Botany Lovers

یہاں آئیں آپ کو ایک کام کی بات بتاؤں ، زندگی میں بہت سے ایسے موڑ آئیں گے ، جہاں آپ محسوس کریں گے کہ کچھ اپنے ، دل کے بہت ہی قریب لوگ ، آپ کو بے وقوف سمجھ رہے ہیں۔۔ یا بنانے کی کوشش میں ہیں۔۔

یہاں عقل مندی سے کام لینا اور ان کے سامنے بے وقوف ہی بنے رہنا۔۔ تاکہ وہ کمفرٹ زون میں جاکر جس قدر چالیں چلیں ، آپ ان تمام سے محفوظ رہتے ہوئے محظوظ ہوتے رہیں اور ان جلد ہی ان افراد کی مکمل اصلیت بنا کسی جھگڑے کے آپ پر عیاں ہو جائے گی۔۔

کوئی آپ کے کتنا ہی قریب کیوں نہ ہو ، ایک دفعہ ان کا باطن آپ پر ظاہر ہو جائے تو دوبارہ نہ وہ کبھی آپ کو تکلیف پہنچا پائیں گے اور نہ ہی ان سے آپ کو کوئی توقعات وابستہ ہوں گی۔۔

ایسے لوگوں کے حق میں ہدایت اور خیر کی دعا کرتے رہیں ، اور ان کے احسان مند رہیں کیونکہ کوئی بعید نہیں کہ آخرت میں وہ آپ کے گناہ لے کر اپنی نیکیاں آپ کو تھما رہے ہوں۔۔

انعام الحق آزاد قیدی۔۔

ایک دوڑ لگی ہوئی ہے، پیسہ، پیسہ، پیسہ۔۔۔!! میں نے اتنے لاکھ کما لئے، آوء تمہیں بھی لاکھوں کمانا سکھاوءں، میں نے اتنے لاکھ کی گاڑی لے لی، تم ابھی تک سرکاری ملازمت سے چمٹے ہوئے ہو، میں نے فلاں کام میں اتنے لاکھ کا نقصان اٹھایا لیکن یہ میرے لئے کوئی حیثیت نہیں رکھتا، میں نے ملازمت چھوڑ دی تو دیکھو میں آج کہاں ہوں۔۔!!! فیس بک کھول لو تو یوں محسوس ہوتا ہے کہ دنیا پہ آج سے پہلے نہ کسی نے لاکھوں کمائے، نہ ہی کسی نے آج سے پہلے صفر سے اٹھ کے معاشی خودمختاری اور غربت سے امارت کا سفر طے کیا۔۔ اللّٰہ کریم آپ سب کے رزق میں دن دوگنا اور رات چوگنا خیر اوربرکت عطا فرمائے۔۔ لیکن۔۔ معذرت کے ساتھ کہوں گی کہ آپ سب موٹیویشن نہیں پھیلا رہے، فرسٹریشن پھیلا رہے ہیں۔۔

آج کا نوجوان قناعت، حاصل پہ اطمینان اور استغناء (آسان الفاظ میں استغناء کسی دوسرے کے پاس دولت اور آسائشات کے انبار دیکھتے ہوئے بھی اس سے مکمل بےنیازی اختیار کرنے کو کہتے ہیں دل مطمئن ہو کہ اللّٰہ اسے مزید دے، میں اپنے حال میں راضی ہوں)جیسی اصطلاحات سے پہلے ہی نابلد ہے، اس پہ مستزاد سوشل میڈیا پہ دن رات پیسے کی اس چکاچوند نے نوجوان لڑکوں کو پیسے کی ایک لاحاصل دوڑ میں اور نوجوان لڑکیوں کو ہل من مزید کی ایسی آگ میں دن رات بھسم کرنا شروع کر دیا ہے کہ دنیا کی ہر نعمت موجود ہوتے ہوئے بھی دلوں میں شکرگزاری کا احساس تک پیدا نہیں ہوتا۔ ابھی عثمان بھائی کی وال پہ ایک ویڈیو دیکھی، ایک لڑکا عام لوگوں سے سوال کر رہا ہے کہ میں آپ کو دس ملین ڈالر دوں تو آپ قبول کریں گے، سب نے ہنسی خوشی ہاں میں جواب دیا، اگلا سوال۔تھا کہ یہ رقم اس شرط پہ ملے گی کہ آپ صبح سو کے اٹھیں گے نہیں تو ہر ایک نے انکار کر دیا، انہی نے یہ نتیجہ اخذ کیا کہ صبح صحت اور تندرستی کی حالت میں اپنے پیروں پہ اٹھ کھڑے ہونا، دس ملین ڈالر سے بھی قیمتی دولت ہے۔۔!!

