Scholar Online Quran Academy

محسن نقوی کی شاندار نظم

[موجِ ادراک]

یہ دشت، یہ دریا، یہ مہکتے ہوئے گلزار
اِس عالمِ امکاں میں ابھی کچھ بھی نہیں تھا
اِک ”جلوہ“ تھا، سو گُم تھا حجاباتِ عدم میں
اِک ”عکس“ تھا، سو منتظرِ چشمِ یقیں تھا

یہ موسمِ خوشبو، یہ گہر تابیِ شبنم
یہ رونقِ ہنگامۂ کونین کہاں تھی؟
گلنار گھٹاؤں سے یہ چھنتی ہوئی چھاؤں
یہ دھوپ، دھنک، دولتِ دارین کہاں تھی؟

یہ نکہتِ احساس کی مقروض ہوائیں
دلدارئ الہام سے مہکے ہوئے لمحات
دوشیزۂ انفاس کی تسبیح کے تیوَر
کس کنجِ تصور میں تھے مصروفِ مناجات؟

”شیرازۂ آئینِ قِدَم“ کے سبھی اِعراب
بے رَبطئ اجزائے سوالات میں گم تھے
یہ رنگ، یہ نیرنگ، یہ اورنگ، یہ سب رنگ
اِک پردۂ افکار و خیالات میں گُم تھے!

یہ پھول، یہ کلیاں، یہ چٹکے ہوئے غنچے
بے آب و ہَوا، تشنۂ آیات و مناجات
یہ برگ، یہ برکھا، یہ لچکتی ہوئی شاخیں
بیگانۂ آدابِ سحر، بے نمِ جذبات

کہسار کے جھرنوں سے پھسلتی ہوئی کرنیں
اِک خوابِ مسلسل کے تحیر میں نہاں تھیں!
چپ چاپ فضاؤں میں مچلتی ہوئی لہریں
ماحول کے بے نطق تصور پہ گراں تھیں

غم خانۂ ظلمت، نہ کوئی بزمِ چراغاں
خورشید نہ مہتاب، نہ انجم نہ کواکب
شورش گہِ ”کُن“ تھی نہ یہ آوازِ دما دم
تفریقِ مَن و تُو نہ مساوات و مراتب

ہنگامۂ شادی نہ کوئی مجلسِ ماتم!
یلغارِ حریفاں نہ جلوسِ غمِ یاراں
آنکھوں میں کوِئی زخم نہ سینے میں کوئی چاک
انبوہِ رقیباں نہ رُخِ لالہ عذاراں

اَفلاس کا احساس نہ پندارِ زَر و سیم
بخشش کے تقاضے نہ یہ دریوزہ گری تھی
پتھر کا زمانہ تھا نہ شیشے کے مکاں تھے
یہ عقل کا دستور نہ شوریدہ سری تھی

مقتول کی فریاد نہ آوازۂ قاتل
مقتل تھے نہ شہ رگ میں لہو تھا، نہ ہوس تھی
دربار، نہ لشکر، نہ کوئی عدل کی زنجیر
دل تھا، نہ کہیں تیرگیِ کنجِ قفس تھی

رہبر تھے، نہ منزل تھی، نہ رستے، نہ مسافر!
قندیل، نہ جگنو، نہ ستارے، نہ گہر تھے
یہ اَبیض و اَسود، نہ اَبّ و جَد، نہ زَر و سیم
اِنساں تھے نہ حیواں، نہ حَجر تھے، نہ شجر تھے

ہر سمت مسلط تھے تحیر کے طلسمات!
جیسے کسی مدفن میں ہو صدیوں کا کوئی راز
جس طرح کسی اجڑے ہوئے شہر کے سائے
یا موت کی ہچکی میں پگھلتی ہوئی آواز

جیسے کسی گھر میں صَفِ ماتم کی خموشی
یا دشت و بیاباں میں نزولِ شبِ آفات
جیسے کسی کہسار پہ تنہا کوئی خیمہ!
یا شامِ غریباں کے تصرف میں سمٰوات

ہَولے سے سرکنے لگے ہستی کے حجابات
دھیرے سے ڈھلکنے لگا تخلیق کا آنچل
چھَن چھَن کے بکھرنے لگا، ”شیرازۂ کُن۔کُن“
رِم جھم سے برسنے لگے احساس کے بادل

