Geet AQaa Dey

Assalam o Alaikum

ہو کرم سرکار اب تو ہو گئے غم بے شمار
جان و دل تم پر فدا اے دو جہاں کے تاجدار
🤲
میں اکیلا اور مسائل زندگی کے بے شمار
آپ ہی کچھ کیجیئے نہ اے شہہ عالی وقار
🤲
یاد آتا ہے طواف خانہ کعبہ مجھے
اور لپٹنا ملتزم سے والہانہ بار بار
🤲
سنگِ اسود چوم کر ملتا مجھے کیف و سرور
چین پاتا دیکھ کر مستجاب و مستجار
🤲
یا خدا دکھلاحطیم پاک و میزاب و مقام
اور صفا مروا مجھے بہر ِرسولؑ زی وقار
🤲
جا رہا ہے قافلہ طیبہ نگر، روتا ہوا
میں رہا جاتا ہوں تنہا اے حبیب کردگار
🤲
جلد پھر تم لو بلا اور سبز گنبد دو دکھا
حاضری کی آرزو نے کر دیا پھر بیقرار
🤲
چوم کر خاک مدینہ جھومتا پھرتا تھا میں
یاد آتے ہیں مدینے کےمجھے لیل و نہار
🤲
گنبد خضرا کے جلوے اور وہ افطاریاں
یاد آتی ہے بہت رمضان طیبہ کی بہار
🤲
یا رسول اﷲ سن لیجیئے میری فریاد کو
کون ہے جو کہ سنے تیرے سوا میری پکار
🤲
حال پر میرے کرم کی اک نظر فرمائیے
دل میرا غمگین ہے اے غمزدوں کے غمگسار
🤲
قافلے والوں سنو یاد آئے تو میرا سلام
عرض کرنا روتے روتے ہو سکے تو بار بار
🤲
غمزدہ یوں نہ ہوا ہوتا عبید قادری
اس برس بھی دیکھتا گر سبز گنبد کی بہار

آپ آئے تو دنیا منور ہوئی
بزم کونین میں روشنی گھر گھر ہوئی
ہادیٔ دوجہاں ہو سلام آپ پر
سرورِ انس و جاں ہو سلام آپ پر
دیکھتے کیا ہو اہل ِ صفا
آپہنچے محبوب ِ خدا
یعنی ہو چکے جلوہ نما
شاہ ِ حق شاہ ِ بطحا
لا اِلہ اِلا اللہ – لا اِلہ اِلا اللہ
حق لا اِلہ اِلا اللہ
آمنّابرسول اللہ

خلق کے رہبر آپہنچے
حق کے پیمبر آپہنچے
شافع ِ محشر آپہنچے
ساقی ِ کوثر آپہنچے
لا اِلہ اِلا اللہ – لا اِلہ اِلا اللہ
حق لا اِلہ اِلا اللہ
آمنّابرسول اللہ

ٹھنڈی ہوائیں چلتی ہیں
مشعلیں حق کی جلتی ہیں
حسرتیں دل کی نکلتی ہیں
خوشیاں پہلو بدلتی ہیں
لا اِلہ اِلا اللہ – لا اِلہ اِلا اللہ
حق لا اِلہ اِلا اللہ
آمنّابرسول اللہ

ساقی ِکوثر بحر ِ خدا
آج تو ایسا جام پلا
اُٹھ جائے ہردہ جدائی کا
جلوۂِ زیبا ہم کو دکھا
لا اِلہ اِلا اللہ – لا اِلہ اِلا اللہ
حق لا اِلہ اِلا اللہ
آمنّابرسول اللہ

جسم سے ہو جب جان جدا
ہم کو ملے فردوس میں جا
لُوٹیں ہم قربت کا مزا
تیری اے محبوب ِ خدا
لا اِلہ اِلا اللہ – لا اِلہ اِلا اللہ
حق لا اِلہ اِلا اللہ
آمنّابرسول اللہ

جنت کی جب سیر کریں
ہم بھی سب ہمراہ چلیں
حوض ِ کوثر پر پہنچیں
ہاتھ سے آپ کے جام پئیں
لا اِلہ اِلا اللہ – لا اِلہ اِلا اللہ
حق لا اِلہ اِلا اللہ
آمنّابرسول اللہ

