DAwn Public Higher Secondary School khairpur campus

خيرپور (رپورٽ: سليم رضا شيخ)
سچل آڊيٽوريم هال ۾ ڊان پبلڪ هائير سيڪنڊري اسڪول گمبٽ ۽ ڊان پبلڪ هائير سيڪنڊري اسڪول خيرپور جي گڏيل سهڪار سان سالياني “آل سنڌ ٽيلينٽ هنٽ پروگرام” تحت “ليٽ مور علي ميموريل ميرٽ اسڪالرشپ 2026” جي ٽيسٽ منعقد ڪئي وئي، جنهن ۾ سنڌ جي مختلف علائقن مان لڳ ڀڳ 150 ذهين ۽ باصلاحيت شاگردن ۽ شاگردياڻين ڀرپور شرڪت ڪئي۔
ان موقعي تي تعليمي ماحول انتهائي پُرجوش ۽ علمي جذبي سان سرشار نظر آيو، جتي شاگردن پنهنجي صلاحيتن جو بهترين انداز ۾ مظاهرو ڪيو۔ تقريب دوران اسڪول جي ايڊمنسٽريٽر نزاکت سمون، پرنسپال بخت علي ڪلهوڙو، ميڊم پشما ۽ ٻين ذميوارن صحافين سان ڳالهائيندي چيو ته هن اسڪالرشپ پروگرام جو بنيادي مقصد ذهين، محنتي ۽ مستحق شاگردن کي مفت ۽ معياري تعليم جا موقعا فراهم ڪرڻ آهي ته جيئن هو پنهنجي صلاحيتن کي وڌيڪ نکارِي سگهن۔
هنن چيو ته تعليم ئي قومن جي ترقي جو اصل ذريعو آهي ۽ اهڙا مثبت ۽ تعميري پروگرام نوجوان نسل ۾ اڳتي وڌڻ جو جذبو پيدا ڪن ٿا۔ هنن وڌيڪ ٻڌايو ته اسڪالرشپ ٽيسٽ ۾ ڪامياب ٿيندڙ شاگردن ۽ شاگردياڻين کي نه صرف مفت تعليمي سهولتون فراهم ڪيون وينديون پر سندن همت افزائي لاءِ خصوصي ايوارڊ ۽ سندون پڻ ڏنيون وينديون۔
ان موقعي تي شرڪت ڪندڙ شاگردن ۽ شاگردياڻين ميڊيا سان ڳالهائيندي چيو ته باصلاحيت ۽ هوشيار شاگردن لاءِ اهڙي قسم جا علمي ۽ تعليمي مقابلا وقت جي اهم ضرورت آهن، ڇاڪاڻ⁠تہ اهڙا پروگرام نوجوانن ۾ خوداعتمادي، مقابلي جو جذبو ۽ اڳتي وڌڻ جي امنگ پيدا ڪن ٿا۔ هنن چيو ته جيڪڏهن شاگردن کي مناسب موقعا ۽ بهتر رهنمائي فراهم ڪئي وڃي ته هو مستقبل ۾ ملڪ ۽ قوم جو نالو روشن ڪري سگهن ٿا۔