Syed Zulqarnain Haider Kazmi

محسن نقوی کی اس شاندار نظم

موجِ ادراک

یہ دشت، یہ دریا، یہ مہکتے ہوئے گلزار
اِس عالمِ امکاں میں ابھی کچھ بھی نہیں تھا
اِک ”جلوہ“ تھا، سو گُم تھا حجاباتِ عدم میں
اِک ”عکس“ تھا، سو منتظرِ چشمِ یقیں تھا

یہ موسمِ خوشبو، یہ گہر تابیِ شبنم
یہ رونقِ ہنگامۂ کونین کہاں تھی؟
گلنار گھٹاؤں سے یہ چھنتی ہوئی چھاؤں
یہ دھوپ، دھنک، دولتِ دارین کہاں تھی؟

یہ نکہتِ احساس کی مقروض ہوائیں
دلدارئ الہام سے مہکے ہوئے لمحات
دوشیزۂ انفاس کی تسبیح کے تیوَر
کس کنجِ تصور میں تھے مصروفِ مناجات؟

”شیرازۂ آئینِ قِدَم“ کے سبھی اِعراب
بے رَبطئ اجزائے سوالات میں گم تھے
یہ رنگ، یہ نیرنگ، یہ اورنگ، یہ سب رنگ
اِک پردۂ افکار و خیالات میں گُم تھے!

یہ پھول، یہ کلیاں، یہ چٹکے ہوئے غنچے
بے آب و ہَوا، تشنۂ آیات و مناجات
یہ برگ، یہ برکھا، یہ لچکتی ہوئی شاخیں
بیگانۂ آدابِ سحر، بے نمِ جذبات

کہسار کے جھرنوں سے پھسلتی ہوئی کرنیں
اِک خوابِ مسلسل کے تحیر میں نہاں تھیں!
چپ چاپ فضاؤں میں مچلتی ہوئی لہریں
ماحول کے بے نطق تصور پہ گراں تھیں

غم خانۂ ظلمت، نہ کوئی بزمِ چراغاں
خورشید نہ مہتاب، نہ انجم نہ کواکب
شورش گہِ ”کُن“ تھی نہ یہ آوازِ دما دم
تفریقِ مَن و تُو نہ مساوات و مراتب

ہنگامۂ شادی نہ کوئی مجلسِ ماتم!
یلغارِ حریفاں نہ جلوسِ غمِ یاراں
آنکھوں میں کوئی زخم نہ سینے میں کوئی چاک
انبوہِ رقیباں نہ رُخِ لالہ عذاراں

اَفلاس کا احساس نہ پندارِ زَر و سیم
بخشش کے تقاضے نہ یہ دریوزہ گری تھی
پتھر کا زمانہ تھا نہ شیشے کے مکاں تھے
یہ عقل کا دستور نہ شوریدہ سری تھی

مقتول کی فریاد نہ آوازۂ قاتل
مقتل تھے نہ شہ رگ میں لہو تھا، نہ ہوس تھی
دربار، نہ لشکر، نہ کوئی عدل کی زنجیر
دل تھا، نہ کہیں تیرگیِ کنجِ قفس تھی

رہبر تھے، نہ منزل تھی، نہ رستے، نہ مسافر!
قندیل، نہ جگنو، نہ ستارے، نہ گہر تھے
یہ اَبیض و اَسود، نہ اَبّ و جَد، نہ زَر و سیم
اِنساں تھے نہ حیواں، نہ حَجر تھے، نہ شجر تھے

ہر سمت مسلط تھے تحیر کے طلسمات!
جیسے کسی مدفن میں ہو صدیوں کا کوئی راز
جس طرح کسی اجڑے ہوئے شہر کے سائے
یا موت کی ہچکی میں پگھلتی ہوئی آواز

جیسے کسی گھر میں صَفِ ماتم کی خموشی
یا دشت و بیاباں میں نزولِ شبِ آفات
جیسے کسی کہسار پہ تنہا کوئی خیمہ!
یا شامِ غریباں کے تصرف میں سمٰوات

ہَولے سے سرکنے لگے ہستی کے حجابات
دھیرے سے ڈھلکنے لگا تخلیق کا آنچل
چھَن چھَن کے بکھرنے لگا، ”شیرازۂ کُن۔کُن“
رِم جھم سے برسنے لگے احساس کے بادل

پلکیں سی جھپکنے لگی دوشیزۂ کونین!
ہلچل سی ہوئی پیکرِ عالم کی رگوں میں
آفاق کے سینے میں دھڑکنے لگیں کرنیں
”شیرازہ کُن“ ڈھل بھی گیا تھا فیکوں میں

ہر سمت بکھرنے لگیں وجدان کی کرنیں
کِرنوں سے کھِلے رنگ تو رنگوں سے گلستاں
بیدار ہوئی خواب سے خوشبوئے رگِ گُل
خوشبو سے مہکنے لگا دامانِ بیاباں،

دامانِ بیاباں میں نہاں سینۂ برفاب
برفاب کے سینے میں تلاطم بھی شرر بھی
اعجازِ لبِ کُن سے ہوئے خلق بیک وقت
صحرا بھی، سمندر بھی، کہستاں بھی، شجر بھی

پھر حدّتِ تخلیق کی شدت سے پگھل کر
جاگے کئی طوفان، تہہِ سینۂ برفاب
ہر موج تھی پروردۂ آغوشِ تلاطم!
ہر قطرہ کا دل، صورتِ بے خوابیِ سیماب

شانوں پہ اٹھائے ہوئے بارِ کفِ سیلاب
بے سمت بھٹکنے لگیں منہ زور ہوائیں
منہ زور ہواؤں کے تھپیڑوں کی دھمک سے
دل بن کے دھڑکنے لگیں بے رنگ فضائیں

بے رنگ فضاؤں کے تحیر کی کسک میں
پنہاں تھے شب و روز سے آلود زمانے
بے اَنت زمانوں کے افق تھے نہ حدیں تھیں
آخر دیا ترتیب انہیں دستِ قضا نے

پھر چشمِ تحیر نے یہ سوچا کہ فضا میں
شادابئ گلزارِ طرب، کس کے لیے ہے؟
یہ کون ہُوا باعثِ تخلیقِ دو عالم!
یہ ارض و سما کیوں ہیں، یہ سب کس کے لیے ہے

تزئینِ مہ و انجمِ افلاک کا باعث
ہے کون؟ جو خلوت کے حجابوں میں چُھپا ہے؟
تخلیقِ رگ و ریشۂ کونین کا مقصد!
ہے کیا؟ جو سرِ لوحِ شب روز لکھا ہے؟

ہے کس کے لیے عشوۂ بلقیسِ تصوّر
یہ غمزۂ رخسارِ جہاں کس کے لیے ہے؟
آرائشِ خال و خدِ ہستی کا سبب کون؟
یہ انجمنِ کون و مکاں کس کے لیے ہے؟

