گورنمنٹ جناح پائلٹ ہائی سکول مظفرآباد آفیشیل

گورنمنٹ جناح پائلٹ ہائی سکول مظفرآباد میں مورخہ 22 مئی 2026 بروز جمعہ(شام) ایک پُروقار اور پرتکلف الوداعی و استقبالیہ تقریب کا انعقاد کیا گیا۔ یہ خوبصورت پروگرام ادارے کی روایات کے مطابق معزز اسٹاف کی جانب سے اُن اساتذہ کے اعزاز میں رکھا گیا جو ترقی اور تبادلے کے باعث نئی ذمہ داریاں سنبھالنے جا رہے ہیں۔

تقریب میں ادارہ سے ترقیاب ہو کر جانے والے سر عادل اقبال اور سر محسن نذیر جبکہ تبادلہ ہو کر جانے والے سر فیصل مقبول کے لیے نیک تمناؤں کا اظہار کیا گیا۔ اسی موقع پر ادارہ میں تشریف لانے والے سر راجا جاوید اقبال، سر نعمان رحمان اور سر سہراب مغل کو خوش آمدید کہا گیا۔

پروگرام کے دوران آنے والے اور جانے والے اساتذہ نے اپنے تاثرات اور یادیں حاضرین کے ساتھ شیئر کیں، جبکہ پرنسپل ادارہ نے بھی اساتذہ کی خدمات کو سراہتے ہوئے ان کے روشن مستقبل کے لیے نیک خواہشات کا اظہار کیا۔

یہ شام محبت، احترام، یادوں اور خوبصورت لمحات سے بھرپور رہی جو ہمیشہ ادارے کی یادگار روایات کا حصہ رہے گی۔

جناح پائلٹ ہائی سکول مظفرآباد میں معیاری تعلیم کے ساتھ طلباء کی کردار سازی اور ہمہ جہت تربیت کو بھی اولین ترجیح دی جا رہی ہے۔ اسی سلسلے میں سکول انتظامیہ نے محکمۂ پولیس کے تعاون سے طلباء کی جسمانی تربیت اور مختلف قومی تقریبات کی پیشگی تیاری کا اہتمام کیا ہے۔

اس عملی تربیت کا مقصد بچوں میں نظم و ضبط، جسمانی فٹنس، حب الوطنی اور سماجی ذمہ داری کے جذبے کو مزید مضبوط بنانا ہے تاکہ وہ مستقبل میں ایک باصلاحیت، ذمہ دار اور محبِ وطن شہری کے طور پر اپنا کردار ادا کر سکیں۔

معرکۂ حق || آپریشن بنیان المرصوص 🇵🇰
آج اس عظیم معرکے کو ایک سال مکمل ہو گیا ہے۔ آپریشن بنیان المرصوص ہماری تاریخ کا وہ روشن باب ہے جو عزم، جرات اور قربانی کی علامت ہے۔ اس دن نے ثابت کیا کہ قومیں صرف طاقت سے نہیں بلکہ ایمان، اتحاد اور حوصلے سے جیتی جاتی ہیں۔ یہ معرکہ دشمن کے غرور کے مقابلے میں ایک مضبوط پیغام تھا کہ پاکستان کا دفاع ناقابلِ تسخیر ہے۔ہمارے بہادر جوانوں نے اپنی جانوں کا نذرانہ دے کر یہ ثابت کیا کہ وطن کی حفاظت سب سے بڑا فریضہ ہے۔

ہم ان تمام غازیوں اور شہداء کو سلام پیش کرتے ہیں جن کی قربانیاں آج بھی ہمیں جینے کا حوصلہ دیتی ہیں اور آنے والی نسلوں کے لیے مشعلِ راہ ہیں۔

پاکستان ہمیشہ زندہ باد 🇵🇰

آپریشن بنیان المرصوص (معرکۂ حق) کی ایک سالہ تکمیل کے موقع پر آج مورخہ 08 مئی 2026 بروز جمعۃ المبارک جناح سکول مظفرآباد میں منعقدہ پروقار تقریب میں وطن سے محبت، قربانی اور اتحاد کا شاندار مظاہرہ دیکھنے کو ملا۔ پاکستان آرمی اور پاکستان ایئر فورس کے بہادر افسران و جوانوں کو خراج عقیدت و خراج تحسین پیش کرنے کے لئے اساتذہ و طلباء کی بھرپور شرکت نے اس لمحے کو یادگار بنا دیا۔ یہ صرف ایک تقریب نہیں بلکہ اس عزم کی تجدید ہے کہ ہم اپنے وطن کی سلامتی اور ترقی کیلئے ہمیشہ یکجا رہیں گے۔ پاکستان زندہ باد، پاک آرمی زندہ باد

مورخہ 05 اپریل 2026 بروز منگل، ڈی پی آئی محکمہ تعلیم سکولز آزادکشمیر جناب محمد شفیق خان صاحب نے جناح سکول کا دورہ کیا۔

دورہ کے دوران موصوف نے سکول میں قائم میٹرک سالانہ امتحانی سنٹر کا تفصیلی معائنہ کیا اور امتحانی انتظامات، نظم و ضبط اور طلبہ کے لیے فراہم کی گئی سہولیات کا جائزہ لیا۔ بعد ازاں انہوں نے پرنسپل ادارہ سے ملاقات کی، سکول کے مختلف شعبہ جات کا وزٹ کیا اور تدریسی و انتظامی امور کے بارے میں تبادلۂ خیال کیا۔

