Government Degree Science & Commerce College Landhi/Korangi # 6 For Boys

(محسنِ پاکستان ڈاکٹر عبدالقدیر خان)
گورنمنٹ ڈگری سائنس و کامرس کالج لانڈھی کورنگی 6 ،کراچی

پرنسپل پروفیسر ڈاکٹر خطیب اللہ خان کی ریٹائرمنٹ کی تقریب کا ایک اور پہلو

اس پُروقار تقریب کا ایک نمایاں پہلو عمائدین شہر کی بھرپور شرکت تھا۔ جس میں سب سے پہلے ذکر کرنا بجا ہوگا محترمہ قرۃالعین صاحبہ کا، جو سندھ اسمبلی کی معزز رکن اور کالج کی دیرینہ محسنہ ہیں۔ انہوں نے سندھ اسمبلی میں کالج کی شکستہ حال عمارت کی از سرِ نو تعمیر کے مقدمے کو نہایت مؤثر انداز میں پیش کیا اور صوبائی وزیر تعلیم جناب سردار احمد شاہ کو بارہا اس کی یاد دہانی کروائی۔ ان کا یہ بھی کہنا تھا کہ محسنِ پاکستان ڈاکٹر عبدالقدیر خان وہ شخصیت ہیں جن کے باعث آج دشمن ہماری طرف میلی آنکھ سے دیکھنے کی جرات نہیں کرتا، ان کے اس کارنامے کے اعتراف میں کالج کا نام محسنِ پاکستان ڈاکٹر عبدالقدیر خان سے منسوب کیا جانا چاہیے. انہوں نے افسوس ظاہر کیا کہ ایک سال گزرنے کے باوجود کالج کے نام کی تبدیلی کا مرحلہ طے نہیں ہو سکا، لیکن پُرعزم لہجے میں اعلان کیا کہ اب کی مرتبہ یہ مسئلہ صوبائی اسمبلی میں قرارداد کی صورت میں پیش کیا جائے گا تاکہ ڈاکٹر عبدالقدیر خان کو ان کا جائز مقام دلایا جا سکے۔

اس کے بعد ذکر ہو رانا وحید صاحب کا، جو آل پاکستان فرنیچر ایسوسی ایشن کے سینئر نائب صدر ہیں۔ وہ اپنے چند رفقا کے ہمراہ تقریب میں شریک ہوئے اور اپنے خیالات کا اظہار بھی فرمایا۔ ان کی تنظیم کی طرف سے کالج کو تین سو سے زائد پھل دار پودے عطیہ کیے گئے۔ یہ نہ صرف کالج کے سبزہ و سایہ کا سبب ہیں بلکہ آنے والے دنوں میں صدقۂ جاریہ کی صورت اختیار کریں گے۔ رانا وحید صاحب نے اپنے خطاب میں اس عزم کا اظہار کیا کہ وہ کراچی کے کالجز کو پھل دار درختوں سے آراستہ کریں گے تاکہ لوگ فی سبیل اللہ لگے ہوئے پھل توڑ کر اپنی بھوک مٹا سکیں اور یوں جگہ جگہ بچھے دسترخوانوں کی ضرورت کم ہو، اور انسانی عزتِ نفس مجروح نہ ہو۔

اسی طرح ایک اور اہم شخصیت جناب ندیم شیخ ایڈووکیٹ بھی اپنے ساتھیوں کے ہمراہ شریک ہوئے، جو جسٹس لائرز فورم کے سربراہ ہیں۔ ان کی آمد کا مقصد تو محض پروفیسر ڈاکٹر خطیب اللہ خان کی ریٹائرمنٹ کی تقریب میں شرکت تھا، مگر انہوں نے موقع کی نزاکت کو سمجھتے ہوئے نہ صرف آخر تک اپنی موجودگی برقرار رکھی بلکہ کالج کے احاطے میں قائم لا کالج کی فعالیت کا اعلان بھی کیا۔ انہوں نے کہا کہ وہ لا کالج کو بھی فعال کریں گے، قبضہ مافیا کی کوششوں کا تدارک کریں گے اور جس زمین پر پلاٹنگ کی بات کی جا رہی ہے وہاں ایک عظیم الشان عمارت تعمیر کی جائے گی جو ڈھائی ہزار طلبہ کو اکاموڈیٹ کرنے کے ساتھ ساتھ مزید انسٹیٹیوٹ کے قیام کی راہ ہموار کرے گی۔ اس کے ساتھ کالج سے متصل گراؤنڈ، جو کالج ہی کی زمین ہے، اس کی واگزاری کے لیے بھی اربابِ اختیار سے بات چیت کی جائے گی تاکہ طلبا کو ان کا حق دلایا جا سکے اور کالج کی موجودہ عمارت کو بھی آراستہ کیا جا سکے۔

