Govt. Boys Higher Secondary School Gojra Muzaffarabad

16/12/2025

Students of GBHSS Gojra on 16.12.2025

09/12/2025

گورنمنٹ بوائز ہائیر سیکنڈری سکول گوجرہ میں آج کا دن 9 دسمبر 2025 واقعی ناقابلِ فراموش اور پرجوش رہا۔ ایک ہی دن میں دو خوبصورت اور یادگار تقریبات منعقد ہوئیں: پہلی تقریب کھیلوں کی تقسیمِ انعامات اور دوسری شعبۂ سیکنڈری کا ”یومِ والدین“۔پہلی تقریب – تقسیمِ انعامات برائے کھیل
سکول کے گراؤنڈ میں ضلعی ایلیمنٹری تعلیمی بورڈ مظفرآباد کے زیرِ اہتمام ہونے والے انٹربورڈ کھیلوں کے مقابلوں میں شاندار کارکردگی دکھانے والے طلبہ کو شیلڈز سے نوازا گیا۔ تقریب کی صدارت سینئر پرنسپل سکول جناب سعید اختر اعوان نے کی جبکہ مہمانِ خصوصی چیئرمین ضلعی ایلیمنٹری بورڈ جناب راجہ سفیر خان تھے۔
گورنمنٹ بوائز ہائیر سیکنڈری سکول گوجرہ نے بورڈ سطح پر مجموعی طور پر چار پوزیشنز حاصل کیں۔ مہمانِ خصوصی جناب راجہ سفیر خان نے فاتح طلبہ کو اپنے ہاتھوں شیلڈز پیش کیں اور بچوں سے براہِ راست مخاطب ہوئے۔ انہوں نے طلبہ کی شاندار پرفارمنس کی خلوصِ دل سے تحسین کی اور کہا:
”آج تم نے جو کارکردگی دکھائی ہے وہ واقعی قابلِ فخر ہے۔ یہ جذبہ، یہ لگن اور نظم و ضبط تمہارے روشن مستقبل کی ضمانت ہے۔ اسی طرح آگے بھی محنت کرو، کھیل کے میدان میں بھی اور زندگی کے ہر شعبے میں بھی تم پاکستان کا نام روشن کرو گے۔ مبارک ہو!“سینئر پرنسپل جناب سعید اختر اعوان نے مہمانِ خصوصی کا شکریہ ادا کرتے ہوئے اپنے خطاب میں کہا:
”محدود وسائل کے باوجود ہمارے بچوں نے جو کارکردگی دکھائی وہ واقعی قابلِ ستائش اور قابلِ فخر ہے۔ یہ کامیابی صرف طلبہ کی نہیں بلکہ اساتذہ، کوچز اور والدین کی مشترکہ محنت کا نتیجہ ہے۔ یاد رکھیں، جب کھیل کے میدان آباد ہوتے ہیں تو ہسپتال ویران ہو جاتے ہیں۔ صحت مند جسم میں ہی صحت مند دماغ رہتا ہے، اور ہمارے بچے آج اسی طرف قدم بڑھا رہے ہیں۔“
تقریب قومی ترانے اور سلامی سے اختتام پذیر ہوئی۔
دوسری تقریب – یومِ والدین (شعبۂ سیکنڈری)
شعبۂ سیکنڈری کی جانب سے ”یومِ والدین“ کا شاندار انعقاد کیا گیا جس میں والدین کی بہت بڑی تعداد نے شرکت کی۔ سینئر پرنسپل جناب سعید اختر اعوان نے والدین سے تفصیلی خطاب کیا۔ اپنے خطاب کے دوران انہوں نے خاص طور پر فارم ٹیچر جناب سعد مسعودی، خطیب صاحب، جناب فیصل فاروق اور چوہدری رشید صاحب کی خدمات کو سراہا اور ان کی کاوشوں کو خراجِ تحسین پیش کیا۔ انہوں نے کہا:
”آج یہاں موجود تمام والدین کا تہہِ دل سے شکریہ۔ آپ کی آمد، آپ کا تعاون اور آپ کی دلچسپی ہی ہماری اصل طاقت ہے۔ بچوں کی تعلیم و تربیت میں والدین اور اساتذہ کا کردار لازم و ملزوم ہے۔ آج میں خاص طور پر جناب سعد مسعودی، خطیب صاحب، فیصل فاروق صاحب اور چوہدری رشید صاحب کا شکریہ ادا کرنا چاہوں گا جنہوں نے والدین کے ساتھ رابطے کو مضبوط بنانے میں اہم کردار ادا کیا۔ آئیں، ہم سب مل کر عہد کریں کہ اس رابطے کو مزید مضبوط اور باقاعدہ بنائیں گے تاکہ ہمارے بچوں کو بہترین تعلیم کے ساتھ بہترین تربیت بھی مل سکے اور ہم انہیں ایک شاندار مستقبل دے سکیں۔“
تقریب دعائیہ کلمات، گروپ فوٹو سیشن اور والدین واساتذہ کے درمیان خوش گپیوں کے ساتھ اختتام پذیر ہوئی۔
ایک ہی دن میں منعقد ہونے والی یہ دو بڑی تقریبات طلبہ، اساتذہ اور والدین سب کے چہروں پر خوشیوں کے رنگ بکھیر گئیں اور سکول کے ماحول کو ایک تہوار جیسا بنا دیا۔
رپورٹ :
زاہد فضل ایلیمنٹری سکول ٹیچر۔

