31/03/2026
تعلیم کے فروغ اور والدین کی ذمہ داریوں پر مبنی ایک یادگار تقریب
آج بحمداللہ گورنمنٹ ہائیر سیکنڈری سکول ٹانڈہ میں ششم اور ہفتم کلاس کے سالانہ رزلٹ کے موقع پر ایک پر وقار تقسیم انعامات کی تقریب منعقد ہوئی۔ تقریب کی صدارت سکول کے قابلِ فخر پرنسپل افتخار جاوید شاہین صاحب نے فرمائی۔ سٹیج سیکرٹری کے فرائض جمیل اختر صاحب اور عامر محمود صاحب (ایس ایس ٹی) نے بخوبی انجام دیئے۔ تقریب کے مہمان خصوصی چوہدری وحیدالدین صاحب اور معروف سرجن ڈاکٹر وسیم اشرف صاحب تھے، جن کی موجودگی نے محفل کی رونق بڑھا دی۔
تقریب کا آغاز تلاوتِ کلام پاک اور نعتِ رسولِ مقبول ﷺ سے ہوا۔ اس کے بعد پرنسپل صاحب نے تمام اساتذہ، والدین اور طلبہ کا استقبال کیا اور تعلیمی نتائج پر اطمینان کا اظہار کیا۔ انہوں نے کہا کہ بچوں کی کامیابی میں والدین کی نگرانی اور اساتذہ کی محنت دونوں اہم کردار ادا کرتے ہیں۔ والدین کو اسکول کی جانب سے نئی داخلہ مہم کے بارے میں تفصیلی آگاہی دی گئی اور انہیں بچوں کی روزانہ کی تعلیمی اور اخلاقی نگرانی پر خصوصی توجہ دینے کی ترغیب دی گئی۔ خاص طور پر سوشل میڈیا کے بڑھتے ہوئے اثرات سے بچوں کو بچانے کے لیے ایک واضح پالیسی مرتب کرنے پر زور دیا گیا تاکہ بچے اپنی قیمتی توانائی تعلیم اور اچھی سرگرمیوں میں صرف کریں۔
ڈاکٹر وسیم اشرف صاحب نے اپنے خطاب میں اپنے تعلیمی دور کی یادداشتیں سناتے ہوئے بچوں کو بتایا کہ محنت اور لگن سے کوئی ہدف ناممکن نہیں ہوتا۔ انہوں نے کہا کہ آج کے طلباء کل کا مستقبل ہیں، لہٰذا ضروری ہے کہ ہم ان کی تربیت میں کوئی کسر نہ چھوڑیں۔ چوہدری وحیدالدین صاحب نے بھی بچوں کی حوصلہ افزائی کرتے ہوئے کہا کہ تعلیم کے ساتھ ساتھ اخلاقی اقدار کو بھی اپنانا چاہیے۔
اس کے بعد پوزیشن پانے والے طلبہ میں انعامات تقسیم کیے گئے۔ فرسٹ، سیکنڈ اور تھرڈ پوزیشن حاصل کرنے والے بچوں کو انعامات دینے میں وسیم اکرم صاحب، بلال صاحب، آصف جاوید صاحب، ملک آفتاب صاحب، عامر محمود صاحب اور عنایت صاحب اللہ دتہ عابد صاحب اساتذہ ادارہ ھذا و مہمانان خصوصی خاص طور پر پیش پیش رہے۔ ان کے علاوہ دیگر اساتذہ نے بھی اس نیک سعی میں بھرپور کردار ادا کیا۔محمد عمر عزیز صاحب کی پی ای ٹی نے بیک گرائونڈ میوزک اور سائونڈ سسٹم مینیج کیا۔ بچوں کی خوشی دیکھ کر ہر چہرے پر مسکراہٹ تھی۔
تقریب کے دوران مقررین نے قصبہ ٹانڈہ میں چوہدری وحیدالدین صاحب کی سماجی خدمات کو بھی خوب سراہا، بالخصوص ان کے زیر اہتمام تین واٹر فلٹرز کی تنصیب پر، جس سے علاقے کے لوگوں کو صاف پانی کی سہولت میسر آئی ہے۔ اس اقدام کو انتہائی قابلِ تحسین قرار دیا گیا۔
آخر میں پرنسپل صاحب نے تمام اساتذہ، والدین اور طلبہ کا شکریہ ادا کرتے ہوئے کہا کہ یہ تقریب صرف انعامات کی تقسیم نہیں، بلکہ بچوں کی بہتری اور ان کے روشن مستقبل کے لیے ایک عہدِ نو بھی ہے۔ انہوں نے والدین پر زور دیا کہ وہ بچوں کی تربیت میں مستقل مزاجی اور محبت کا دامن ہاتھ سے نہ چھوڑیں۔ اس کے ساتھ ہی دعا کی گئی کہ اللہ تعالیٰ ہمارے سب بچوں کو علم کے زیور سے آراستہ کرے، انہیں سوشل میڈیا کے منفی اثرات سے محفوظ رکھے، اور ان کے اندر اعلیٰ اخلاق اور خدمتِ خلق کا جذبہ پیدا فرمائے۔ آمین
یہ تقریب ایک سبق اور پیغام لے کر آئی کہ جب اساتذہ، والدین اور معاشرہ مل کر بچوں کی رہنمائی کرے تو کوئی بھی بچہ پیچھے نہیں رہتا۔
