Government Graduate College Pattoki

گورنمنٹ گریجویٹ کالج پتوکی میں یومِ آزادی کی مناسبت سے ایک شاندار، پُروقار اور ملی جذبوں سے لبریز تقریب کا انعقاد کیا گیا۔ تقریب کا آغاز سبز ہلالی پرچم کی سربلندی سے ہوا، جہاں پرنسپل پروفیسر محمد اسلم زمان صاحب اور وائس پرنسپل پروفیسر ڈاکٹر صابری نور مصطفیٰ صاحب نے معزز اساتذہ کے ہمراہ پرچم کشائی کی۔ فضا میں لہراتا ہوا سبز ہلالی پرچم آزادی کی تاریخ، قومی وحدت اور قربانیوں کی ایک روشن داستان بن کر نگاہوں کو خیرہ کر رہا تھا۔ اس کے بعد قومی ترانہ پیش کیا گیا اور پوری فضا حب الوطنی کے جذبات سے معمور ہوگئی۔

یومِ آزادی کے اس یادگار موقع پر پرنسپل صاحب، وائس پرنسپل صاحب اور معزز اساتذہ نے اپنے اپنے نام سے پودے بھی لگائے۔ یہ عمل محض شجرکاری نہ تھا بلکہ اس عزم کی علامت تھا کہ جس طرح وطن کی آزادی کی حفاظت ضروری ہے، اسی طرح اس کی سرسبزی، خوب صورتی اور آنے والی نسلوں کے روشن مستقبل کی ذمہ داری بھی ہم سب پر عائد ہوتی ہے۔ مٹی میں لگایا جانے والا ہر پودا گویا پاکستان کے بہتر اور خوش حال مستقبل کی ایک امید بن گیا۔

بعد ازاں انچارج بزمِ علم و ادب ڈاکٹر عابد سلیم صاحب نے پروگرام کا باقاعدہ آغاز کیا۔ طلبہ نے ملی نغموں اور پُرجوش تقاریر کے ذریعے اپنے دلوں میں موجزن حب الوطنی کے جذبات کا اظہار کیا۔ ان کی آوازوں میں پاکستان سے محبت، ان کے لہجے میں عزم اور ان کے چہروں پر وطن کے روشن مستقبل کا خواب نمایاں تھا۔ ملی نغموں نے تقریب کی فضا کو اس قدر پُرجوش کر دیا کہ حاضرین کے دل بھی جذبۂ حب الوطنی سے سرشار ہوگئے۔

تقریب سے پرنسپل پروفیسر محمد اسلم زمان صاحب، ڈاکٹر شفیق الرحمن صاحب، پروفیسر نذر فرید صاحب اور ڈاکٹر عابد سلیم صاحب نے خطاب کیا۔ مقررین نے آزادی کی قدر و قیمت، قیامِ پاکستان کے لیے دی جانے والی قربانیوں اور نوجوان نسل کی قومی ذمہ داریوں پر روشنی ڈالتے ہوئے اس امر پر زور دیا کہ پاکستان کی حقیقی ترقی علم، کردار، اتحاد اور محنت کے ذریعے ہی ممکن ہے۔

تقریب کی نظامت کے فرائض ممبر بزمِ علم و ادب پروفیسر اویس منیر احمد صاحب نے نہایت خوب صورتی، شائستگی اور ادبی انداز میں انجام دیے۔ ان کی برجستہ نظامت نے تقریب کے ہر مرحلے کو باہم مربوط رکھا اور پروگرام کے حسن میں اضافہ کیا۔

گورنمنٹ گریجویٹ کالج پتوکی میں یومِ آزادی کی یہ تقریب صرف ایک رسمی جشن نہ رہی بلکہ آزادی کی نعمت کے احساس، شہداء کی قربانیوں کی یاد، شجرکاری کے عزم اور نئی نسل میں حب الوطنی کی روح بیدار کرنے کا ایک خوب صورت استعارہ بن گئی۔ سبز ہلالی پرچم کی چھاؤں میں اٹھنے والی یہ صدائیں اس عہد کی گواہ تھیں کہ پاکستان ہماری پہچان بھی ہے، ہماری امید بھی اور ہمارے روشن مستقبل کی بنیاد بھی۔