02/12/2025

02/12/2025

پروفیشنل ڈیویلپمنٹ اینڈ سٹاف میٹنگ
گورنمنٹ بوائز ہائیَر سیکنڈری سکول گوجرہ، مظفرآباد
تاریخ سیشن: 29 نومبر 2025ء
ادارہ ہذا میں ایک انتہائی مفید، پرجوش اور یادگار پروفیشنل ڈیویلپمنٹ اینڈ سٹاف میٹنگ کا انعقاد ہوا جس کی صدارت ادارہ کے قابلِ احترام سنئیر پرنسپل جناب سعید اختر اعوان نے کی۔ سیشن کے تمام مراحل کو منظم انداز میں چلانے کی ذمہ داری اسٹاف سیکرٹری جناب علی اصغر بخاری نے احسن طریقے سے نبھائی۔
سیشن کا باقاعدہ آغاز تلاوتِ کلامِ پاک سے ہوا جس کی سعادت محترم قاری طیب صاحب نے حاصل کی، جبکہ نعتِ رسولِ مقبولﷺ کی سعادت معزز سنیر استاد جناب فیصل فاروق نے حاصل کی۔
اس کے بعد محترم پرنسپل صاحب نے تفصیلی اور ولولہ انگیز سیشن لیا۔ آپ کا سیشن دو اہم موضوعات پر مشتمل تھا:
سیشن اول: پروفیشنل ڈیولپمنٹ اس سیشن میں جناب نے اساتذہ کو سیکھ کر سکھانے کی ترغیب دی۔علاوہ ازیں موصوف نے paradigm shift پر بات کرتے ہوئے فرمایا کہ ہم پرانے روایتی نظام سے نکل کر ایک بالکل نئے، تخلیقی اور طالب علم محور نظام کی طرف گامزن ہیں۔
اس نئے نظام کے اہم نکات یہ ہیں:
• اب طالب علم محض علم کا متلاشی اور رٹا لگانے والا نہیں رہے گا بلکہ وہ خود علم کا موجد اور دریافت کنندہ (Inventor of Knowledge) بنے گا۔
• استاد کا کردار اب صرف “لیکچر دینے والا” نہیں رہے گا بلکہ وہ ایک سہارا دینے والا، راہ دکھانے والا اور سہولت مہیا کرنے والا (Facilitator) بنے گا۔
• سکول اب صرف اینٹوں گارے کی عمارت نہیں رہے گا بلکہ یہ ایک زندہ و جاوید “سیکھنے والی کمیونٹی” (Learning Community) بنے گا۔
اس کے بعد جناب نے کسی بھی تبدیلی کے تین مراحل پر گفتگو کی۔
تبدیلی کے تین مراحل اور ان کی سادہ وضاحت:
1. Freeze → موجودہ روایتی نظام کو مکمل روک دیں اور اس کا گہرا جائزہ لیں کہ کیا اچھا چل رہا ہے اور کیا تبدیل کرنا ہے۔
2. D- Freeze → پرانے منفی رویوں اور پرانے فرسودہ طریقوں کو چھوڑنے میں جو تکلیف محسوس ہو اس کو برداشت کرنا ہوگا بندھے ہوئے ذہنوں کو توڑیں، نئے خیالات اور طریقوں کے
لیے دل و دماغ کو کھلا چھوڑ دیں۔
3. Re-Freeze → جو نئےاور
مثبت طریقے ہم اپنائیں اس پر قائم رہیں اور ان پر عملدرآمد کو یقینی بنائیں اور پائیدار بنیں تاکہ یہ ہمارا نیا مستقل نظام بن جائے۔
