The punjab science Academy Gojra

25/06/2021

day of Rahmat- Jumma is here. May Allah bestow His blessings and mercy upon you and your family!

19/06/2021

NMDCAT ALERT...!!!

ایم ڈی کیٹ کےلیے کسی ادارے کو جوائن کرنے کی بجاۓ PMC ویب سائٹ پر اگلے ایک دو ہفتوں میں اپلوڈ ہونے والے question bank کو ہی فالو کریں۔ ٹو دی پوائنٹ تیاری کا یہی بہترین طریقہ ہے۔آپ سے 6000 روپے فیس اسی question بنک کی لی گئی ہے۔

21/12/2020

جوانی میں انسان باپ کو شک کی نگاہ سے دیکھتا رہتا ہے ، جیسے باپ کو ہمارے مسائل ، تکلیفوں یا ضرورتوں کا احساس ہی نہیں ، یہ نئے دور کے تقاضوں کو نہیں سمجھتا .
کبھی کبھی ہم اپنے باپ کا موازنہ بھی کرنا شروع کر دیتے ہیں ، " اتنی محنت ہمارے باپ نے کی ہوتی ، بچت کی ہوتی ،کچھ بنایا ہوتا تو آج ہم بھی ...فلاں کی طرح عالیشان گھر ، گاڑی میں گھوم رہے ہوتے "
" کہاں ہو ؟ کب آؤ گے ؟ زیادہ دیر نہ کرنا " جیسے سوالات انتہائی فضول اور فالتو سے لگتے ہیں .
" سویٹر تو پہنا ہے کچھ اور بھی پہن لو سردی بہت ہے " انسان سوچتا ہے کہ اولڈ فیشن کی وجہ سے والد کو باہر کی دنیا کا اندازہ نہیں .
اکثر اولادیں اپنے باپ کو ایک ہی معیار پر پرکھتی ہیں، گھر ، گاڑی، پلاٹ ، بینک بیلنس ، کاروبار اور اپنی ناکامیوں کو باپ کے کھاتے میں ڈال کر خود سرخرو ہو جاتے ہیں " ہمارے پاس بھی کچھ ہوتا تو اچھےاسکول میں پڑھتے، کاروبار کرتے "
اس میں شک نہیں ، اولاد کے لئے آئیڈیل بھی انکا باپ ہی ہوتا ہے لیکن کچھ باتیں جوانی میں سمجھ نہیں آتیں یا ہم سمجھنے کی کوشش نہیں کرتے ،اسلئے کہ ہمارے سامنے وقت کی ضرورت ہوتی ہے ، دنیا سے مقابلے کا بھوت سوار ہوتا ہے ، جلد سے جلد سب کچھ پانے کی جستجو میں ہم کچھ کھو بھی رہے ہوتے ہیں جس کا احساس بہت دیر سے ہوتا ہے .
بہت سی اولادیں ، وقتی محرومیوں کا پہلا ذمہ دار اپنے باپ کو قرار دے کر ، ہر چیز سے بری الزمہ ہو جاتی ہیں .
وقت گزر جاتا ہے ، اچھا بھی برا بھی ، اور اتنی تیزی سے گزرتا ہے کہ انسان پلک جھپکتے ماضی کی کہانیوں کو اپنے ارد گرد منڈلاتے دیکھنا شروع کر دیتا ہے. جوانی، پڑھائی، نوکری شادی ،اولاد اور پھر وہی اسٹیج وہی کردار ، جو نبھاتے ہوئے ، ہر لمحہ ، اپنے باپ کا چہرہ آنکھوں کے سامنے آ آ کر باپ کی ہر سوچ ،احساس ،فکر ، پریشانی ، شرمندگی اور اذیت کو ہم پر کھول کے رکھ دیتا ہے .
باپ کی کبھی کبھی بلا وجہ خاموشی، کبھی پرانے دوستوں میں بے وجہ قہقہے ، اچھے کپڑوں کو ناپسند کرکے ، پرانوں کو فخر سے پہننا ، کھانوں میں اپنی سادگی پر فخر ، کبھی کبھی سر جھکائے اپنے چھوٹے چھوٹے کاموں میں مگن ہونے کی وجہ، کبھی بغیر وجہ تھکاوٹ کے بہانے سر شام بتی بجھا کر لیٹ جانا، نظریں جھکائے ، انتہائی محویت سے ڈوب کر قران کی تلاوت کرنا، سمجھ تو آنا شروع ہو جاتا ہے لیکن بہت دیر بعد، جب ہم خود راتوں کو جاگ جاگ کر ، دوسرے شہروں میں گئے بچوں پر آیت الکرسی کے دائرے پھونکتے ہیں .
جب ہم سردی میں وضو کرتے ہوئے اچانک سوچتے ہیں ، پوچھ ہی لیں "بیٹا آپ کے ہاں گرم پانی آتا ہے؟ "
جب قہر کی گرمی میں روم کولر کی خنک ہوا بدن کو چھو تی ہے تو پہلا احساس جو دل و دماغ میں ہلچل سی مچاتا ہے ، وہ " کہیں اولاد گرمی میں تو نہیں بیٹھی "
جوان اولاد کے مستقبل ، شادیوں کی فکر ، ہزار تانے بانے جوڑتا باپ ، تھک ہار کر اللّه اور اسکی پاک کلام میں پناہ ڈھونڈتا ہے ، تب یاد آتا ہے ، ہمارا باپ بھی ایک ایک حرف ،ایک ایک آیت پر رک رک کر بچوں کی سلامتی، خوشی، بہتر مستقبل کی دعائیں ہی کرتا ہوگا .
ہر نماز کے بعد ،اٹھے کپکپاتے ہاتھ، اپنی دعاؤں کو بھول جاتے ہونگے ، ہماری طرح ہمارا باپ بھی ایک ایک بچے کو ، نمناک آنکھوں سے اللّه کی پناہ میں دیتا ہوگا .
سر شام کبھی کبھی ، کمرے کی بتی بجھا کر ، اس فکر کی آگ میں جلتا ہوگا کہ میں نے اپنی اولاد کے لئے بہت کم کیا ؟
اولاد کو باپ بہت دیر سے یاد آتا ہے ، اتنی دیر سے کہ ہم اسے چھونے، محسوس کرنے ، اس کی ہر تلخی، اذیت، فکر کا ازالہ کرنے سے محروم ہو جاتے ہیں . یہ ایک عجیب احساس ہے، جو وقت کے بعد اپنی اصل شکل میں ہمیں بےچین ضرور کرتا ہے . لیکن یہ حقیقتیں جن پر وقت پر عیاں ہو جائیں وہی خوش قسمت اولادیں ہیں .
اولاد ہوتے ہوئے ہم سمجھتے ہیں
باپ کا چھونا پیار کرنا ، دل سے لگانا، یہ تو بچپن کی باتیں ہیں . باپ بن کر آنکھیں بھیگ جاتی ہیں ، پتہ نہیں باپ نے کتنی دفعہ دل ہی دل میں ، ہمیں چھاتی سے لگانے کو بازو کھولے ہونگے ؟ پیار کے لئے اس کے ہونٹ تڑپے ہوں گے ، اور ہماری بے باک جوانیوں نے اسے یہ موقع نہیں دیا ہوگا .
ہم جیسے درمیانے طبقے کے سفید پوش لوگوں کی ہر خواہش، ہر دعا ، ہر تمنا ، اولاد سے شروع ہو کر اولاد پر ختم ہو جاتی ہے .
لیکن کم ہی باپ ہوں گے جو یہ احساس اپنی اولاد کو اپنی زندگی میں دلا سکے ہوں . یہ ایک چھپا ، میٹھا میٹھا درد ہے جو باپ اپنے ساتھ لے جاتا ہے ،اولاد کے لئے ، بہت کچھ کر کے بھی کچھ نہ کرسکنے کی ایک خلش ، آخری وقت تک ایک باپ کو بے چین رکھتی ہے ، اور یہ سب بہت شدت سے محسوس ہوتا ہے جب ہم باپ بنتے ہیں . بڑھاپے کی دہلیز پر قدم رکھتے ہیں . تو باپ کے دل کا حال جیسے قدرت ہمارے دلوں میں منتقل کر دیتی ہے .
اولاد اگر باپ کے دل میں اپنے لئے محبت کو کھلی آنکھوں سے، وقت پر دیکھ لے تو شاید اسے یقین ہو جائے کہ دنیا میں باپ سے زیادہ اولاد کا کوئی دوست نہیں ہوتا۔