اویس منیر احمد
میڈیا کوآرڈینیٹر
گورنمنٹ گریجویٹ کالج پتوکی ۔

گورنمنٹ گریجویٹ کالج پتوکی میں یومِ آزادی کی تقریب کی تیاریاں جوش و خروش سے جاری ہیں۔ پرنسپل پروفیسر محمد اسلم زمان صاحب اور وائس پرنسپل پروفیسر ڈاکٹر صابری نور مصطفی صاحب کی قیادت میں انتظامات کا تفصیلی جائزہ لیا گیا اور تقریب کو شایانِ شان، منظم اور یادگار بنانے کے لیے تمام امور کو حتمی شکل دی جا رہی ہے۔ وطنِ عزیز سے محبت، قومی جذبے اور سبز ہلالی پرچم کی سربلندی کے عزم کے ساتھ کالج میں جشنِ آزادی کی فضا پوری آب و تاب سے جلوہ گر ہے۔

اویس منیر احمد
میڈیا کوآرڈینیٹر
گورنمنٹ گریجویٹ کالج پتوکی ۔

گورنمنٹ گریجویٹ کالج پتوکی میں آج شعبۂ اردو کے زیرِ اہتمام طلبہ و طالبات کے تھیسسز کے زبانی امتحان کا انعقاد ہوا۔ یہ علمی و تحقیقی نشست اس اعتبار سے نہایت اہم تھی کہ اس میں نوجوان محققین نے اپنی علمی کاوشوں، تحقیقی بصیرت اور فکری استعداد کا مؤثر انداز میں اظہار کیا۔

اس موقع پر بیرونی ممتحنین کے فرائض ڈاکٹر رفیق ساگر صاحب، ڈاکٹر راشد اقبال صاحب، پروفیسر یاسمین کاشف صاحبہ، پروفیسر راؤ افضل صاحب اور پروفیسر مرتضیٰ جوئیہ صاحب نے انجام دیے۔ تمام طلبہ و طالبات نے بھرپور اعتماد اور علمی تیاری کے ساتھ اپنے اپنے تحقیقی مقالوں کا دفاع کیا اور کامیابی سے زبانی امتحان مکمل کیا۔

اس علمی موقع پر صدرِ شعبۂ اردو پروفیسر ڈاکٹر صابری نور مصطفیٰ صاحب، ڈاکٹر عابد سلیم صاحب اور پروفیسر اویس منیر احمد صاحب بھی موجود رہے اور طلبہ کی علمی و تحقیقی کاوشوں کی حوصلہ افزائی کی۔

یہ کامیابی محض ایک امتحان میں کامیابی نہیں بلکہ تحقیق، مطالعے، فکر اور مسلسل علمی ریاضت کے ایک خوب صورت سفر کی تکمیل ہے۔ تھیسز کا کامیاب دفاع اس امر کا ثبوت ہے کہ گورنمنٹ گریجویٹ کالج پتوکی میں طلبہ کو نصابی تعلیم کے ساتھ تحقیق و تنقید کی سنجیدہ روایت سے بھی روشناس کرایا جا رہا ہے۔

شعبۂ اردو کے لیے یہ دن یقیناً باعثِ مسرت و افتخار ہے کہ اس کے طلبہ و طالبات نے اپنی علمی صلاحیتوں کا بھرپور اظہار کرتے ہوئے کامیابی کی ایک اور منزل عبور کی۔

تمام کامیاب طلبہ و طالبات، اساتذۂ کرام اور شعبۂ اردو کو دلی مبارک باد۔
دعا ہے کہ علم و ادب کی یہ شمع اسی طرح روشن رہے اور یہ نوجوان محققین مستقبل میں اردو زبان و ادب کی خدمت میں اپنی صلاحیتوں کو بروئے کار لاتے رہیں۔

