ثالث خطوة:
لااااااازم لااااااازم تعمل تغذية بصرية كتيره وتكون مطلع على حملات تسويق رقمي لشركات، تعرف تحللها وتفهم الشركات دي عملت شنو وكيف.
التغذية البصرية دي بتوسع أفقك وبتخليك عندك مخزون كويس من الافكار يساعدك تجيب فكرة خارج الصندوق، والفكرة دي تقدر تستخدمها في اي واحده من الشركات الانت حتقدم ليها خدماتك وتبقى قصة من قصص نجاحك الكبيره بإذن الله.

توضيحات مهمة:
- إنت تبدأ بشنو دي إجابتها عندك إنت فبعد تنتهي من الكورس التدريبي حتكون إتكونت عندك فكرة عن التسويق الرقمي وبعد تنتهي من التطبيق العملي حيبقى قدامك رؤية واضحة تساعدك تختار إنتي تبدأ بشنو!

- التعليق الصوتي ميزة إضافية أجلها شويه بعد الكورس لانك إذا اتوجهت لمحتوى مرئي او مسموع حتستفيد منها شديد. في خلال الفترة دي حاول طور المهارة دي، مثلا: ممكن تجيب فيديو إعلاني وتفرغ النص بتاعه وتحاول تتمرن على طبقات الصوت لمن تجيده كويس. او تحاول تبتكر اسلوبك الخاص في الاعلانات. ولازم تراجع الحاجه دي مع اشخاص ليهم خبرة في المجال او مع واحد منصف من دائرة معارفك يديك رأيه بإنصاف وصدق.

أخر حاجة:
ما تركز على القروش في البداية، إذا عايز تبدع بالجد ركز على تعلمك، تطبيقك، وإطلاعك. اللحظة الحتكون فيها محترف وبروفيشنال وزول مبدع بتجيب افكار خارج الصندوق هي اللحظة القروش حتبدأ تجيك أحدي عندك. اتوكل وأبدا طوالي ✌🏾

#اسألنا

إنتي عايزة شنو؟
ده السؤال المفروض تطرحيهو على نفسك قبل ما تحددي مسيرتك، ماف زول بعمل كارير شفت ساي كده!
فالسؤال...
إنتي عايزة تبني مجالك المهني في الهندسة الكهربائية؟ ولا شايفة نفسك في مجال تاني؟

ما عيب إنه الزول يكون ضايع بغض النظر عن متين اتخرج، المهم إنه يحدد عايز شنو بالزبط ويقيم الخيارات القدامه ويبدأ يتحرك في طريقه.
وخليك عارفه إنه طالما قاعده تتعلمي وتكتشفي في خياراتك إنتي حتستمتعي💚

حاليا مفروض تعملي شنو؟
١. جيبي ورقة وقلم وجاوبي على الأسئلة دي:
- إنتي عايزه تكوني وين؟
- شنو هو شغفك وهواياتك؟
- شنو أكتر حاجة شايفه إنك بتلقي نفسك فيها ؟
- هل فعليا الهندسة الكهربائية هي رغبتك ؟
- هل إنتي فاهمه أنه مجال الكهرباء ده واسع كتير وقدرتي تتطلعي على تخصصاته كلها؟
- هل عندك الرغبة إنها تكون الكارير حقك؟
- شنو هو المجال الممكن تخشي غير الهندسة الكهربائية ومتاح بالنسبة ليك؟

الاسئلة دي حتديك اجابات مكتوبه قدامك، حتخليك تشوفي إجاباتك بنفسك. إحنا مرات ما بنكون شايفين حجم الفرص قدامنا لاننا ما بنكون إجتهدنا ندرس الفرص دي ونشوفها كويس وأقصد هنا ممكن ما تكوني إطلعتي على الفرص الكبيرة الموجودة في تخصصك الأكاديمي.

٢. في معادلة لازم تحليها حتساعدك تحددي هل ده الكارير الانتي ممكن تمشي فيهو ولا لا والمعادلة هي:
رفق = (ر) رغبة + (ف) فرصة + (ق) قدرة
مثلا: اخترتي مجال الهندسة الكهربائية

- هل عندك فيها رغبة؟ (قيمها من 10)
ورغبة عنها المقصود بيها تطلعاتك وأهدافك واحلامك.
- هل موجود فيها فرص؟ (قيمتها من 10)
وعشان تعرفي الإجابة دي لازم تقري وتفتشي مهندسين كهرباء وتسألي! ايوه تسألي عديل اصلا ما عيب 💚
اسألي في مجتمعات المهندسين السودانيين والغير سودانيين عن التخصص بتاعك شوفي حجم فرصه كيف، اقري مقالات عن فروع التخصص واقري عن حجم فرص العمل بتاعتها وعن الإستثمار فيها كمان، الحاجات دي لو اطلعتي عليها حتديك معلومات حقيقه عن الفرص. (تلميح ممكن تستخدمي: عمليات البحث ساهلة ممكن بقوقل، ممكن في لينكدان تسألي، ممكن بأي أداء من اداوات الذكاء الإصطناعي)

- هل عندك ليها قدرة جسديه ومادية ؟
جسديه لطبيعة العمل الحتكون، ومادية لحوجتك لبعض الكورسات وجري فترة التدريب الممكن تنزليها في أي شركة.(قيميها من 10)

