10/02/2023
الانجليزي ثانوية أزهرية :.........................................
الإنجليزي عامل عقدة لطائفة كبيرة من الطلاب لكنه أسهل مادة تجيب فيها مجموع وفي حاجات بتبقى داخل ضامنها قبل الامتحان.
سؤال الدايالوج:
سؤال بييجي مباشر يا إما يديك إجابة وعايز سؤال يا إما بيديك سؤال وعايز إجابة، وإجابة السؤالين بتكون من خلال قراءة السؤال كامل يعني على سبيل المثال لو سايب نقط وكاتب مدة أسأل عن المدة وهكذا، وفي نقطة بتيجي كتير في الامتحانات وهي السؤال المذيل وعلامته أسهل علامة أول ما تلاقي في آخر السطر فاصلة ونقط وبعدين علامة استفهام يبقى سؤال مذيل، ذاكر قواعده كويس عشان تضمنها لو جت، وحل أسئلة دايالوج كتير هتلاقيه سهل خالص والله.
سؤال اختر:
طبعاً سؤال الاختر بيبقى عبارة عن عشرين سؤال عشرة جرامر وعشرة كلمات، لو أنت مذاكر الجرامر كويس هتحله بييجي مباشر وبالنسبة للكلمات نصيحة مني بعد ما تخلص حفظ الكلمات من عربي لإنجليزي اعكس وعود نفسك تشوف الكلمة بالإنجليزي تعرف معناها بالعربي ده أفضل وهيفيدك وأنت بتحل سؤال الكلمات كتير، وركز على المفردات الرئيسية كويس.
سؤال الترجمة:
بيجيلك جمل متوسطة تترجمها(مش معقدة)، لو مش معاك ملف كلمات خاصة بالترجمة لازم تجيب pdf من واحد صاحبك أو مع أي حد أكيد هتلاقي واحفظ مع كلمات المنهج 10 أو 15 كلمة كل مرة عشان ميقابلكش كلمة مش عارفها وتقعد تخمن، وكلمات الترجمة مشهورة زي الحكومة، التكنولوجيا، الحضارة، التطور، التلوث، وسائل التواصل الاجتماعي، السلام، الحرب، الفقر والغنى وهكذا، حل أسئلة ترجمة كتير واتدرب عليها عشان تتعود ترتب الجملة صح وبكده إن شاء الله سؤال الترجمة في المتناول.
سؤال القصة:
أنا كاتب البوست مخصوص عشان سؤال القصة ده، القصة باختصار عشان تريح دماغك هتجيب ملف للقصة بالعربي وتقعد تقرأها بالعربي وتحفظ كلمات كل شابتر من الملخص_ أنا بفضل المعاصر_ وبعدين تحل أسئلة عليها، أنا عملت كده وقفلت السؤال القصة (8درجات مضمونين).
سؤال القطعة:
وده برأيي تحله السؤال قبل الأخير لإنه محتاج حد رايق يقعد يقرأها كاملة ويحاول يجمع مضمونها في دماغه قبل ما يشوف الأسئلة وبعدين هيبدأ يحل، الأسئلة كلها بتيجي من جواها إلا لو رخم عليك وجابلك كلمة وقالك دي معناها إيه زي ما عمل معانا.
سؤال البرجراف:
آخر سؤال تحله في الورقة كلها، وده مش محتاج منك فيه غير إن خطك يكون حلو وما ينفعش تشخبط فيه والمقدمة بتاعتك تكون هي جملة واحدة ويستحسن تكون صغيرة، وأهم جزء في البرجراف هو أوله، أول أربع خمس جمل لازم يكونوا منظمين كويس ومش فيهم غلطة في الجرامر . بيهتم بأول خمس سطور جدآ وبعد كده عادي هو بيطلب منك 120 كلمة بس بيركز على أول جزئية ويقيمك عليها.
ملحوظة أخيرة: متنسوش تحلوا الwork book بتاع كتاب المعهد عشان أحياناً بيجيب منه بس مش أكيد.
بالتوفيق 🤍