پلکیں سی جھپکنے لگی دوشیزۂ کونین!
ہلچل سی ہوئی پیکرِ عالم کی رگوں میں
آفاق کے سینے میں دھڑکنے لگیں کرنیں
”شیرازہ کُن“ ڈھل بھی گیا تھا فیکوں میں

ہر سمت بکھرنے لگیں وجدان کی کرنیں
کِرنوں سے کھِلے رنگ تو رنگوں سے گلستاں
بیدار ہوئی خواب سے خوشبوئے رگِ گُل
خوشبو سے مہکنے لگا دامانِ بیاباں

دامانِ بیاباں میں نہاں سینۂ برفاب
برفاب کے سینے میں تلاطم بھی شرر بھی
اعجازِ لبِ کُن سے ہوئے خلق بیک وقت
صحرا بھی، سمندر بھی، کہستاں بھی، شجر بھی

پھر حدّتِ تخلیق کی شدت سے پگھل کر
جاگے کئی طوفان، تہہِ سینۂ برفاب
ہر موج تھی پروردۂ آغوشِ تلاطم!
ہر قطرہ کا دل، صورتِ بے خوابیِ سیماب

شانوں پہ اٹھائے ہوئے بارِ کفِ سیلاب
بے سمت بھٹکنے لگیں منہ زور ہوائیں
منہ زور ہواؤں کے تھپیڑوں کی دھمک سے
دل بن کے دھڑکنے لگیں بے رنگ فضائیں

بے رنگ فضاؤں کے تحیر کی کسک میں
پنہاں تھے شب و روز سے آلود زمانے
بے اَنت زمانوں کے افق تھے نہ حدیں تھیں
آخر دیا ترتیب انہیں دستِ قضا نے

پھر چشمِ تحیر نے یہ سوچا کہ فضا میں
شادابئ گلزارِ طرب، کس کے لیے ہے؟
یہ کون ہُوا باعثِ تخلیقِ دو عالم!
یہ ارض و سما کیوں ہیں، یہ سب کس کے لئے ہے

تزئینِ مہ و انجمِ افلاک کا باعث
ہے کون؟ جو خلوت کے حجابوں میں چُھپا ہے؟
تخلیقِ رگ و ریشۂ کونین کا مقصد!
ہے کیا؟ جو سرِ لوحِ شب روز لکھا ہے؟

ہے کس کے لیے عشوۂ بلقیسِ تصوّر
یہ غمزۂ رخسارِ جہاں کس کے لیے ہے؟
آرائشِ خال و خدِ ہستی کا سبب کون؟
یہ انجمنِ کون و مکاں کس کے لیے ہے؟

پھر ریشمِ انوار کا ملبوس پہن کر
ظاہر ہوا اِک پیکرِ صد رنگ بصد ناز
نکھرے کئی بکھرے ہوئے رنگوں کے مناظر
فطرت کی تَجلّی ہوئی آمادۂ اعجاز

وہ پیکرِ تقدیس، وہ سرمایۂ تخلیق
وہ قبلۂ جاں، مقصدِ تخلیقِ دو عالم
وجدان کا معیار، مہ و مہر کا محور
وہ قافلہ سالارِ مزاجِ بنی آدم

وہ منزلِ اربابِ نظر، فکر کی تجسیم
وہ کعبۂ تقدیرِ دو عالم، رخِ احساس
وہ بزمِ شب و روز کا سلطانِ معظّم
وہ رونقِ رخسارۂ فیروزہ و الماس

وہ شعلگئِ شمعِ حرم ، تابشِ خورشید
وہ آئینہِ حُسنِ رُخِ ارض و سماوات
وہ جس سے رواں موجِ تبسم کی سبیلیں
وہ جس کے تکلم کی دھنک چشمۂ آیات

وہ جس کا ثنا خواں دلِ فطرت کا تکلم !
ہستی کے مناظر ، خمِ ابرو کے اشارے
آفاق ہیں دامن کی صباحت پہ تصدق
قدموں کے نشاں ڈھونڈتے پھرتے ہیں ستارے

اُس رحمتِ عالم کا قصیدہ کہوں کیسے ؟
جو مہرِ عنایات بھی ہو ، ابرِ کرم بھی
کیا اُس کے لیے نذر کروں ، جس کی ثنا میں
سجدے میں الفاظ بھی، سطریں بھی ، قلم بھی !

اس کے بعد کا حصہ بڑا ہی زبردست ہے!!!