پھر ریشمِ انوار کا ملبوس پہن کر
ظاہر ہوا اِک پیکرِ صد رنگ بصد ناز
نکھرے کئی بکھرے ہوئے رنگوں کے مناظر
فطرت کی تَجلّی ہوئی آمادۂ اعجاز

وہ پیکرِ تقدیس، وہ سرمایۂ تخلیق
وہ قبلۂ جاں، مقصدِ تخلیقِ دو عالم
وجدان کا معیار، مہ و مہر کا محور
وہ قافلہ سالارِ مزاجِ بنی آدم

وہ منزلِ اربابِ نظر، فکر کی تجسیم
وہ کعبۂ تقدیرِ دو عالم، رخِ احساس
وہ بزمِ شب و روز کا سلطانِ معظّم
وہ رونقِ رخسارۂ فیروزہ و الماس

وہ شعلگئِ شمعِ حرم، تابشِ خورشید
وہ آئینہِ حُسنِ رُخِ ارض و سماوات
وہ جس سے رواں موجِ تبسم کی سبیلیں
وہ جس کے تکلم کی دھنک چشمۂ آیات

وہ جس کا ثنا خواں دلِ فطرت کا تکلم!
ہستی کے مناظر، خمِ ابرو کے اشارے
آفاق ہیں دامن کی صباحت پہ تصدق
قدموں کے نشاں ڈھونڈتے پھرتے ہیں ستارے

اُس رحمتِ عالم کا قصیدہ کہوں کیسے؟
جو مہرِ عنایات بھی ہو، ابرِ کرم بھی
کیا اُس کے لیے نذر کروں، جس کی ثنا میں
سجدے میں الفاظ بھی، سطریں بھی، قلم بھی!

چہرہ ہے کہ انوارِ دو عالم کا صحیفہ
آنکھیں ہیں کہ بحرینِ تقدس کے نگیں ہیں
ماتھا ہے کہ وحدت کی تجلی کا ورق ہے
عارِض ہیں کہ ”والفجر“ کی آیات کے اَمیں ہیں

گیسو ہیں کہ ”وَاللَّیل“ کے بکھرے ہوئے سائے
ابرو ہیں کہ قوسینِ شبِ قدر کھُلے ہیں
گردن ہے کہ بَر فرقِ زمیں اَوجِ ثریا
لب، صورتِ یاقوت شعاعوں میں دُھلے ہیں

قَد ہے کہ نبوت کے خد و خال کا معیار
بازو ہیں کہ توحید کی عظمت کے عَلَم ہیں
سینہ ہے کہ رمزِ دلِ ہستی کا خزینہ
پلکیں ہیں کہ الفاظِ رُخِ لوح و قلم ہیں

باتیں ہیں کہ طُوبیٰ کی چٹکتی ہوئی کلیاں
لہجہ ہے کہ یزداں کی زباں بول رہی ہے
خطبے ہیں کہ ساون کے امنڈتے ہوئے دریا
قِرأت ہے کہ اسرارِ جہاں کھول رہی ہے

یہ دانت، یہ شیرازۂ شبنم کے تراشے
یاقوت کی وادی میں دمکتے ہوئے ہیرے
شرمندۂ تابِ لب و دندانِ پیمبرﷺ
حرفے بہ ثنا خوانی و خامہ بہ صریرے

یہ موجِ تبسم ہے کہ رنگوں کی دھنک ہے
یہ عکسِ متانت ہے کہ ٹھہرا ہوا موسم
یہ شکر کے سجدے ہیں کہ آیات کی تنزیل
یہ آنکھ میں آنسو ہیں کہ الہام کی رِم جھم

یہ ہاتھ یہ کونین کی تقدیر کے اوراق
یہ خط، یہ خد و خالِ رُخِ مصحف و انجیل
یہ پاؤں یہ مہتاب کی کرنوں کے مَعابِد
یہ نقشِ قدم، بوسہ گہِ رَف رَف و جبریل

یہ رفعتِ دستار ہے یا اوجِ تخیل!
یہ بندِ قبا ہے کہ شگفتِ گُلِ ناہید
یہ سایۂ داماں ہے کہ پھیلا ہوا بادل
یہ صبحِ گریباں ہے کہ خمیازۂ خورشید

یہ دوش پہ چادر ہے کہ بخشش کی گھٹا ہے
یہ مہرِ نبوت ہے کہ نقشِ دلِ مہتاب
رخسار کی ضَو ہے کہ نمو صبحِ ازل کی
آنکھوں کی ملاحت ہے کہ روئے شبِ کم خواب

ہر نقشِ بدن اتنا مناسب ہے کہ جیسے
تزئینِ شب و روز کہ تمثیلِ مہ و سال
ملبوسِ کہن یوں شکن آلود ہے جیسے
ترتیب سے پہلے رُخِ ہستی کے خد و خال

رفتار میں افلاک کی گردش کا تصور
کردار میں شامل بنی ہاشم کی اَنا ہے
گفتار میں قرآں کی صداقت کا تیقُّن
معیار میں گردُوں کی بلندی کفِ پا ہے

وہ فکر کہ خود عقلِ بشر سَر بگریباں
وہ فقر کہ ٹھوکر میں ہے دنیا کی بلندی
وہ شکر کہ خالق بھی ترے شکر کا ممنون
وہ حُسن کہ یوسفؑ بھی کرے آئینہ بندی

وہ علم کہ قرآں تِری عِترت کا قصیدہ
وہ حِلم کہ دشمن کو بھی امیدِ کرم ہے
وہ صبر کہ شبیرؑ تری شاخِ ثمردار
وہ ضبط کہ جس ضبط میں عرفانِ اُمُم ہے

”اورنگِ سلیماں“ تری نعلین کا خاکہ
”اعجازِ مسیحا“ تری بکھری ہوئی خوشبو
”حُسنِ یدِ بیضا“ تری دہلیز کی خیرات
کونین کی سج دھج تری آرائشِ گیسو

سَر چشمۂ کوثر ترے سینے کا پسینہ
سایہ تری دیوار کا معیارِ اِرَم ہے
ذرے تری گلیوں کے مہ و انجمِ افلاک
”سورج“ ترے رہوار کا اک نقشِ قدم ہے

دنیا کے سلاطیں ترے جارُوب کشوں میں
عالم کے سکندر تری چوکھٹ کے بھکاری
گردُوں کی بلندی، تری پاپوش کی پستی
جبریلؑ کے شہپر ترے بچوں کی سواری

دھرتی کے ذوِی العدل، تِرے حاشیہ بردار
فردوس کی حوریں، تِری بیٹی کی کنیزیں
کوثر ہو، گلستانِ ارم ہو کہ وہ طُوبیٰ
لگتی ہیں ترے شہر کی بکھری ہوئی چیزیں

ظاہر ہو تو ہر برگِ گُلِ تَر تِری خوشبو
غائب ہو تو دنیا کو سراپا نہیں ملتا
وہ اسم، کہ جس اسم کو لب چوم لیں ہر بار
وہ جسم کہ سورج کو بھی سایہ نہیں ملتا

احساس کے شعلوں میں پگھلتا ہوا سورج
انفاس کی شبنم میں ٹھٹھرتی ہوئی خوشبو
الہام کی بارش میں یہ بھیگے ہوئے الفاظ
اندازِ نگارش میں یہ حُسن رمِ آہو!