یوں یہ تقریب محض ایک الوداعی اجلاس نہ رہی بلکہ ایک ایسے عہد و پیمان کی صورت اختیار کر گئی جس میں کالج کے ماضی کی خدمات کو خراجِ عقیدت پیش کرنے کے ساتھ ساتھ اس کے مستقبل کے لیے عملی منصوبہ بندی اور جدوجہد کا عزم بھی شامل تھا۔

(محسنِ پاکستان ڈاکٹر عبدالقدیر خان)
گورنمنٹ ڈگری سائنس و کامرس کالج لانڈھی، کورنگی نمبر 6، کراچی

گذشتہ دنوں کالج میں ایک نہایت پُروقار اور شایانِ شان تقریب منعقد ہوئی، جسے کالج کے تدریسی و غیر تدریسی عملے نے اس انداز میں ترتیب دیا کہ ہر گوشہ وقار اور محبت کی خوشبو سے معطر نظر آیا۔ یہ تقریب کالج کے ریٹائر ہونے والے پرنسپل، پروفیسر ڈاکٹر خطیب اللہ خان اور پروفیسر مقصود علی کی گراں قدر خدمات کے اعتراف میں منعقد کی گئی تھی۔ پروفیسر مقصود علی بھی ایک دوسرے سرکاری کالج سے بطور پرنسپل ریٹائر ہوئے ہیں، اور اس موقع پر دونوں شخصیات کی علمی، انتظامی اور پیشہ ورانہ کاوشوں کو بھرپور انداز میں خراجِ تحسین پیش کیا گیا۔

یہ تقریب کالج کے ڈاکٹر عبدالقدیر خان آڈیٹوریم میں منعقد ہوئی۔ جہاں اساتذہ کرام، معززینِ شہر اور متعدد سابق پرنسپل صاحبان یعنی پروفیسر احمد مدثر خان، پروفیسر محمد علی شیخ، پروفیسر ڈاکٹر ممتاز عمر اور پروفیسر اقبال عالم کی خصوصی شرکت نے تقریب کو علمی اور ادبی وقعت کا ایک نادر رنگ عطا کیا۔

تقریب کے روحِ رواں پروفیسر ڈاکٹر عبدالقادر ہاشم تھے، جو اپنے مخصوص شیریں اور روایتی لب و لہجے کے ساتھ اس تقریب کی نظامت فرما رہے تھے۔ ان کی خوش اسلوبی اور دلنشینی نے محفل کو حسنِ ترتیب اور دلکشی عطا کی۔ اسی کے ساتھ اس تقریب کی کامیابی کے پس منظر میں پروفیسر سید کاشف علی اور پروفیسر ندیم اختر صاحبان کی بھرپور مساعی بھی نمایاں رہیں، جنہوں نے اپنی محنت اور سلیقہ شعاری سے اس پروگرام کو ایک منفرد رنگ بخشا۔

اس موقع پر پروفیسر ڈاکٹر خطیب اللہ خان کی خدمات پر روشنی ڈالی گئی۔ ان کے وہ اقدامات جو کالج کے لیے سنگِ میل کی حیثیت رکھتے ہیں، آج بھی اس ادارے کی پہچان ہیں۔ ان میں ڈاکٹر عبدالقدیر خان آڈیٹوریم کی تزئین و آرائش، کالج کی لائبریری اور ریڈنگ ہال کی جدید ترتیب، شجرکاری کی مہم کے تحت سینکڑوں پھل دار درختوں کا لگایا جانا، تجربہ گاہوں کی ترقی اور کمپیوٹر لیب کی بھرپور تزئین شامل ہیں۔ یہ تمام خدمات اس بات کا بین ثبوت ہیں کہ انہوں نے نہ صرف تدریسی ماحول بلکہ طلبا کے عملی و تحقیقی مستقبل کے لیے بھی سنہری راستے ہموار کیے۔

