Ishq E Sukhan

گلے ملا نہ کبھی چاند بخت ایسا تھا
ہرا بھرا بدن اپنا درخت ایسا تھا

ستارے سسکیاں بھرتے تھے اوس روتی تھی
فسانۂ جگر لخت لخت ایسا تھا

ذرا نہ موم ہوا پیار کی حرارت سے
چٹخ کے ٹوٹ گیا دل کا سخت ایسا تھا

یہ اور بات کہ وہ لب تھے پھول سے نازک
کوئی نہ سہہ سکے لہجہ کرخت ایسا تھا

کہاں کی سیر نہ کی توسن تخیل پر
ہمیں تو یہ بھی سلیماں کے تخت ایسا تھا

ادھر سے گزرا تھا ملک سخن کا شہزادہ
کوئی نہ جان سکا ساز و رخت ایسا تھا

شکیب جلالی

یہ لوگ بات ہی کرتے ہیں غم شناسی کی
کوئی بھی جان نہ پایا گھٹن اداسی کی

ترے سلام کے پیچھے مفاد جانتا ہوں
ذرا سی داد مجھے گفتگو شناسی کی؟

میں اپنے خواب میں ٹکرا رہا تھا گاڑی سے
سو میری نیند علامت ہے بد حواسی کی

ہم اس کے واسطے بدلے میں نفل پڑھتے ہیں
دعا ہمارے لیے جس نے بھی ذرا سی کی

یقین مان اکیلا نہیں ہوں برسوں سے
یہ چوتھی نسل مرے ساتھ ہے اداسی کی

معاشرے نے مرے دونوں ہونٹ سی ڈالے
میں بات کر رہا تھا بےگنہ کی پھانسی کی

مرے حواس پہ رہتا ہے روز طاری کوئی
کسی کی یاد میں ہر شام چائے باسی کی

چھپانا پڑ گیا تھا درد فیضی لوگوں سے
سسک کے روتے ہوئے ساتھ ساتھ کھانسی کی

فیضان احمد فیضی۔

بہت فرسودہ لگتے ہیں مجھے اب پیار کے قصے
گل و گلزار کی باتیں، لب و رخسار کے قصے

یہاں سب کے مقدر میں فقط زخمِ جدائی ہے
سبھی جھوٹے فسانے ہیں وصالِ یار کے قصے

بھلا عشق و محبت سے کسی کا پیٹ بھرتا ہے
سنو تم کو سناتا ہوں میں کاروبار کے قصے

مرے احباب کہتے ہیں یہی اک عیب ہے مجھ میں
سرِ دیوار لکھتا ہوں پسِ دیوار کے قصے

کہانی قیس و لیلیٰ کی بہت ہی خوب ہے لیکن
مرے دل کو لبھاتے ہیں رسن و دار کے قصے

میں کیسے خون روتا ہوں وطن کی داستانوں پر
کبھی تم بھی تو سُن جاؤ مرے آزار کے قصے

عاصم اکثر میں لوگوں سے اسی کارن نہیں ملتا
وہی بے کار کی باتیں وہی بے کار کے قصے.

عاصم

اُونچی جگہ سے گِر کر ____میں بے نشان ٹوٹا
تیرے بھی ہاتھ خالی ,میرا بھی مان ٹوٹا __!

خستہ دلی کا دُکھ بھی __ اپنی جگہ ہے لیکن
بستی میں سب سے پہلے میرا مکان ٹوٹا __!

پہلے میں سوچتا تھا زندہ ہُوں میں پھر اِک شب
ایسا گمان ٹوٹا _____ایسا گمان ٹوٹا __!

اک کہکشاں تھی مُجھ میں قوسِ قزح تھی ہر سُو
پھر سر پہ آکے میرے ____ اِک آسمان ٹوٹا __!

تجھے نہ آئیں گی مفلس کی مشکلات سمجھ،
میں چھوٹے لوگوں کے گھر کا بڑا ہوں، بات سمجھ

میرے علاوہ ہیں چھے لوگ منحصر مجھ پر
میری ہر ایک مصیبت کو ضرب سات سمجھ

فلک سے کٹ کے زمیں پر گری پتنگیں دیکھ
تُو ہجر کاٹنے والوں کی نفسیات سمجھ

شروع دن سے اُدھیڑا گیا ہے میرا وجود
جو دِکھ رہا ہے اسے میری باقیات سمجھ

کتابِ عشق میں ہر آہ ، ایک آیت ہے
اور آنسوؤں کو حروفِ مقطعات سمجھ

کریں یہ کام تو کنبے کا دن گزرتا ہے
ہمارے ہاتھوں کو گھر کی گھڑی کے ہاتھ سمجھ

دل و دماغ ضروری ہیں زندگی کے لئے
یہ ہاتھ پاؤں اضافی سہولیات سمجھ
(عمیر نجمی)