حیدرؑ تری ہیبت ہے تو حسنینؑ ترا حُسن
اصحاب؟ وفادار تو نائب ترے معصوم
سلمٰیؑ تری عصمت ہے، خدیجہؑ تری توقیر
زہراؑ تری قسمت ہے تو زینبؑ ترا مقسوم

کس رنگ سے ترتیب تجھے دیجیے مولا؟
تنویر کہ تصویر، تصور کہ مصور؟
کس نام سے امداد طلب کیجیے تجھ سے
یٰسین کہ طہٰ کہ مزمل کہ مدثر؟

پیدا تری خاطر ہوئے اطرافِ دو عالم
کونین کی وسعت کا فسوں تیرے لیے ہے
ہر بحر کی موجوں میں تلاطم تری خاطر
ہر جھیل کے سینے میں سکوں تیرے لیے ہے

ہر پھول کی خوشبو ترے دامن سے ہے منسوب
ہر خار میں چاہت کی کھٹک تیرے لیے ہے
ہر دشت و بیاباں کی خموشی میں ترا راز
ہر شاخ میں زلفوں سی لٹک تیرے لیے ہے

”دن“ تیری صباحت ہے تو شب تیری علامت
گُل تیرا تبسم ہے، ستارے ترے آنسو!
آغازِ بہاراں تری انگڑائی کی تصویر
دِلدارئ باراں ترے بھیگے ہوئے گیسو

کہسار کے جھرنے، ترے ماتھے کی شعاعیں
یہ قوسِ قزح، عارضِ رنگیں کی شکن ہے
یہ ”کاہکشاں“ دھول ہے نقشِ کفِ پا کی
ثقلین ترا صدقۂ انوارِ بدن ہے

ہر شہر کی رونق ترے رستے کی جمی دھول
ہر بَن کی اداسی، تری آہٹ کی تھکن ہے
جنگل کی فَضا تیری متانت کی علامت
بستی کی پھبن تیرے تبسم کی کِرن ہے

میداں ترے بُوذر کی حکومت کے مضافات
کہسار ترے قنبر و سلماں کے بسیرے
صحرا، ترے حبشی کی محبت کے مصلّے!
گلزار ترے میثم و مِقداد کے ڈیرے

کیا ذہن میں آئے کہ تو اترا تھا کہاں سے؟
کیا کوئی بتائے تری سرحد ہے کہاں تک؟
پہنچی ہے جہاں پر تری نعلین کی مٹی
خاکسترِ جبریل بھی پہنچے نہ وہاں تک

سوچیں تو خدائی تری مرہونِ تصور
دیکھیں تو خدائی سے ہر انداز جدا ہے
یہ کام بشر کا ہے نہ جبریلؑ کے بس میں
تو خود ہی بتا اے مرے مولاﷺ کہ تو کیا ہے؟

کہنے کو تو ملبوسِ بشر اوڑھ کے آیا
لیکن ترے احکام فلک پر بھی چلے ہیں
انگلی کا اشارہ تھا کہ تقدیر کی ضَربت
مہتاب کے ٹکڑے تری جھولی میں گِرے ہیں

کہنے کو تو بستر بھی میسر نہ تھا تجھ کو
لیکن تری دہلیز پہ اترے ہیں ستارے
انبوہِ ملائک نے ہمیشہ تری خاطر
پلکوں سے ترے شہر کے رَستے بھی سنوارے

کہنے کو تو اُمّی تھا لقب دہر میں تیرا
لیکن تو معارِف کا گلستاں نظر آیا
اک تُو ہی نہیں صاحبِ آیاتِ سماوات
ہر فرد ترا وارثِ قرآں نظر آیا

کہنے کو تو فاقوں پہ بھی گزریں تری راتیں
اسلام مگر اب بھی نمک خوار ہے تیرا
تُو نے ہی سکھائی ہے تمیزِ من و یزداں
انسان کی گردن پہ سدا بار ہے تیرا

کہنے کو ترے سر پہ ہے دستارِ یتیمی
لیکن تو زمانے کے یتیموں کا سہارا
کہنے کو ترا فقر ترے فخر کا باعث
لیکن تُو سخاوت کے سمندر کا کنارا

کہنے کو تو ہجرت بھی گوارا تجھے لیکن
عالم کا دھڑکتا ہوا دل تیرا مکاں ہے
کہنے کو تو مَسکن تھا ترا دشت میں لیکن
ہر ذرہ تری بخششِ پیہم کا نشاں ہے

کہنے کو تو اک ”غارِ حرا“ میں تیری مسند
لیکن یہ فلک بھی تری نظروں میں ”کفِ خاک“
کہنے کو تو ”خاموش“ مگر جنبشِ لب سے
دامانِ عرب گرد، گریبانِ عجم چاک

اے فکرِ مکمل، رُخِ فطرت، لبِ عالم
اے ہادئ کُل، ختم رُسل، رحمتِ پیہم
اے واقفِ معراجِ بشر، وارثِ کونین
اے مقصدِ تخلیقِ زماں، حُسنِ مجسم

نسلِ بنی آدم کے حسیں قافلہ سالار
انبوہِ ملائک کے لیے ظلِّ الٰہی!
پیغمبرِ فردوسِ بریں، ساقیِ کوثر
اے منزلِ ادراک، دِل و دیدہ پناہی

اے باعثِ آئینِ شب و روزِ خلائق
اے حلقۂ ارواحِ مقدس کے پیمبرﷺ
اے تاجوَرِ بزمِ شریعت، مرے آقا
اے عارفِ معراجِ بشر، صاحبِ منبر

اے سیّد و سَرخیل و سر افراز و سخن ساز
اے صادق و سجّاد و سخی، صاحبِ اسرار
اے فکرِ جہاں زیب و جہاں گیر و جہاں تاب
اے فقرِ جہاں سوز و جہاں ساز و جہاں دار

اے صابر و صنّاع و صمیمِ وصفِ اوصاف
اے سرورِ کونین و سمیعِ یمِ اصوات
میزانِ اَنا، مکتبِ پندارِ تیقُّن!
اعزازِ خودی، مصدرِ صد رُشد و ہدایات

