21/07/2025
یونیورسٹی کی زندگی بظاہر مصروف اور بھرپور لگتی ہے، لیکن اکثر طلبہ اس مصروفیت میں اصل مقصد سے بھٹک جاتے ہیں۔ وہ ساری توجہ کلاسز، اسائنمنٹس اور پریزنٹیشنز پر مرکوز کر دیتے ہیں، اور سمجھتے ہیں کہ بس یہی سب کچھ ہے۔ چار سال اسی بھاگ دوڑ میں گزر جاتے ہیں، اور جب ڈگری ہاتھ میں آتی ہے تو پہلی بار حقیقت کی دیوار سے ٹکر ہوتی ہے۔ تب اندازہ ہوتا ہے کہ مارکیٹ میں قدم جمانے کے لیے صرف ڈگری کافی نہیں، بلکہ مہارت (skills) اور سمجھداری درکار ہے۔
گریجویشن کے بعد نوکری کی تلاش ایک نئے امتحان کی صورت اختیار کر لیتی ہے۔ ہر جاب پوسٹنگ میں درجنوں نہیں، سینکڑوں امیدوار اپلائی کرتے ہیں۔ کمپنیوں کو صرف وہ امیدوار چاہیے جو مسئلے کا حل نکال سکے، ٹیم میں کام کرنا جانتا ہو، اور کچھ کر کے دکھانے کی صلاحیت رکھتا ہو۔ مگر بدقسمتی سے ہمارے اکثر گریجویٹس میں یہ اوصاف نہیں ہوتے، کیونکہ نہ تو انہیں یونیورسٹی نے سکھایا، اور نہ ہی انہوں نے خود سیکھنے کی کوشش کی۔
موجودہ دور میں کامیابی کا انحصار صرف ڈگری پر نہیں بلکہ عملی علم، ڈیجیٹل مہارتوں، اور خود اعتمادی پر ہے۔ جو طالبعلم وقت کے ساتھ خود کو بدلتا ہے، نئی چیزیں سیکھتا ہے، اور میدان میں اترنے سے نہیں گھبراتا — وہی کامیاب ہوتا ہے۔ لنکڈ ان، فری لانسنگ پلیٹ فارمز، آن لائن کورسز، اور پروفیشنل نیٹ ورکنگ اب ضرورت بن چکی ہے، نہ کہ آپشن۔ سیکھنے کی کوئی حد نہیں، لیکن سیکھنے کی نیت ہونی چاہیے۔
اب وقت آ چکا ہے کہ نوجوان اپنی ترجیحات کا ازسرِنو جائزہ لیں۔ "سکوپ ہے یا نہیں؟" کی رٹی رٹائی سوچ سے نکلیں اور یہ دیکھیں کہ دنیا کیا مانگ رہی ہے؟ کون سی مہارت کل کے لیے ضروری ہے؟ وقت ضائع کرنے کی بجائے سیکھنے میں لگائیں، چاہے تھوڑا تھوڑا ہی سہی۔ دنیا کی دوڑ میں وہی آگے نکلتا ہے جو وقت سے پہلے خود کو تیار کر لیتا ہے۔