چہرہ ہے کہ انوارِ دو عالم کا صحیفہ
آنکھیں ہیں کہ بحرینِ تقدس کے نگیں ہیں
ماتھا ہے کہ وحدت کی تجلی کا ورق ہے
عارِض ہیں کہ ”والفجر“ کی آیات کے اَمیں ہیں

گیسو ہیں کہ ”وَاللَّیل“ کے بکھرے ہوئے سائے
ابرو ہیں کہ قوسینِ شبِ قدر کھُلے ہیں
گردن ہے کہ بَر فرقِ زمیں اَوجِ ثریا
لب، صورتِ یاقوت شعاعوں میں دُھلے ہیں

قَد ہے کہ نبوت کے خد و خال کا معیار
بازو ہیں کہ توحید کی عظمت کے عَلَم ہیں
سینہ ہے کہ رمزِ دلِ ہستی کا خزینہ
پلکیں ہیں کہ الفاظِ رُخِ لوح و قلم ہیں

باتیں ہیں کہ طُوبیٰ کی چٹکتی ہوئی کلیاں
لہجہ ہے کہ یزداں کی زباں بول رہی ہے
خطبے ہیں کہ ساون کے امنڈتے ہوئے دریا
قِرأت ہے کہ اسرارِ جہاں کھول رہی ہے

یہ دانت ، یہ شیرازۂ شبنم کے تراشے
یاقوت کی وادی میں دمکتے ہوئے ہیرے
شرمندۂ تابِ لب و دندانِ پیمبرﷺ
حرفے بہ ثنا خوانی و خامہ بہ صریرے

یہ موجِ تبسم ہے کہ رنگوں کی دھنک ہے
یہ عکسِ متانت ہے کہ ٹھہرا ہوا موسم
یہ شکر کے سجدے ہیں کہ آیات کی تنزیل
یہ آنکھ میں آنسو ہیں کہ الہام کی رِم جھم

یہ ہاتھ یہ کونین کی تقدیر کے اوراق
یہ خط ، یہ خد و خالِ رُخِ مصحف و انجیل
یہ پاؤں یہ مہتاب کی کرنوں کے مَعابِد
یہ نقشِ قدم ، بوسہ گہِ رَف رَف و جبریل

یہ رفعتِ دستار ہے یا اوجِ تخیل !
یہ بندِ قبا ہے کہ شگفتِ گُلِ ناہید
یہ سایۂ داماں ہے کہ پھیلا ہوا بادل
یہ صبحِ گریباں ہے کہ خمیازۂ خورشید

یہ دوش پہ چادر ہے کہ بخشش کی گھٹا ہے
یہ مہرِ نبوت ہے کہ نقشِ دلِ مہتاب
رخسار کی ضَو ہے کہ نمو صبحِ ازل کی
آنکھوں کی ملاحت ہے کہ روئے شبِ کم خواب

ہر نقشِ بدن اتنا مناسب ہے کہ جیسے
تزئینِ شب و روز کہ تمثیلِ مہ و سال
ملبوسِ کہن یوں شکن آلود ہے جیسے
ترتیب سے پہلے رُخِ ہستی کے خد و خال

رفتار میں افلاک کی گردش کا تصور
کردار میں شامل بنی ہاشم کی اَنا ہے
گفتار میں قرآں کی صداقت کا تیقُّن
معیار میں گردُوں کی بلندی کفِ پا ہے

وہ فکر کہ خود عقلِ بشر سَر بگریباں
وہ فقر کہ ٹھوکر میں ہے دنیا کی بلندی
وہ شکر کہ خالق بھی ترے شکر کا ممنون
وہ حُسن کہ یوسفؑ بھی کرے آئینہ بندی

وہ علم کہ قرآں تِری عِترت کا قصیدہ
وہ حِلم کہ دشمن کو بھی امیدِ کرم ہے
وہ صبر کہ شبیرؑ تری شاخِ ثمردار
وہ ضبط کہ جس ضبط میں عرفانِ اُمُم ہے

” اورنگِ سلیماں “ تری نعلین کا خاکہ
” اعجازِ مسیحا “ تری بکھری ہوئی خوشبو
” حُسنِ یدِ بیضا “ تری دہلیز کی خیرات
کونین کی سج دھج تری آرائشِ گیسو

سَر چشمۂ کوثر ترے سینے کا پسینہ
سایہ تری دیوار کا معیارِ اِرَم ہے
ذرے تری گلیوں کے مہ و انجمِ افلاک
” سورج “ ترے رہوار کا اک نقشِ قدم ہے