معزز مہمانوں اور سابق پرنسپل صاحبان نے اس موقع پر دونوں پروفیسر صاحبان کو پھولوں اور تحائف سے نوازتے ہوئے ان کی علمی و تربیتی خدمات کو خراجِ عقیدت پیش کیا۔ الفاظ کے موتیوں میں پروئے گئے یہ کلمات ریٹائرڈ پروفیسر صاحبان کی شخصیات کی بھرپور عکاسی کر رہے تھے۔

تقریب میں ایک اور خوش آئند لمحہ وہ تھا جب سینئر ڈائریکٹر فزیکل ایجوکیشن، قمر یار خان کو چیف ڈائریکٹر فزیکل ایجوکیشن کے عہدے پر ترقی ملنے پر دلی مبارکباد پیش کی گئی۔ اس کے ساتھ ہی نئے شامل ہونے والے لیکچرر، جناب آغا عبدالوہاب، جو معاشیات کے استاد ہیں، کو بھی پُرجوش انداز میں خوش آمدید کہا گیا۔

اسی دوران چارج لینے والے نئے پرنسپل، پروفیسر اطہر محمد خان شیروانی نے بھی اپنے خیالات کا اظہار کیا۔ انہوں نے ریٹائر ہونے والے دونوں پروفیسر صاحبان کے لیے تحسین و دعائیہ کلمات پیش کیے اور ترقی پانے والے و نئے شامل ہونے والے اساتذہ کے لیے بھی خیر مقدمی جذبات کا اظہار کیا۔ ان کے الفاظ نہ صرف عزت افزائی کے آئینہ دار تھے بلکہ آنے والے دور کے لیے امیدوں اور حوصلوں کا پیغام بھی رکھتے تھے۔

آخر میں، اساتذہ اور غیر تدریسی عملے نے ریٹائر ہونے والے دونوں پروفیسر صاحبان کو پھول، یادگاری شیلڈز اور الوداعی کلمات کے ذریعے خراجِ تحسین پیش کیا۔ مقررین نے کہا کہ ان کی بصیرت افروز اور ولولہ انگیز خدمات ہمیشہ اس ادارے کی تاریخ کے روشن باب رہیں گی اور آنے والی نسلیں ان سے استفادہ کرتی رہیں گی۔

تقریب کے اختتام پر شرکا کے لیے ظہرانے کا اہتمام کیا گیا، جس نے محفل کی فضا کو مزید خوشگوار اور یادگار بنا دیا۔ اس طرح یہ تقریب محبت، وقار اور شکر گزاری کے انوکھے امتزاج کے ساتھ ایک ایسا لمحہ تخلیق کر گئی جو مدتوں یاد رکھا جائے گا۔

ان شا اللہ تعالیٰ

(محسنِ پاکستان ڈاکٹر عبدالقدیر خان)
گورنمنٹ ڈگری سائنس و کامرس کالج لانڈھی کورنگی 6، کراچی میں گذشتہ دنوں پرنسپل، پروفیسر ڈاکٹر خطیب اللہ خان کی ریٹائرمنٹ کے موقع پر ایک پُر وقار الوداعی تقریب منعقد کی گئی، جس میں طلبا، اساتذۂ کرام اور عمائدینِ شہر نے شرکت کی اور اپنے جذبات کا بھرپور اظہار کیا۔ اس موقع پر طلبا نے بتایا کہ پرنسپل صاحب نے کالج کی بہتری کے لیے بے شمار اقدامات کیے، جن میں مختلف لیبز کی ترقی، خاص طور پر سائنس لیبز کو جدید بنانا، لائبریری کے ریڈنگ ہال کی ترتیب، کالج کے ڈاکٹر عبدالقدیر خان آڈیٹوریم کی تزئین و آرائش، اور شجرکاری کی مہم کے تحت کثیر تعداد میں پھل دار درخت لگانا شامل ہیں۔

