15/03/2024
رمضان پیکج، بینظیر انکم سپورٹ پروگرام، لنگر خانے، کورونا ریلیف پیکج، احساس پروگرام اور مفت آٹا سروس جیسے منصوبے بنا کر اس پر سیاسی تشہیر کی جاتی ہے اس کو انتخابات میں بطورِ خاص استعمال کیا جاتا ہے۔ کیا اس قوم نے کبھی سوچا کہ اس میں اور ان خود ساختہ ریا کاری کرنے والے مخیر حضرات میں (جو غریبوں کی مدد اس لیئے کرتے ہیں کہ تصویر بنائی جا سکے یا لوگوں کے سامنے خود کو معزز دکھایا جا سکے) ایک بنیادی فرق ہے وہ ذاتی پیسے سے غریب کی تحقیر کرتے ہیں جب کہ یہ ظالم سرمایہ دارانہ نظام کے علم بردار عوام کے پیسوں سے عوام کی تحقیر کرتے ہیں۔ پوری دنیا میں سماجی تحفظ کے منصوبے بنائے جاتے ہیں پوری دنیا میں غریب اور بے گھر افراد کیلئے حکومت اور مخیر حضرات ادارے بناتے ہیں،تعلیم اور صحت کا بندوست ہوتا ہے ان کو کھانا بھی کھلایا جاتا ہے ان کی ضروریات کا بھی خیال رکھا جاتا ہے مگر اس سب کی تشہیر نہیں ہوتی نہ ہی اس کا انتخاب میں ووٹ حاصل کرنے کے لیے استعمال ہوتا ہے۔ مسئلہ منصوبوں کا نہیں سوچ کا ہے اور یہ بیمار سوچ ہی قومی زوال کی بنیادی وجہ ہے۔
