17/08/2026
خیبر سٹوڈنٹس ایسوسی ایشن پشاور یونیورسٹی کا ایڈمیشن کیمپ جاری، ڈاکٹر شیر شاہ آفریدی کی خصوصی شرکت
پشاور: خیبر سٹوڈنٹس ایسوسی ایشن پشاور یونیورسٹی کا ایڈمیشن کیمپ آج بھی بھرپور انداز میں جاری رہا، جس میں ضلع خیبر سے تعلق رکھنے والے طلباء و طالبات نے بڑی تعداد میں شرکت کی اور یونیورسٹی میں داخلوں، شعبہ جات، میرٹ اور دیگر تعلیمی معاملات کے حوالے سے رہنمائی حاصل کی۔
ایڈمیشن کیمپ میں پاکستان پیپلز پارٹی ضلع خیبر کے صدر ڈاکٹر شیر شاہ آفریدی نے خصوصی شرکت کی اور فیتہ کاٹ کر کیمپ کا باقاعدہ افتتاح کیا۔ اس موقع پر خیبر سٹوڈنٹس ایسوسی ایشن کے صدر عالم زیب آفریدی، چیئرمین ابرار آفریدی، سینئر نائب صدر شہریار آفریدی، نائب صدر اللہ یار آفریدی، نائب صدر عارف آفریدی، باڑہ کوارڈینیٹر زیب آفریدی، ترجمان ملک حامد آفریدی، سپورٹس سیکرٹری عبداللہ آفریدی، خلیل آفریدی اور وہاب آفریدی سمیت دیگر عہدیداران موجود تھے۔
سابق کابینہ و ممبران میں سرپرستِ اعلیٰ حارث شنواری، چیئرمین اسحاق آفریدی، جنرل سیکرٹری اسد آفریدی اور عدنان آفریدی بھی اس موقع پر شریک ہوئے۔
اس موقع پر صدر خیبر سٹوڈنٹس ایسوسی ایشن عالم زیب آفریدی نے ڈاکٹر شیر شاہ آفریدی سے مطالبہ کیا کہ ضلع خیبر کے مستحق اور غریب طلباء و طالبات کے لیے گورنر خیبر پختونخوا کے ذریعے خصوصی سکالرشپس اور تعلیمی سرگرمیوں کے لیے ضروری فنڈز کی فراہمی کے لیے اپنا کردار ادا کریں، تاکہ مالی مشکلات کے باعث کوئی باصلاحیت طالب علم اعلیٰ تعلیم سے محروم نہ رہے۔
ڈاکٹر شیر شاہ آفریدی نے طلباء کے مطالبات کو سراہتے ہوئے یقین دلایا کہ "ان شاء اللہ مجھ سے جتنا ممکن ہوا، میں ضرور اپنا کردار ادا کروں گا۔ میں خود ضلع خیبر سے تعلق رکھتا ہوں اور خیبر کے طلباء کے مسائل اور مشکلات کو بخوبی سمجھتا ہوں۔ ان شاء اللہ آپ کے لیے ہر وقت حاضر ہوں گا اور اپنی استطاعت کے مطابق ہر ممکن تعاون جاری رکھوں گا۔"
اس موقع پر پاکستان پیپلز پارٹی پشاور ڈویژن کے صدر مصباح الحق نے بھی خیبر سٹوڈنٹس ایسوسی ایشن کے تعلیمی اقدامات کو سراہتے ہوئے کہا کہ طلباء کی رہنمائی اور فلاح و بہبود کے لیے ان شاء اللہ ہر قسم کے ممکنہ تعاون میں اپنا کردار ادا کریں گے۔
خیبر سٹوڈنٹس ایسوسی ایشن کے صدر عالم زیب آفریدی نے کہا کہ ایڈمیشن کیمپ کا بنیادی مقصد ضلع خیبر کے طلباء و طالبات کو اعلیٰ تعلیم کے حصول میں آسانی فراہم کرنا اور انہیں بروقت، درست اور مفت رہنمائی فراہم کرنا ہے۔ انہوں نے کہا کہ تعلیم ہی وہ راستہ ہے جو ہمارے نوجوانوں کو مشکلات، محرومی اور پسماندگی سے نکال کر ترقی اور خوشحالی کی طرف لے جا سکتا ہے۔
انہوں نے مزید کہا کہ خیبر سٹوڈنٹس ایسوسی ایشن مستقبل میں بھی طلباء کے حقوق، تعلیمی سہولیات اور روشن مستقبل کے لیے اپنی جدوجہد جاری رکھے گی۔