پروفیسر ڈاکٹر خطیب اللہ خان مجاہد نے خود طلبا سے خطاب کرتے ہوئے انہیں تعلیم کی اہمیت اور ضرورت پر روشنی ڈالی اور اس بات پر زور دیا کہ استاد اور طالب علم کے درمیان مضبوط رشتہ قائم ہونا چاہیے۔ انہی اصولوں اور محنت کی بدولت آج یہ منظر دیکھنے کو ملا کہ طلبا اپنے استاد اور پرنسپل کو ان کی ریٹائرمنٹ پر محبت اور عزت کے ساتھ الوداع کہہ رہے ہیں۔

آخر میں، طلبا کی طرف سے انہیں خراجِ عقیدت پیش کیا گیا اور مختلف یادگاری تحائف کے ذریعے ان کی بصیرت انگیز اور ولولہ انگیز رہنمائی کا شکریہ ادا کیا گیا۔ اپنی تقاریر میں طلبا نے اس بات کا اعتراف کیا کہ سابق پرنسپل کی قیادت میں کالج نے علمی، اخلاقی اور تربیتی لحاظ سے بے مثال ترقی کی ہے۔ پروفیسر ڈاکٹر خطیب اللہ خان کی خدمات اور بصیرت ہمیشہ کالج کی تاریخ میں ایک روشن اور یادگار باب کے طور پر قائم رہیں گی۔

پرنسپل پروفیسر ڈاکٹر خطیب اللہ خان مجاہد کی ریٹائرمنٹ

آج 9 ستمبر 2025ء، بروز منگل
(محسنِ پاکستان ڈاکٹر عبدالقدیر خان)
گورنمنٹ ڈگری سائنس و کامرس کالج،لانڈھی کورنگی 6، کراچی کے لیے ایک تاریخ ساز دن ہے کہ ہمارے محترم پرنسپل پروفیسر ڈاکٹر خطیب اللہ خان مجاہد اپنی طویل اور روشن خدمات کے بعد ریٹائر ہو رہے ہیں۔ ان کی شخصیت علم و عمل، شفقت و محبت اور انتظامی بصیرت کا حسین امتزاج رہی ہے۔

ڈاکٹر صاحب نے اپنے دورِ نظامت میں تعلیم کو ہمیشہ اولین ترجیح دی۔ انہوں نے نہ صرف تدریسی معیار بلند کرنے کی کوشش کی بلکہ غیر تدریسی عملے کی اصلاح اور ان کے مسائل کے حل میں بھی بھرپور کردار ادا کیا۔ کالج کے نظم و ضبط کو بہتر بنانے، تدریسی ماحول کو خوشگوار بنانے اور طلبا کے لیے ہمہ وقت تعلیمی و تربیتی مواقع فراہم کرنے میں ان کی کوششیں ناقابلِ فراموش ہیں۔

ان کی سب سے نمایاں خوبی ان کی بے لوث محبت اور نرم رویہ تھا۔ وہ اساتذہ کے ساتھ خلوص و وقار کے ساتھ پیش آتے، طلبا کی حوصلہ افزائی کرتے اور غیر تدریسی عملے کے ساتھ بھی بہترین تعلقات قائم رکھتے۔ اس حسنِ سلوک نے نہ صرف کالج کے ماحول کو مثالی بنایا بلکہ ایک خاندان جیسی فضا پیدا کی۔

ڈاکٹر خطیب اللہ خان مجاہد نے اپنے عمل اور خدمت کے ذریعے یہ ثابت کیا کہ ایک حقیقی معلم اور منتظم کا کردار کیا ہونا چاہیے۔ ان کی خدمات ہمیشہ یاد رکھی جائیں گی اور آنے والے وقت میں ہم ان کے قائم کردہ معیار سے رہنمائی حاصل کرتے رہیں گے۔

ہم دعا گو ہیں کہ اللہ تعالیٰ انہیں صحت و عافیت، عزت و وقار اور لمبی عمر عطا فرمائے، اور ان کی آئندہ زندگی بھی اسی طرح خوشیوں اور کامیابیوں سے عبارت ہو۔

(محسنِ پاکستان ڈاکٹر عبدالقدیر خان)
گورنمنٹ ڈگری سائنس و کامرس کالج لانڈھی کورنگی نمبر 6

جشن عید میلاد النبی صلی اللہ علیہ وسلم
اور
یوم شہداء دفاع پاکستان
(پہلی تا نو ستمبر 2025)

