GHS Trangri Bala

آج گورنمنٹ ہائی اسکول ترنگڑی بالا میں ایک نہایت پروقار، پُراثر اور یادگار تقریب منعقد ہوئی، جہاں کلاس نہم کی جانب سے کلاس دہم کے طلبہ کے اعزاز میں الوداعی تقریب (Farewell Party) کا اہتمام کیا گیا۔
یہ تقریب صرف ایک الوداع نہیں بلکہ اُن پانچ قیمتی سالوں کی یادوں کا عکس تھی جو کلاس دہم کے طلبہ نے اس ادارے میں گزارے۔ ان سالوں میں طلبہ نے نہ صرف کتابی علم حاصل کیا بلکہ تربیت، نظم و ضبط، اخلاقیات، برداشت، صبر، محنت اور جدوجہد جیسے قیمتی اسباق بھی سیکھے، جو ان کی آنے والی زندگی میں رہنمائی کریں گے۔
اس موقع پر معزز پرنسپل جناب ذوالفقار احمد صاحب نے نہایت مدلل اور فکرانگیز خطاب کیا۔ انہوں نے طلبہ کو آنے والے سالانہ امتحانات کے حوالے سے قیمتی مشورے دیتے ہوئے کہا کہ کامیابی صرف دعا سے نہیں بلکہ مسلسل محنت، لگن اور قربانی سے حاصل ہوتی ہے۔ انہوں نے طلبہ کو تلقین کی کہ وہ مشکل حالات میں بھی ہمت نہ ہاریں کیونکہ سخت محنت اور جدوجہد ہی روشن مستقبل کی کنجی ہے۔ مزید برآں انہوں نے عملی زندگی میں اچھے کردار، سچائی اور مثبت سوچ کو کامیابی کی اصل بنیاد قرار دیا۔
تقریب کے دوران کلاس نہم کے طلبہ نے اپنے سینئرز کے لیے نیک تمناؤں اور محبت بھرے جذبات کا اظہار کیا اور اس بات کا عہد کیا کہ وہ بھی انہی کے نقشِ قدم پر چلتے ہوئے اسکول کا نام روشن کریں گے۔
ہم دعاگو ہیں کہ کلاس دہم کے تمام طلبہ اپنے آنے والے امتحانات میں شاندار کامیابی حاصل کریں اور زندگی کے ہر میدان میں محنت، جدوجہد اور اچھے کردار کے ذریعے کامیابی کی نئی منازل طے کریں۔
اللہ تعالیٰ آپ سب کا حامی و ناصر ہو۔ آمین

گورنمنٹ ہائی سکول ترنگڑی بالا میں ہاکی کے فروغ کے حوالے سے ایک نہایت اہم اور خوشگوار تقریب کا انعقاد کیا گیا، جس میں جناب زاہد بھائی (صدر ڈسٹرکٹ ہاکی ایسوسی ایشن مانسہرہ)، جناب سجاد صاحب اور جناب اسد بھائی (میڈیا کوآرڈینیٹر) نے خصوصی شرکت فرمائی۔
تقریب کے دوران وہ اہم وعدہ پورا کیا گیا جو جناب زاہد بھائی اور جناب سجاد صاحب نے ترنگڑی ہاکی کلب کے ساتھ کیا تھا۔ آج انہوں نے اپنے اس وعدے کو نبھاتے ہوئے کلب کے نوجوان کھلاڑیوں کے لیے اعلیٰ معیار کی ہاکی اسٹکس اور گول کیپر کٹ فراہم کی، جو بعد میں ترنگڑی کلب کی جانب سے بچوں کو ڈونیٹ کی گئیں۔ بچوں کے چہروں پر خوشی، جوش اور حوصلے کی چمک قابلِ دید تھی۔
اس موقع پر گورنمنٹ ہائی سکول ترنگڑی بالا کے گراؤنڈ میں ایک شاندار فرینڈلی ہاکی میچ بھی کھیلا گیا، جو ترنگڑی بلو اور ترنگڑی وائٹ کے درمیان ہوا۔ یہ میچ بچوں کے لیے نہ صرف تفریح کا ذریعہ تھا بلکہ کھیل کے ذریعے نظم و ضبط، ٹیم ورک اور صحت مند مقابلے کا جذبہ بھی ابھرا۔
ہم خصوصی طور پر وحید احمد مانو بھائی کا دل کی گہرائیوں سے شکریہ ادا کرتے ہیں، ان کی ترنگڑی کے نوجوانوں کے لیے سپورٹ، محبت اور لگن قابلِ ستائش ہے۔ یہ دونوں ہمارے حقیقی لیجنڈ پلیئرز ہیں۔
ترنگڑی کی طرف سے جناب زاہد بھائی، جناب سجاد صاحب، جناب اسد بھائی، وحید احمد اور مانو بھائی کا دل سے شکریہ ادا کیا جاتا ہے۔
ان کی خدمات، ان کا کردار اور ہاکی کے فروغ کے لیے ان کی کوششیں ہمیشہ یاد رکھی جائیں گی۔
ترنگڑی کی ہاکی میں ان کا نام ہمیشہ نمایاں رہے گا۔