Danish Baig از قلم

20/10/2020

The punjab science academy with new name now Toppers academy come and join us for the best preparation

12/05/2020

15/01/2020

2nd year physics pairing scheme

15/01/2020

1st year Physics pairing scheme 2020

02/01/2020

2nd year annual paper will be started from 28 april 2020

21/11/2019

خانۂ کعبہ پر حملے کے 40 سال، اصل میں کیا ہوا تھا؟

آج سے ٹھیک 40 برس قبل باغیوں کے ایک گروہ کے خانۂ کعبہ پر قبضے نے تمام اسلامی دنیا پر سکتہ طاری کر دیا۔

جہیمان العتیبی، جن کے خانۂ کعبہ پر قبضے نے دنیا کو ہلا کر رکھ دیا (اے ایف پی)

نمازِ فجر کے وقت امامِ کعبہ شیخ محمد السبیل امامت کروانے کی تیاری کر رہے تھے۔ آج ہوا میں خنکی تھی اس لیے انہوں نے خاکستری رنگ کا جبہ پہن رکھا تھا۔

55 سالہ شیخ السبیل کعبہ کے بالکل سامنے کھڑے تھے اور ان کے پیچھے دائروی صفوں میں نصف لاکھ کے قریب نمازی موجود تھے۔ امام نے معمول کے مطابق نماز ادا کروائی، اس کے بعد انہوں نے مصلے پر اپنا رخ موڑ کر مائیکروفون میں دعا شروع کی۔ اس دوران انہوں نے کنکھیوں سے دیکھا کہ مسجد کی پچھلی صفوں سے کچھ لوگ کندھوں پر تابوت اٹھائے آگے کی طرف بڑھ رہے ہیں۔ یہ کوئی غیر معمولی بات نہیں تھی۔ حج ابھی 20 دن پہلے ختم ہوا تھا اور ابھی لاکھوں حاجی مکہ میں موجود تھے۔ ان میں سے جو بھی فوت ہو جائے، اس کے لواحقین کی کوشش ہوتی تھی کہ نمازِ جنازہ مسجد الحرام میں امامِ کعبہ کی امامت ہی میں ادا ہو۔