شجر کاری سنت نبوی صلی اللہ علیہ وآلہ وسلم
8ستمبر 2025

صبح وشام کے پرنسپل ،اساتذہ عملے کے اراکین ، طلبہ اور خیرخواہان لانڈھی کورنگی نے کالج میں ساٹھ ناریل کے پودے لگا کر شجر کاری مہم کے تیسرے حصے کا آ غا ز کردیا۔
پرنسپل پروفیسر ڈاکٹر خطیب اللہ خان نے اس موقع پر شرکاء سے خطاب کرتے ہوئے کہا کہ شجر کاری سنت نبوی ہے اور آپ صلی اللہ علیہ وآلہ وسلم نے درخت لگائے انکی حفاظت اور نگہداشت کرنے کی تلقین فرمائی ۔ ہمیں چاہیے کہ ہم ماحولیاتی تبدیلیوں کے لئے زیادہ سے زیادہ شجر کاری میں حصہ لیں تاکہ جو ماحول انسانوں نے خراب کیا ہے اسکو ٹھیک کیا جاسکے۔ اور جگہ جگہ دستر خوان سجانے سے بہتر ہے کہ پھلدار درخت لگائے جائیں تاکہ لوگوں کو انکی عزت نفس مجروح کیے بغیر پیٹ بھرنے کی ضرورت کو پورا کیا جاسکے۔
پہلے حصے میں پاکستان فرنیچر ایسوسی ایشن نے اپنے وائس چیئرمین رعنا وحید صاحب کی سرکردگی میں ڈھائی سو پھلوں کے پودے لگائے۔ جبکہ دوسرے فیز میں ASAبینک نے یوم آزادی کے موقع پر 50 پھلوں کے پودے لگائے۔
تیسرے حصے میں کالج اساتذہ نے اپنی طرف سے ساٹھ ناریل کے پودے لگا کر جنت اقبال اور کرکٹ گراؤنڈ کی پوری بائونڈری کو سر سبز شاداب کردیا۔
آ خر میں امت کے شہداء ومجاہدین کے لئے دعاکی گئی

(محسنِ پاکستان ڈاکٹر عبدالقدیر خان) گورنمنٹ ڈگری سائنس و کامرس کالج،لانڈھی کورنگی 6، کراچی

جشن عید میلاد النبی صلی اللہ علیہ وآلہ وسلم
اور
شہداء یوم دفاع پاکستان تقریبات
یکم تا نو ستمبر 2025

4ستمبر2025
جشنِ عید میلاد النبی ﷺ کے موقع پر مسابقۂ تلاوت و نعت خوانی کا انعقاد کیا گیا۔ اس پرنور محفل میں طلبا نے دلنشیں انداز میں تلاوتِ کلامِ پاک اور عقیدت و محبت سے لبریز نعتیہ کلام پیش کیے۔

ان مقابلوں میں منصفین کے فرائض پروفیسر سید کاشف علی، پروفیسر عبدالواحد اور پروفیسر آغا عبدالوہاب نے انجام دیے، جبکہ پروفیسر ڈاکٹر عبدالقادر ہاشم نے ہمیشہ کی طرح تقریب کی میزبانی نہایت خلوص اور اپنے روایتی دلکش لب و لہجے میں ادا کی، جس سے محفل کا وقار اور تاثیر مزید بڑھ گئی۔

تقریب سے خطاب کرتے ہوئے کالج کے وائس پرنسپل پروفیسر اطہر محمد خان شیروانی صاحب نے کہا کہ تلاوت اور نعت خوانی کے مواقع ادب و احترام کے متقاضی ہیں۔ طلبا کو چاہیے کہ ان مواقع پر سر ڈھانپیں اور ٹوپی پہن کر عقیدت کے ساتھ نعت یا تلاوت پیش کریں۔ انہوں نے مزید کہا کہ دین و ادب کا حسین امتزاج ہی ہمارے کالج کی پہچان ہے۔

اس موقع پر یومِ دفاعِ پاکستان کی مناسبت سے وطنِ عزیز کے شہدا اور محافظوں کو خراجِ عقیدت پیش کیا گیا اور ملک کی سلامتی کے لیے خصوصی دعائیں کی گئیں۔