جو اِس بزم میں شامل ہو
اُس پر رحمت نازل ہو
جس گھر میں یہ محفل ہو
عزت و برکت داخل ہو
لا اِلہ اِلا اللہ – لا اِلہ اِلا اللہ
حق لا اِلہ اِلا اللہ
آمنّابرسول اللہ

داور ِ کُل اے ربّ ِ عُلیٰ
صدقہ ذات ِ محمد کا
جاری رہے تا روز ِ جزا
مذہب اہل ِ سنّت کا
جاری رہے تا روز ِ جزا
مسلک اعلیٰ حضرت کا
جاری رہے تا روز ِ جزا
سلسلہ میرے مُرشد کا
لا اِلہ اِلا اللہ – لا اِلہ اِلا اللہ
حق لا اِلہ اِلا اللہ
آمنّابرسول اللہ

سارے نبیوں کے عہدے بڑے ہیں
لیکن آقا ﷺ کا منصب جدا ہے
وہ امامِ صفِ انبیاؑء ہے
ان کا رتبہ بڑوں سے بڑاہے

کوئی لفظوں سے کیسے بتا دے
ان کے رتبے کی حد ہے تو کیا ہے
ہم نے اپنے بڑوں سے سنا ہے
صرف اللہ ہی ان سے بڑا ہے

وہ جو اک شہر نور الہدیٰ ہے
جلوہ گاہوں کا اک سلسلہ ہے
جس کی ہر صبح شمس الضحیٰ ہے
جس کی ہر شام بدر الدجیٰ ہے

نام جنت کا تم نے سنا ہے
میں نے اس کا نظارا کیا ہے
میں یہاں سے تمہیں کیا بتا دوں
ان کے مدینے کی گلیوں میں کیا ہے

کتنا پیارا ہے موسم وہاں کا
کتنی پرکیف ساری فضاہے
تم میرے ساتھ خود چل کے دیکھو
گرد طیبہ بھی خاک شفا ہے

یہ وہی شہرِ طیبہ ہے جس میں
خواب گاہِ حبیبِ خدا ہے
کام ہے جن کا عقدہ کشائی
نام بھی جن کا خیر الورٰی ہے

جن کا رتبہ سوا ہے خرد سے
فہم و ادراک سے ماورا ہے
بحر و بر جن کے زیرِ نگیں ہیں
تابہ افلاک جن کی ضیا ہے

پیشواؤں کے جو پیشوا ہیں
اک لقب جن کا صدرالعلٰی ہے
قاب قوسین ہے جن کی منزل
رہگزر سدرۃ المنتہٰی ہے

مستقل ان کی چوکھٹ عطا ہو
میرے معبود ﷻ یہ التجاہے
کوئی پوچھے تو یہ کہ سکوں میں
باب جبریل میرا پتہ ہے 🌴

الصلوة ولسلام علیک یا رسول اللہ
وعلی الک واصحابک یا حںیب اللہ

منگتے خالی ہاتھ نہ لوٹے کتنی ملی خیرات نہ پوچھو
ان کا کرم پھر ان کا کرم ہے ان کےکرم کی بات نہ پوچھو

کنت کنزاً رازِ مشیّت جلوۂ اسریٰ نورِ ہدایت
جگمگ جگمگ دونوں عالم کیسی ہے وہ ذات نہ پوچھو

حب ِ عشق نبی کونین کی دولت عشق نبی بخشش کی ضمانت
اس سے بڑھ کر دستِ طلب میں ہے بھی کوئی سوغات نہ پوچھو

رشکِ جناں طیبہ کی گلیاں ہر ذرّہ فردوس بد اماں
چاروں طرف انوار کا عالم رحمت کی برسات نہ پوچھو

ظاہر میں تسکین دل و جاں باطن میں معراج دل و جاں
نام نبی پھر نامِ نبی ہے نام نبی کی بات نہ پوچھو

حال اگر کچھ اپنا سنایا اُن کے کرم کا شکوہ ہوگا
میں اپنے حالات میں خوش ہوں مجھ سے مرے حالات نہ پوچھو

تاجِ شفاعت سر پر پہنے حشر کا دولہا آ پہنچا
آنکھیں کھو لو غور سے دیکھو کس کی ہے بارات نہ پوچھو

میں کیا اور کیا میری حقیت سب کچھ ہے سرکار کی نسبت
میں تو بُرا ہوں لیکن میری لاج ہے کس کے ہات نہ پوچھو