آخر میں پرجوش نعرہ: “Impossible کو توڑ کر کہو: I am possible!” ہاں ہم کر سکتے ہیں اگر لگن سے جذبے سے کوئی بھی کام کریں اسے پایہ تکمیل تک پہنچا سکتے ہیں.
سیشن دوم
سٹاف میٹنگ
اس سیشن میں پرنسپل صاحب نے اساتذہ کو مزید بہتر کام کرنے کا حوصلہ دیا اور
اساتذہ کی کارکردگی کو خوب سراہا، باہمی تعاون کی تعریف کی ٹیچرز کے رویے کی تعریف کی اور ان کی ٹیم ورک کے جذبے کو خوب سراہا کہ جو بھی اساتذہ کو مزید حوصلہ درج ذیل خوبصورت اشعار کے مصداق دیا-
اُٹھو! کہ اب قوم کے ننھے مسیحاؤں کو
تیری ضرورت ہے، ترے ہاتھ کی چھاؤں کو
وہ بجلیاں جو تیرے سینے میں چھپی ہیں اب تک
انہیں جگا دے، جلا دے، زمانے کو دکھا دے
جو بچہ آج تیری کلاس میں بیٹھا ہے خاموش
وہی کل سائنسدان، شاعر، لیڈر بنے گا شاید
تیرے ایک لفظ سے اُس کی تقدیر بدل سکتی ہے
تو شمع ہے، تو چراغ ہے، تو دیپک جلتا رہنا
نہ تھک، نہ ہار، نہ رُک، نہ جھک، نہ ڈر، نہ گھبرا
یہ بچوں کی آنکھوں میں جو خواب ہیں سوئے ہوئے
انہیں جگا دے، اُڑا دے، آسمانوں پہ پہنچا دے
کہ معلم ہی تو ہے جو ناممکن کو ممکن کرتا ہے!
پرنسپل صاحب کی طرف سے اساتذہ کرام کے لیے اہم عملی تجاویز بھی دی گئی چند ایک درج ذیل ہیں
ہر استاد اپنے مضمون کو کتاب تک محدود نہ رکھے بلکہ طلبہ کو تحقیق، تجربات، پروجیکٹس اور نئے آئیڈیاز کی طرف لے کر جائے۔
ہر ہفتے کم از کم ایک کلاس کو “Open Discussion” یا “Learning Community” کی شکل دیں جہاں طلبہ آزادانہ سوالات کریں اور ایک دوسرے سے سیکھیں۔
مختلف مضامین کے اساتذہ مل کر مشترکہ سرگرمیاں، گروپ پروجیکٹس اور انٹرکلاس مقابلے منعقد کریں۔
فارم مدرسین ہر دن والدین سے واٹس ایپ یا فون کال پر براہِ راست رابطہ کریں اور طالب علم کی حاضری، کارکردگی، رویے اور بہتری کے لیے تجاویز سے مکمل آگاہ کریں
بچوں کا واٹس ایپ گروپ بنائیں تاکہ ہر دن کی رپورٹ والدین تک پہنچائی جا سکے۔
پرنسپل صاحب نے فرمایا:
“یہ کچھ بنیادی تجاویز اگر دل سے نافذ ہو جائیں تو ہمارا ادارہ بہت جلد حقیقت کا روپ اختیار کر لے گا، ان شاء اللہ۔”
آخر میں دعا کے بعد تمام اساتذہ کرام کے لیے گرم گرم چائے، بسکٹ کا اہتمام کیا گیا۔ اساتذہ نے ایک دوسرے کے ساتھ خوب گپ شپ کرتے ہوئے چائے پی اور نئے عزم و حوصلے کے ساتھ روانہ ہوئے۔
یہ میٹنگ نہ صرف فکری و تدریسی اعتبار سے بلکہ اخوت، محبت اور حوصلہ افزائی کے لحاظ سے بھی نہایت کامیاب اور یادگار ثابت ہوئی۔
والسلام,زاہد فضل ایلیمنٹری ٹیچر