عیسوی کیلنڈر کے مطابق یہ 20 نومبر 1979 کی بات ہے، یعنی آج سے ٹھیک 40 برس قبل۔ ہجری کیلنڈر کے تحت اس دن نہ صرف سال کا پہلا دن تھا بلکہ نئی صدی کا بھی پہلا دن تھا یعنی 1400 ہجری کا آغاز ہو گیا تھا۔

شیخ السبیل نے دعا جاری رکھی لیکن سروں پر سرخ دھاری دار صافے باندھے یہ لوگ انہی کی طرف بڑھتے گئے، حتیٰ کہ بالکل قریب پہنچ گئے۔

ان کے آگے آگے میلے کچیلے کپڑوں میں ملبوس الجھی ہوئی داڑھی والا ایک آدمی تھا۔ اس نے امام کعبہ کو ایک طرف دھکیل کر ان سے مائیک چھین لیا اور مائیک اپنے منہ کے قریب لا کر بدوی عربی میں پوری طاقت سے چیخا، ’بردرانِ اسلام، اللہ اکبر، مہدی کا ظہور ہو گیا ہے!‘

اس دوران اس کے ساتھیوں نے اپنے تابوتوں میں چھپی کلاشنکوفیں نکال کر لہرانی اور جوابی نعرے لگانے شروع کر دیے، ’مہدی کا ظہور ہو گیا ہے!‘

50 ہزار نمازی پھٹی آنکھوں اور کھلے منہ سے یہ سارا منظر دیکھ رہے تھے۔ ان کی سمجھ میں نہیں آ رہا تھا کہ یہ ہو کیا رہا ہے۔ اسی دوران مسجد الحرام کے در و دیوار فائرنگ کی آواز سے گونج اٹھے۔ سکیورٹی پر مامور پولیس اہلکاروں نے مزاحمت کی کوشش کی تھی جن پر ان جنگجوؤں نے گولی چلا دی۔ پولیس والوں کے پاس کوئی اسلحہ نہیں تھا بلکہ صرف ڈنڈے تھے اس لیے وہ بلا مزاحمت مارے گئے۔

مسجد کے صحن میں سپاہیوں کا خون بہنے لگا۔ گنبدوں اور میناروں پر بسیرا کرنے والے ہزاروں کبوتر بھی بےچین ہو کر ادھر ادھر اڑنے لگے۔

یہ کوئی معمولی بات نہیں تھی۔ اسلامی عقائد کی رو سے خانۂ کعبہ کی حدود میں کسی قسم کے تشدد کی شدید ممانعت ہے۔ حتیٰ کہ وہاں کسی جانور کو بھی نقصان نہیں پہنچایا جا سکتا۔ اس لیے نمازی دہشت کے عالم میں اپنی اپنی جگہوں پر جمے باغیوں کی کارروائی دیکھتے رہے۔

باغیوں کی تعداد 400 کے قریب تھی اور ان میں عورتیں اور بچے بھی شامل تھے، بلکہ کچھ سیاہ فام امریکی مسلمان بھی تھے۔ ان کے کمانڈر، جنہوں نے امام السبیل سے مائیک چھینا تھا، وہ فوجی ڈسپلن سے اپنے ساتھیوں کو ہدایات دینے لگے۔ جنگجو مسجد کے طول و عرض میں پھیل گئے۔ ان میں سے کچھ نے مسجد کے 292 فٹ اونچے میناروں پر چڑھ کر وہاں مشین گنیں نصب کر لیں۔ دوسروں نے مسجد کی دوسری منزل پر کھڑکیوں کے آس پاس پوزیشنیں سنبھال لیں۔ اسی دوران سرغنہ نے نمازیوں کو حکم دیا کہ صحن میں پڑے ہزاروں قالینوں کو گول تہہ کر کے دروازوں کے پیچھے لگا دیں تاکہ باہر سے کوئی زبردستی اندر نہ آ سکے۔ دوسروں کو اسلحے کی نوک پر حکم دیا گیا کہ وہ میناروں پر چڑھ کر نشانچیوں کو پانی، اسلحہ اور دوسرا سامان پہنچائیں۔ کمانڈر کے انداز سے صاف ظاہر ہوتا تھا کہ وہ لمبے مقابلے کی تیاری کر رہے ہیں۔

یہ کمانڈر 43 سالہ جہيمان تھے۔
سعودی نیشنل گارڈ کا آپریشن (الشرق الاوسط)