اویس منیر احمد
میڈیا کوآرڈینیٹر
گورنمنٹ گریجویٹ کالج پتوکی ۔

گورنمنٹ گریجویٹ کالج پتوکی میں آج شعبۂ انگریزی کے زیرِ اہتمام طلبہ و طالبات کے زبانی امتحان (Viva Voce) کا انعقاد ہوا، جو علمی و تحقیقی سرگرمیوں کے حوالے سے ایک نہایت اہم اور قابلِ تحسین مرحلہ تھا۔ اس موقع پر بیرونی ممتحن پروفیسر ڈاکٹر محمد عمر عظیم صاحب، گورنمنٹ گریجویٹ کالج ٹاؤن شپ لاہور نے طلبہ و طالبات کے تحقیقی مقالہ جات کا جائزہ لیا اور ان سے مختلف علمی و تحقیقی پہلوؤں پر سوالات کیے۔

شعبۂ انگریزی کے تمام طلبہ و طالبات نے نہایت اعتماد، محنت اور علمی تیاری کے ساتھ اپنے تھیسسز کا کامیابی سے دفاع کیا۔ ان کے مدلل جوابات اور تحقیقی بصیرت نے اس امر کو ثابت کیا کہ ایک اچھا تعلیمی ادارہ صرف کتابی علم منتقل نہیں کرتا بلکہ طلبہ میں سوچنے، سوال کرنے، تحقیق کرنے اور اپنے مؤقف کو دلیل کے ساتھ پیش کرنے کی صلاحیت بھی پیدا کرتا ہے۔

اس علمی موقع پر صدرِ شعبۂ انگریزی پروفیسر محمد انیس صاحب، پروفیسر زین العابدین صاحب اور پروفیسر امجد رشید صاحب بھی موجود رہے اور طلبہ کی علمی رہنمائی اور حوصلہ افزائی کرتے رہے۔

یہ زبانی امتحان محض ایک رسمی تعلیمی مرحلہ نہیں تھا بلکہ طلبہ کی برسوں کی محنت، اساتذہ کی علمی رہنمائی اور تحقیقی ذوق کی عملی تصویر تھا۔ طلبہ و طالبات کی کامیابی اساتذہ کی محنت اور شعبۂ انگریزی کی علمی روایت کے لیے بھی باعثِ فخر ہے۔

گورنمنٹ گریجویٹ کالج پتوکی میں علم و تحقیق کا یہ سفر اسی عزم کے ساتھ جاری رہے کہ یہاں سے نکلنے والا ہر طالب علم اپنے علم، کردار اور تحقیق کے ذریعے معاشرے میں مثبت تبدیلی کا پیامبر بنے۔

علم کی روشنی، تحقیق کی جستجو اور کامیابی کا یہ سفر ہمیشہ جاری رہے۔

اویس منیر احمد
میڈیا کوآرڈینیٹر
گورنمنٹ گریجویٹ کالج پتوکی ۔

علم کی روشنی، مستقبل کی ضمانت ڈی آئی ٹی میں داخلہ لیجیے

آج کے جدید دور میں کامیابی کا راستہ صرف کتابوں سے نہیں، بلکہ علم، ہنر اور ٹیکنالوجی سے ہو کر گزرتا ہے۔ اگر آپ اپنے بچوں کے روشن مستقبل کے لیے معیاری اور کم خرچ تعلیم کا انتخاب کرنا چاہتے ہیں تو گورنمنٹ گریجویٹ کالج پتوکی آپ کے لیے ایک بہترین موقع فراہم کر رہا ہے۔

دو سالہ ڈی آئی ٹی (Diploma in Information Technology) میں داخلہ لیجیے یہ ڈپلومہ آئی سی ایس پروگرام کے برابر ہے ۔ جدید انفارمیشن ٹیکنالوجی کی دنیا سے جڑی مہارتیں حاصل کیجیے۔ ڈی آئی ٹی ایک عملی اور ہنر پر مبنی پروگرام ہے جو طلبہ کو کمپیوٹر اور جدید ٹیکنالوجی کے میدان میں آگے بڑھنے کے لیے بنیاد فراہم کرتا ہے۔