اے شاکر و مشکور و شکیلِ شبِ عالم
اے ناصر و منصور و نصیرِ دلِ انسان
اے شاہد و مشہود و شہیدِ رُخِ توحید،
اے ناظر و منظور و نظیرِ لبِ یزداں

اے یوسفؑ و یعقوبؑ کی اُمّید کا محور
اے بابِ مناجاتِ دلِ یونسؑ و ادریسؑ
اے نُوحؑ کی کشتی کے لیے ساحلِ تسکیں
اے قبلۂ حاجاتِ سلیماںؑ شہِ بلقیس

اے والئِ یثرب مری فریاد بھی سُن لے!
اے وارثِ کونین میں لَب کھول رہا ہوں
زخمی ہے زباں، خامۂ دل خون میں تر ہے
شاعر ہوں مگر دیکھ مَیں سچ بول رہا ہوں

تُو نے تو مجھے اپنے معارف سے نوازا
لیکن میں ابھی خود سے شناسا بھی نہیں ہوں
تُو نے تو عطا کی تھی مجھے دولتِ عِرفاں
لیکن میں جہالت کے اندھیروں میں گھِرا ہوں

بخشش کا سمندر تھا ترا لطف و کرم بھی
لیکن میں تیرا لطف و کرم بھول چکا ہوں
بکھری ہے کچھ ایسے شبِ تیرہ کی سیاہی
میں شعلگیِ شمعِ حرم بھول چکا ہوں

تُو نے تو مجھے کفر کی پستی سے نکالا
میں پھر بھی رہا قامتِ الحاد کا پابند
تُو نے تو مرے زخم کو شبنم کی زباں دی
میں پھر بھی تڑپتا ہی رہا صورتِ اَسپند

تُو نے تو مجھے نکتۂ شیریں بھی بتایا
میں پھر بھی رہا معتقدِ تلخ کلامی
تُو نے تو مرا داغِ جبیں دھو بھی دیا تھا
میں پھر بھی رہا صید و ثنا خوانِ غلامی

تُو نے تو مسلط کیا افلاک پہ مجھ کو
میں پھر بھی رہا خاک کے ذرّوں کا پجاری
تُو نے تو ستارے بھی نچھاور کیے مجھ پر
میں پھر بھی رہا تیرگئ شب کا شکاری

تُو نے تو مجھے درسِ مساوات دیا تھا
میں پھر بھی مَن و تُو کے مراحل میں رہا ہوں
تُو نے تو جدا کر کے دکھایا حق و باطل
میں پھر بھی تمیزِ حق و باطل میں رہا ہوں

تُو نے تو کہا تھا کہ زمیں سب کے لیے ہے
میں نے کئی خطوں میں اسے بانٹ دیا ہے
تُو نے جسے ٹھوکر کے بھی قابل نہیں سمجھا
میں نے اُسی کنکر کو گہر مان لیا ہے

تُو نے تو کہا تھا کہ زمانے کا خداوند
انساں کے خیالوں میں کبھی آ نہیں سکتا
لیکن میں جہالت کے سبب صرف یہ سمجھا
وہ کیسا خدا؟ جس کو بشر پا نہیں سکتا

تُو نے تو کہا تھا کہ وہ اونچا ہے خِرد سے
مَیں نے یہی چاہا اتر آئے وہ خِرد میں
تو نے تو کہا تھا ”اَحد“ ہے وہ اَزل سے
میں نے اُسے ڈھونڈا ہے سدا ”حِسّ و عدد“ میں

اب یہ ہے کہ دنیا ہے مری تیرہ و تاریک
سایۂ غمِ دوراں کا محیطِ دل و جاں ہے
ہر لمحہ اداسی کے تصرف میں ہے احساس
تا حدِ نظر خوفِ مسلسل کا دھواں ہے

صحرائے غم و یاس میں پھیلی ہے کڑی دھوپ
کچھ لمسِ کفِ موجِ صبا تک نہیں ملتا
بے اَنت سرابوں میں کہاں جادۂ منزل؟
اپنا ہی نشانِ کفِ پا تک نہیں ملتا

اَعصاب شکستہ ہیں تو چھلنی ہیں نگاہیں
احساسِ بہاراں، نہ غمِ فصلِ خزاں ہے
آندھی کی ہتھیلی پہ ہے جگنو کی طرح دل
شعلوں کے تصرف میں رگِ غنچۂ جاں ہے

ہر سمت ہے رنج و غم و آلام کی بارش
سینے میں ہر اک سانس بھی نیزے کی اَنی ہے
اب آنکھ کا آئینہ سنبھالوں میں کہاں تک
جو اشک بھی بہتا ہے وہ ہیرے کی کنی ہے

احباب بھی اعداء کی طرح تیر بکف ہیں،
اب موت بھٹکتی ہے صفِ چارہ گراں میں
سنسان ہے مقتل کی طرح شہرِ تصور
سہمی ہوئی رہتی ہے فغاں، خیمۂ جاں میں

شاعر: محسن نقوی
کتاب: موجِ ادراک

For Home Tuition
Contact me

یکم محرم الحرام 1442ھ

خلاصہ مجلسِ عزاء (اول)
استادِ محترم سید جواد نقوی
جامعہ العروہ الوثقیٰ لاہور


چند سالوں سے ہمیں قیامِ مقدس کو امام کے خطبات و کلمات کی روشنی میں تفسیر کرنے کی توفیق ملی ہے۔
کربلا کی صحیح تفسیر امام حسین کے علاوہ کوئی نہیں کر سکتا۔
کربلا کے بارے میں بہت کچھ لکھا اور کہا گیا ہے ۔ مومنین کے ذہنوں میں قیام حسین سے متعلق جو پہلو ہیں وہ سننے کی وجہ سے بنے ہیں نا کہ تحقیق سے۔ لہٰذا ہم اپنے ذہنوں میں موجود تصویر کا امام کے کلمات سے موازنہ کریں ۔


