Jamia Arbia Siddiquia - Orangi Town

اسلام ہمیں اپنے والدین، عزیز و اقارب اور پڑوسیوں کے ساتھ حسن سلوک کی ترغیب دیتا ہے۔

ہمیں اپنے اخلاق کو بہتر بنانا چاہیے۔ سب سے بڑھ کر اپنے گھر والوں کے لیے رحم دل بن جائیں۔ اپنے والدین، بیوی بچوں سب سے محبت سے بات کریں تو گھر خوشیوں کا گہوارہ بن جائے گا۔

اللّٰه کریم بہت ہی رحیم ہے۔ رحم کرنے کو پسند فرماتے ہیں۔ اور جو کچھ نرمی پر عطا فرماتے ہیں وہ سختی پر عطا نہیں فرماتے۔

جب ہم دوسروں کے ساتھ نرمی سے پیش آئیں گے تو اللّٰه کریم بھی ہم پر رحم فرمائیں گے۔ دعا ہے کہ اللّٰه کریم ہم سب کو اچھے اخلاق والا بنائیں، آمین ثم آمین یا رب العالمین۔

مریم حسن

مسواک کرنا سنت ہے۔ یہ دانتوں کی صفائی کے ساتھ اللہ تعالیٰ کی خوشنودی حاصل کرنے کا ذریعہ ہے۔

نبی کریم ﷺ مسواک کی بہت تاکید فرمایا کرتے تھے۔ اس حوالے سے احادیث میں فضائل موجود ہے۔ ایک حدیث مبارکہ میں ہے کہ "اگر مجھے امت کے مشقت میں پڑ جانے کا اندیشہ نہ ہوتا تو میں انہیں ہر نماز کے وقت مسواک کرنے کا حکم کرتا۔" صحیح بخاری: 887

المختصر! مسواک کے طبی و روحانی بہت فوائد ہیں۔ ذہن تیز، حافظہ قوی ہوتا ہے۔ تمام انبیاء کی سنت ہے۔ اگر آپ مسواک کو اپنی زندگی کا حصہ بنا لیں، اس کی برکتیں خود اپنی زندگی میں محسوس کریں گے۔ اور اپنے ساتھ ساتھ دوسروں کو بھی تلقین کریں گے، ان شاءاللّٰه۔

مریم حسن

اگر آپ دلوں کو جوڑنا چاہتے ہیں۔ اور آپس میں محبت پیدا کرنا چاہتے ہیں تو ایک دوسرے کو ہدیہ دینے کی کوشش کیا کریں۔

ہدیہ دینا نا صرف دلوں سے رنجش و کینہ کو دور کرتا ہے بلکہ ایک دوسرے کو خوش کرنے کے ساتھ ساتھ رضائے الٰہی کے حصول کا بھی ذریعہ ہے۔

ہدیہ دیتے ہوئے اصل خلوص ہوتا ہے۔ گفٹ میں چھوٹی چیز ہی دی جائے لیکن دینے کی کوشش ضرور کرنی چاہیے۔ سب پہلے قریبی رشتے داروں کو ہدیہ دینا چاہیے تاکہ آپ کو صلہ رحمی کا ثواب ملے گا۔

عید قریب آرہی ہیں تو ہو سکے تو ضرور اپنے والدین، اور دیگر عزیزوں کو ہدیہ دیجیے اس خوشی کے موقع پر، ان کے چہروں پر مسکراہٹیں بکھیرنے کا آپ سبب بن جائیں گے۔ محبت و صلہ رحمی کا ثواب الگ، اور رزق میں فراوانی اور عمر میں درازی کا سبب بھی بنتی ہیں۔

مریم حسن

ہمیں اللّٰه کریم نے روزہ رکھنے کی صورت میں سحری و افطاری جیسی عظیم نعمتوں و رحمتوں سے نوازا ہے۔ جو روزہ رکھتے ہیں وہی ان اوقات سے لطف اندوز ہو سکتے ہیں۔

یہ ہم میں اور اہل کتاب کے روزوں میں فرق کو بھی ظاہر کرتی ہیں۔
حضرت عمرو بن العاص سے مروی ہے کہ آپ صلی اللّٰه علیہ وسلم نے ارشاد فرمایا: ہمارے اور اہل کتاب کے روزوں کے درمیان فرق صرف سحری کھانا ہے۔ (صحیح مسلم : 836)

المختصر! سحری ضرور کریں۔ تاکہ سنت کا ثواب بھی ملے اور برکت کا حصول ہو۔ اس کے ساتھ ہی جب ہم سحری کرتے ہیں تو ہمارے اندر اگلے دن روزہ رکھنے کے لیے طاقت پیدا ہو جاتی ہیں۔
اللّٰه کریم سحری کی برکت سے ہم سب پر رحمتیں نازل فرمائیں، آمین ثم آمین یا رب العالمین۔

مریم حسن

روزہ دار کے لیے دو خوشیاں ایک تو ایک افطار کی خوشی۔۔ اور دوسرا رب سے ملاقات کے وقت۔

ماہ رمضان میں، جب روزے دار روزہ رکھ کر، سب حلال چیزوں سے صرف اللّٰه کے لیے رکتے ہیں۔ تو اللّٰه کریم اس عمل سے اتنے خوش ہو جاتے ہیں کہ ارشاد فرماتے ہیں: "روزہ صرف میرے لیے ہے اور اس کا اجر میں خود دوں گا۔"