28/11/2025

آج مورخہ 27 نومبر 2025 کو ادارے میں ایک اہم سیشن منعقد ہوا جس میں جناب پرنسپل محترم سعید اختر اعوان نے طلبہ اور تدریسی و غیر تدریسی عملے سے خطاب کیا۔ سیشن کا مقصد تعلیمی کارکردگی، نظم و ضبط اور ادارے میں جاری سرگرمیوں کا تفصیلی جائزہ لیتے ہوئے آئندہ کے اہداف مقرر کرنا تھا۔

پرنسپل صاحب نے اپنے خطاب میں بتایا کہ نومبر کے لیے طے کیے گئے تمام اہداف کامیابی سے حاصل کر لیے گئے ہیں، جس پر اساتذہ اور اسٹاف کی محنت و لگن کو سراہا گیا۔ اس کے بعد دسمبر کے لیے نئے اہداف مقرر کیے گئے جن کے لیے متعلقہ شعبہ جات کو باقاعدہ ہدایات جاری کی گئیں۔ بزمِ ادب کی کارکردگی کا جائزہ لیتے ہوئے اسے مزید فعال، منظم اور طلبہ کے لیے فائدہ مند بنانے کے لیے مثبت تجاویز پیش کی گئیں۔ اسی طرح صبح کی اسمبلی کے معیار میں بہتری، نظم و ضبط اور طلبہ کی تربیت کے حوالے سے بھی ضروری ہدایات دی گئیں تاکہ یہ سرگرمی زیادہ مؤثر اور مقصدیت سے ہم آہنگ ہو سکے۔

اس موقع پر بچوں کو محنت، لگن اور بلند حوصلے کا پیغام دیتے ہوئے علامہ اقبالؒ کا شعر بھی پیش کیا گیا، جو نوجوانوں کو آگے بڑھنے کی تحریک دیتا ہے:
؎ ستاروں سے آگے جہاں اور بھی ہیں
ابھی عشق کے امتحاں اور بھی ہیں

شعبہ امتحانات کی کارکردگی پر بھی گفتگو ہوئی، اور پرنسپل صاحب نے اسے مزید بہتر، شفاف اور منظم بنانے کے لیے چند ضروری اقدامات تجویز کیے۔ اجلاس کے دوران ادارے کے نظم و ضبط پر خصوصی توجہ دی گئی۔ جناب پرنسپل نے وضاحت کی کہ کسی بھی تعلیمی ادارے کی ترقی اور پہچان اس کے مضبوط نظم و ضبط سے ہوتی ہے۔ اس موقع پر طلبہ کو ہدایت کی گئی کہ وہ وقت کی پابندی کریں، مکمل اور درست یونیفارم پہن کر آئیں، کلاس روم اور سکول کے دیگر حصوں میں اساتذہ کی ہدایات پر مکمل عمل کریں، صفائی کا خاص خیال رکھیں اور ایک دوسرے کے ساتھ باوقار اور ذمہ دارانہ رویّہ اختیار کریں۔