حقیقتِ کربلا و تفسیرِ کربلا ہر نسلِ بشر کےلیے ضروری ہے۔ اس داستان میں فقط ثواب نہیں ہے۔ ثواب مسلم ہے۔ ثواب کے لیے اللہ تعالٰی نے بہت سے دیگر ذریعے بنائے ہیں۔
ذکرِ سید الشہداء و شہدائے کربلا کو احیاء کرنے کا مقصد جس کے پیشِ نظر ان مجالس کو جاری رکھنے کاحکم ہوا ہے وہ یہ ہے کہ اس کی حقیقت کو سمجھنا ہر نسل کے دور و زمانے کی ضرورت ہے۔ کربلا سے ہی ہر نسلِ بشری اپنا بھرم باقی رکھ سکتی ہے۔
اس کے بغیر رسوائی کا سامنا کرنا پڑے گا۔ جیسا کہ کر رہے ہیں۔
جو آج مسلمانوں کے ساتھ ہو رہا ہے۔ عرب ہوں یا غیر عرب ہوں۔
ہم اپنی سرزمین کو دیکھ لیں کہ جس میں لوگوں کی حالت دیکھیں تو شاید سب سے زیادہ عبرت ناک ہے۔
اس محرومی سے نکلنے کےلیے بعض اوقات صاحبانِ دانش و بصیرت متوجہ ہوتے ہے اور ایسے شعار پیش کرتے ہیں کہ ذلت و حقارت ناقابلِ قبول ہے۔ لیکن عملاً اس سے نکلنے کا کوئی منشور نہیں ہے۔
واحد منشور مکتبِ کربلا و قیامِ حسین ہے جو انسان کو عزت دے سکتا ہے اور ذلت سے دور کر سکتا ہے۔
کربلا کو سمجھنا اس لیے ضروری ہے کہ ہم کربلا سے یہ سبق سیکھیں کہ کس طرح ہم نے اپنے دور میں نجات پانی ہیں۔
ہم نے رسومات کا راستہ اپنا لیا ہے کہ جس کے بعد ہم خود کو تسلی دے لیتے ہیں۔ مگر حقیقت میں ہمارے زندگی رسومات سے پہلے بھی ذلت و حقارت اور غلامی کی ہے بعد میں بھی۔

ہمیں یہ سبق کون پڑھائے؟
اس کے معلم خود امام حسین ع ہیں۔
مومنین ان اہم موضوعات کو سمجھیں۔

اگر امام حسین ع کے قیام کو مناسب ترین عنوان دیا جاائے تو کیا بنتا ہے؟
ایسا عنوان جس میں حقیقت کی عکاسی ہو ۔ وہ عنوان جو دیگر علماء نے بھی ذکر کیا ہے۔ اور جو میری نظر میں سب سے زیادہ جامع ہے۔

"قیامِ سید الشہداء سرمشق ہے۔"

سر مشق اس عبارت کو کہتے ہیں کہ جو معلم تختہ سیاہ پر لکھتا ہے اور طالب علم اس کی مشق کرتے ہیں۔
یہ جملہ معلم اس لیے لکھتا ہے تاکہ شاگرد اسی طرح اسے لکھیں۔
طالب علم اسے کئی دفعہ دہراتا ہے پھر جا کے معلم جیسا لکھتا ہے۔
مشق اس وقت ہوتی ہے جب سرمشق موجود ہو۔
جب معلم لکھ کر دکھائے اور پھر طالب علم اس کی مشق کریں۔
مجلسِ عزا مشق ہے۔ مجلس حسین میں خود امام سے سیکھنا ہے آزادی و وقار کا راستہ جو امام سے سیکھنا ہے۔
معلم جب حاضر نہیں ہوتا تو کوئی اور شخص آکے ٹائم پاس کرواتا ہے اور قصے کہانیاں سناتا ہے اور عموماً شاگرد بھی اس سے زیادہ خوش ہوتے ہیں کہ یہ فقط قصے سناتا ہے۔
یہ مشکل پیش آئی۔ کہ جب معلم حسین ع تھے۔ لیکن بیچ میں کچھ دل بہلانے والے آئے اور ٹائم پاس کیا۔
نقصان یہ ہوا کہ کربلا کا سبق فراموش ہو گیا اور اصل درس باقی نہ رہا۔ جب ہم حسین ابن علی کی کلاس میں بیٹھ کر حسین ابن علی سے دور رہے۔ اس کا نتیجہ آج ہمیں مل رہا ہے۔

آج پاکستان اور ہندوستان کے مسلمان جس خفت سے گزر رہے ہیں اس کی وجہ یہی ہے ۔ آج ہم نے
اسے تقدیر سمجھا ہے اور تقدیر کی خود ساختہ تفسیر کر کے یہ نتیجہ نکالا ہے ۔

قرآن کے مطابق ہماری تقدیر خلافتِ زمین و تمام امت کے اوپر خلافتِ الٰہیہ تھی لیکن آج مسلمان تمام پست و حقیر لوگوں کے آگے جھکا ہوا ہے۔

ہم نے یہی غلطی کہ ہم نے نصاب بھی بدلا اور معلم بھی بدلا۔

قرآن و کعبہ و رسول اللہ کا مزار ہوتے ہوئے اور تمام آئمہ کے مقدس مزار ہوتے ہوئے اہل بیت نے امت کا رخ کربلا کی طرف موڑا ہے چونکہ توحید امامت نبوت سب کربلا سے ملتا ہے۔

انسان حسین ابن علی سے راستہ لیتا ہے پھر اس کی مشق کرتا ہے۔
جن لوگوں نے مشق کی ہے وہ سب کے سامنے سر فخر سے بلند کر کے جیتے ہیں۔
اگر سب نے مشق کی ہوتی تو یہ عزت و احترام سب کو ملتا۔۔
آج کشمیر کا یہ سودا نہ ہوتا ۔ فلسطین مفت میں فروخت نہ ہوتا۔
ہم یزید پہ لعنت اور حسین پہ سلام اس لیے کرتے ہیں کہ یزید تکرار نہ ہو اور یزیدی حکومتوں کا خاتمہ فقط ایک یزید پر لعنت سے نہیں ہوتا۔
اگر مشق کی ہوتی تو ہر زمانے کا یزید نابود ہو جاتا۔ مگر آج یزید مضبوط ہے۔
ہندوستان میں اس سال مجالس کی اجازت نہیں ہے۔ حسین ابن علی کی مجلس کی اجازت کیلئے وقت کا یزید اجازت دے گا۔
اگر ہم نے مجالس میں مشق کی ہوتی تو یزید باقی نہ رہتا۔
اس کوتاہی کی طرف توجہ کی ضرورت ہے جسے عقیدہ بنا لیں۔
عقیدہ یعنی گرہ لگا لینا۔
اللہ کی وحدانیت کی روح سے گرہ لگانا توحید ہے۔
امام حسین سے اپنا رابطہ جوڑ لیں اپنے ضمیر کے ساتھ گرہ لگا لیں۔
اگر ایسا کر لئں تو رسومات کے بعد تسکین نہیں ملے گی۔ باطل و یزیدیت کی سرنگونی تک تسکین نہیں ملے گی۔

یہ سرمشق مشاہدہ کریں اور پڑھیں۔
فیس لے کے کوئی نہیں بتائے گا۔ فیس سے تسکین والی گفتگو ملے گی صرف۔
امام حسین کے کلمات موجود ہیں۔ ہر جملہ موجود ہے ۔ وہی سر مشق ہے۔ ہم کربلا کا سفر کریں امام حسین کی امامت میں۔
اگر ہم اما م کے ساتھ 61 ہجری میں ہوتے تو کہاں ہوتے؟
یہ در بند تو نہیں ہوا۔ آج بھی امام کے ساتھ سفر کر سکتے ہیں۔
امام کے زمانے میں جو صورتحال تھی وہی آج ہے۔ جو امام نے اس وقت کیا وہی ہم نے کرنا ہے۔