بعد تفتشي كويس وتفكري وتأخدي زمنك تجاوبي الاسئلة دي حتعرفي الإجابة 💚

إحنا ما بنقدر نقول ليك أدخلي المجال الفلاني ده لانه كده حنكون حصرنا تفكيرك فيهو وحددنا ليك مسارك إحنا! الحاجة دي لازم تتحدد منك إنتي، لإنك الوحيدة العارفه رغبتك وإمكانياتك لإنك الوحيدة العارفة كمية الطاقة الكبيرة الجواك 🙏🏾

وأخر حاجة:
مهما كان طريقك إستمتعي بكل تفاصيله واستمتعي بكمية المعلومات حتتعلميها وحتزيد من معرفتك، بغض النظر عن النتيجة المهم إنك تكوني بتعملي الحاجه الانتي دايراها ومستمتعه 💚

#اسألنا

مجرد إنك وعيتي لمشكلتك دي وحاسه إنك محتاجه تعدلي الحاجة دي، يبقى ده أول الغيث 💚
عموما لازم تكوني عارفة حاجة مهمة:
"الدافع هو المحرك لإنجازك، وإيمانك بهدفك هو البخليك تستمر، والعمل اليومي والإلتزام العالي هو شريك النجاح " ✌🏾
إنتي محتاجة تفصلي نشاطاتك حاليا (مؤقتا) وتقعدي قعدة ترتيب بورقة وقلم.. تعرفي إنتي وين، ودايره شنو أصلا وبتسوي في شنو وبتسوي ليه ؟
أسئلة قد تكون بسيطة لكن إجابتها بتقطع ليك نص الطريق!
ماف زول بقدر ينجز ويسعى ما لم يكون عنده هدف قدامه وهو مؤمن بهدفه ده، وأكتر الناس البتنجز دي عندها إيمان بأهدافها.

حتعملي شنو، بخطوات عملية:
- جيبي ورقة وقلم وجاوبي (بصدق ولازم تكتبي) الاسئلة دي: أنا عايزه شنو وهدفي وحلمي شنو(لازم حاجة حقيقيه وانت دايراها) ؟ هل فعلا أنا دايره الحاجات دي؟.... وبعدها لازم تجاوبي: أنا حاليا بعمل في شنو؟ هل البعمل فيهو ده بساعدني أصل لهدفي؟ هل خلال الفترة الفاتت دي أنا كنت جاده ومجتهده وملتزمه بالمهام اليومية حقتي؟ شنو الأسباب البتخليني ما التزم ومخليه عندي عدم رغبة انجز؟
أعتقد لمن تجاوبي الإجابات دي وهي مكتوبه قدامك حتكوني فهمتي الحاصل ليك شنو بالزبط.

- بغض النظر عن إجاباتك فوق، لازم في صفحة جديدة مرتبة مهندمة تكتبي إنتي عايزة شنو، ممكن الحاجه العايزاها دي تكون حلم وطموح: وظيفة كبيرة، تكوني خبيرة في مجال وعندك وزن كبير في المجال، تكوني Business woman وعندك كم مشروع تجاري وشغاله فيهم، أو أي احلام وطموحات تانيه.
بعد كده تجي تعملي إسقاط لطموحاتك دي في شكل أهداف ذكية(ممكن تقري عن كيف تكتبي أهداف ذكية) والأهداف دي بتتعمل في شكل مهام يومية تنجزيها!

- يستحسن تراجعي صياغ الأهداف والمهام الانتي كتبتيها مع مختص ممكن يكون صديق على معرفة كافية جدا بمهارات التخطيط، أو ممكن ترسلي لينا طوالي في رقم الواتساب بتاعنا وحبابك 🌹

- لمن الحاجات دي كلها تجهز وخلال الفترة دي لو عندك اي إلتزام قراية أو كورسات بتنجزي فيها بنصحك بطريقة فعالة جدا وبنشوف إنك كمان ممكن تستخدميها في شغلك. الطريقة الفعالة دي إسمها بمدورا،فهمها شنو الطريقة دي؟
تكتيك البمدورا هو طريقة بتديري بيها الزمن بتساعدك تركز أكتر وتزيد إنتاجيتك...
الفكرة بسيطة:
بتجيب منبه بتزبطه على 25 دقيقة، بتجهز مهمتك وتبدأ تشتغل خلال ال 25 دقيقة دي ما مفروض تركز في أي حاجه غير الحاجة الانت بتعمل فيها.. مجرد ما المنبه يضرب بتأخد راحة 5 دقايق، وبكده بتكوني عملتي دورة.
بتعمل الحركة دي ٤ مرات وبعدها بتاخد راحة بين 15-30 دقيقه. وبتستمر بنفس الطريقة.

يلا إحنا بننصحك بشنو؟ ✌🏾
بننصحك عشان تعملي لياقة وتقدري تنجزي وتستمري (يعني عشان تتعودي) وما تقيفي إنك تبدي شويه شويه ..
مثلا أول يومين تعملي دورتين بس ..
اليوم الثالث والرابع تعملي ٣ دورات..
والخامس والسادس تعملي ٤ دورات...
والسابع والثامن ولدة ١٠ يوم تعملي ٥ دورات.. وشويه شويه تبدي تزيديها، وحتلاحظي فرق شاسع في إنجازك 💪

الطريقة دي بتخليك تركزي على حاجة واحدة بدون تشتت، وبتعودك على مود أداء المهام، وبتخلي المهام الكبيرة أسهل. كمان بتساعدك تقللي من التوتر لإنك ما بتضغطي على نفسك لفترات طويلة وحتخليك تحسي بإنجازك وكمية الحاجات الجديدة البتتعلميها ✌🏾

#اسألنا