جہیمان بن محمد بن سيف العتيبی 1930 کی دہائی میں نجد کے علاقے میں پیدا ہوئے تھے۔ کہا جاتا ہے کہ وہ بچپن میں بہت بدمزاج تھے اور بہت رویا کرتے تھے اس لیے ان کا نام جہیمان رکھ دیا گیا جس کا مطلب ہے ’منہ بگاڑنے والا۔‘

جہیمان نے پرائمری ہی میں سکول چھوڑ دیا تھا اور اس کے بعد کبھی تعلیم مکمل نہ کر سکے۔ کچھ لوگوں کے مطابق انہیں لکھنا نہیں آتا تھا، بلکہ وہ کلاسیکی عربی بھی اچھی طرح نہیں جانتے تھے۔

انہوں نے نیم فوجی ادارے نیشنل گارڈ میں شمولیت اختیار کی اور 18 سال تک اس کے ملازم رہے۔ لیکن ان کے ذہن میں کچھ اور چل رہا تھا، اس لیے وہ نوکری چھوڑ کر مدینہ آئے جہاں اس وقت کئی مذہبی خیال پروان چڑھ رہے تھے۔

جہیمان کی مدینہ آمد سے چند سال قبل معروف شامی عالمِ دین محمد ناصر الدین البانی یونیورسٹی آف مدینہ میں حدیث کی تعلیم دیا کرتے تھے۔ ان کے نظریات سے متاثر ہو کر مدینہ کے نوجوانوں نے الجماعہ السلفیہ المحتسبہ (الجماعہ) نامی ایک تنظیم قائم کر لی۔
خانۂ کعبہ اسلام کا متبرک ترین مقام ہے (محمد مہدی کریم)

جہیمان کے ساتھیوں میں سے کئی ایسے تھے جنہوں نے خانۂ کعبہ میں تعلیم پائی تھی اور وہ اس کے چپے چپے سے واقف تھے، اس لیے انہیں پوری عمارت کو مکمل طور پر کنٹرول حاصل کرنے میں زیادہ وقت نہیں لگا۔ جہیمان نے میناروں پر نصب نشانچیوں کو حکم دے رکھا تھا کہ تمھیں دور دور تک جو بھی سپاہی نظر آئے، اسے بلاتامل گولی سے اڑا دو کیوں کہ وہ تمہیں قتل کرنے کے درپے ہے۔

وہاں عورتوں، بچوں اور بزرگوں کی بڑی تعداد موجود تھی۔ مسجد میں عربوں کے علاوہ دسیوں ہزار غیر ملکی بھی موجود تھے، جن کی اکثریت کو عربی نہیں آتی تھی۔ انہوں نے سرگوشیوں میں ایک دوسرے سے پوچھنا شروع کر دیا کہ یہاں کیا ہو رہا ہے۔

ان کی مشکل حل کرنے کے لیے باغیوں نے ایک پاکستانی کو اپنے درمیان شامل کر رکھا تھا۔ باغیوں نے پاکستانی اور ہندوستانی نمازیوں کو الگ کیا اور اس نے اردو میں پکار کر کہا، ’آرام سے بیٹھ جاؤ اور سنو۔‘

اسی دوران باغیوں نے چند دوسری زبانیں بولنے والے مترجم اکٹھے کر لیے تھے اور ان کی مدد سے انہوں نے نمازیوں کو اپنا پیغام سنانا شروع کر دیا۔

اس دوران قحطانی کے بڑے بھائی، جن کی عربی بہت فصیح تھی، انہوں نے مسجد کے مرکزی لاؤڈ سپیکر سے تقریر شروع کر دی۔

مکہ کے باسیوں کو پہلے تو سمجھ ہی نہیں آئی کہ خانۂ کعبہ میں ہوا کیا ہے۔ پولیس کے موقعے پر پہنچتے پہنچتے سورج طلوع ہو گیا تھا۔ ایک سو کے قریب سکیورٹی اہلکاروں نے مسجد کی طرف بڑھنے کی کوشش کی لیکن میناروں پر بیٹھے جنگجوؤں نے انہیں لمحوں کے اندر گولیوں سے اڑا دیا۔

اس کے بعد دوسرے سکیورٹی ادارے بھی وہاں پہنچ گئے۔ فوج کو بھی خبردار کر دیا گیا اور ان کے دستوں نے مکہ کی طرف سفر شروع کر دیا۔

سکیورٹی آپریشن کا ایک منظر (سکرین گریب)

الجماعہ کے نظریات سخت گیر تھے اور یہ اسلام کو اس کی ابتدائی اور بقول ان کے اصل شکل میں بحال کرنا چاہتے تھے۔ ان کے ساتھ شامل ہونے والوں کی بڑی تعداد بدوی نوجوانوں پر مشتمل تھی جن میں سے بہت سوں کو شکایت تھی کہ انہیں روزگار کے مواقع میسر نہیں آ رہے۔

ان کا خیال تھا کہ اندھیرے کمرے میں، جہاں سورج نظر آئے، روزہ کھولا جا سکتا ہے۔ یہ ہر طرح کی تصاویر کے خلاف تھے، یہاں تک کہ شناختی کارڈ اور پاسپورٹ بنوانے کو گناہ سمجھتے تھے۔ رفتہ رفتہ حالات یہاں تک پہنچے کہ انہوں نے ملبوسات کی دکانوں میں جا کر مجسمے توڑنا شروع کر دیے۔