ہم آج مزمتی بن گئے ہیں۔ مزمت کربلا و قرآ ن کی تعلیم نہیں ہے مزاحمت تعلیم ہے۔

امام حسین نے مدینہ سے خروج کیا اور مکہ کو قیام گاہ بنایا۔
8 ذوالحجہ تک مکہ رہے۔


مکہ کے قیام میں وہ مقاصد جس کی خاطر یہ قیام اختیار فرمایا تھا اس کا لوگوں پہ اثر نہیں ہوا۔ امام کی باتیں سنیں لیکن معمول کی زندگی پر رہے۔ جس طرح ہم ہیں کہ حسین ابن علی کی باتیں سن کر پھر اپنے معمول کے کاموں میں مصروف ہیں۔

امام نے 8 ذوالحجہ کو اعلان کیا کہ کل ہم مکہ چھوڑ رہے ہیں عراق کی جانب جا رہے ہیں۔
مکہ کے والی اور خاندان کے لوگوں نے امام کو روکنے کی کوشش کی ۔ سب اپنے محرک کے ساتھ آئے اور روکا۔
صبح امام نے ارادہ کیا نکلنے کا تو محمد بن حنفیہ آئے اور لگام پکڑ کر روکا کہ نہ جائیں اور کہا کہ اگر جانا چاہتے ہیں تو بیبیوں کو نہ لے جائیں۔
والی مکہ نے فوجی دستہ روانہ کیا ۔ جس نے روکنے کی کوشش کی۔ معمولی سے جھڑپ بھی ہوئی۔ مگر وہ ناکام ہو کر واپس چلے گئے۔
شہرِ مکہ سے کچھ فاصلہ طے کر چکے تو والی مکہ کی طرف سے مذاکراتی وفد امام کو جا ملا۔
روایت کے مطابق عبداللہ جعفر جناب زینب کے شوہر اور امام کے چچا زاد بھائی جو کہ خود ایک بہت بڑی شخصیت تھے۔ انہوں نے امام کو خود خط لکھا اپنے بیٹوں عون و محمد کے ہاتھ یہ خط بھیجا ۔ وہ خط امام تک پہنچا اور کہا کہ مکہ میں رہیں میرے آنے تک۔ پہلے قدم میں روکنے کےلیے خط لکھا اور دوسرے قدم میں خود روانہ ہوئے۔
وہ آئے اور والی مکہ سے ملے۔ والی مکہ ان کا احترام کرتے تھے۔
قیام حسین کو سمجھنے کےلیے تمام کردار اور شخصیت کو سمجھنا ضروری ہے۔ ساری صورتحال واضح ہونا ضروری ہے۔
عمر ابن سعید ابن عاص اشدق والی مکہ کو امام کو مکہ میں شہید کرنے کےلیے معموریت دی گئی تھی۔ یزید کے باپ نے عمر ابن سعید معموریت دی کہ لوگوں سے بیعت لینی ہے۔ بااثر لوگوں سے بیعت لینی ہے۔ اپنی حکمت سے بیعت لینی ہے۔اس کو امیر حج بھی بنایا گیا تھا۔
جب انہیں علم ہوا کہ امام مکہ جا رہے ہیں تو مکہ کو کنٹرول کرنے کیلئے مکہ کا والی اسے بنایا گیا جو کہ حد درجہ سفاک ۔ مکار انسان تھا۔ جو ستر حجری تک رہا اور بنو امیہ کے ساتھ خیانت کی ۔ خود بھی بنو امیہ سے ہے۔
عبدالملک مروان کے ہاتھوں قتل ہوا۔
بنو امیہ میں تمام لوگ تخت چاہتے تھے۔
مروان کا ولی عہد ایک دور میں یہ مقرر ہوا۔ آل سفیان و آل مروان کو اس نے دھوکہ دیا اور یہ چاہتا تھا کہ اس کا خاندان اس تخت کو سنبھالیں
یہ لوگوں کو خریدنے کا ماہر تھا۔ عمر ابن سعید لوگوں کو شخصیات کو خریدتا تھا۔ اس لیے اسے یزید نے امیر الحاج بنایا۔ ساٹھ ہجری کے حج میں یہ امیر الحاج تھا۔
اس نے امام کےلیے حکمت عملی بنائی ہوئی تھی۔
کہ امام کو مکہ روکیں ۔

دوسرا کام یہ تھا کہ حج کی افراتفری میں کہ جہاں نظم نہیں ہوتا تو یہ چاہتے تھے کہ حج کے اعمال کے دوران امام کو اس طرح سے شہید کر دیا جائے کہ اس کے قاتل کا علم نہ ہو سکے۔
یہ منصوبہ بندی عمر ابن سعید نے کی ہوئی تھی۔
اس لیے امام نے حج کیا ہی نہیں۔

ان کےلیے تدبیر سے ہٹ کے صورتحال ہو گئی۔
اب یہ اگلے پلان پہ آ گئے کہ امام کو مکہ سے نہ نکلنے دیں کسی بھی حالت میں۔
اس لیے بزور شمشیر روکنے کی کوشش کی۔ لشکر بھیجا مگر امام نہ رکے۔
اب آخری کوشش کی سفارتکاری کی۔ کہ امان دینے پہ آ گئے کہ آپ کی شرائط ہم مانتے ہیں ۔ اب قتل کے منصوبہ کو سفارتکاری میں تبدیل کیا۔

عبداللہ ابن جعفر اپنے طور پر مکہ پہنچ آئے۔ انہوں نے والی سے بات کی اور کہا کہ والی اگر تو بیعت کا مطالبہ نہ کر اور امان نامہ دے دے تو امام رک سکتے ہیں۔یہ تجویز والی کو اچھی لگی۔


عبداللہ ابن جعفر نے والی مکہ سے کہا کہ فوراً امام حسین کے نام خط لکھ اور امان دے ، تحفظ دے اور بتا کہ آپ مکہ میں رہیں کہ آ پ کو مکہ میں کوئی مسئلہ پیش نہیں ائے گا۔ اس میں نیکی کا اظہار کر( چونکہ امام حسین ع اہل بیت سے ہیں۔ آل رسول سے ہیں)۔ اور ان کو یقین دہانی کرواؤ کہ اگر وہ مکہ میں رہیں تو کوئی نقصان نہیں پہنچے گا اور درخواست کرو کہ وہ اپنا ارادہ بدل دیں شاید تمہاری باتوں سے انہیں اطمینان ہو جائے اور لوٹ آئیں۔
یہ خط یحیٰ ابن سعید کے ہاتھ بھیج جو بھائی ہے تاکہ اس خط کی اہمیت کا اندازہ ہو۔ اس سے امام کو علم ہو جائے گا کہ تو یہ کام سنجیدگی سے کر رہا ہے۔