بچوں کی کردار سازی اور اخلاقی تربیت کی اہمیت کو اجاگر کرتے ہوئے پرنسپل صاحب نے اقبالؒ کا ایک اور خوب صورت شعر بھی پیش کیا، جو اچھے اخلاق اور مہذب رویّے کی قدر و قیمت واضح کرتا ہے:
؎ ترے اخلاق سے آتی ہے قلب و جاں میں نِگہت
کہ جیسے پھول سے آتی ہے بادِ نکہت میں خوشبو

مزید برآں، اساتذہ کو تاکید کی گئی کہ وہ طلبہ کی رہنمائی اور نگرانی میں مزید بہتری لائیں تاکہ ادارے کا تعلیمی ماحول مثبت، پُرسکون اور تربیت آموز رہے۔ پرنسپل صاحب نے واضح کیا کہ نظم و ضبط کی خلاف ورزی برداشت نہیں کی جائے گی اور ہر طالب علم کو ادارے کے قواعد و ضوابط پر پوری طرح عمل کرنا ہوگا۔ انہوں نے کردار سازی، صفائی، اخلاقیات اور ذمہ داری کو معیاری تعلیم کا لازمی حصہ قرار دیا۔

سیشن کے اختتام پر پرنسپل صاحب نے امید ظاہر کی کہ تمام شعبہ جات مل کر ادارے کی مجموعی کارکردگی کو مزید بہتر بنانے میں اپنا کردار ادا کریں گے اور دسمبر کے اہداف بھی کامیابی سے حاصل کیے جائیں گے
رپورٹ :
زاہد فضل ایلیمنٹری سکول ٹیچر۔

