مدرسہ دارالقرآن چھترپلین مانسہرہ

حضرت ابو ہریرہ رضی اللہ عنہ سے روایت ہے کہ رسول اللہ ﷺ نے ارشاد فرمایا:
"رمضان کے بعد سب سے افضل روزے اللہ کے مہینے 'محرم' کے ہیں، اور فرض نماز کے بعد سب سے افضل نماز رات کی نماز (تہجد) ہے۔"
(صحیح مسلم: 1163)

*ملفوظاتِ حکیم الامت مجدد الملت حضرت مولانا محمد اشرف علی تھانوی رحمۃ اللہ علیہ*

*جس قدر دنیا بڑھتی جاتی ہے اُسی قدر دین میں کمی آتی جاتی ہے*

ارشاد فرمایا کہ بعض اہلِ حیلہ کہتے ہیں کہ ہم تو دنیا کے لیے کماتے ہیں، اگر دنیا نہ ہوگی تو دین کی بھی درستی نہ ہوگی مگر یہ کہنا اس کا اس وقت صحیح ہوتا جبکہ ہم یہ دیکھتے کہ دنیا کی ترقی کے ساتھ وہ دین کی بھی ترقی کر رہے ہیں۔ ہم تو روز روشن کی طرح یہ دیکھ رہے ہیں کہ جس قدر دنیا بڑھتی جاتی ہے اُسی قدر دین میں کمی آتی جاتی ہے۔
حضرات یہ دنیا کچھ کام نہ آوے گی اور آخرت میں کام نہ آنا تو ظاہر ہی ہے، ہم تو اس کا کام میں نہ آنا اور اس کی تحصیل پر حسرت ہونا یہاں ہی مشاہدہ کر رہے ہیں۔ جب کوئی دنیا پرست مرنے لگے تو مرتے وقت پوچھنا چاہیے کہ دنیا طلبی کے بارے میں اس وقت تمہاری کیا رائے ہے؟ آیا تمہاری اب بھی وہی تحقیق ہے یا بدل گئی؟ میں بقسم کہتا ہوں کہ وہ ضرور پہلی تحقیق سے رجوع کریں گے کیونکہ جس بازار میں اب وہ جارہے ہیں وہاں یہ سکّہ نہیں چلتا جو انہوں نے عمر بھر جمع کیا ہے اور جو سکّہ وہاں چلتا ہے وہ ان کے پاس ہے نہیں کیونکہ وہ اس کے جمع کرنے کو عمر بھر بے سود بتایا کرتے تھے۔ وہاں تو وہ سکّہ چلتا ہے جو ظاہر میں تم کو کالا معلوم ہوتا ہے اور واقع میں وہ خالص چاندی ہے اور جو جمع کیا ہے وہ بظاہر چاندی اور واقع میں وہ لوہا ہے مگر اس وقت آنکھیں بند ہیں لیکن عنقریب کھل جاویں گی اور حقیقت نظر آجاوے گی۔

(الاخلاص حصہ اول، دعوات عبدیت جلد اول، صفحہ ۱۵۸، خطبات حکیم الامت، جلد ۳۰، صفحہ ۲۴۸)

*ملفوظاتِ حکیم الامت مجدد الملت حضرت مولانا محمد اشرف علی تھانوی رحمۃ اللہ علیہ*

*ایک بزرگ کی عجیب نصیحت*

ارشاد فرمایا کہ یہ حضرات (اہل اللہ) تو اس درجہ رحیم و کریم ہوتے ہیں کہ جس کا کوئی حد و حساب نہیں ہے۔ ایک بزرگ نے اپنے مرید سے کہا کہ اگر تم کو کوئی ستائے تو نہ صبر كيجیو اور نہ بدلہ لیجیو۔ بدلہ تو اس لیے نہ لینا کہ جیسے تم کو تکلیف ہوئی ہے ایسی ہی تمہارے بھائی کو تکلیف ہوگی اور صبر اس لیے نہ کرنا کہ یہ صبر اس پر پڑے گا اور پھر اس پر کوئی بلا آوے گی، یہ بھی گوارا نہ ہونا چاہیے۔ اس نے پوچھا کہ پھر کیا کریں؟ فرمایا ذرا برا بھلا کہہ کر دل کا بخار نکال لیا کرو۔ سبحان اللہ، اصلی ہمدردی یہ ہے۔