گورنمنٹ ہائی سکول ترنگڑی بالا کے گراؤنڈ میں سیٹی ہاکی کلب مانسہرہ کو شاندار انداز میں خوش آمدید کہا گیا۔ علاقے بھر سے آئے ہوئے شائقینِ ہاکی نے بڑی دلچسپی کے ساتھ میچ کو دیکھا اور کھلاڑیوں کی بھرپور حوصلہ افزائی کی۔
ترنگڑی بالا کے ہر بچے میں زبردست جوش و جذبہ تھا۔ اپنے لیجنڈری ہاکی پلیئرز کو اپنے ہی گراؤنڈ پر دیکھ کر بچے بےحد خوش اور پُرجوش تھے۔ وہ ان کے لیے بھرپور آواز میں چِئیر کرتے رہے، ان سے ملنے، ہاتھ ملانے اور تصاویر لینے کے خواہش مند تھے۔
میچ سیٹی ہاکی کلب مانسہرہ اور ترنگڑی بالا ہاکی کلب کے درمیان کھیلا گیا جس میں ہائی سکول ترنگڑی بالا کے موجودہ اور پرانے طلباء نے بھی بھرپور شرکت کی۔ پورا ماحول نہایت خوشگوار اور کھیل کے جذبے سے بھرپور تھا۔
ترنگڑی بالا ہاکی کلب نے شاندار کھیل کا مظاہرہ کرتے ہوئے سیٹی ہاکی کلب مانسہرہ کو 1–3 سے شکست دی۔ دونوں ٹیموں نے بہترین ہاکی پیش کی، مگر ترنگڑی بالا کے کھلاڑیوں کا کھیل لاجواب تھا۔
میچ کی امپائرنگ 1برار احمد صاحب اور سجاد صاحب نے انجام دی جبکہ وحید صاحب نے زبردست کمینٹری کرتے ہوئے میچ کو مزید دلچسپ بنایا۔
آخر میں تمام شائقین اور کھلاڑیوں کا شکریہ ادا کیا جاتا ہے جنہوں نے آج کے میچ کو یادگار بنا دیا۔
ترنگڑی بالا ہاکی کلب کو شاندار کامیابی پر دل کی گہرائیوں سے مبارک باد!

آج گورنمنٹ ہائی اسکول ترنگڑی بالا کے گراؤنڈ میں ایک شاندار اور یادگار ہاکی میچ کھیلا گیا، جو شنکیاری ہاکی کلب اور ہائی اسکول ترنگڑی بالا کے باصلاحیت طلبہ کے درمیان ہوا۔
میچ انتہائی دلچسپ، سنسنی خیز اور خوبصورت کھیل کے مظاہرے سے بھرپور رہا۔
شنکیاری ہاکی کلب کے کھلاڑیوں نے بہترین سپورٹس مین اسپرٹ کا مظاہرہ کیا،
جبکہ ترنگڑی بالا کے نوجوانوں نے بھی زبردست جذبے، ٹیم ورک اور جوش و خروش کے ساتھ شاندار کھیل پیش کیا۔
گیم کے آفیشلز میں ریٹائرڈ پروفیسر اجمل صاحب نے اپنی ذمہ داریاں انجام دیں۔
ایمپائرنگ کے فرائض ابرار احمد صاحب اور عبداللہ صاحب نے خوش اسلوبی سے سرانجام دیے۔
آخر میں گورنمنٹ ہائی اسکول ترنگڑی بالا کی ٹیم نے شاندار کارکردگی کا مظاہرہ کرتے ہوئے چار۔صفر (4–0) سے کامیابی حاصل کی۔
تمام کھلاڑیوں کو عمدہ کھیل پر دلی مبارکباد
اور شنکیاری ہاکی کلب کا شکریہ جنہوں نے آ کر کھیل کے ذریعے خوبصورت لمحات بانٹے۔