خاؔلد میں صرف اتنا کہوں گا جاگ اُٹھا اشکوں کا مقدر
یادِ نبی میں روتے روتے کیسے کٹی ہے رات نہ پوچھو

Munawwar Meri Ankhoun ko Naat Lyrics
منور میری آنکھوں کو مرے شمس الضحیٰ کردیں
غموں کی دھوپ میں وہ سایۂ زلف دوتا کردیں

جہاں بانی عطا کردیں بھری جنت ہبہ کردیں
نبی مختارِ کل ہیں جس کو جو چاہیں عطا کردیں

جہاں میں ان کی چلتی ہے وہ دم میں کیا سے کیا کردیں
زمیں کو آسماں کردیں ثریا کو ثریٰ کردیں

فضا میں اڑنے والے یوں نہ اترائیں ندا کردیں
وہ جب چاہیں جسے چاہیں اسے فرماں رَوا کردیں

ہر اک موجِ بلا کو میرے مولیٰ ناخدا کردیں
مری مشکل کو یوں آساں مرے مشکل کشا کردیں

ہر اک موجِ بلا کو بحر غم میں ناخدا کردیں
مری مشکل کو یوں آساں مرے مشکل کشا کردیں

عطا ہو بے خودی مجھ کو خودی میری ہوا کردیں
مجھے یوں اپنی الفت میں مرے مولیٰ فنا کردیں

جہاں میں عام پیغام شہ احمد رضا کردیں
پلٹ کر پیچھے دیکھیں پھر سے تجدید وفا کردیں

نبی سے ہو جو بیگانہ اسے دل سے جدا کردیں
پدر ، مادر ، برادر ، مال و جاں ان پر فدا کردیں

تبسم سے گماں گزرے شب تاریک پر دن کا
ضیائِ رخ سے دیواروں کو روشن آئینہ کردیں

شب تاریک پر دن کا گماں گزرے تبسم سے
ضیائِ رخ سے دیواروں کو روشن آئینہ کردیں

کسی کو وہ ہنساتے ہیں کسی کو وہ رلاتے ہیں
وہ یونہی آزماتے ہیں وہ اب تو فیصلہ کردیں

گلِ طیبہ میں مل جائوں گلوں میں مل کے کھل جائوں
حیاتِ جادوانی سے مجھے یوں آشنا کردیں

یہ دورِ آزمائش ہے انہیں منظور ہے جب تک
نہ چاہیں تو ابھی وہ ختم دورِ ابتلا کردیں

سگ آوارۂ صحرا سے اُکتا سی گئی دنیا
بچائو اب زمانے کا سگانِ مصطفیٰ کردیں

زمانہ خوگر مے ہے نئی مے کی ضرورت ہے
پلا کر اپنی نظروں سے وہ تجدید نشہ کردیں

مجھے کیا فکر ہو اخترؔؔ مرے یاور ہیں وہ یاور
بلائوں کو جو میری خود گرفتارِ بلا کردیں

Naat Lyrics #1
Madine ka Safar hey Or Mein Numdida Urdu Lyrics
مدینے کا سفر ہے اور میں نم دیدہ نم دیدہ
جبیں افسردہ افسردہ، قدم لغزیدہ لغزیدہ

چلا ہوں ایک مجرم کی طرح میں جانبِ طیبہ
نظر شرمندہ شرمندہ، بدن لرزیدہ لرزیدہ

کسی کے ہاتھ نے مجھ کو سہارا دے دیا ورنہ
کہاں میں اور کہاں یہ راستے پیچیدہ پیچیدہ

غلامانِ محمد دور سے پہچانے جاتے ہیں
دلِ گرویدہ گرویدہ، سرِ شوریدہ شوریدہ

کہاں میں اور کہاں اس روضہِ اقدس کا نظّارہ
نظر اس سمت اٹھتی ہے مگر دزدیدہ دزدیدہ

مدینے جا کے ہم سمجھے تقدس کس کو کہتے ہیں
ہوا پاکیزہ پاکیزہ، فضا سنجیدہ سنجیدہ

بصارت کھو گئی لیکن بصیرت تو سلامت ہے
مدینہ ہم نے دیکھا ہے مگر نادیدہ نادیدہ

وہی اقبؔال جس کو ناز تھا کل خوش مزاجی پر
فراقِ طیبہ میں رہتا ہے اب رنجیدہ رنجیدہ