دنیا کے سلاطیں ترے جارُوب کشوں میں
عالم کے سکندر تری چوکھٹ کے بھکاری
گردُوں کی بلندی ، تری پاپوش کی پستی
جبریلؑ کے شہپر ترے بچوں کی سواری

دھرتی کے ذوِی العدل ، تِرے حاشیہ بردار
فردوس کی حوریں ، تِری بیٹی کی کنیزیں
کوثر ہو ، گلستانِ ارم ہو کہ وہ طُوبیٰ
لگتی ہیں ترے شہر کی بکھری ہوئی چیزیں

ظاہر ہو تو ہر برگِ گُلِ تَر تِری خوشبو
غائب ہو تو دنیا کو سراپا نہیں ملتا
وہ اسم ، کہ جس اسم کو لب چوم لیں ہر بار
وہ جسم کہ سورج کو بھی سایہ نہیں ملتا

احساس کے شعلوں میں پگھلتا ہوا سورج
انفاس کی شبنم میں ٹھٹھرتی ہوئی خوشبو
الہام کی بارش میں یہ بھیگے ہوئے الفاظ
اندازِ نگارش میں یہ حُسن رمِ آہو!

حیدرؓ تری ہیبت ہے تو حسنینؓ ترا حُسن
اصحاب وفادار تو نائب ترے معصوم
سلمٰیؓ تری عصمت ہے ، خدیجہؓ تری توقیر
زہراؓ تری قسمت ہے تو زینبؓ ترا مقسوم

کس رنگ سے ترتیب تجھے دیجیئے
تنویر کہ تصویر ، تصور کہ مصور ؟
کس نام سے امداد طلب کیجیے تجھ سے
یٰسین کہ طہٰ کہ مزمل کہ مدثر ؟

پیدا تری خاطر ہوئے اطرافِ دو عالم
کونین کی وسعت کا فسوں تیرے لیے ہے
ہر بحر کی موجوں میں تلاطم تری خاطر
ہر جھیل کے سینے میں سکوں تیرے لئے ہے

ہر پھول کی خوشبو ترے دامن سے ہے منسوب
ہر خار میں چاہت کی کھٹک تیرے لیے ہے
ہر دشت و بیاباں کی خموشی میں ترا راز
ہر شاخ میں زلفوں سی لٹک تیرے لئے ہے

”دن“ تیری صباحت ہے تو شب تیری علامت
گُل تیرا تبسم ہے ، ستارے ترے آنسو !
آغازِ بہاراں تری انگڑائی کی تصویر
دِلدارئ باراں ترے بھیگے ہوئے گیسو

کہسار کے جھرنے ، ترے ماتھے کی شعاعیں
یہ قوسِ قزح ، عارضِ رنگیں کی شکن ہے
یہ ” کاہکشاں“ دھول ہے نقشِ کفِ پا کی
ثقلین ترا صدقۂ انوارِ بدن ہے

ہر شہر کی رونق ترے رستے کی جمی دھول
ہر بَن کی اداسی ، تری آہٹ کی تھکن ہے
جنگل کی فَضا تیری متانت کی علامت
بستی کی پھبن تیرے تبسم کی کِرن ہے

میداں ترے بُوذر کی حکومت کے مضافات
کہسار ترے قنبر و سلماں کے بسیرے
صحرا ، ترے حبشی کی محبت کے مصلّے !
گلزار ترے میثم و مِقداد کے ڈیرے

کیا ذہن میں آئے کہ تو اترا تھا کہاں سے ؟
کیا کوئی بتائے تری سرحد ہے کہاں تک ؟
پہنچی ہے جہاں پر تری نعلین کی مٹی
خاکسترِ جبریل بھی پہنچے نہ وہاں تک

سوچیں تو خدائی تری مرہونِ تصور
دیکھیں تو خدائی سے ہر انداز جدا ہے
یہ کام بشر کا ہے نہ جبریلؑ کے بس میں
تو خود ہی بتا اے مرے نبیﷺ کہ تو کیا ہے ؟

کہنے کو تو ملبوسِ بشر اوڑھ کے آیا
لیکن ترے احکام فلک پر بھی چلے ہیں
انگلی کا اشارہ تھا کہ تقدیر کی ضَربت
مہتاب کے ٹکڑے تری جھولی میں گِرے ہیں

کہنے کو تو بستر بھی میسر نہ تھا تجھ کو
لیکن تری دہلیز پہ اترے ہیں ستارے
انبوہِ ملائک نے ہمیشہ تری خاطر
پلکوں سے ترے شہر کے رَستے بھی سنوارے