22/11/2025

گورنمنٹ بوائز ہائیر سیکنڈری سکول گوجرہ کے پرائمری سیکشن میں بزمِ ادب کی تقریب انتہائی جوش و خروش، ادبی و دینی رنگ اور بچوں کے بھرپور جذبے کے ساتھ منعقد ہوئی۔ تقریب کا مقصد ننھے طالب علموں میں دینی و ملی جذبہ اجاگر کرنا، تقریر کی صلاحیت کو ابھارنا اور تخلیقی سرگرمیوں کو فروغ دینا تھا۔
تقریب کا باقاعدہ آغاز تلاوتِ کلامِ پاک سے ہوا جسے کلاس پنجم کے طالب علم نے نہایت خوبصورت انداز میں پیش کیا۔ اس کے بعد کلاس فورتھ کے حمزہ نے حضور نبیٔ کریم صلی اللہ علیہ وسلم کی بارگاہ میں نعتِ رسولِ مقبول پیش کی، جس پر حاضرین نے خوب داد دی اور درود و سلام کی آوازیں بلند کیں۔
بچوں نے دینی و قومی موضوعات پر دل نشین تقاریر، ملی نغمے اور چھوٹے چھوٹے ڈائیلاگ پیش کیے۔ کلاس تھرڈ کے بلال نے “محمد ﷺ رحمتہ للعالمین” اور کلاس پنجم کے طحہٰ عارف نے “ماحول اور ہم” کے عنوان پر ایسی زبردست تقاریر کیں کہ تمام حاضرین محوِ حیرت رہ گئے۔ اسی طرح جماعت پنجم کے طالب علم دانش نے علم کی اہمیت پر بات کی جبکہ محسن آفتاب نے اقوال زریں پیش کیے۔
تقریب کی صدارت سکول کے محترم پرنسپل جناب سعید اختر اعوان نے کی جبکہ وائس پرنسپل صاحب سمیت پرائمری سیکشن کے تمام اساتذہ شریکِ محفل رہے۔
تقریب کے اختتام پر ایک باوقار اور یادگار حلف برداری کی تقریب منعقد ہوئی۔ پرنسپل صاحب نے سکول کے نو منتخب مانیٹرز، ہیڈ بوائز اور پراکٹرز سے ایمانداری، ذمہ داری اور سکول کی بہتری کے لیے کوشش کرنے کا حلف لیا۔ ننھے قائدین نے دائیں ہاتھ اٹھا کر پرجوش انداز میں حلف دہرایا، جس نے تقریب کو مزید خوبصورت اور باوقار بنا دیا۔
اختتامی کلمات میں پرنسپل جناب سعید اختر اعوان نے فرمایا:
“ایسی سرگرمیاں ہمارے بچوں کے اعتماد کو بڑھاتی ہیں اور ان کی صلاحیتوں کو اجاگر کرتی ہیں۔ ہم چاہتے ہیں کہ ہمارے طالب علم صرف کتابی علم ہی نہیں بلکہ دینی، ملی اور اخلاقی اقدار کے بھی امین بنیں۔ آج 20 نومبر کو عالمی یومِ اطفال منایا جا رہا ہے، آپ سب کو مبارک ہو! اقوامِ متحدہ کے کنونشن آن دی رائٹس آف دی چائلڈ (UNCRC) کے مطابق ہر بچے کو تعلیم، صحت، تحفظ اور اظہارِ رائے کا بنیادی حق حاصل ہے۔ ہمارا فرض ہے کہ ان حقوق کے تحفظ کو یقینی بنائیں، بچوں کو بااختیار بنائیں اور ایک محفوظ، پرامن ماحول فراہم کریں تاکہ وہ اپنی صلاحیتوں کو مکمل طور پر استعمال کر سکیں۔”
تقریب تمام شرکاء کے تالیوں کی گونج اور بچوں کے چہروں پر مسکراہٹوں کے ساتھ اختتام پذیر ہوئی۔
زاہد فضل ایلیمنٹری سکول ٹیچر گورنمنٹ بوائز ہائیر سیکنڈری سکول گوجرہ مظفرآباد

18/11/2025

مورخہ 29 اکتوبر 2025 گورنمنٹ بوائز ہائیر سیکنڈری سکول گوجرہ مظفرآباد کے مڈل سیکشن کی ایک پُروقار اور یادگار بزمِ ادب کی تقریب منعقد ہوئی۔ اس تقریب کی صدارت سربراہِ ادارہ جناب سعید اختر اعوان صاحب نے فرمائی ادارہ ہذا کے وائس پرنسپل عبد الوحید شیخ اور اساتذہ کرام میں جناب فیضان نثارمیر، جناب خواجہ آصف، جناب زاہد فضل، جناب عمار اشفاق ، جناب توصیف سعید ،جناب احسن ممتاز جناب امجد حسین بھی موجود تھے۔
تقریب کا باقاعدہ آغاز تلاوتِ کلامِ پاک سے ہوا۔ ایک خوش الحان طالبِ علم جماعت ہشتم نے جب قرآنِ مجید کی آیاتِ بینات کی تلاوت کی تو فضا نور و سرور سے معمور ہو گئی۔ اس کے بعد نعتِ رسولِ مقبول ﷺ پیش کی گئی۔ادارے کے طالب علم راجہ عاشر نے نبی مکرم کی بارگاہ میں عقیدت کے پھول نچھاور کیے ۔ جس نے حاضرین کے دلوں کو عقیدت و محبت سے لبریز کر دیا۔
غارِ حرا کا پہلا اجالا حضور ہیں
بزمِ مکان و کون کے دولھا حضور ہیں