یہ تجویز پیش کی عبداللہ بن جعفر نے والی مکہ کو۔
والی مکہ شدید کرب میں تھا۔ جس کی حالت بہت بے بسی کی تھی۔ جب اس نے یہ تجویز سنی تو اس میں اتنا بھی حوصلہ نہیں تھا کہ خط لکھتا اور عبداللہ ابن جعفر سے کہا کہ میری جانب سے آپ خط لکھو اور جو چاہتے ہو لکھو۔ میں اس کے نیچے مہر لگا دوں گا۔
عبداللہ ابن جعفر نے والی کی جانب سے امام حسین کو خط لکھا۔
اس سے پہلے انہوں نے اپنی جانب سے بھی خط لکھا تھا کہ جس میں تھا کہ
" بسم اللہ الرحمٰن الرحیم۔ میں اللہ کا واسطہ آپ کو دیتا ہوں کہ آپ مکہ سے باہر نہ جائے۔ مجھے خوف ہے اس خروج کے بارے میں۔ مجھے لگ رہا ہے کہ اس میں آپ کی شہادت ہو اور اہل بیت کےلیے موت و شہادت نظر آ رہی ہے۔ اگر آپ کو شہید کر دیا گیا تو زمین سے اللہ کا نور بجھ جائے گا۔ آپ روح ہدایت اور امیر المومنین ہیں۔ آپ فیصلے میں جلدی نہ کریں عراق جانے میں۔ میں ہو سکا تو یزید و تمام بنو امیہ سے آُپ کےلیے آپ کے خآندان، مال ، ایال کیلئے امان نامہ لے کر آتا ہوں۔(عبداللہ ابن جعفر کی شخصیت ایسی تھی کہ وہ یہ کام کر بھی سکتے تھے)۔"
عبداللہ ابن عمر نے بھی کوشش کی۔ انہیں خیر کی دعا بھی دی۔ لیکن امام نے اپنا فیصلہ ترک نہیں کیا۔

اب دوسرا خط والی کی جانب سے لکھ رہے ہیں کہ جس میں لب ولہجہ والی والا اختیار کیا ۔ اس کا متن یہ ہے کہ
" عمر ابن سعید کی جانب سے حسین ابن علی کے نام خط۔ میں اللہ سے دعا مانگتا ہوں کہ آپ کو اس راہ سے باز رکھے جس راہ میں آپ کی موت ہے۔ اور میں یہ بھی چاہتا ہوں کہ اللہ آپ کو اس راہ کی رہنمائی کرے جس میں آپ کےلیے صحیح راستہ ہو۔ مجھے پتہ چلا ہے کہ آپ عراق جانا چاہتے ہیں۔ میں آپ کو دشمنی سے دور رہنے کےلیے کہتا ہوں ۔ عراق جانے میں اور اس راستے میں مجھے آپ کی موت نظر آرہی ہے۔ میں دوشخصیتیں عبد اللہ ابن جعفر اور یحیٰ ابن سعید کو بھیج رہا ہوں۔ یہ دونوں جب خط لے کر آئیں آپ میری جانب آ جائیں ( عراق کا ارادہ ترک کر کے مکہ آ جائیں) میں ذمہ لیتا ہوں آپ کےلیے امان، حسن جوار، قرابت کی ذمہ داری لیتا ہوں۔ اس عہد کی نگہبانی اللہ کو سونپتا ہوں۔"

اس خط میں امام کے خاندان سے عبداللہ ابن جعفر کو اور اپنے خاندان سے اپنے بھائی کو مربوط کیا۔
عبداللہ ابن جعفر ان سفاک اور قاتلوں کو اور بنو امیہ کی سفاکی کو جانتے تھے۔ بنو امیہ کی سفاکی کا ذکر کئی اور صحابہ نے بھی کیا اور امام کو یاد دلایا۔
لیکن والی کے ذہن میں امام کی مزاحمت اور کوفہ جانے سے روکنا تھا۔ عراقیوں کے ساتھ ناطہ کاٹنے کےلیے یہ کوشش کی۔


عمر ابن سعید کے پاس خط لے کر عبداللہ ابن جعفر آئے اور مہر لگنے کے بعد وہ اور یحیٰ امام کے پاس آئے اور خط پڑھا۔
یحیٰ ابن سعید نے پڑھ کر امام کو سنایا۔ امام نے لکھا
"جو عملِ صالح کرتا ہے اور اللہ پہ ایمان رکھتا ہے وہ اللہ اور رسول کا دشمن نہیں ہوتا۔ یہ جو امان کا کہا تو تجھے معلوم ہونا چاہیے کہ سب سے بہتر پناہ اللہ کی پناہ ہے۔ اللہ کے امان دینے کا قانون یہ ہے کہ جو دنیا میں اللہ سے ڈرتا ہے اللہ اسے آخرت میں امان دیتا ہے۔ میں اللہ سے اس دنیا میں اللہ کے خوف کی دعا کرتا ہوں تاکہ مجھے آخرت کی پناہ مل جائے۔ یہ جو تونے لکھا ہے کہ تو بھلائی کی وجہ سے یہ آفر دے رہا ہے تو میں اللہ سے اس کی جزا کی دعا کرتا ہوں۔"
پھر یہ دونوں والی کے پاس آئے۔
دونوں نے کہا " ہم نے خط پڑھا ہے اور ارادہ بدلنے کی کوشش بھی بہت کی ہے تو انہوں نے ایک عذر پیش کیا ہے کہ میں نے ایک خواب میں رسول اللہ کو دیکھا ہے کہ جس میں رسول اللہ نے ایک حکم دیا ہے میں اس حکم کو عملی کرنے جا رہا ہوں، یہ میرے فائدے میں ہو یا نقصان میں ہو۔ امام حسین نے خواب کے بارے میں کہا کہ یہ خواب کسی کو نہیں بتاؤ ں گا کہ جب تک اپنے رب کی ملاقات کو نہیں پہنچ جاتا'۔

اس خط کے اندر وہی سر مشق ہے کہ ایسے موقع پر کہ جب ایسی آفر ملے اور ہم ایسی صورتحال میں آ جائیں کہ جب ہم محاصرے میں ہوں اور یہ تجویز آ جائے۔
مثلاً کہ اسرائیل کو تسلیم کر لو تو یہ سب فوائد مل جائیں گے تو انہیں کیا کرنا چاہیے۔ امام حسین نے بتایا ہے کہ کیا کرنا چاہیے۔