ہائی سکول ترنگڑی بالا قومی کھیل کی نرسری

اپریل 2023 میں میرا تبادلہ ہائی سکول ترنگڑی بالا میں مدرس کے طور پر ہوا۔ میدان پکھل کا ایک تاریخی سکول ہونے کی ناطے سے یہاں بہت کچھ سیکھنے کو ملا مگر سب سے دلچسپ لرننگ ہاکی کے حوالے سے ہوئی۔ یہاں آنے سے پہلے مجھے بھی ہاکی کے بارے میں اتنا ہی علم تھا جتنا کہ کسی عام شہری کو معلوم ہوتا ہے۔ یعنی اگر کوئی پوچھے کہ پاکستان کا قومی کھیل کونسا ہے تو جواب دے دیتا ہاکی اور بس۔
ہائی سکول ترنگڑی بالا کے ماحول میں آنے کے بعد ہاکی کا ایک انتہائی دلچسپ کھیل ہونے کے بارے میں معلوم ہوا۔ یہاں کے ایک ایک بچے کی رگ رگ میں جب ہاکی کیلئے جنون دیکھا تو ہاکی کی قدر و قیمت کا اندازہ ہوا۔ غریب گھرانوں کے بچے کوئی پلاسٹک کی چپل پہنے، کوئی پھٹے پرانے جوتے پہنے اور کوئی ننگے پاؤں ہی گیند کے پیچھے ایسے دوڑتے ہیں جیسے اس گیند میں ہر بچے کا انعام چھپا ہو۔ یہاں بتاتا چلوں کہ ہاکی کی گیند ایک نہایت سخت جان پتھر نما گولا ہوتی ہے جو اگر کسی کو لگ جائے تو اس آدمی کےکم از کم ہفتہ بھر اوسان خطا رہتے ہیں۔
میرا جب کبھی گراونڈ سے گزر ہو ہو تو کھیلتے ہوئے بچوں کو دور سے آواز دے کر پکارتا ہوں کہ بیٹا پلیز مجھے بچا کر یہ نہ ہو کی میرے ٹخنے پھولا بیٹھو۔
بات اگر وسائل کی کریں تو معلوم ہوگا کہ ہاکی پاکستان کا قومی کھیل تو ہے مگر یہ عوامی سطح پر کھیلنے کیلئے نہایت ہی مہنگا کھیل بھی ہے۔ ہاکی کی ایک نارمل کوالٹی کی فائبر سٹک بھی کم از کم دس ہزار روپے سے شروع ہوتی ہے۔ اور یوں اسکی قیمتیں لاکھوں تک بھی جاتی ہیں۔ ایک ٹیم کو کم از کم گیارہ ہاکیاں درکار ہوتی ہیں اور ایک گول کیپر کی کٹ جو کہ نارمل کوالٹی 25 سے 30 ہزار روپے سے شروع ہوتی ہے۔ اس کے علاوہ کھلاڑیوں کی کٹیں اور دیگر حفاظتی گارڈز وغیرہ کو بھی اگر ملا لیا جائے تو اس طرح ہاکی کی کی ایک ٹیم کم از کم ڈیڑھ سے دو لاکھ میں تیار ہوتی ہے۔
اب گاؤں یا گلی محلے کی سطح پر لوگوں کے پاس اتنے وسائل کہاں کہ وہ قومی کھیل کو زندہ رکھ سکیں۔ اس کے ساتھ ساتھ ہاکی کھیلنے کیلئے گراونڈ کہاں سے لائے جائیں؟ اصولا تو یہ کھیل آسٹرو ٹرف پر کھیلا جاتا ہے جو کہ کروڑوں کی مالیت رکھتی ہے اور بغیر حکومتی سرپرستی کے اسکی خریداری ناممکن ہے مگر ہمارے معاشرے میں تو سیدھے اور ہموار گراونڈ کی بھی کمی ہے۔