انہوں نے مسجدِ نبوی کے قریب بیت الاخوان نامی ایک ہاسٹل قائم کیا۔ اس کی مسجد میں محراب نہیں تھی، کیوں کہ یہ محراب بنانے کو بھی بدعت گردانتے تھے۔ چونکہ ان کا خیال تھا کہ جوتے پہن کر نماز ادا کی جا سکتی ہے، اس لیے یہ شہر کی مسجدوں میں جوتوں سمیت گھس جاتے تھے۔

مدینہ والوں کو ان باتوں سے تشویش پیدا ہونے لگی۔ 1977 میں مدینہ کے بعض جید علما نے بیت الاخوان پہنچ کر انہیں قائل کرنے کی کوشش کی۔ مسجد کی چھت پر ہونے والی اس بحث کا یہ نتیجہ نکلا کہ کچھ لوگ تو قائل ہو کر الجماعہ کا ساتھ چھوڑ گئے مگر اکثریت زیادہ کٹر ہو کر جہیمان کے گرد اکٹھی ہو گئی۔

پولیس نے الجماعہ کے خلاف کریک ڈاؤن کر کے جہیمان کو ان کے ایک سو ساتھیوں سمیت گرفتار کر لیا۔ البتہ شیخ ابن باز نے ان سے پوچھ گچھ کرنے کے بعد فیصلہ کیا یہ لوگ بےضرر ہیں، انہیں چھوڑ دیا گیا۔

جیل میں قیام کے دوران جہیمان کی ملاقات محمد القحطانی سے ہوئی۔ اس ملاقات نے سب کچھ بدل کے رکھ دیا۔

جہیمان کے ساتھی (اے ایف پی)

اس وقت تک ریاض میں ہنگامی صورتِ حال کا آغاز ہو چکا تھا۔ شاہ خالد نے فوری طور پر مشیروں کو طلب کر لیا اور اس عجیب و غریب صورتِ حال سے نمٹنے کے طریقوں پر غور شروع ہو گیا۔ اسی اجلاس میں ہونے والے ایک فیصلے کے تحت سعودی عرب کی سرحدیں بند کر دی گئیں اور تمام ملک عملاً باقی دنیا سے کٹ کر رہ گیا۔

ادھر کعبہ کے اردگرد کا علاقہ خالی کروا لیا گیا، شہر کی بجلی اور ٹیلی فون لائنیں کاٹ دی گئیں اور پولیس اور فوج نے مورچے سنبھال لیے۔

ادھر قحطانی کے بڑے بھائی نے مرکزی لاؤڈ سپیکر سے تقریر کرنا شروع کر دی۔ مکہ کے باسیوں نے حیرت سے سنا کہ مہدی کا ظہور ہو چکا ہے اور آخرت کی گھڑی آ پہنچی ہے۔

کچھ نمازیوں نے مسجد کے ذیلی دروازوں اور کھڑکیوں سے نکلنے کی کوشش کی۔ باغیوں نے انہیں نہیں روکا، ویسے بھی یرغمال بنانے کے لیے ان کے پاس ہزاروں لوگ موجود تھے۔

امام السیبل نے اپنا خاکستری جبہ اتار کر پھینک دیا اور لوگوں کے مجمعے میں گھل مل گئے تاکہ انہیں پہچانا نہ جا سکے۔ اسی دوران انڈونیشیائی حاجیوں کا ایک گروہ کھڑکی سے نکلنے کی کوشش کر رہا تھا۔ امامِ کعبہ ان میں جا ملے۔ جنگجوؤں نے انہیں دیکھا، مگر روکنے کی کوشش نہیں، اور یوں امام وہاں سے صحیح سلامت نکلنے میں کامیاب ہو گئے۔

جوں جوں دن نکلتا جا رہا تھا، اس واقعے کی سنگینی کھل کر سامنے آ رہی تھی۔ ایک تو یہ معلوم نہیں تھا کہ باغیوں کی کل تعداد کتنی ہے، ان کے پاس کس قسم کا اسلحہ ہے، خوراک کتنی ہے، اور یہ کہ مسجد میں کتنے یرغمالی موجود ہیں۔

دوسرا بڑا مسئلہ یہ تھا کہ خانۂ کعبہ پر چڑھائی کرنا کوئی معمولی بات نہیں تھی۔ وہاں پودا تک اکھاڑنے کی اجازت نہیں تھی اور یہ ممانعت ایامِ جاہلیہ سے چلی آ رہی تھی۔ جنگجوؤں کے خلاف کسی قسم کی کارروائی سے قبل علما سے اجازت لینا ضروری تھا۔ حکمرانوں کو خدشہ تھا کہ اگر وہاں قتل و غارت ہوئی تو کہیں انہیں عوام اور مذہبی طبقے کے غیظ کا سامنا نہ کرنا پڑے۔

