Dr. Riffat Iqbal Khan -Poet/writer

26/06/2016

کل نفس ذائقۃ الموت
سب کی آنکھوں نے دیکھا
شفق شام کے رنگ میں
موت کی زردیاں
آج پھر گھل گئیں
ہم نے کس حوصلے سے سنا
شورِ گریہ ، صدائے بکا
صحن میں چارپائی پہ جب
ہم نے رکھا تھا اک نوجواں
ساکت و سرد مٹی کا
ستواں بدن
گرد بیٹھی ہوئی پیرہ زن ، لؑعبتیں
بال بکھرائے گریہ کناں
اور چوپال میں مرنے والے کے ساتھی ، اعزّا ، شناسا
سبھی دل گرفتہ ، سروں کو جھکائے
گراں بارِ غم
آسمانوں پہ بیٹھا خدا
موت اور زندگی کا خدا
جو کبھی اس تماشائے پیہم سے تھکتا نہیں
جانتا ہے
فنا کی قدیمی کہانی کے انجام کو
موت کی یہ خلش
حجلۂ جان و دل سے نکلتی نہیں
روپ بدلے ہوئے
بستیوں ، راستوں ، کھیتیوں ، آنگنوں
کارخانوں ، فضاؤں میں رقصاں
فقط مرگ کا راج ہے
چار سو مرگ ہے
عصرِ موجود کے سب مکیں
زندگی کے سزاوار
آبِ بقا ڈھونڈتے ڈھونڈتے
ارتقا کے حسیں خواب کے زانوئے گرم پر
سر ٹکائے ہوئے
سرد ہو جائیں گے
ایک دن آئے گا
ہم بھی مر جائیں گے
( رفعت اقبال )

10/02/2016

23/01/2016

وہی اہلِ دنیا کی مصلحت ، وہی صبح ہے وہی شام ہے
وہی اہلِ درد کی بے بسی ، وہی خواجگی وہی بام ہے
وہ جو آبِ زر سے لکھے گئے وہ قصص تو دیمکیں کھا گئیں
وہ جو خونِ دل سے لکھا گیا ، وہی حرف حرفِ دوام ہے
کسی قصرِ سنگِ سفید میں وہ معاہدے بھی لکھے گئے
مری نسلِ نو کو گلہ رہا ، وہ غلام ابنِ غلام ہے
جو سمندروں پہ گزر گئی مرے ماہ تاب کو کیا خبر
وہ تو رقصِ نور میں ہے مگن ، اُسے اپنے کام سے کام ہے
کسی گل بدن کی عطا سے ہے دلِ با مراد سنبھال رکھ
تُو فقیرِ شہرِ جمال ہے ، ترا زخم زخمِ دوام ہے
اے ہوائے در بہ دری ہمیں ابھی اور کتنا ستائے گی
نہ تو آسماں پہ سکوں تجھے ، نہ ہی خاک داں پہ قیام ہے
( رفعت اقبال )
Wahi Ehle duniya ki maslahat , wahi sub,h hay wahi sham hay
Wahi ehle dard ki bebasi , wahi khajagi wahi baam hay
Wo jo aabe zar se likhay gaey , wo qasas tou deemakein kha gaen
wo jo khoone dil se likha giya , wahi harf harfe dawaam hay
Kisi qasre sange safaid mein wo muahade bhi likhay gaey
miri nasle nou ko gila raha , wo ghulam ibne ghulam hay
jo samndarun pa guzar gaei , miray maah taab ko kia khabar
wo tou raqse noor mein hay magan , usay apne kaam se kaam hay
Kisi gul badan ki ata se hay , dile bamurad sanbhaal rakh
Too faqeere shehre jamal hay , tira zakhm zakhme dawaam hay
aey hawaey dar ba dari hamein abhi aor kitna sataey gi
na tou aasa,n pa suku,n tujhy na hi khaakda,n pa qiyam hay
( Rifat Iqbal )

26/12/2015

جزائے کارِ محبت ہمیں ملے نہ ملے
وہ وقت آئے زمانہ تجھے سلام کرے
( رفعت اقبال )

23/12/2015

( نعتیہ اشعار )
جان و دل و نگاہ کا ان پر سلام ہے
جن کا کلامِ خاص خدا کا کلام ہے
اُس پر نثار نعمتیں دونوں جہان کی
حاصل جسے بھی نسبتِ خیر الانام ہے
جانے ہے اور کون بجز ذاتِ کبریا
کیسی ہے ان کی شان اور کیسا مقام ہے
قاسم ہیں دوجہان کی سب نعمتوں کے آپ
دستِ سخا و جُود میں سارا نظام ہے
( رفعت اقبال )

29/11/2015

Author of Khird Afrozi Aur Raushan Khayali