اس بزمِ ادب میں مڈل سیکشن کے طلبہ نے اپنی صلاحیتوں اور قابلیتوں کا خوب مظاہرہ کیا۔ جس کا تمام تر سہرا بزم ادب کمیٹی کو جاتا ہے ۔ روایتی آغاز کے بعد جماعت ہشتم کے طلبہ نے ایک مزاحیہ و اصلاحی خاکہ پیش کیا جس کا مرکزی خیال “تعلیم کی اہمیت” تھا۔ اس خاکے میں نہ صرف ہلکے پھلکے مزاح کا رنگ جھلکتا تھا بلکہ اس میں طلبہ کو علم کی قدر و منزلت کا پیغام بھی دیا گیا۔ حاضرینِ محفل نے اس پیش کش کو بے حد پسند کیا اور ننھے طلبہ کی ذہانت و فصاحت پر داد و تحسین کے پھول نچھاور کیے۔
بعد ازاں جماعت ہفتم کے طالب علم نے "تعلیم و تربیت کے فوائد" کے عنوان پر ایک پرمغز تقریر پیش کی۔ اس تقریر میں علم کو اخلاقی و روحانی تربیت کا ذریعہ قرار دیتے ہوئے طلبہ کو علم کے ساتھ کردار سازی کی تلقین کی گئی۔ مقرر کے دل نشین انداز اور پُراعتماد لہجے نے سامعین کو بے حد متاثر کیا۔
اسی دوران میں جماعت ہفتم کے طلباء نے ایک خوب صورت ٹیبلو پیش کیا جس میں معاشرتی ہم آہنگی، باہمی تعاون اور محنت کی افادیت کو نہایت دل کش انداز میں پیش کیا گیا۔ طلباء کی کارکردگی پر حاضرین نے پرجوش انداز میں داد دی۔ اس کے بعد جماعت ہشتم کے ایک طالب علم "محمد احسان" نے “اساتذہ کا احترام” کے عنوان سے نہایت شائستہ اور مدلل تقریر کی جس میں اساتذہ کے کردار، تربیتی خدمات اور ان کی قربانیوں کو خراجِ تحسین پیش کیا گیا۔
تقریب کے دوران میں سامعین پر سکون و سنجیدگی کی فضا طاری رہی۔ اساتذا کرام اور طلبہ دونوں نے پروگرام میں گہری دل چسپی کا مظاہرہ کیا۔ ہر گوشے سے نظم و ضبط، شائستگی اور علمی ذوق کی جھلک نمایاں تھی۔
جب طلبہ کی پیش کش اختتام کو پہنچی تو اس کے بعد جناب صدر محفل سینئر پرنسپل گورنمنٹ بوائز ہائیر سیکنڈری سکول گوجرہ جناب سعید اختر اعوان کو اظہارِ خیال کی دعوت دی گئی۔ انھوں نے اپنے خطاب میں فرمایا:
"ایسی علمی و ادبی تقریبات طلبہ کے فکری افق کو وسعت دیتی ہیں۔ بزمِ ادب دراصل وہ پلیٹ فارم ہے جہاں نوجوان اپنے احساسات و خیالات کو مہذب انداز میں پیش کرنے کا سلیقہ سیکھتے ہیں۔ آج کے بچوں نے اپنی گفتگو اور پیش کشوں سے یہ ثابت کر دیا ہے کہ وہ نہ صرف ذہین بلکہ باادب اور باصلاحیت بھی ہیں۔ میں اس کامیاب تقریب کے انعقاد پر تمام اساتذہ کرام، خصوصاً بزم ادب کمیٹی کو دل کی گہرائیوں سے مبارک باد پیش کرتا ہوں۔”
"ادب انسان کے اخلاق و کردار کی آبیاری کرتا ہے۔ تعلیم محض کتابی علم کا نام نہیں بلکہ یہ شعور، تہذیب اور انسانیت کا درس دیتی ہے۔ آج ہمارے ننھے طلبہ نے جس اعتماد اور وقار کے ساتھ اپنے خیالات کا اظہار کیا ہے وہ اس بات کا مظہر ہے کہ ہمارے ادارے کے اساتذہ طلبہ کی فکری و اخلاقی تربیت میں اپنا فرض بہ خوبی ادا کر رہے ہیں۔ میں دعا گو ہوں کہ ہمارے یہ نونہال مستقبل میں علم و عمل کے میدان میں نمایاں مقام حاصل کریں اور اپنے ادارے، والدین اور وطن کا نام روشن کریں۔"
تقریب کے اختتام پر اجتماعی دعا کی گئی کہ اللہ تعالیٰ اس ادارے کو مزید ترقی و کامیابی عطا فرمائے،اساتذہ اکرام کو جزائے خیر دے اور طلبہ کو علم و اخلاق کی دولت سے سرفراز کرے۔
یوں یہ علمی و ادبی محفل خوشگوار یادوں کے ساتھ اپنے اختتام کو پہنچی مگر اس کی خوش بو مدتوں دلوں میں رہےگی۔
زاہد فضل چاند ایلیمنٹری مدرس ادارہ ہذا۔