آخر میں پرنسپل پروفیسر ڈاکٹر خطیب اللہ خان نے خطاب کرتے ہوئے کہا کہ عید میلاد النبی ﷺ اور یومِ دفاعِ پاکستان (چھ ستمبر) کا ایک ساتھ آجانا ہمیں اس حقیقت کی یاد دہانی کرواتا ہے کہ رسول اکرم ﷺ نے بطور قائد اور بطور سپہ سالار اپنے ارشادات و احکامات کے ذریعے امت کو قیادت، اتحاد اور دفاع کی روشن مثالیں عطا کیں۔ انہوں نے مزید کہا کہ طلبا کو چاہیے کہ وہ نبی کریم ﷺ کی سیرت سے رہنمائی حاصل کرتے ہوئے دین و وطن کی خدمت کو اپنا نصب العین بنائیں۔

تقریب کے اختتام پر مسابقوں میں شریک طلبا کو اسناد تقسیم کی گئیں، جبکہ اول، دوم اور سوم پوزیشن حاصل کرنے والے نمایاں طلبا کو نقد انعامات سے نوازا گیا۔ بعد ازاں تمام شرکا میں شیرینی بھی تقسیم کی گئی، جس سے محفل کی خوشی اور رونق دوبالا ہو گئی۔

محفل میں اساتذہ اور طلبا کی بڑی تعداد شریک ہوئی اور فضا عشقِ رسول ﷺ اور جذبۂ حب الوطنی کے ولولہ انگیز نعروں سے گونجتی رہی۔

میگزین "کارواں" — (محسنِ پاکستان ڈاکٹر عبدالقدیر خان) گورنمنٹ ڈگری سائنس و کامرس کالج لانڈھی کورنگی 6، کراچی، کا یہ پہلا آن لائن شمارہ ہے، جو اساتذہ اور طلبا کی تخلیقی و علمی کاوشوں کا حسین امتزاج ہے۔ اس میگزین میں شامل مضامین نہ صرف طلبا کی فکر و صلاحیتوں کا مظہر ہیں بلکہ اساتذہ کی رہنمائی اور تجربات کا عکس بھی ہیں۔ پرنسپل پروفیسر ڈاکٹر خطیب اللہ خان کی سرپرستی اور بطور مدیر پروفیسر سید کاشف علی کی رہنمائی میں شروع ہونے والے اس منصوبے کو عملی شکل دینے میں پروفیسر ڈاکٹر عبدالقادر ہاشم نے بطور معاون مدیر کلیدی کردار ادا کیا۔ کمپوزنگ، ترتیب اور تدوین سے لے کر اجرا تک کے تمام مراحل میں ان کی محنت اور لگن نمایاں ہے۔ "کارواں" کا آن لائن اجرا فیس بک پر کیا جا رہا ہے، جہاں یہ ادارے کی علمی و ادبی سرگرمیوں کا روشن نشان بنے گا۔ 👇🏽👇🏽👇🏽

Online Karvan 2024-25.pdf

(محسنِ پاکستان ڈاکٹر عبدالقدیر خان)
گورنمنٹ ڈگری سائنس و کامرس کالج لانڈھی کورنگی نمبر 6

جشن عید میلاد النبی صلی اللہ علیہ وسلم
اور
یوم شہداء دفاع پاکستان
(پہلی تا نو ستمبر 2025)
یکم ستمبر 2025

کالج میں آج یعنی پہلی ستمبر 2025 بروز پیر، ڈاکٹر عبدالقدیر خان آڈیٹوریم ایک پُروقار تقریب کا گواہ بنا۔ اس یادگار تقریب کی نظامت کے فرائض پروفیسر ڈاکٹر عبدالقادر ہاشم نے نہایت خوش اسلوبی اور وقار کے ساتھ انجام دیے۔