قیامت کے دن جب لوگ حساب کتاب میں مشغول ہوں گے تو کچھ لوگ عرشِ الٰہی کے سائے تلے کھا پی رہے ہوں گے۔ لوگ پوچھیں گے: "یہ کون ہیں!!؟" جواب ملے گا: "یہ وہ لوگ ہیں جو دنیا میں روزے رکھا کرتے تھے"

پس اس ماہ کی ساعات کو قیمتی بنانے کی کوشش کریں'۔ کیونکہ سب روزے داروں کے لیے ایسی خوشیاں ہے جس کا اجر اللہ کے پاس ہے، ان شاءاللّٰه۔

مریم حسن

کبھی کبھار انسان پریشانی، یا غم کی ایسی کیفیات سے گزرتا ہے کہ میں وہ خود کو بے بس محسوس کرتا ہے۔

دنیا کی ساری نعمتیں ہونے کے باوجود، وہ غم/صدمہ جو اسے لاحق ہوتا ہے اسے اندر تک جلا دیتا ہے۔ اسے سمجھ نہیں آتی کہ آیا ان سب سے نکلیں!!؟
کیسے میری روح کو سکون ملے!!؟
کیسے میری زندگی سے یہ پریشانی ختم ہو!!!
لیکن ان سب سے نکلنے کا راستہ اسے نظر نہیں آرہا ہوتا!
ایسے میں آیا کیا کیا جائیں کہ ان سب سے بآسانی نکلا جا سکیں!!؟

ایسے میں کثرت استغفار کو اپنے اوپر لازم کر لیجیے؛
مشکوٰۃ کی حدیث مبارکہ:
"جو استغفار کو لازم کر لیتا ہے اللّٰه تعالیٰ ہر تنگی سے اسے نجات عطا فرما دیتے ہیں۔"

یعنی آپ جس بھی مشکل میں ہوں گے اگر کثرت سے استغفار پڑھیں گے تو کیسی ہی مشکل ہو، یا کیسا ہی شدید غم جو جان کو گھلا دیتا ہے، ان سب سے اللّٰه کریم نکال دیں گے۔ اور ایسی جگہ سے رزق ملتا ہے انسان کے وہم و گمان میں بھی نہیں ہوتا۔

المختصر! جو بھی غم ہو آپ استغفار کی کثرت کریں، اللّٰه ہر غم سے نجات عطا فرما دیں گے، ان شاءاللّٰه تعالیٰ۔

مریم حسن

اگر آپ بروز قیامت نبی کریم ﷺ کے قریب ہونا چاہتے ہیں تو پیارے نبی کریم ﷺ پر کثرت سے درود شریف پڑھنا خود پر لازم کر لیجیے۔

دردو شریف کو کثرت سے پڑھنے کی برکت سے صرف قربت ہی نہیں ملے گی بلکہ جو درودشریف کو کثرت سے پڑھے گا اللّٰه کریم اس کے تمام غموں کے لیے کافی ہو جائیں گے۔ گناہوں کی مغفرت ہوتی ہے۔

اسی حوالے سے مشہور صحابی رسول حضرت ابی بن کعب رضی اللہ عنہ کا واقعہ ہے کہ انھوں نے رسول اللہ ﷺ سے عرض کیا: اے اللہ کے رسول صلی اللہ علیہ وسلم! میں آپ پر کثرت سے درود بھیجتاہوں، اپنی دعا میں کتنا وقت درود کے لیے خاص کروں؟ آپ ﷺ نے فرمایا: جتنا تم چاہو۔ کہتے ہیں کہ میں نے عرض کیا: کیا ایک چوتھائی صحیح ہے؟ آپ ﷺ نے فرمایا: جتنا تم چاہو، لیکن اگر اس سے زیادہ کرو تو تمہارے لیے اور اچھاہے! میں نے عرض کیا: نصف وقت مقرر کرلوں؟ آپ ﷺ نے فرمایا: جتنا تم چاہو، لیکن اس سے زیادہ کرو تو تمہارے لیے اور اچھا ہے! میں نے عرض کیا: دو تہائی وقت مقرر کردوں؟ آپ ﷺ نے فرمایا: جتنا تم چاہو، لیکن اس سے زیادہ کرو تو تمہارے لیے ہی بہتر ہے۔میں نے عرض کیا: میں اپنی ساری دعا کا وقت درود کے لیے وقف کرتاہوں! اس پر آپ ﷺ نے فرمایا: یہ تیرے سارے دکھوں اور غموں کے لیے کافی ہوگا، اور تیرے گناہوں کی بخشش کا باعث ہوگا۔"

الغرض آپ کچھ بھی حاصل کرنا چاہتے ہیں تو دردو شریف کو اپنی زندگی کا معمول بنا لیجئے۔ بروز قیامت نبی کریم ﷺ کا قرب نصیب ہوگا۔ اللّٰه آپ کی تمام پریشانیاں دور کر دیں گے۔ آپ کے تمام غموں کے لیے کافی ہو جائیں گے۔ پس درودشریف کی کثرت کیجئے پریشانیاں آپ کی زندگی سے دور ہو جائیں گی، ان شاءاللّٰه۔

مریم حسن