سپاہیوں کے ذہنوں میں غبار تھا۔ اگر وہ کعبہ پر قبضہ کرنے والوں سے لڑتے ہوئے مارے گئے تو اس کے بدلے انہیں جنت ملے گی، یا کعبے کا تقدس پامال کرنے کے عوض جہنم؟

آخر شاہ خالد شیخ عبدالعزیز بن باز سے ملے۔ شیخ کی عمر اس وقت 70 برس تھی اور وہ بینائی سے محروم ہو چکے تھے۔

شیخ مشکل میں تھے۔ ایک طرف تو وہ خود بعض کٹر نظریات کے حامل تھے۔ وہ سائنس کے خلاف تھے اور ان کا خیال تھا کہ زمین سورج کے گرد نہیں بلکہ سورج زمین کے گرد گردش کرتا ہے۔ ابھی چند ماہ قبل امریکی خلاباز چاند پر اترے تھے۔ شیخ اس کو بھی جھوٹ سمجھتے تھے۔

دوسری الجھن یہ تھی کہ جہیمان شیخ ابن باز کے شاگرد رہ چکے تھے اور ایک سال پہلے شیخ نے ہی ان کے بے ضرر ہونے کی گواہی دے کر انہیں جیل سے چھڑوایا تھا۔ امامِ کعبہ شیخ السبیل بھی باغیوں کے چنگل سے نکل کر آ گئے تھے اور علما کی کمیٹی میں شامل ہو گئے تھے۔ انہوں نے دوسرے علما کے ساتھ فتویٰ دے دیا۔ خانۂ کعبہ کو چھڑوانے کے لیے فوجی کارروائی جائز قرار پائی۔

خانۂ کعبہ پر قبضے کی خبر نے پوری مسلم دنیا کو ہلا کر رکھ دیا (پبلک ڈومین)

جہیمان کو 1978 میں احساس ہوا کہ اسلام میں مہدویت کے بارے میں جو بشارتیں موجود ہیں، القحطانی ان میں سے کئی پر پورا اترتے تھے۔

قحطانی کا اصل نام محمد تھا، والد کا نام عبداللہ، اور ان کا تعلق حجاز کے شمال میں واقع علاقے نجد سے تھا اور وہ پیغمبر اسلام کے خاندان سے تھے، یعنی سید تھے۔ مختلف روایتوں میں مہدی کی اسی قسم کی علامتیں بتائی گئی ہیں۔

1978 کے اواخر میں جہیمان نے دعویٰ کیا کہ انہیں خواب میں بشارت ہوئی ہے کہ مہدی کا ظہور ہو چکا ہے اور وہ مہدی محمد قحطانی ہیں۔ انہوں نے قحطانی کی بہن سے شادی بھی کر لی۔

جہیمان نے شہر چھوڑ کر صحرا کا رخ اختیار کیا اور وہاں سے کیسٹیں ریکارڈ کر کے اور پمفلٹ لکھ لکھ کر لوگوں کو بتانا شروع کر دیا کہ مہدی دنیا میں تشریف لا چکے ہیں۔

ان پمفلٹوں میں سعودی حکومت پر الزام لگایا گیا کہ وہ مذہب کو دنیاوی مقاصد کے حصول کے لیے استعمال کر رہی ہے اور اس نے جہاد کا خاتمہ کر دیا ہے اور وہ مغربی دنیا کی کاسہ لیس بن کر رہ گئی ہے۔

پمفلٹوں میں اپنے پیروکاروں کو حکم دیا گیا کہ وہ سرکاری اداروں سے دور رہیں، اگر ملازم ہیں تو استعفیٰ دے دیں، طلبہ ہیں تو سکول کالج چھوڑ دیں اور ان کے جھنڈے تلے اکٹھے ہو جائیں۔

جہیمان العتیبی (اے ایف پی)

فوجیوں نے گرین سگنل ملنے کے بعد مختلف حکمتِ عملیوں پر کام شروع کر دیا۔ تین طرف سے حملہ کیا لیکن جنگجوؤں کی عمدہ پوزیشن اور ڈسپلن کی وجہ سے بھاری نقصان اٹھا کر پسپا ہونے پر مجبور ہونا پڑا۔

اس کے بعد ہیلی کاپٹر سے فوجیوں کو مسجد کے اندر اتارنے کی کوشش کی لیکن جنگجوؤں نے انہیں چھت پر اترنے سے پہلے فضا ہی میں بھون ڈالا۔

اسی دوران کسی کو بن لادن گروپ کا خیال آیا۔ وہ چونکہ مسجد کی توسیع کا کام کر رہے تھے، اس لیے ان کے پاس تفصیلی نقشے موجود تھے۔ اسامہ بن لادن کے بڑے بھائی سالم بن لادن نے مسجد کے بارے میں معلومات فراہم کرنے میں اہم کردار ادا کیا۔

اب معاملے کی سنگینی کھل کر سامنے آئی۔ مسجد الحرام کے اندر طویل راہداریوں، دالانوں، صحنوں، تہہ خانوں اور سرنگوں کا جال بچھا ہوا تھا، اس لیے براہِ راست کارروائی سے ہزاروں لوگوں کے نقصان کا اندیشہ تھا اور کامیابی پھر بھی مشکل دکھائی دیتی تھی۔