تقریب دو اہم پہلوؤں سے مزین تھی۔

ایک تو یہ کہ... پروفیسر ڈاکٹر ممتاز عمر کو، جو دو برس قبل تدریسی خدمات سے سرکاری طور پر ریٹائر ہو چکے ہیں، تمغۂ امتیاز کے لیے منتخب کیے جانے پر ان کے اعزاز میں ایک یادگاری شیلڈ پیش کی گئی۔ اگرچہ وہ ریٹائر ہو چکے ہیں، مگر حقیقت یہ ہے کہ استاد یا پروفیسر کبھی ریٹائر نہیں ہوتے، ان کی علمی روشنی ہمیشہ آنے والی نسلوں کو منور کرتی رہتی ہے۔ اس موقع پر پروفیسر ڈاکٹر ممتاز عمر نے خطاب کرتے ہوئے کہا کہ انہوں نے بصارت سے محرومی کے باوجود اپنی علمی و تحقیقی کاوشیں جاری رکھیں۔ انہوں نے کہا کہ پی ایچ ڈی کرنے والے بخوبی جانتے ہیں کہ یہ کتنا صبر آزما مرحلہ ہوتا ہے۔ انہوں نے اپنے والدین کو خراجِ عقیدت پیش کیا جنہوں نے نابینا ہونے کے باوجود انہیں تعلیم کے زیور سے آراستہ کیا۔ پروفیسر ڈاکٹر ممتاز عمر نے کہا کہ انہوں نے اپنی محرومی کو معذوری نہیں سمجھا بلکہ حوصلے اور عزم سے آگے بڑھتے ہوئے پی ایچ ڈی جیسی اعلیٰ ڈگری حاصل کی۔

اس موقع پر پروفیسر ڈاکٹر عبدالقادر ہاشم نے بھی ان کی علمی و تدریسی خدمات کو سراہتے ہوئے کہا کہ پروفیسر ڈاکٹر ممتاز عمر کی جدوجہد اور کامیابیاں ادارے کے لیے ایک روشن مثال ہیں۔ انہوں نے مزید کہا کہ اگرچہ یہ تمغۂ امتیاز پروفیسر ڈاکٹر ممتاز عمر کی ذاتی کامیابی ہے، لیکن اس اعزاز سے پورا کالج بھی فخر محسوس کر رہا ہے۔ یہ اعزاز نہ صرف پروفیسر ڈاکٹر ممتاز عمر کے لیے باعثِ افتخار ہے بلکہ پورے کالج کے وقار اور علمی شناخت میں اضافہ ہے۔

جب پروفیسر ڈاکٹر ممتاز عمر کو شیلڈ پیش کی گئی تو اس موقع پر آڈیٹوریم حاضرین کی پرجوش تالیاں اور خوشی کے اظہار سے گونج اٹھا۔

تقریب کا دوسرا پہلو کالج کے پہلے آن لائن میگزین کا اجرا تھا، جسے تعلیمی و تخلیقی سرگرمیوں کی طرف ایک خوش آئند سنگِ میل قرار دیا گیا۔ اس میگزین میں اساتذہ اور طلبہ کے مضامین بھی شامل کیے گئے ہیں، جو ادارے کی علمی و ادبی سرگرمیوں کا روشن عکس ہیں۔

میگزین کے اجرا کے موقع پر بھی شرکاء نے پُرجوش انداز میں خوشی کا اظہار کیا اور اسے کالج کے لیے ایک یادگار کامیابی قرار دیا۔

اختتامی خطاب میں پرنسپل پروفیسر ڈاکٹر خطیب اللہ خان نے پروفیسر ڈاکٹر ممتاز عمر کو مبارک باد پیش کی اور ان کی خدمات کو سراہا۔ ساتھ ہی انہوں نے کالج کے پہلے آن لائن میگزین کے اجرا کو ادارے کے وقار میں اضافہ قرار دیا۔ انہوں نے کہا کہ اس میگزین کی کمپوزنگ سے لے کر ترتیب و تدوین تک کی تمام تر ذمہ داری پروفیسر ڈاکٹر عبدالقادر ہاشم نے جس محنت اور لگن سے ادا کی، وہ یقیناً لائقِ تحسین ہے۔

مزید برآں، پرنسپل صاحب نے آڈیٹوریم کی تزئین و آرائش کے حوالے سے چیف ڈائریکٹر فزیکل ایجوکیشن جناب قمر یار خان اور سجاوٹ و زیبائش کے ضمن میں پروفیسر ضیاالرحمٰن خلجی کی کاوشوں کو سراہتے ہوئے کہا کہ ان کی محنت نے تقریب کو مزید باوقار اور یادگار بنا دیا۔

تقریب کا اختتام دعائیہ کلمات پر ہوا۔

(محسنِ پاکستان ڈاکٹر عبدالقدیر خان)
گورنمنٹ ڈگری سائنس و کامرس کالج، لانڈھی کورنگی 6، کراچی

