14/09/2026
وفاقی دارالحکومت میں غربت اور بے روزگاری کا ایک اور دلخراش منظر سامنے آگیا، جہاں کرایہ ادا نہ ہونے پر مالکِ مکان نے مبینہ طور پر ایک خاتون کو بچوں سمیت گھر سے نکال دیا، جس کے بعد بے سہارا خاندان پولی کلینک ہسپتال کے سامنے گرین بیلٹ پر رہنے پر مجبور ہوگیا۔
متاثرہ خاتون کے مطابق وہ ضیاء مسجد کے علاقے میں کرائے کے مکان میں رہائش پذیر تھی، تاہم مالی مشکلات کے باعث کرایہ ادا نہ ہوسکا۔ خاتون کا کہنا ہے کہ اس کے شوہر کا پیشہ رنگ سازی ہے، مگر گزشتہ کچھ عرصے سے انہیں کام نہیں مل رہا، جس کے باعث گھر کے اخراجات چلانا بھی مشکل ہوگیا۔
گھر سے بے دخل کیے جانے کے بعد خاتون اپنے بچوں سمیت سڑک کنارے کھلے آسمان تلے زندگی گزارنے پر مجبور ہے۔ معصوم بچوں کے ہمراہ گرین بیلٹ پر قیام نے وفاقی دارالحکومت میں فلاحی نظام اور مستحق خاندانوں کے لیے حکومتی معاونت کے دعوؤں پر بھی سوالات اٹھا دیے ہیں