جناب محمد شفیق خان صاحب نے ادارہ کے مجموعی نظم و نسق، امتحانی انتظامات اور تعلیمی ماحول کو سراہتے ہوئے سکول انتظامیہ کی کاوشوں کی تعریف کی۔

جناح پائلٹ ہائی سکول مظفرآباد میں نئے تعلیمی سیشن 27-2026 کے موقع پر نئے داخل ہونے والے طلبہ کے اعزاز میں ایک خصوصی استقبالیہ تقریب کا انعقاد جمعرات، 30 اپریل 2026 کو کیا گیا۔ اس موقع پر نئے طلبہ کو خوش آمدید کہا گیا اور نئے تعلیمی ادارہ میں تعلیمی سفر کے آغاز پر ان سے نیک تمناؤں کا اظہار کیا گیا۔

جناح پائلٹ ہائی سکول مظفرآباد اپنے نئے طلبہ کو دل کی گہرائیوں سے خوش آمدید کہتا ہے اور ان کے روشن اور کامیاب مستقبل کے لیے دعاگو ہے۔

مبارکباد || جناح سکول کے سابق پرنسپل محترم سعید اختر اعوان صاحب(موجودہ سینئر پرنسپل GBHSS گوجرہ) کو ان کے قابل فخر بیٹے محترم فیضان سعید کی پاکستان آرمی میں بطور کیپٹن ڈاکٹر شاندار پاسنگ آؤٹ پر دل کی گہرائیوں سے مبارکباد پیش کرتے ہیں۔ اللہ تعالیٰ انہیں مزید کامیابیوں، عزت اور خدمتِ وطن کی توفیق عطا فرمائے۔

11اپریل 2026 کا دن ہمارے ادارے کے لیے فخر، خوشی اور یادگار لمحات کا حسین امتزاج بن کر سامنے آیا ہے، ایلیمنٹری بورڈ کے سالانہ امتحان 2026 میں جماعت ہشتم اور جماعت پنجم کا %100 شاندار رزلٹ نہ صرف طلبہ کی محنت بلکہ اساتذہ کرام کی لگن، رہنمائی اور خلوص کا منہ بولتا ثبوت ہے۔

یہی وہ طلبہ ہیں جن کی مسکراہٹیں آج ان خوبصورت گروپ فوٹوز میں قید ہیں، کبھی کسی تقریب میں، کبھی کسی خوشی کے موقع پر اور کبھی اپنے پیارے اساتذہ کے ساتھ۔ ان تصویروں میں چھپی خوشیاں، دوستی اور محنت آج کے اس شاندار کامیابی کے لمحے سے جُڑ کر ایک خوبصورت کہانی سنا رہی ہیں۔

یہ تصاویر صرف یادیں نہیں بلکہ اس سفر کی گواہ ہیں جس میں محنت، دعا اور عزم شامل رہا۔ آج کا سو فیصد رزلٹ انہی لمحوں کی تکمیل ہے، جو کل کی محنت اور آج کی کامیابی کا حسین سنگم بن گیا ہے۔

تمام کامیاب طلبہ، معزز اساتذہ کرام اور والدین کو دل کی گہرائیوں سے مبارکباد، یہ کامیابی ہمیشہ ہماری یادوں میں ایک روشن باب کی طرح زندہ رہے گی۔
بقلم ابو سلطان

پرنسپل ادارہ امجد اقبال اعوان صاحب اور جملہ ایلیمنٹری اساتذہ کرام کو ایلمنٹری بورڈ مظفرآباد کے سالانہ امتحان 2026ء میں کلاس ہشتم و کلاس پنجم کا %100 رزلٹ دینے پر دلی مبارک باد
معز احمد عباسی 637/750 (کلاس ہشتم)
محمد ریحان میر 622/750 (کلاس ہشتم)
فرقان علی 460/550 (کلاس پنجم)

جناح سکول میں پرائمری/مڈل لیول تک عید ملن پارٹی کا اہتمام کیا گیا جہاں بچوں نے شاندار پرفارمنس پیش کر کے خوب داد سمیٹی، ٹو/تھری کلاس کے بچوں نے اسٹیج کی ذمہ داری بھی احسن انداز میں نبھائی۔ اس موقع پر سالانہ تقریب 2026ء میں نمایاں کارکردگی دکھانے والے طلبہ کو انعامات سے نوازا گیا جبکہ بچوں کے لیے ریفریشمنٹ کا بھی بہترین انتظام کیا گیا۔ خوبصورت سجاوٹ نے تقریب کو مزید دلکش بنا دیا۔ || 10 اپریل 2026

تعلیمی سیشن 2026 کا آغاز ایک نئے عزم کے ساتھ || 06 اپریل 2026 || گورنمنٹ جناح پائلٹ ہائی سکول میں نئے تعلیمی سیشن کے آغاز پر پہلی سٹاف میٹنگ کا انعقاد کیا گیا، جس میں پرنسپل صاحب نے اساتذہ کرام کی سابقہ کارکردگی کو سراہتے ہوئے نئے سیشن کے لیے اہم اہداف اور پالیسیز پر رہنمائی فراہم کی۔ اساتذہ کرام کے باہمی مشاورت سے تعلیمی معیار، نظم و ضبط اور طلباء کی بہترین تربیت کے عزم کو مزید مضبوط کیا گیا۔