یوم آذادی و معرکہ حق
1 آگست تا 14اگست 2025
یکم اگست 2025
1. اسمبلی سے خطاب فرماتے ہوئے پرنسپل پروفیسر ڈاکٹر خطیب اللہ خان نے آذادی کی اہمیت پر روشنی ڈالی اور تحریک پاکستان میں طلبہ کے کردار کو اجاگر کیا ۔ آذادی کبھی بھی پلیٹ میں سج کر نہیں ملتی اس کے لئے جان مال اور وقت کی قربانی دینی پڑتی ہے۔ پاکستان ہمارے بزرگوں کی قربانیوں کا ثمر ہے اسکو ہمارے بزرگوں نے فرش سے عرش تک پہنچایا لیکن آج عاقبت نااندیش رہنماؤں نے ہمیں بھکاری بنا دیا ہے
2. قوم نے یہ ثابت کردیا ہے کہ وہ اپنے دفاع کے بارے میں پر عزم ہے اور جس طرح محسن پاکستان ڈاکٹر عبد القدیر خان نے دفاع وطن کے بارے میں سوچا اور باوجود مالی تنگی کے اور نامساعد حالات کے اپنے ہدف کو حاصل کرلیا ان شاءاللہ قوم بنیان مرصوص بن جائے گی اور یکسو ہو کر اپنے ہر ہدف کو حاصل کرنے میں کامیاب ہو جائے گی۔ ان شاءاللہ
3. بڑے پیمانے پر صفائی مہم کا آغاز کیا گیا جس میں بھاری مشینری کا بھی استعمال کیا گیا
4. پاکستان فرنیچر ایسوسی ایشن نے گرین پاکستان مہم کے تحت پورے کالج کو پھل دار درختوں سے سرسبز کرنے کا عزم کیا ہے اس عمل کا آغاز پودے لگا کر کردیا ہے۔ پاکستان فرنیچر ایسوسی ایشن کے سینئر نائب صدر رعنا وحید صاحب نے ایسوسی ایشن کے ممبران کی کثیر تعداد کے جھرمٹ میں اساتذہ کرام اسٹاف اور اہل علاقہ کی موجودگی میں اس مہم کا آغاز کیا ۔
5. شہدا کی یاد میں پودے لگائے گئے فاتحہ خوانی کی گئی

پرنسپل پروفیسر ڈاکٹر خطیب اللہ خان ڈیسکوں کی مرمت کا معائنہ کرتے ہوئے

اساتذہ کرام زمانۂ طالب علمی کی یادیں تازہ کرتے ہوئے

(محسنِ پاکستان ڈاکٹر عبدالقدیر خان)
گورنمنٹ ڈگری سائنس و کامرس کالج، لانڈھی کورنگی 6، کراچی

آج کی چند تصاویر ادارے کی ترقی اور تعلیمی ماحول کی بہتری کی عملی جھلک پیش کر رہی ہیں۔ محترم اساتذہ کرام کے ہمراہ مختلف کلاس رومز کا دورہ کیا گیا، جہاں حالیہ مرمت اور نئے فرنیچر کی تزئین کا کام جاری ہے۔

دورے کے دوران اساتذۂ کرام کو ڈیسک پر بیٹھ کر اپنے تعلیمی ایّام کی یادیں تازہ کرتے دیکھا جاسکتا ہے۔ ایک تصویر میں پرنسپل پروفیسر ڈاکٹر خطیب اللہ خان، اساتذہ کو کچھ سمجھاتے اور رہنمائی کرتے ہوئے بھی نظر آ رہے ہیں۔

اس سے قبل کالج کے ڈاکٹر عبدالقدیر خان آڈیٹوریم میں ایک اسٹینڈنگ کانفرنس منعقد کی گئی، جس کی روداد اہم تعلیمی پہلوؤں کی عکاس تھی۔

مزید برآں، آڈیٹوریم کی دیواروں کو ایم ایم عالم اور تحریکِ پاکستان کے موضوعات سے مزین کرنے کی تجویز زیرِ غور ہے، تاکہ طلبا کو ہماری قومی تاریخ اور تہذیبی ورثے سے جوڑا جا سکے۔

ان شاء اللہ، یہ تمام سرگرمیاں ادارے کے وقار میں اضافہ اور تعلیمی ماحول میں بہتری کا ذریعہ ثابت ہوں گی۔