ترنگڑی بالا سکول کے پاس ایک وسیع گراونڈ ہے جس پر علاقہ بھر کے افراد مختلف کھیلوں کی سرگرمیاں کرتے ہیں۔ مگر ہائی سکول ترنگڑی بالا کا سٹاف ہر سال اپنی جیب سے اس گراونڈ کی ہمواری کرتا ہے اسکی نکاسی کا خیال رکھتا ہے اس پر گاڑیاں اور بائکس چڑھانے سے روکتا ہے کہ کہیں اسکی سطح خراب نہ ہو جائے۔ اسکے علاوہ اپنے طالب علموں کو ہاکی کی مہنگی سہولیات میسر کرنے کیلئے سٹاف ممبرز کیا کیا جدوجہد کرتے ہیں وہ میں ایک سٹاف ممبر ہونے کے ناطے بخوبی جانتا ہوں۔ پرنسپل ذوالفقار احمد صاحب کی سرپرستی میں ہر فرد قومی کھیل کو زندہ رکھنے کیلئے جان لگاتا ہے۔ ایس ایس ٹی وحید احمد صاحب ہر سال سیاسی و سماجی نمائندگان سے قومی کھیل کو سپورٹ کرنے کیلئے تعاون کی اپیل کرتے ہیں مگر اکثر کہیں سے کوئی خاص معاونت نہیں حاصل ہو پاتی۔ اور پھر بالآخر ہائی سکول ترنگڑی بالا کا سٹاف بڑھ چڑھ کر ذاتی طور پر اس سلسلے میں مدد فراہم کرتا ہے اور قومی کھیل کی شمع کو بجھنے نہیں دیتا۔
بات کریں ترنگڑی بالا سکول کی ہاکی کیلئے کسی نرسری کے کردار کی تو سکول ہذا کے اساتذہ کرام سی ٹی استاد جناب بدر منیر خان اور ایس ایس ٹی مہتاب احمد صاحب بہترین کوچ اور ٹیم انچارج کا کردار ادا کرتے ہیں۔ کلاس ششم میں داخل ہونے والے بچوں کو یہ ٹریننگ ملنا شروع ہوتی ہے اور جیسے جیسے بچے اگلی کلاسز میں بڑھتے جاتے ہیں ویسے ہی وہ مزید میچور اور بہترین کھلاڑی بن جاتے ہیں۔ اور پھر نہم دہم تک پہنچتے پہنچتے سکول کے پاس ایک بااثر اور ویل ٹرینڈ ایتھلیٹ تیار ہو جاتا ہے۔ اور یہ سلسلہ پچھلے 35 سال سے جاری و ساری ہے۔ ہمیشہ ترنگڑی بالا کی ہاکی ٹیم ضلعی سطح پر نمایاں پوزیشن حاصل کر کے ڈویژن اور صوبے میں بھی اپنی پہچان رکھتی ہے۔ کبھی کبھار ایسا بھی ہوجاتا ہے کہ ہائی سکول ترنگڑی بالا اپنے ہی بچوں سے ہار جاتا ہے اور ٹورنامنٹ سے باہر ہو جاتا ہے۔ آپ سوچ رہے ہوں گے کہ وہ کیسے؟ اسکا جواب یہ کی ہمارے بچے جنہیں ہم نے چھٹی جماعت سے لے کر دہم تک ٹرین کیا ہوتا ہے وہ آگے جا کر گیارہویں اور بارہویں جماعت میں ہائیر سیکنڈری سکول شیرپور اور ہائیر سیکنڈری سکول بفہ کی جانب سے ہمارے ہی بچوں یعنی اپنے ہی چھوٹے بھائیوں کے خلاف میچ جیت جاتے ہیں۔ چونکہ گیارہویں اور بارہویں جماعت کے بچے زیادہ میچور اور زیادہ تجربہ کار ہوتے ہیں اس لئے ان کے ساتھ مقابلہ اکثر چھوٹے بچوں کے بس کی بات نہیں رہتی۔ مگر سلام ہے ترنگڑی کے نڈر خون کی کہ چھوٹے چھوٹے معصوم بچے سینا تان کر جان لگا کر ایسا کھیل پیش کر رہے ہوتے ہیں کہ تماشائی حقہ بقہ رہ جاتے ہیں۔ ترنگڑی سکول کا سٹاف بھی اپنے ہی لگائے ہوئے تناور درختوں کے ہاتھوں نرسری میں پلتے چھوٹے پودوں کی ہار کو دل و جان سے قبول کر لیتا ہے۔ اور پھر سے قومی کھیل کی خدمت کیلئے سال بھر کی تگ و دو میں مصروف عمل ہو جاتا ہے۔
تحریر:
دانش تاج
ایس ایس ٹی
ہائی سکول ترنگڑی بالا