15/11/2025

Bazm-e-adab for HSSC section today

26/09/2024

الحمد للّٰہ۔ سیرت سرور عالم خاتم النبیین صلی اللہُ علیہ و آلہ وسلم کے ہفتہ تقریبات کے ضلعی سطح کے مقابلہ جات میں گورنمنٹ بوائز ہائیر سیکنڈری سکول مظفرآباد کے ہونہار طالب علم ماجد پیرزادہ نے مقابلہ حسن نعت کے بوائز سکاوٹ سیکشن میں اول پوزیشن حاصل کی۔بچے کا اپنے اسکاوٹ لیڈر محمد جواد فاروق اور پرنسپل پیر سعید بخاری صاحب کے ساتھ گروپ فوٹو۔۔

25/09/2024

الحمدللہ۔ گورنمنٹ بوائز ہائیر سیکنڈری سکول گوجرہ، مظفرآباد کے جماعت سال اول کے ہونہار طالب علم محمد حسیب علی نے سکاوٹنگ کے ہفتہ تقریبات کے دوران روور سیکشن میں تلاوتِ کلامِ پاک میں ضلع بھر میں دوسری پوزیشن حاصل کی۔اس شاندار کامیابی پر جناب پرنسپل اور جملہ سٹاف مبارکباد کا مستحق ہے۔

07/09/2024

آج بتاریخ 7 ستمبر 2024 ادارہ ہذا میں یوم تحفظ ختم نبوت کے حوالے سے تقریب کا انعقاد کیا گیا جس میں ادارے کے طلباء اور اساتذہ کرام نے اظہار خیال کیا۔ ادارہ کے سینئر ماہر مضمون ڈاکٹر سلمان میر صاحب نے طلباء کے سامنے خصوصی طور پر ختم نبوت کے تصور، اس کی اہمیت، تاریخ اور جھوٹے دعویداران کے متعلق تفصیلی گفتگو کی۔ ادارہ کے وائس پرنسپل سید علی اصغر بخاری صاحب نے طلباء کو منکرین ختم نبوت کے مختلف ہتھکنڈوں اور ان سے بچنے کے حوالے سے آگاہی فراہم کی۔ علاؤہ ازیں ، ادارہ کے مدرسین توصیف سعید صاحب، جواد ہاشمی صاحب اور ندیم الحس گیلانی صاحب نے اپنے اپنے انداز میں نظم و نثر میں اپنی عقیدت کا اظہار کیا۔ آخر میں ادارے کے پرنسپل پیر سعید بخاری صاحب نے صدارتی خطاب کیا اور دعا کروائی۔

06/09/2024

Defence Day Celebration at Govt Boys Higher Secondary School Gojra Muzaffarabad