پرائیویٹ اداروں میں لاکھوں کی فیس کے بوجھ تلے دبنے کے بجائے چند ہزار روپے کی مناسب فیس میں ایک سرکاری تعلیمی ادارے سے معیاری تعلیم حاصل کریں۔
یہ صرف ایک ڈپلومہ نہیں، بلکہ آپ کے ہنر، خود اعتمادی اور مستقبل میں آگے بڑھنے کی ایک مضبوط بنیاد ہے۔

نوٹ:اس ڈپلومہ کے سبجکٹ آپ اسی پوسٹر میں دیکھ سکتے ہیں ۔

اپنے بچوں کو مہنگی تعلیم کے بجائے معیاری، سستی اور باوقار تعلیم کا تحفہ دیجیے۔

آئیے! گورنمنٹ گریجویٹ کالج پتوکی میں ڈی آئی ٹی میں داخلہ لیجیے اور ٹیکنالوجی کے روشن سفر کا آغاز کیجیے۔

کم خرچ تعلیم۔۔ معیاری تربیت۔۔ روشن مستقبل۔

ایڈمیشن انچارج پروفیسر شاہد رمضان صاحب فون نمبر
03007575014

اویس منیر احمد
میڈیا کوآرڈینیٹر
گورنمنٹ گریجویٹ کالج پتوکی ۔

گورنمنٹ گریجویٹ کالج پتوکی میں تعلیمی نظم و ضبط، باہمی مشاورت اور ادارہ جاتی ترقی کے تسلسل کو برقرار رکھتے ہوئے پرنسپل پروفیسر محمد اسلم زمان صاحب وائس پرنسپل پروفیسر ڈاکٹر صابری نور مصطفی صاحب کی زیر صدارت تمام تدریسی و انتظامی عملے کی اہم میٹنگ کا انعقاد کیا گیا ۔

اس میٹنگ میں میں کالج میں جاری داخلہ مہم، طلبہ کی انرولمنٹ میں اضافے، تعلیمی معیار کو مزید مؤثر بنانے اورڈپٹی ڈائریکٹر کالجز قصور کی جانب سے جاری کردہ ہدایات پر تفصیل سے گفتگو کی گئی۔ پرنسپل صاحب نے اساتذہ پر زور دیا کہ وہ اپنی علمی بصیرت، محنت اور خلوصِ نیت کے ساتھ زیادہ سے زیادہ طلبہ کو اعلیٰ تعلیم کی جانب راغب کریں تاکہ کالج علمی و تعلیمی میدان میں مزید نمایاں مقام حاصل کر سکے۔

وائس پرنسپل ڈاکٹر صابری نور مصطفی صاحب نے بھی ادارہ جاتی نظم و نسق، باہمی تعاون اور اجتماعی ذمہ داری کی اہمیت پر روشنی ڈالتے ہوئے اساتذہ کو ہدایت کی کہ وہ داخلہ مہم کو کامیاب بنانے کے لیے بھرپور کردار ادا کریں اور ڈپٹی ڈائریکٹر کالجز قصور سر علی حمید صاحب کی ہدایات پر مکمل عمل درآمد کو یقینی بنائیں۔

یہ میٹنگ خوشگوار اور مثبت ماحول میں اختتام پذیر ہوئی ، جہاں تمام اساتذہ نے ادارے کی ترقی، طلبہ کے روشن مستقبل اور گورنمنٹ گریجویٹ کالج پتوکی کو تعلیمی میدان میں مزید کامیابیوں سے ہمکنار کرنے کے عزم کا اعادہ کیا۔ یقیناً ایسی بامقصد نشستیں کسی بھی تعلیمی ادارے کی مضبوط بنیاد، بہتر منصوبہ بندی اور روشن مستقبل کی ضمانت ہوتی ہیں۔

اویس منیر احمد
میڈیا کوآرڈینیٹر
گورنمنٹ گریجویٹ کالج پتوکی۔