آج گورنمنٹ ہائی اسکول ترنگری بالا کے سرسبز و شاداب میدان میں انٹر اسکولز سپورٹس ٹورنامنٹ 2025 (ہاکی) کا یادگار فائنل کھیلا گیا۔
یہ دلچسپ اور سنسنی خیز مقابلہ گورنمنٹ ہائی سیکنڈری اسکول بفا اور گورنمنٹ ہائی اسکول ترنگری بالا کے درمیان ہوا،
جہاں دونوں ٹیموں نے بہترین کھیل کا مظاہرہ کرتے ہوئے شائقین کے دل جیت لیے۔
گراؤنڈ انچارج:
جناب ذوالفقار احمد صاحب (پرنسپل، گورنمنٹ ہائی اسکول ترنگری بالا)
جناب طارق صاحب (پرنسپل، گورنمنٹ ہائی سیکنڈری اسکول بیرکنڈ)
جناب زین العابدین صاحب (پرنسپل، گورنمنٹ ہائی اسکول خاکی)
پروفیسر ریٹائرڈ اجمل صاحب
جناب سجاد احمد صاحب (لیجنڈ ہاکی پلیئر)
جناب زاہد صاحب (لیجنڈ ہاکی پلیئر),
ان معزز مہمانوں کی آمد نے ایونٹ کو وقار، جوش اور حوصلے سے بھر دیا۔
ان کی موجودگی نے نوجوان کھلاڑیوں میں نیا جذبہ اور ولولہ پیدا کیا۔
جناب ابرار صاحب اور جناب زاہد صاحب نے غیر جانب دار، منصفانہ اور شاندار امپائرنگ کے فرائض انجام دیے۔
ہم اپنے مخلص دوست جناب اسد صاحب کا دل کی گہرائیوں سے شکریہ ادا کرتے ہیں،
جنہوں نے رضاکارانہ طور پر میڈیا کوآرڈینیٹر کی حیثیت سے خدمات سرانجام دیں۔
انہوں نے پورے میچ کی لائیو کوریج سوشل میڈیا پر نشر کی، تاکہ ہر شخص اس خوبصورت لمحے کا حصہ بن سکے۔
ان کا جذبہ، خلوص اور خدمت قابلِ فخر ہیں۔
اس دلچسپ مقابلے میں گورنمنٹ ہائی سیکنڈری اسکول بفا نے کامیابی حاصل کی۔
لیکن درحقیقت، آج ہاکی جیتی، کھیل جیتا، اور اسپورٹس مین اسپرٹ جیتی!
ہار جیت کھیل کا حصہ ہے، مگر آج جس نے دل جیتا وہ ہے کھیل کی محبت اور باہمی احترام کا جذبہ۔ 🏑
آخر میں، تمام مہمانانِ گرامی، منتظمین، اساتذہ، کھلاڑیوں اور تماشائیوں کا شکریہ
جنہوں نے اپنی شرکت اور تعاون سے اس ایونٹ کو یادگار بنایا۔

🏑 ڈسٹرکٹ اسپورٹس ٹورنامنٹ 2025 🏑
آج گورنمنٹ ہائی سکینڈری اسکول بفا اور گورنمنٹ ہائی سکول شمدھڑا کے درمیان ہونے والے سیمی فائنل ہاکی میچ کی چند جھلکیاں!
یہ زبردست مقابلہ گورنمنٹ ہائی سکول ترنگڑی بالا کے گراؤنڈ میں کھیلا گیا، جس میں دونوں ٹیموں نے بہترین کھیل کا مظاہرہ کیا۔

جوش، جذبہ اور اسپورٹس مین اسپرٹ سے بھرپور لمحات

SECOND SEMIFINAL
GHSS BAFFA VS GHS SHANDHARA
SATURDAY , 1 NOVEMBER 2025 (10 am)
VENUE : GHS TRANGEI BALA