VTI Jhelum

وزیراعلیٰ پنجاب کے خوشحال پنجاب وژن کے تحت گورنمنٹ ووکیشنل ٹریننگ انسٹیٹیوٹ ٹاہلیانوالہ میں کمپیوٹر ہارڈ ویئر، نیٹ ورکنگ اور سی سی ٹی وی کورسز، ماہانہ وظیفہ اور انٹرنیشنل ڈپلومہ بھی دیا جائے گا
جہلم (نیوز لائن):وزیراعلیٰ پنجاب مریم نواز شریف کے ہنر مند نوجوان، خوشحال پنجاب وژن کے تحت ڈپٹی کمشنر جہلم میر رضا اوزگن کی خصوصی ہدایت پر ٹاہلیانوالہ جہلم میں واقع گورنمنٹ ووکیشنل ٹریننگ انسٹیٹیوٹ میں نوجوانوں کے لیے کمپیوٹر ہارڈ ویئر اینڈ نیٹ ورک پروفیشنل اور سی سی ٹی وی پروفیشنل کورسز میں مفت داخلوں کا آغاز کر دیا گیا ہے۔
ضلعی انتظامیہ کے مطابق حکومت پنجاب کے اس انقلابی پروگرام کا مقصد نوجوانوں کو آئی ٹی کے شعبے میں جدید تکنیکی مہارتیں فراہم کر کے انہیں باعزت روزگار کے قابل بنانا ہے۔ ڈپٹی کمشنر جہلم میر رضا اوزگن نے بتایا کہ ان کورسز کے دوران نوجوانوں کو کمپیوٹر و لیپ ٹاپ ریپیئرنگ، نیٹ ورکنگ اور سی سی ٹی وی کیمرہ انسٹالیشن جیسے اہم شعبوں میں پیشہ ورانہ تربیت دی جائے گی۔
انہوں نے مزید بتایا کہ وزیر اعلیٰ پنجاب کے خصوصی پروگرام کی نمایاں خصوصیت یہ ہے کہ کورس مکمل کرنے والے کامیاب امیدواروں کو مفت انٹرنیشنل ڈپلومہ فراہم کیا جائے گا، جبکہ دورانِ تربیت طلبہ کو ماہانہ وظیفہ، مفت کتب اور ٹریننگ میٹریل بھی مہیا کیا جائے گا۔
ڈپٹی کمشنر کے مطابق کورس کا دورانیہ 12 ماہ کی فنی تربیت اور 2 ماہ کی عملی آن جاب ٹریننگ پر مشتمل ہے تاکہ نوجوان عملی میدان میں مارکیٹ کی ضروریات کے مطابق خود کو تیار کر سکیں۔ میٹرک یا اس سے زائد تعلیم رکھنے والے نوجوان اس سنہری موقع سے فائدہ اٹھانے کے لیے نزد مرکزی جنازہ گاہ ٹاہلیانوالہ جہلم میں واقع ادارے سے فوری رابطہ کریں یا مزید معلومات کے لیے 0314-5520800 پر رابطہ کیا جا سکتا ہے۔