ادھر جہیمان اور ان کے ساتھیوں کی جانب سے مسجد کے لاؤڈ سپیکروں سے تقریروں کا سلسلہ جاری تھا۔ اب انہوں نے اپنے مطالبات پیش کرنا شروع کر دیے تھے، جن کا لبِ لباب یہ تھا کہ مغربی ملکوں سے رابطے توڑ دیے جائیں، حکومت کا تختہ الٹ دیا جائے، امریکہ کو تیل کی فراہمی روک دی جائے، اور تمام غیر ملکیوں کو ملک سے نکال دیا جائے۔

چوتھے روز سکیورٹی فورس کے اہلکار مسجد کی کچھ دیواروں میں سوراخ کر کے اندر گھس گئے اور چند حصوں پر کنٹرول حاصل کر لیا لیکن یرغمالوں کی بڑی تعداد اب بھی جنگجوؤں کے قبضے میں تھی۔ باغی عورتیں اپنے مردہ ساتھیوں کے چہرے مسخ کر دیتی تھیں تاکہ ان کی شناخت نہ ہو سکے۔

اسی دوران مبینہ امام مہدی قحطانی بھی مارے گئے اور ان کی لاش اس حالت میں سکیورٹی حکام کے قبضے میں آ گئی کہ چہرہ سلامت رہ گیا تھا۔ اس سے بعض جنگجو سکتے میں آ گئے۔ اگر امام مہدی مارے گئے ہیں تو دنیا پر غلبہ کون پائے گا اور بقیہ بشارتیں کیسے پوری ہوں گی؟

البتہ جہیمان نے سر توڑ کوشش کی کہ قحطانی کی موت کی خبر کو کسی نہ کسی دبا دیا جائے۔

ادھر فوجی دماغ سر جوڑے بیٹھے تھے کہ باغیوں سے خانۂ خدا کو کس طرح آزاد کروایا جائے۔ کسی نے منصوبہ پیش کیا کہ سرنگوں میں پانی چھوڑ دیا جائے اور پھر اس پانی میں بجلی چھوڑ دی جائے۔

دلچسپ بات یہ ہے کہ پاکستان میں بہت سے لوگ سمجھتے ہیں کہ اس منصوبے پر عمل ہوا تھا اور اسی طریقے سے باغیوں پر قابو پایا گیا تھا لیکن حقیقت یہ ہے کہ یہ منصوبہ رد ہو گیا تھا کیوں کہ ایک تو مکہ میں اتنا پانی ہی نہیں تھا کہ دنیا کی سب سے بڑی مسجد کو بھر سکے، دوسرے اس میں یرغمالوں کی بڑے پیمانے پر ہلاکتوں کا اندیشہ تھا۔ سعودی سکیورٹی چیف ترکی الفیصل نے اس موقعے پر کہا تھا کہ ’کعبہ کو بھرنے کے لیے بحیرۂ احمر بھی ناکافی ہو گا۔‘

جب سعودی حکام عاجز آ گئے تو انہوں نے فیصلہ کیا کہ بیرونی مدد حاصل کی جائے۔ اس وقت امریکی سی آئی اے کے کمانڈو سعودی سپاہیوں کو تربیت دے رہے تھے، لیکن صورتِ حال کی نزاکت کے پیشِ نظر فیصلہ کیا گیا کہ اس موقعے پر امریکہ کے ملوث ہونے کے سیاسی اثرات پڑیں گے، اس لیے نگاہِ انتخاب نسبتاً نیوٹرل ملک فرانس پر پڑی۔

اس وقت فرانسیسی سیکرٹ سروس کے سربراہ کاؤنٹ کلاود الیکساندر دے مارینشے تھے۔ فرانسیسی حکومت کے ذریعے ان سے رابطہ کیا گیا تو انہوں نے تجویز پیش کی کہ کعبہ کے اندر گیس چھوڑ دی جائے جس سے باغی بےہوش ہو جائیں۔

اس مقصد کی خاطر فرانسیسی خفیہ ادارے جی آئی جی این کے تین کمانڈوز کو ہنگامی بنیادوں پر سعودی عرب روانہ کیا گیا۔ لیکن یہاں ایک مسئلہ درپیش تھا کہ سعودی قانون کی رو سے حجاز کی حدود میں کوئی غیر مسلم داخل نہیں ہو سکتا۔ چنانچہ پہلے ان تینوں کو عارضی طور پر کلمہ پڑھایا، اور پھر مکہ پہنچا دیا گیا۔

انہوں نے اپنا کام فوراً شروع کر دیا۔ لیکن مسئلہ یہ تھا کہ مسجد اتنی بڑی تھی اور اس کے بہت سے حصے کھلے تھے اس لیے گیس کا خاطر خواہ اثر نہیں ہوا۔ لیکن اسی دوران سعودی حکام نے دوسرا آپریشن شروع کر رکھا تھا۔ ماسک پہنے ہوئے سپاہیوں نے مسجد کی دیوار میں سوراخ کر لیے اور وہاں سے اندر گرینیڈ پھینکنا شروع کر دیے، جس سے بہت سے یرغمالی بھی ہلاک ہو گئے۔
آخری آپریشن جس میں اہلکاروں نے گیس ماسک استعمال کیے (پبلک ڈومین)