میرے عزیزو۔۔!! میں یہ نہیں کہتی کہ اپنے حالات بدلنے کیلئے کوشش نہ کریں۔ بالکل کریں لیکن صرف پیسہ، صرف آسائشات، صرف دولت مند بننے کو اپنا مقصدِ حیات ہرگز مت بنائیں۔ آپ کو اللّٰہ کریم نے صحت عطا کی ہے، روز کھانے کو مل رہا ہے، گھر میں کوئی موذی بیماری نہیں ہے، آپ اپنے بچوں کیلئے رزق کمانے کی قابلیت اور طاقت رکھتے ہیں، آپ کے بچے تعلیم حاصل کر رہے ہیں۔ آپ موسم کے مطابق ٹھنڈا اور گرم لباس زیبِ تن کرنے کے قابل ہیں، قسم بخدا۔۔۔! ان سب نعمتوں کا کوئی بدل ہے ہی نہیں، ہو ہی نہیں سکتا۔ نہ ہی ہم ان سب کا شکر ادا کرنے کے قابل ہیں۔ "معیارِ زندگی" نامی بلا کو اپنے حواسوں پہ مت سوار ہونے دیں۔

اور آپ سب سے، جنہیں اللّٰہ کریم نے صفر سے بہت اوپر پہنچا دیا ہے، یقین مانیں کہ آپ جیسے بےشمار لوگ اس دنیا میں ہیں، جو کچھ نہیں تھے اور آج بہت کچھ ہیں۔ یہ نظامِ کائنات ہمیشہ سے ایسے ہی چلتا آیا ہے، اس کے بعد بھی ایسا ہی رہے گا۔ یہاں کسی کے سر پہ بیٹھے بٹھائے اقتدار کا ہما بیٹھ جاتا ہے اور کوئی دو ہزار پانچ کے زلزلے جیسی کسی آفت یا کسی موذی مرض یا کسی بھی وجہ سے اپنی بنی بنائی راجدھانی سے ہاتھ دھو بیٹھتا ہے۔ آپ کا اللّٰہ کریم نے ہاتھ پکڑ لیا ہے، اللّٰہ کریم اس سے آگے بھی اپنا فضل و کرم شاملِ حال رکھے۔ لوگوں کو موٹیویٹ کیجئیے لیکن خدارا فرسٹریشن پھیلانے سے احتراز برتئے۔ اس دنیا میں دولت مند ترین، غریب ترین اور متوسط طبقہ ہمیشہ سے تھا اور ہمیشہ رہے گا. اصل دولت مند وہ ہے جسے ربِّ کائنات نے حاصل پہ اطمینان اور استغناء عطا فرما دیا ہے۔ وما علینا الّا البلٰغ۔۔
ربیعہ فاطمہ بخاری

اک نظر دیکھ ذرا مسجدِ اقصٰی آقا
تیری عظمت کا نشاں تیرا مصلیٰ آقا
تھا جو اس امتِ مرحوم کا قبلہ آقا
آج اُس پر بھی ہے ابلیس کا قبضہ آقا

بُولَہَب شعلہ بہ کف سوئے حَرَم آئیں گے
کیا مسلمان یونہی دیکھتے رہ جائیں گے

فائق تُرابی

بنی ہلال کی ایک لڑکی سے حضرت عمر رض بن خطاب کے صاحبزادے کا نکاح:
حضرت عمر بن الخطاب رضی اللّٰہ عنہ نے اپنے دورِ خلافت میں دودھ میں پانی ملانے کی ممانعت فرما دی تھی،ایک رات اطراف مدینہ میں (کسی ضرورت کےلئے) نکلے، اچانک ایک عورت کی آواز سنی،وہ اپنی لڑکی سے کہہ رہی تھی:
"بیٹی! تم نے ابھی تک دودھ میں پانی نہیں ملایا؟صبح ہونے کو ہے۔"
لڑکی بولی: "دودھ میں پانی کیسے ملاؤں،امیر المومنین نے تو اس سے منع کررکھا ہے۔"
بڑھیا: "اور لوگ بھی تو ملاتے ہی ہیں، تم بھی ملا لو،امیر المومنین کو کیا خبر؟۔"
لڑکی: "اگر عمر کو خبر نہیں تو رب عمر تو جانتا ہے،جب ان کی ممانعت ہے تو مجھ سے تو یہ نہیں ہوگا۔"اس لڑکی کی گفتگو حضرت عمر رضی اللّٰہ عنہ کو بے حد پسند آئی،صبح ہوئ تو اپنے صاحبزادہ عاصم کو بلاکر یہ سارا قصہ انہیں سنایا اور فرمایا: "جاؤ دریافت کرو وہ لڑکی کون ہے؟" عاصم گئے تحقیق کی تو معلوم ہوا کہ اس لڑکی کا تعلق قبیلہء بنی ہلال سے ہے،حضرت عمر رضی اللّٰہ (کو آکر اطلاع کی یہ سن کر آپ) نے عاصم سے فرمایا: "بیٹا! جاؤ اس لڑکی سے نکاح کرلو، وہ یقیناً اس لائق ہے کہ اس کے بطن سے ایک شہسوار پیدا ہو جو تمام عرب کی قیادت کرے۔"چنانچہ عاصم نے اس لڑکی سے نکاح کرلیا،اس کے بطن سے ام عاصم بنت عاصم بن عمر بن خطاب پیدا ہوئیں۔ام عاصم کا نکاح عبد العزیز بن مروان بن الحکم سے ہوا اور ان سے عمر بن عبد العزیز پیدا ہوئے(رضی اللّٰہ عنہم)
{سیرۃ عمر بن عبد العزیز رحمۃ اللہ علیہ ص:١٤}

