05/02/2025
وانا: قوم اشرف خیل کا نئے جنرل بس سٹینڈ کے خلاف گرینڈ جرگہ، شدید تحفظات کا اظہار
وانا (نمائندہ خصوصی) وانا بازار میں نئے جنرل بس سٹینڈ کے خلاف قبیلہ اشرف خیل کا ایک گرینڈ جرگہ منعقد ہوا، جس میں بڑی تعداد میں قبائلی عمائدین، علماء، مقامی افراد اور سٹنیڈ متاثرین کی بڑی تعداد نے شرکت کی۔
جرگے سے خطاب کرتے ہوئے ملک جانباز خان، ملک بہادر خان، مارث خان، ملک اینار خان، مولانا رحمت اللہ، مولانا سلطان خان، ملک عبدالعلی و دیگر نے حکومت کے فیصلے پر سخت اعتراض کیا۔ ان کا کہنا تھا کہ جنرل بس سٹینڈ کی مد میں حکومت نے قوم کاکا خیل اور قوم اشرف خیل دونوں کو D کلاس لائسنس جاری کیے ہیں، لیکن مقامی ضلعی انتظامیہ اور پولیس فورس نے جانبداری کا مظاہرہ کرتے ہوئے قوم اشرف خیل کے ساتھ سوتیلی ماں جیسا سلوک اشرف خیل قبیلے کو نظر انداز کیا ہے اگرچہ قانون کے مطابق دونوں قبیلے الگ الگ سٹینڈز کے حقدار ہیں۔
منشی باز گل نے کہا کہ وانا بازار میں پہلے سے موجود بس سٹینڈز کو ختم کرانے کے باعث 36 منشی بے روزگار ہوچکے ہیں، جس کی وجہ سے ان کے گھروں کے چولہے ٹھنڈے پڑ گئے ہیں اور ان بچے فاقے گزارنے پر مجبور ہیں۔
جرگے نے انکشاف کیا کہ سٹی اور تنائی تھانہ میں غیر قانونی طور پر پرائیویٹ افراد کو بٹھایا گیا ہے، جو بس سٹینڈ کے نام پر زبردستی گاڑیوں سے مسافروں کو اتار کر بھتہ وصول کر رہے ہیں۔
جرگے نے حکومت سے مطالبہ کیا کہ ملک کے دیگر شہروں کی طرح وانا میں بھی متعدد بس سٹینڈز قائم کرنے کی اجازت دی جائے۔ شرکاء نے حکومت کو پانچ تاریخ تک کی مہلت دیتے ہوئے خبردار کیا کہ اگر غیر قانونی اقدامات کا سلسلہ جاری رہا تو سنگین تصادم کا خطرہ لاحق ہوگا، جس کی تمام تر ذمہ داری حکومت اور پولیس پر عائد ہوگی۔
Copy