اس وقت محاصرے کو 14 دن گزر چکے تھے۔ باغیوں کا اسلحہ، خوراک اور ہمت ختم ہو چکے تھے، اس لیے بچے کھچے باغیوں نے چار دسمبر کو اپنے آپ کو حکام کے حوالے کر دیا۔ ان میں جہیمان بھی شامل تھے جن کی ابتر حالت ان کی تصاویر میں دیکھی جا سکتی ہے۔

سعودی انٹیلی جنس کے سربراہ شہزادہ ترکی الفیصل انہیں دیکھنے ہسپتال گئے تو انہوں شہزادے کا ہاتھ تھام لیا، ’شاہ خالد سے کہو مجھے معاف کر دیں، میں آئندہ ایسا کوئی کام نہیں کروں گا۔‘

تاہم ان کی یہ درخواست قبول نہیں ہوئی، اور اگلے چند دنوں میں جہیمان کو ان کے 62 ساتھیوں سمیت سرِ عام سزائے موت دے دی گئی اور یوں اس واقعے کا خاتمہ ہوا۔

اس واقعے میں کتنی ہلاکتیں ہوئیں، یہ تعداد متنازع ہے۔ حکومت کا کہنا تھا کہ اس کے 127 اہلکار مارے گئے ہیں، ایک درجن کے قریب نمازی، تاہم غیر سرکاری تعداد چار ہزار کے قریب بتائی گئی۔

اس کے بعد حکام نے جو کریک ڈاؤن کیا، اس میں صحرا کی طرف سے آنے والی ایک گاڑی بھی پکڑی گئی جس میں ایک 22 سالہ نوجوان موجود تھا۔ اسے الجمعاعہ کا کارکن ہونے کے شبے میں بند کر دیا گیا، لیکن اس نے پوچھ گچھ کے دوران کعبہ کے محاصرہ سے مکمل لاعلمی ظاہر کی۔

اس نوجوان کا نام اسامہ بن لادن تھا۔

بعد میں اسامہ بن لادن نے بھی سعودی حکومت کے خلاف بغاوت کی اور ان کے الزامات جہیمان کی تحریک کے عائد کردہ الزامات سے بہت ملتے جلتے تھے۔ 1985 میں انہوں نے پشاور میں گفتگو کرتے ہوئے کہا تھا کہ جہیمان بالکل ٹھیک تھا۔

پاکستانی کنیکشن

پاکستان میں اس خبر پر دہشت، سکتے، غم اور غصے کا ملا جلا ردِ عمل دیکھنے میں آیا۔ کعبے میں خون خرابہ اور اس پر باغیوں کے قبضے کی خبر انہیں کسی طریقے سے ہضم نہیں ہو رہی تھی۔

اگلے دن کے اخباروں میں جو خبریں چھپیں ان میں اس واقعے کو بڑی حد تک امریکی سازش قرار دیا گیا اور اداریوں میں اظہارِ خیال کیا گیا کہ امریکہ اپنی فوج بھیج کر کعبے پر قبضہ چھڑوائے گا اور اس بہانے خلیج پر قابض ہو جائے گا۔

ملک بھر میں اس واقعے کے خلاف ہڑتال کی گئی اور جلوس نکالے گئے۔ اسلام آباد میں امریکی سفارت خانے کو نذرِ آتش کر دیا گیا، جس میں دو امریکی اہلکار اور دو پاکستانی مارے گئے۔ مظاہرین سے مشنری سکول، امریکن ایکسپریس کے دفتر اور برٹش کونسل لائبریری بھی نہیں بچ سکے۔ بعد میں بنگلہ دیش، بھارت اور کویت میں بھی اسی قسم کی مظاہروں اور تشدد کی خبریں آئیں۔

اس کے بعد وقتاً فوقتاً ایسی اطلاعات بھی آتی رہی ہیں کہ پاکستانی کمانڈوز نے آپریشن میں حصہ لیا تھا، جن میں پرویز مشرف بھی شامل تھے۔ 2016 میں ایک نجی چینل کے اینکر جاوید چودھری کے پروگرام میں پاکستانی سیاست دان خورشید محمود قصوری نے بھی اسی قسم کا دعویٰ کیا کہ ’میجر پرویز مشرف نے کعبہ سے دہشت گردوں کو فلش آؤٹ کیا۔‘ لیکن اسی پروگرام میں بریگیڈیئر جاوید حسین نے فون کر کے کہا کہ یہ بات بالکل غلط ہے اور پاکستانی کمانڈوز اس کارروائی میں شامل نہیں تھے۔

اور ویسے بھی اگر پرویز مشرف نے اس کارروائی میں حصہ لیا ہوتا تو وہ اس کا ذکر اپنی آپ بیتی ’ان دا لائن آف فائر‘ میں ضرور کرتے۔

11/08/2019

May Allah Almighty showers His countless blessings upon all of you and your families regards: Malik M. Rashid Majeed