08/08/2020
الناس اللي خلصت الثانويه ومستنيه التنسيق ،
اول حاجه علشان تدرس بالروسي بتدرس سنه تحضيري اسعارها بتكون من 1000حتي 3500 دا بيختلف علي حسب قوة التحضيري و الجامعة اللي رايحها عالية ولا متوسطة ولا ضعيفة.
و التحضيري دا بيبقي عبارة عن دراسة اللغه الروسيه بالروسي بنسبة 95% و بالانجليزي بنسبة 5% يعني بتدرس روسي بالروسي و لما حاجه تقف قدامك الدكتورة بتقولهالك بالانجليزي و بتدرس مواد تانيه زي أحياء و كيمياء لو إنت داخل تخصص طبي ، و لو هاتدخل تخصص هندسي هاتدرس فيزياء و رياضه
ماتخافش المواد دي مش زي الثانويه الكتاب 100و 200 صفحه ، لا دي أسس علشان تأهلك إنك تدرس في الجامعة يعني تخف من صعوبات الدراسة
*تحذير* أغلبيه الناس اللي بتروح علي اساس انها رايحه تحضيري بتروح تتفاجئ ب إنها بتدرس لغة بس و الجامعة بتزوق الموضوع بإنها بتديك في الرياضة يعني ايه (+) و (-) و (×) و (÷) بس و معادلتين صغيرين بس كدا انا درست رياضه و بيدوك شهاده بكدا و الفيزياء بيدوك الكثافة و الحجم و كام مصطلح كدا و الاحياء حاجات بسيطه. بس اوعي يابن الحلال تنخدع في الكلام دا علشان كله في الاخر بيصب في مصلحتك يعني ايه الشهاده مقابل انك تتعلم ،
و بالنسبه للناس اللي حابه تدرس بالانجليزي اولا يابن الحلال لو مستواك وحش ف الانجليزي بلاش او علي الاقل حاول تعدل من مستواك بس لو انت وحش ف الانجليزي ممكن تخش روسي هايتسهلوا معاك شويه علشان انت لسه جديد ف اللغة و دا كله بيبقي بينك انت و الدكتور اللي عليك يعني لو انت بتحضر معاه و بتعمل اللي عليك هايساعدك و لو انت لأ هاتبقي زيك زي الروسي في المعاملة يعني المعامله شغل و بس مفيش تساهل و انت لسه بادئ في اللغة ف هاتحس الموضوع صعب جدا
في حاجه لازم تاخد بالك منها و هي :
1-قرار النقابة العامة للأطباء اللي هو لسه متطبق السنه دي و بينص ان علشان النقابة تعترف بيك في مصر علشان تشتغل و تقدر تاخد كارنيه النقابة لازم يبقي مجموعك أقل ب 5% من مجموع الطب يعني السنه دي الطب هاياخد من 99% انت لازم تبقي جايب 94% دا للطب البشري و كذلك الأسنان و الصيدلة علشان لو روحت مكتب هايتضحك عليك و انت لسه علي عماك ف مش هايجيبوا سيرته و القرار دا هايتطبق علي دفعة 2019 اللي لسه خارجه السنادي بس الناس اللي هاتسافر و هاتكمل شغلها و دراستها برا مالكش دعوة بالقرار دا و الناس خرجة ثانويه 2018 مالكوش دعوه كدا كدا طالما انت في جامعة حكومية المجلس الاعلي للجامعات بيعادلك الشهادة و تقدر تشتغل و تفتح عيادة ، 98% من الجامعات بتبقي حكوميه و 2% خاصه ف خلي بالك علشان ماتجيش يتضحك عليك و تبقي مش عارف تعمل ايه ولا عارف تحول من جامعة للتانيه.
2-في حاجه ناس بيعملوها انهم بيسترخصوا تحضيري بيكون ب 500$ او ب 600$ و بيروح و يتلاقي نفسه في معهد لغه مش هايتعلم فيه صح زي الجامعة علشان المعاهد مابتعملش تجديد فيزا ف هاتلاقي نفسك بتروح تقعد ٢ شهرين او ٣ و ترجع علي بلدك تاني و كمان مستوي التعليم فيه ضعيف و بياخد شهادة لغه زي الجامعة بس مالهاش لازمه علشان في ماتعلمش.
3- أي حد يغريك و يقولك هاعمللك مشروع تكسب من وراه كذا و كذا أوعي تصدق علشان في الغالب هايضحك عليك و هايتنصب عليك في فلوس جامدة .
4-أي حد يقدملك بياخد عمولته جزء بعد لما القبول يتطلع و جزء بعد الدعوة و أوعي تديله كله مرة واحده و مش أي حد تقدم معاه اللا لما تستريح معاه .
5- إبعد عن المكاتب علشان هاتحسسك هاتسكن في فندق ٧ نجوم و في الاخر هاتلاقيه سكن عادي مفهوش تلاجه 😅 و انك رايح بريطانيا و امريكا و كندا ف نفس الوقت و هاتحسسك انك مفيش منك و هاتروح تتفاجئ بكل حاجه إسمع مني و كمان بياخدوا عموله من1000$ لحد 2000$ و دا مبلغ كبير و حاول تقدم مع طالب تكون واثق فيه أو أي حد صاحبك أو قريبك يكون هناك .
6- خلي بالك و ركز و اعرف اسم جامعتك كويس و روح أسال عنها في المجلس الاعلي للجامعات علشان تشوفها معترف بيها في مصر و تقدر تعمل معادلة علشان تشتغل و كدا و كمان ادخل علي اي موقع و شوف ترتيبها الكام علي روسيا و علي العالم و شوف الشهادة بتاعة الجامعة ايه نظامها و طرق الدراسه فيها
7- لما تروح المجلس الأعلي للجامعات اللي في جامعة القاهرة خد شهادة الثانوية معاك و روح بيها و قولهم دا مجموعي هل هاينفع لما اخلص دراسة برا أعادل بمجموعي دا و لا لأ
و ربنا يوفقك الجميع 🖤