مکمل دو ہی دانوں پر یہ تسبیحِ محبت ہے
جو آئے تیسرا دانہ تو ڈوری ٹوٹ جاتی ہے

مقرر وقت ہوتا ہے محبت کی نمازوں کا
ادا جن کی نکل جائے قضا بھی چھوٹ جاتی ہے

محبت کی نمازوں میں امامت ایک کو سونپو
اسے تکنے، اُسے تکنے سے نیت ٹوٹ جاتی ہے

محبت دل کا سجدہ ہے جو ہے توحید پر قائم
نظر کے شرک والوں سے محبت روٹھ جاتی ہے

بتِ محبوب پانا ہے تو پھر اللہ سے مانگو
کہ پوجا بت کی کرنے میں تو قسمت پھوٹ جاتی ہے

شاعر: زبیر راج
کتاب: زمانے بیت جاتے ہیں

پرانا گھر نئے نقشے میں اچھا بن گیا ہے
مگر اک باپ بچوں کا تماشہ بن گیا ہے

بہت اچھا ہوا ہم اک قبیلے کے نکل آئے
چلو اب ہاتھ تھامو اب تو رشتہ بن گیا ہے

خدایا اب ذرا تیری توجہ اس طرف بھی
ہمارا ہاتھ پھیلے پھیلے کاسہ بن گیا ہے

ادھورا گھر سہی سر ڈھانپنے کو چھت تو ہے ناں
بہت ہے یار، اب تک جو بھی، جیسا بن گیا ہے

وہ ڈھابہ یاد ہے جس پر کبھی مل بیٹھتے تھے
وہ ڈھابہ گر چکا ہے اور پلازہ بن گیا ہے

یہ دیوانہ جسے سب لوگ پاگل کہہ رہے ہیں
کسی کا ناز تھا دیکھو تو اب کیا بن گیا ہے

نزر حسین ناز

رہے گا عشق ترا خاک میں ملا کے مجھے
کہ ابتدا میں ہوئے رنج انتہا کے مجھے

دیئے ہیں ہجر میں دکھ درد کس بلا کے مجھے
شبِ فراق نے مارا لٹا لٹا کے مجھے

بغیر موت کے کس طرح کوئی مرتا ہے
یقیں نہ آئے تو وہ دیکھ جائیں آ کے مجھے

بلائے عشق تو دشمن کو بھی نصیب نہ ہو
مرا رقیب بھی رویا گلے لگا کے مجھے

کہا یہ دل نے چلو آج کوئے قاتل میں
اجل کہاں سے کہاں لے گئی لگا کے مجھے

ہر ایک شخص کو حاصل جدا ہے کیفیت
جفا کے لطف تجھے ہیں ، مزے وفا کے مجھے

غضب ہے آہ میری داغؔ نام ہے میرا
تمام شہر جلاؤ گے کیا جلا کے مجھے

داغ دہلوی

ہاتھ خالی ہیں ترے شہر سے جاتے جاتے
جان ہوتی تو مری جان لٹاتے جاتے

اب تو ہر ہاتھ کا پتھر ہمیں پہچانتا ہے
عمر گزری ہے ترے شہر میں آتے جاتے

اب کے مایوس ہوا یاروں کو رخصت کر کے
جا رہے تھے تو کوئی زخم لگاتے جاتے

رینگنے کی بھی اجازت نہیں ہم کو ورنہ
ہم جدھر جاتے نئے پھول کھلاتے جاتے

میں تو جلتے ہوئے صحراؤں کا اک پتھر تھا
تم تو دریا تھے مری پیاس بجھاتے جاتے

مجھ کو رونے کا سلیقہ بھی نہیں ہے شاید
لوگ ہنستے ہیں مجھے دیکھ کے آتے جاتے

ہم سے پہلے بھی مسافر کئی گزرے ہوں گے
کم سے کم راہ کے پتھر تو ہٹاتے جاتے

راحت اندوری

جن کے دل جوڑتے اک عُمر بِتا دی مَیں نے
جب مَروں گا تو وہ اَحباب اکٹّھے ہوں گے

عمیر نجمی

ہمارے دل میں کہیں درد ہے !!........ نہیں ہے نا !!!!
ہمارا چہرہ بَھلا زرد ہے!!!! .......... نہیں ہے نا !!!!

سُنا ہے' آدمی مر سکتا ہے.............. بچھڑتے ہوئے
ہمـارا ہاتھ چُھوؤ ' سرد ہے !!!....... نہیں ہے نا !!!!

سُنا ہے ہجر میں چہروں پہ............ دھول اڑتی ہے
ہمارے رخ پہ کہِیں گرد ہے !!!!۔۔۔۔۔۔۔ نہیں ہے نا !!!!

تمہاری راہ کبھی دیکھی نہیں............ قسم لے لو
میری پلکوں پہ کَرب ہے !!..... نہیں ہے نا!!!!!

وہی ہے درد وہی درد کا.................. درماں بھی ہے!!
کہیں قریب وہ بیدرد ہے...!!!!.......... نہیں ہے نا ۔۔۔!!!