Quba Islamic Center Lahore

قباء اسلامک سنٹر میں نمازِ عیدالفطر کا روح پرور اجتماع ہزاروں افراد کی شرکت کے ساتھ منعقد ہوا۔
مقررہ وقت سے قبل ہی پنڈال بھر گئے، جبکہ شدید رش کے باعث وسیع کارپارکنگ بھی ناکافی محسوس ہونے لگی۔

بارش کی آنکھ مچولی کے باوجود انتظامات میں دشواری پیش آئی، مگر قباء ٹیم نے مستعدی کے ساتھ رات بھر خدمات سرانجام دیں اور بہترین نظم برقرار رکھا۔

خطبۂ عیدالفطر کا مرکزی پیغام یہ تھا کہ رسول اللہ ﷺ کو سب سے زیادہ خوشی کسی کے ہدایت پا لینے پر ہوتی تھی۔
عکرمہ بن ابی جہلؓ کے قبولِ اسلام، سیدنا ابوہریرہؓ کی والدہ کے ایمان لانے، اور کعب بن مالکؓ کی توبہ کی قبولیت—یہ وہ مواقع تھے جن پر نبی کریم ﷺ اور صحابہ کرامؓ کو بے پناہ خوشی حاصل ہوئی۔

اسی تناظر میں بیان کیا گیا کہ رمضان المبارک مغفرت کا مہینہ ہے، جس میں اللہ تعالیٰ بے شمار خوش نصیبوں کو جہنم سے آزادی عطا فرماتا ہے، اور اسی عظیم نعمت کی خوشی میں عیدالفطر کا دن عطا کیا گیا۔

اختتام پر امتِ مسلمہ کی بھلائی، مظلوم مسلمانوں کی مدد، مسلمانوں کے اتحاد، اور کفار و مشرکین کے شر سے حفاظت کی خصوصی دعائیں کی گئیں۔

موجودہ ملکی حالات کے تناظر میں شیخ عبدالجبار بلال حفظہ اللہ کی اہل وطن کے لئے نصیحت بھری گفتگو
گفتگو کا خلاصہ
🌿 فتنوں کے دور میں نبی کریم ﷺ کی ہدایات
اللہ کے رسول ﷺ کی تعلیمات مسلمانوں کو فتنوں اور آزمائشوں کے دور میں صبر، استقامت اور عافیت کا راستہ دکھاتی ہیں۔ سورۃ التوبہ (آیت 128) میں آپ ﷺ کی امت سے بے پناہ محبت، خیر خواہی اور شفقت کو بیان کیا گیا:
"لَقَدْ جَاءَكُمْ رَسُولٌ مِّنْ أَنْفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُمْ بِالْمُؤْمِنِينَ رَءُوفٌ رَّحِيمٌ"
یعنی نبی ﷺ کو امت کی مشقت گراں گزرتی ہے، وہ تمہارے لیے بھلائی کے شدید خواہاں اور مؤمنوں پر مہربان و رحیم ہیں۔
۱۔ فتنوں میں غیر متحرک رہنے کی ترغیب
نبی ﷺ نے فرمایا کہ فتنوں کے زمانے میں جو بندہ جتنا دور اور غیر متحرک رہے گا، اتنا ہی بہتر ہے۔
بیٹھا ہوا شخص کھڑے سے بہتر،
کھڑا ہوا چلنے والے سے بہتر،
اور چلنے والا دوڑنے والے سے بہتر ہے۔
یعنی فتنہ بڑھنے کے وقت جذباتی عمل یا سرگرمی سے بچنا اور خاموشی و عافیت اختیار کرنا افضل ہے۔
۲۔ فتنوں سے پناہ اختیار کرنا
آپ ﷺ نے فرمایا کہ جب فتنہ برپا ہو جائے تو انسان کو چاہیے کہ کوئی پناہ کی جگہ تلاش کرے اور خود کو فتنے سے دور رکھے۔
یہاں تک کہ دجال جیسے سب سے بڑے فتنے کے بارے میں بھی حکم دیا کہ اس کے پاس دیکھنے کے لیے بھی نہ جاؤ بلکہ دور رہو۔
۳۔ ہتھیار اٹھانے کی ممانعت
نبی ﷺ نے فرمایا:
" من حمل علينا السلاح، فليس منا "
جس نے ہم پر اسلحہ اٹھایا وہ ہم میں سے نہیں ہے ۔
(اگرچہ چلانے کا ارادہ نہ ہو)۔
یہ سخت وعید اس بات کی علامت ہے کہ مسلمان کے خلاف معمولی جارحیت بھی کبیرہ گناہ ہے۔
۴۔ حکمرانوں کے ظلم پر صبر و دعا
آپ ﷺ نے ظلم و ناانصافی کے باوجود صبر، استغفار اور دعا کی تلقین فرمائی۔
اہل علم نے کہا کہ حکمرانوں کا ظلم دراصل اللہ کا انتقام اس کا تلوار یعنی مسلح مزاحمت سے نہیں بلکہ توبہ و استغفار اور دعا سے سامنا کرنا چاہیے ۔
۵۔ فتنوں سے پناہ کی دعائیں
رسول ﷺ نے مختلف دعاؤں میں فتنوں سے پناہ مانگی، جیسے:
اللَّهُمَّ إِنِّي أَعُوذُ بِكَ مِنْ جَهْدِ الْبَلَاءِ، وَدَرَكِ الشَّقَاءِ، وَسُوءِ الْقَضَاءِ، وَشَمَاتَةِ الأَعْدَاءِ
(رواه البخاري ومسلم)
• “جہد البلاء” سے مراد ہے ایسی آزمائش یا مصیبت جسے انسان برداشت نہ کر سکے۔
• “درك الشقاء” یعنی بدبختی میں مبتلا ہو جانا، آخرت میں خسارے یا دنیا میں محرومی سے۔
• “سوء القضاء” یعنی ایسا فیصلہ جو انجامِ بد پر منتج ہو۔
• “شماتة الأعداء” یعنی مجھ سے کوئی ایسا فعل سرزد ہو کہ جس سے دشمن خوش ہوں ۔
اور ہمارا دشمن شیطان سب سے زیادہ ہماری آپس کی لڑائی پر خوش ہوتا ہے ۔

