31/08/2026
شاہ ولی اللہ محدث دہلویؒ سیمینار کا انعقاد
کپس کالج، کاہنہ، لاہور میں جمعیت علماء اسلام کی جانب سے شاہ ولی اللہ محدث دہلوی رحمۃ اللہ علیہ سیمینار کا انعقاد کیا گیا۔ پروگرام کی صدارت مولانا عبد المنان انبالوی صاحب نے کی، جبکہ سرپرستی حضرت مولانا مفتی عبد الحفیظ صاحب نے فرمائی۔
سیمینار میں خصوصی مہمانانِ گرامی کے طور پر جناب پروفیسر ڈاکٹر امجد علی شاکر، مولانا سعید عاکف، مولانا عبد الودود شاہد، بلال احمد میر، محمد افضل خان، قاری امجد سعید، جناب محسن خواجہ، مفتی عبد الرشید علوی، حافظ عرفان حیدر اور مکرمہ اشرف شریک ہوئے۔
اس پروگرام کی ایک نمایاں خصوصیت یہ تھی کہ سیمینار کے دعوت نامے اور اشتہارات پر کسی بھی شخصیت کا نام نمایاں نہیں کیا گیا تھا۔ اس کا بنیادی مقصد یہ تھا کہ لوگ کسی فرد یا شخصیت کی نسبت سے نہیں بلکہ موضوع کی اہمیت اور شاہ ولی اللہ محدث دہلویؒ کی فکر سے وابستگی کی بنیاد پر اس اجتماع کا حصہ بنیں۔
اس پروگرام کی تیاری اور کامیابی میں مفتی عبد الحفیظ صاحب، مولانا عبد المنان انبالوی، حافظ محمود اشرف، حافظ ندیم (دارالکتاب)، محمد افضل خان اور مولانا مکرمہ اشرف کی خصوصی کاوشوں، محنت اور بھرپور تعاون کا اہم کردار رہا۔ اسی طرح مقامی جماعت کی مسلسل محنت اور کوششوں کے نتیجے میں پروگرام میں عوام کی غیر معمولی شرکت دیکھنے میں آئی۔
پروگرام کے موقع پر ہال مکمل طور پر پُر تھا، جبکہ ہال کے باہر بھی کثیر تعداد میں عوام موجود تھے۔ عوام کی یہ بھرپور شرکت اس امر کی عکاسی کرتی ہے کہ شاہ ولی اللہ محدث دہلویؒ کی فکر، علمی ورثے اور تجدیدی نظریات سے وابستگی آج بھی معاشرے میں موجود ہے اور اس موضوع پر سنجیدہ علمی گفتگو کی ضرورت محسوس کی جاتی ہے۔
یہ سیمینار ایک مسلسل علمی سلسلے کی کڑی ہے، جس کا مقصد ایسے اجتماعات اور سیمینارز کے ذریعے فکرِ ولی اللہی، اس فکر سے وابستہ شخصیات، ان کے علمی کام اور ان کے نظریات کو عام کرنا اور نئی نسل کو اس عظیم علمی و فکری ورثے سے روشناس کرانا ہے۔
