Darulfalah International

رات الحمد للّٰہ "عشرہِ ذی الحجہ تربیتی کلاس" مکمل ہوئی، حاضری اگر چہ کم تھی لیکن انتظام کرنے والے ادارے کو، شرکاء کو اور معلّمین کو الحمد للّٰہ بہت فائدے ہوئے.
🌀 فائدوں میں سے بڑا فائدہ یہ ہوا کہ عید الاضحٰی کے بعد 15 جون کو سمر کیمپ یعنی گرمی کی چھٹیوں کی کلاس کرنے کا فیصلہ ہو گیا جو ان شاءاللہ 40 روز پر مشتمل ہو گی.
♻️ مکمل ہو جانے والی کلاس کے فوائد و اثرات اور پھر نئی شروع ہونے والی کلاس کی تفصیلات ان شاءاللہ بہت جلد آپ سے شیئر کی جائیں گی.

عبد الحنان کیلانی صاحب سے ایک مفید نشست
===================
ویسے تو اپنے ادارے کے اساتذہ اور دیگر رفقاء سے ملاقاتیں، کام کے لیے مشاورت اور دیگر معاملات پر الحمد للّٰہ گفت گو ہوتی رہتی ہے، آج ہمارے تخصُّص پروگرام کے ڈائریکٹر جناب عبد الحنان کیلانی صاحب سے تخصُّص 4 کے طلبہ، کلاس کے انتظامی و تدریسی معاملات اور اس کو بہتر سے بہتر بنانے کے ساتھ ساتھ علومِ اسلامیہ کی پہلی کلاس کی بہتر تربیت و تعلیم پر سیر حاصل گفت گو ہوئی۔
علاوہ ازیں منہجِ اہلِ حدیث اور فکرِ اہلِ حدیث پر بھی گفت گو ہوئی، شیخ الحدیث حضرت مولانا محمد اسماعیل سلفی علیہ الرحمہ کی تصنیف "تحریک آزادیِ فکر اور شاہ ولی اللّٰہ کی تجدیدی مساعی" کے حوالے سے بھی کئی پہلوؤں پر گفت گو ہوئی، ہمارے استاذِ گرامی "ابو الجامعہ و شیخ الجامعہ فضیلۃ الشیخ ڈاکٹر حافظ عبد الرحمٰن مدنی" (حفظہ اللّٰہ و رعاہ و عافاہ) کے حوالے سے بھی تحریکِ اہلِ حدیث پر گفت گو ہوئی کہ استاذِ گرامی فرماتے ہیں:
"اہلِ حدیث ایک فکری منہاج اور ساتھ ہی ساتھ ایک طرزِ عمل کا نام ہے، یہ کسی انسانی گروہ، حزب اور جتھے کا نام نہیں."
وہ فرماتے ہیں:
"ہم عقیدے میں اہل السنہ و الجماعۃ ہیں اور اس باب میں ہمارے بالمقابل معتزلہ، اشاعرہ اور ماتریدیہ وغیرہ ہیں، جب کہ عمل میں ہم اہلِ حدیث ہیں، اور اس میدان میں ہمارے بالمقابل اہل الرائے اور اہلِ ظاہر ہیں."
شیخ محترم مزید یہ فرماتے ہیں:
"اس سب کے باوجود رواداری، میل جول، تعلقات اور مروءت ہمارا امتیاز اور پہچان رہی ہے."
ویسے یہ آخری بات تو ہمیں محدثین کی جماعت میں الحمد للّٰہ بہ درجہِ اتمّ نظر آتی ہے.

الحمد للّٰہ حمدا کثیرا