اور کبھی تنہائی میں پورے شعور کے ساتھ اس دعا کو کریں اور اس کی گہرائی اور لذت محسوس کریں کہ اس میں ہر خیر مانگ لی گئی ۔
"وَاجْعَلْ كُلَّ قَضَاءٍ قَضَيْتَهُ لِي خَيْرًا"(رواہ مسلم)
(اے اللہ! میرے بارے میں جو فیصلہ تو نے کیا ہے، اسے خیر والا بنا دے۔)
یہ دعائیں فتنوں میں دل کی سلامتی، صبر، اور خیر کے فیصلے کا بہترین ذریعہ ہیں۔

۶۔ حکمرانوں کے لئے وارننگ

اللَّهُمَّ مَن وَلِيَ مِنْ أَمْرِ أُمَّتِي شَيْئًا، فَشَقَّ عَلَيْهِمْ، فَاشْقُقْ عَلَيْهِ،
وَمَن وَلِيَ مِنْ أَمْرِ أُمَّتِي شَيْئًا، فَرَفَقَ بِهِمْ، فَارْفُقْ بِهِ
(رواه مسلم)
اے اللہ! جس نے میری امت کے کسی معاملے کی ذمہ داری سنبھالی اور اُن پر سختی کی،تو تُو بھی اس پر سختی فرما،
اور جس نے میری امت کے کسی معاملے کی ذمہ داری سنبھالی اور اُن کے ساتھ نرمی کی،تو تُو بھی اس کے ساتھ نرمی فرما۔

«مَا مِنْ عَبْدٍ يَسْتَرْعِيهِ اللَّهُ رَعِيَّةً، يَمُوتُ يَوْمَ يَمُوتُ وَهُوَ غَاشٌّ لِرَعِيَّتِهِ، إِلَّا لَقِيَ اللَّهَ وَهُوَ عَلَيْهِ غَضْبَانُ»
(رواه مسلم )
جو شخص اللہ تعالیٰ کی طرف سے کسی رعیت کا ذمہ دار بنایا جائے،
پھر وہ اپنی رعیت کے ساتھ خیانت کرے،
اور ان کے خیرخواہ نہ بنے،
تو وہ جب مرے گا تو اللہ سے اس حال میں ملاقات کرے گا کہ اللہ اس پر غضبناک ہوگا۔