امام حسین نے بتایا ہے کہ جب کوئی بھی نصرت و مدد کےلیے نہ ہو تو کیا کرنا ہے؟
امام حسین کو اسی لیے پیشوا بنایا ہے کہ ایسی صورتحال میں کیا کیا جائے۔
آج کے محکوم و غلام لوگوں کےلیے یہ سر مشق ہے۔


مصائب۰۰۰۰۰۰۰۰۰۰
مصائب کا روایتی انداز یہ ہے کہ مصائب میں ایسے جملے بیان کیے جائیں جن کا مقصد فقط مومنین کو رلانا ہو۔ طالب علمانہ اور خاص طور پہ رہبر معظم امام خامنہ ای دام ظلہ جو کہ بہت بڑے خطیب ہیں۔
ایران میں زیادہ تر علماء خود کو خطیب نہیں سمجھتے جس روایت کو امام خمینی نے بدلا ۔ امام خمینی مرجع تقلید ہوتے ہوئے خطابت کرتے تھے۔ باقی علماء نے خصوصاً یہ کہنا شروع کر دیا کہ امام خمینی خطیب ہیں۔ یعنی روضہ خوان ہیں۔
اس ڈر سے علماء مجلس نہیں پڑھتے۔
ایران کے سب سے اعلیٰ خطیب امام خامنہ ای ہیں۔ یہ تصدیق شدہ بات ہے۔
آپ مصائب پڑھتے ہیں۔ اور خود بھی گریہ کرتے ہیں۔
مصائب پڑھنے کا انداز یہ اپناتے ہیں کہ کتاب کھول کر مصائب پڑھتے ہیں اور طلاب کو کہا کہ اس طریقے سے مصائب پڑھا کرو۔
کتاب لہوف جو سید ابن طاؤس کی کتاب ہے ۔ جو بہت جید علماء میں سے ہیں۔ مفاتیح الجنان میں کئی دعائیں آپ سے منسوب ہیں۔
آپ نے مقتلِ کربلا لکھی ہے۔
اس کتاب کا مطالعہ کرتے ہیں
پاکستان میں مومنین امام حسین سے بہت محبت کرتے ہیں اور امام کے بارے میں جاننا چاہتے ہیں۔ اس لیے ضروری ہے کہ ان تک اصل تاریخ پہنچائی جائے۔
اہل سنت کے پاس بھی کربلا کو پڑھنے سمجھنے کی کوئی کتاب مستند نہیں ہے۔ شیعہ کتابوں سے وہ استفادہ نہیں کرتے۔ شیعہ منابع کے قریب نہیں آتے۔ وہ بھی کربلا ہمارے خطباء و ذاکرین سے سنتے ہیں۔ اس لیے اہل سنت بھی تسلی کے ساتھ سنیں اور اس کے مصدقات کو تحقیق بھی کرلیں چونکہ اس کتاب کی روایات تاریخِ طبری سے لی گئی ہیں۔ اور وہ ابی مخنف سے لی گئی ہیں۔ اور یہ روایات ان ہستیوں سے لی گئی ہیں کہ جو کربلا میں موجود تھے۔

امام حسین کے قافلے کو روکنے کےلیے حر کے ساتھ ایک جنگی دستہ آیا۔

امام حسین گھوڑے پہ سوار ہوئے کاروان تیار کیا اور چل پڑے۔ لیکن حر کا دستہ اس طرح آ رہا تھا کہ جہاں موقع ملتا تو امام کا راستہ روکنے کی کوشش کرتے حتیٰ کہ کربلا پہنچ گئے۔ یہ دو محرم کا دن تھا۔ امام کا قافلہ جب کربلا پہنچا تو امام نے پوچھا اس زمین کا نام کیا ہے۔ وہاں لوگوں نے بتایا کہ اس صحرا کو کربلا کہتے ہیں۔ امام نے فرمایا خدایا تیری بارگاہ میں کرب و بلا سے پناہ مانگتا ہوں۔ اور فرمایا یہ کرب و بلا کی جگہ ہے۔ سواریوں سے اتر آؤ ۔ اللہ کی قسم ہمارے کاروان کے اترنے کی یہی جگہ ہے۔
( ایک روایت میں ہے کہ ایک دفعہ امام علی ع جنگ سفین کےلیے کوفہ سے شام جاتے ہوئے اس صحرا سے گزر ے اور اس حصے کا نام پوچھا تو لوگوں نے کہا یہ کربلا ہے۔ امام اترے ریت کو مٹی میں لے کر تیں دفعہ کہا "اللہ کی قسم یہی جگہ ہے"۔ ساتھیوں نے پوچھا کہ نماز، استراحت، جنگ کی جگہ ہے۔ امام نے فرمایا نہیں ۔ تو امام نے فرمایا " عاشقوں کے گرنے کی یہی جگہ ہے"۔ اس وقت امام حسین موجود تھے۔)

اب امام حسین نے فرمایا آل رسول کے پاک خون کے گرنے کی یہی جگہ ہے۔ اللہ کی قسم ہماری قبروں کی یہی جگہ ہے۔ اور زہرا کی بیٹیوں کی طرف نگاہ کر کے فرمایا اللہ کی قسم آل رسول کے رسیوں میں قید ہونے کی یہی جگہ ہے۔ یہ مجھے نانا نے بتایا ہوا تھا پہلے سے۔ امام کے حکم پر تمام کاروان سواریوں سے اتر آیا۔ حر کا دستہ تھوڑے فاصلے سے اترا اور پڑاؤ ڈال لیا۔

امام حسین ع اپنے کاروان سے تھوڑے دور چلے گئے اور صحرا کے ایک حصے میں بیٹھ کر ایک کپڑے سے اپنی تلوار کو صاف کرنا شروع کیا۔ ساتھ فرمایا " اے زمانہ برا ہو تیرا کہ تونے کیسی دوستی نبھائی ہے۔ کہ مجھے کس کے ساتھ یہاں پہنچا دیا ہے۔ تونے صبح و شام کتنی ایسی ہستیاں دنیا سے مٹائی ہیں۔ ہر زندہ نے ایک دن اس مقام پہ پہنچنا ہے۔ رحلت کا وقت قریب آ گیا ہے اور معاملہ خدا کے پاس پہنچ گیا ہے۔ ثانی زہرا کاروان کے ایک دوسرے کنارے پر یہ شعر سن رہی تھیں۔ بی بی نے یہ شعر سنے اور فرمایا اے بھائی یہ کلام تو وہ شخص کہتا ہے جسے شہادت کا یقین ہو گیا ہو۔ فرمایا ایسا ہی ہے ہمارا شہادت کا وقت قریب آ گیا ہے۔
بی بی فریاد کرنے لگی۔ بی بی نے فرمایا اے ماں آپ کا حسین تنہا ہو گیا ہے۔ اس کے بعد باقی بیبیوں نے تیاری چھوڑ دی اور ماتم شروع کر دیا۔

ماتم شبیر۰۰۰۰۰۰۰۰