کہنے کو تو اُمّی تھا لقب دہر میں تیرا
لیکن تو معارِف کا گلستاں نظر آیا
اک تُو ہی نہیں صاحبِ آیاتِ سماوات
ہر فرد ترا وارثِ قرآں نظر آیا

کہنے کو تو فاقوں پہ بھی گزریں تری راتیں
اسلام مگر اب بھی نمک خوار ہے تیرا
تُو نے ہی سکھائی ہے تمیزِ من و یزداں
انسان کی گردن پہ سدا بار ہے تیرا

کہنے کو ترے سر پہ ہے دستارِ یتیمی
لیکن تو زمانے کے یتیموں کا سہارا
کہنے کو ترا فقر ترے فخر کا باعث
لیکن تُو سخاوت کے سمندر کا کنارا

کہنے کو تو ہجرت بھی گوارا تجھے لیکن
عالم کا دھڑکتا ہوا دل تیرا مکاں ہے
کہنے کو تو مَسکن تھا ترا دشت میں لیکن
ہر ذرہ تری بخششِ پیہم کا نشاں ہے

کہنے کو تو اک ” غارِ حرا“ میں تیری مسند
لیکن یہ فلک بھی تری نظروں میں ” کفِ خاک“
کہنے کو تو ”خاموش“ مگر جنبشِ لب سے
دامانِ عرب گرد ، گریبانِ عجم چاک

اے فکرِ مکمل ، رُخِ فطرت ، لبِ عالم
اے ہادئ کُل ، ختم رُسل ، رحمتِ پیہم
اے واقفِ معراجِ بشر ، وارثِ کونین
اے مقصدِ تخلیقِ زماں ، حُسنِ مجسم

نسلِ بنی آدم کے حسیں قافلہ سالار
انبوہِ ملائک کے لیے ظلِّ الٰہی !
پیغمبرِ فردوسِ بریں ، ساقیِ کوثر
اے منزلِ ادراک ، دِل و دیدہ پناہی

اے باعثِ آئینِ شب و روزِ خلائق
اے حلقۂ ارواحِ مقدس کے پیمبرﷺ
اے تاجوَرِ بزمِ شریعت ، مرے آقا
اے عارفِ معراجِ بشر ، صاحبِ منبر

اے سیّد و سَرخیل و سر افراز و سخن ساز
اے صادق و سجّاد و سخی ، صاحبِ اسرار
اے فکرِ جہاں زیب و جہاں گیر و جہاں تاب
اے فقرِ جہاں سوز و جہاں ساز و جہاں دار

اے صابر و صنّاع و صمیمِ وصفِ اوصاف
اے سرورِ کونین و سمیعِ یمِ اصوات
میزانِ اَنا ، مکتبِ پندارِ تیقُّن !
اعزازِ خودی ، مصدرِ صد رُشد و ہدایات

اے شاکر و مشکور و شکیلِ شبِ عالم
اے ناصر و منصور و نصیرِ دلِ انسان
اے شاہد و مشہود و شہیدِ رُخِ توحید ،
اے ناظر و منظور و نظیرِ لبِ یزداں

اے یوسفؑ و یعقوبؑ کی اُمّید کا محور
اے بابِ مناجاتِ دلِ یونسؑ و ادریسؑ
اے نُوحؑ کی کشتی کے لیے ساحلِ تسکیں
اے قبلۂ حاجاتِ سلیماںؑ شہِ بلقیس

اے والئِ یثرب مری فریاد بھی سُن لے !
اے وارثِ کونین میں لَب کھول رہا ہوں
زخمی ہے زباں ، خامۂ دل خون میں تر ہے
شاعر ہوں مگر دیکھ مَیں سچ بول رہا ہوں

تُو نے تو مجھے اپنے معارف سے نوازا
لیکن میں ابھی خود سے شناسا بھی نہیں ہوں
تُو نے تو عطا کی تھی مجھے دولتِ عِرفاں
لیکن میں جہالت کے اندھیروں میں گھِرا ہوں

بخشش کا سمندر تھا ترا لطف و کرم بھی
لیکن میں تیرا لطف و کرم بھول چکا ہوں
بکھری ہے کچھ ایسے شبِ تیرہ کی سیاہی
میں شعلگیِ شمعِ حرم بھول چکا ہوں