ابو خالد الاحمر نے کہا: میں نے عبداللہ المحض بن حسن المثنی رح ( حضرت حسن بن علی المرتضیٰ رضی اللّٰہ عنھم کے پوتے)سے حضرات شیخین ابوبکر وعمر رضی اللّٰہ عنھما کے بارے میں دریافت کیا تو فرمایا: "صلى الله عليهما و لا صلى على من لم يصل عليهما" (ان دونوں پر اللّٰہ کی رحمت ہو اور جس نے ان دونوں پر رحمت خداوندی کی دعا نہیں کی اس پر اللّٰہ کی رحمت نہ ہو) اور فرمایا: "میں ایسے شخص کے بارے میں جو سیدنا ابوبکر و سیدنا عمر فاروق رضی اللّٰہ عنھما پر سب وشتم کرتا ہو توقع نہیں رکھتا کہ اس کو توبہ نصیب ہو"
ان کے سامنے اس دن کا تذکرہ آیا،جس دن حضرت عثمان غنی رضی اللہ عنہ کی شہادت ہوئ تو اس قدر روۓ کہ داڑھی اور دامن تر ہوگئے۔
{المرتضیٰ کرم اللہ وجہہ صفحہ ٣٩٥}

قطب الاقطاب حضرت سید نفیس الحسینی شاہ صاحب نوراللہ مرقدہٗ فرماتے ہیں!

خاک اور خُون میں لتِھڑے ہُوئے جانبازوں سے
پیش آتی ہے مَشیٌت بڑی توقیر کے ساتھ

اپنے اللہ کا صَد شُکر اَدا کرتا ہُوں
جِس نے وابستہ کیا دامنِ شبٌیرؓ کے ساتھ

قطب الاقطاب حضرت سید نفیس الحسینی شاہ صاحب نوراللہ مرقدہ کا حضرات حسنین کریمین رضی اللہ عنھم کی شان میں لاجواب کلام 🌹🥀

عُتبہ بن فرقد گورنر آذربایجان نے امیر المومنین عمر فاروق رضی اللّہ عنہ کے لیے دو پٹاریوں میں خبیص نامی حلوہ بطور تحفہ بھیجا ۔
امیر المومنین سمجھے کہ پٹاریوں میں سرکاری روپیہ آیا ہے ۔ لانے والے نے جب بتایا کہ خبیص نامی حلوہ ہے تو انہوں نے پٹاری کھلوائی اور چکھ کر دیکھا ! پھر لانے والے سے پوچھا ۔ کیا عتبہ کی فوج کے سب لوگ یہ حلوہ سیر ہو کر کھاتے ہیں ؟؟
لانے والے نے نفی میں جواب دیا ۔
امیر المومنین نے حلوہ واپس کر دیا اور یہ پُر عتاب خط عتبہ کو لکھا ۔
"" واضح ہو کہ خبیص نہ تو تمھاری محنت کا ثمرہ ہے نہ تمھاری ماں اور باپ کی ۔ تم وہی غذا کھاؤ جس سے تمھاری فوج کے باقی مسلمان کیمپ میں سیر ہوتے ہیں ""
۔۔۔۔۔۔
عابی مکھنوی
بحوالہ : بلاذری انساب ، بیہقی شعب

خوش ہو رہا ہوں اُن کی خوشی دیکھ دیکھ کر
دستِ نبی میں دستِ علیؓ دیکھ دیکھ کر

فائق تُرابی

ایک بار نبی اکرم صلی اللّٰہ علیہ وسلم نے آنے والے ایک فتنے کا تذکرہ کیا ، اس دن حضرت عثمان غنی رضی اللّٰہ عنہ چادر اوڑھے ہوئے قریب سے گزرے ،نبی اکرم صلی اللّٰہ علیہ وسلم نے ان کی طرف اشارہ کر کے فرمایا، " یہ اس دن حق پر ہوں گے".
("مسند احمد"، ح: 18118)