(الاخلاص حصہ اول، دعوات عبدیت جلد اول، صفحہ ۱۵۵، خطبات حکیم الامت، جلد ۳۰، صفحہ ۲۴۶)

مدرسہ دارالقرآن چھترپلین مانسہرہ

رسول اللہ ﷺ نے ارشاد فرمایا:
"جو شخص یہ چاہتا ہو کہ اس کے رزق میں وسعت کی جائے اور اس کی عمر دراز کی جائے، تو اسے چاہیے کہ وہ رشتہ داروں کے ساتھ حسنِ سلوک کرے۔"
(صحیح بخاری: 2067،

*ملفوظاتِ حکیم الامت مجدد الملت حضرت مولانا محمد اشرف علی تھانوی رحمۃ اللہ علیہ*

*جو چیز جہاں سے لو وہیں رکھو*

ایک صاحب نے حضرت والا رحمہ اللہ کی چھتری جہاں سے لی تھی بجائے اس کے دوسری جگہ رکھ دی۔ ارشاد فرمایا کہ یہ بھی آداب میں سے ہے کہ جو چیز جہاں سے لے وہیں رکھے اور صرف دوسرے ہی کی چیز نہیں بلکہ اپنی بھی چیز جہاں سے لے وہیں رکھے۔ میں نے تو اپنے مکان میں تمام چیزیں مقررہ جگہوں پر رکھی ہیں، اس میں پریشانی نہیں ہوتی۔ فرض کرو دیا سلائی کا بکس ہے، اگر مقررہ جگہ پر رکھا ہو تو اگر آدھی رات کو بھی ہاتھ پڑے گا تو فوراً مل جاوے گا۔

(اصلاح کے تیر بہدف نسخے، صفحہ ۲۰۴)

حضرت ابودرداء رضی اللہ عنہ سے روایت ہے کہ انہوں نے رسول اللہ ﷺ کو یہ فرماتے ہوئے سنا:
"والد جنت کا سب سے بہترین دروازہ ہے، اب تمہاری مرضی ہے کہ (اس کی نافرمانی کر کے) اس دروازے کو ضائع کر دو یا (اس کی فرمانبرداری کر کے) اس کی حفاظت کرو۔"
(سنن ترمذی: 1900)

*ملفوظاتِ حکیم الامت مجدد الملت حضرت مولانا محمد اشرف علی تھانوی رحمۃ اللہ علیہ*

*آج کل دعوے ہی دعوے ہیں*

ارشاد فرمایا کہ آج کل ادعاء اور اظہار بہت ہے حالانکہ جو کام کرتے ہیں وہ دو حال سے خالی نہیں، یا تو اللہ کے لیے یا تو نفس کے لیے۔ اگر اللہ کے لیے ہے تو اللہ میاں کا علم کافی ہے اور اظہار کی کیا حاجت ہے۔ اور اگر نفس کے لیے ہے تو کوئی نتیجہ نہیں، پھر اظہار کس کا۔ اس کا امتحان کہ یہ اللہ کے لیے یہ کام کر رہا ہے یا نفس کے لیے، یہ ہے کہ اگر دوسرا شخص اسی کام کا آجاوے تو یہ خود چھوڑ کر بیٹھ جائے اور غنیمت جانے کہ اس نے میرا کام ہلکا کر دیا۔ آج کل تو یہ حالت ہے کہ اگر ایسا ہو تو ذبح ہوجاویں۔ نہ مولویوں میں اخلاص، نہ مشائخ میں الا ماشاء اللہ۔

(اصلاح کے تیر بہدف نسخے، صفحہ ۱۹۴)