تُو نے تو مجھے کفر کی پستی سے نکالا
میں پھر بھی رہا قامتِ الحاد کا پابند
تُو نے تو مرے زخم کو شبنم کی زباں دی
میں پھر بھی تڑپتا ہی رہا صورتِ اَسپند

تُو نے تو مجھے نکتۂ شیریں بھی بتایا
میں پھر بھی رہا معتقدِ تلخ کلامی
تُو نے تو مرا داغِ جبیں دھو بھی دیا تھا
میں پھر بھی رہا صید و ثنا خوانِ غلامی

تُو نے تو مسلط کیا افلاک پہ مجھ کو
میں پھر بھی رہا خاک کے ذرّوں کا پجاری
تُو نے تو ستارے بھی نچھاور کئے مجھ پر
میں پھر بھی رہا تیرگئ شب کا شکاری

تُو نے تو مجھے درسِ مساوات دیا تھا
میں پھر بھی مَن و تُو کے مراحل میں رہا ہوں
تُو نے تو جدا کر کے دکھایا حق و باطل
میں پھر بھی تمیزِ حق و باطل میں رہا ہوں

تُو نے تو کہا تھا کہ زمیں سب کے لیے ہے
میں نے کئی خطوں میں اسے بانٹ دیا ہے
تُو نے جسے ٹھوکر کے بھی قابل نہیں سمجھا
میں نے اُسی کنکر کو گہر مان لیا ہے

تُو نے تو کہا تھا کہ زمانے کا خداوند
انساں کے خیالوں میں کبھی آ نہیں سکتا
لیکن میں جہالت کے سبب صرف یہ سمجھا
وہ کیسا خدا ؟ جس کو بشر پا نہیں سکتا

تُو نے تو کہا تھا کہ وہ اونچا ہے خِرد سے
مَیں نے یہی چاہا اتر آئے وہ خِرد میں
تو نے تو کہا تھا ” اَحد“ ہے وہ اَزل سے
میں نے اُسے ڈھونڈا ہے سدا ”حِسّ و عدد“ میں

اب یہ ہے کہ دنیا ہے مری تیرہ و تاریک
سایۂ غمِ دوراں کا محیطِ دل و جاں ہے
ہر لمحہ اداسی کے تصرف میں ہے احساس
تا حدِ نظر خوفِ مسلسل کا دھواں ہے

صحرائے غم و یاس میں پھیلی ہے کڑی دھوپ
کچھ لمسِ کفِ موجِ صبا تک نہیں ملتا
بے اَنت سرابوں میں کہاں جادۂ منزل ؟
اپنا ہی نشانِ کفِ پا تک نہیں ملتا

اَعصاب شکستہ ہیں تو چھلنی ہیں نگاہیں
احساسِ بہاراں ، نہ غمِ فصلِ خزاں ہے
آندھی کی ہتھیلی پہ ہے جگنو کی طرح دل
شعلوں کے تصرف میں رگِ غنچۂ جاں ہے

ہر سمت ہے رنج و غم و آلام کی بارش
سینے میں ہر اک سانس بھی نیزے کی اَنی ہے
اب آنکھ کا آئینہ سنبھالوں میں کہاں تک
جو اشک بھی بہتا ہے وہ ہیرے کی کنی ہے

احباب بھی اعداء کی طرح تیر بکف ہیں ،
اب موت بھٹکتی ہے صفِ چارہ گراں میں
سنسان ہے مقتل کی طرح شہرِ تصور
سہمی ہوئی رہتی ہے فغاں، خیمۂ جاں میں

شاعر: محسن نقوی
کتاب: موجِ ادراک

" *گھر کیلئے ایک دستور اور قانون "*
-------------------------------

ڈاکٹر عبدالکریم بکار صاحب شامی شہری ہیں اور دنیا بھر میں اپنے منفرد مقالات کی بناء پر جانے پہچانے جاتے ہیں- چالیس سے زیادہ کتابوں کے مؤلف ہیں، سعودی عرب کی ہر یونیورسٹی میں پڑھا چکے ہیں۔ ۔ آپ کہتے ہیں:

💥 والدین اس انتظار میں نا رہیں کہ تربیت گاہیں ان کی اولاد کو اچھا شہری بنائیں، انہیں خود اس ذمہ داری کو پورا کرنا ہوگا کہ اپنے بچوں کو معاشرے کا ذمہ دار فرد بنائیں۔

💥اچھا ہو کہ والدین گھروں میں کچھ ایسے ہلکے پھلکے قانون بنایں جن پر عمل کر کے بچوں کے کردار میں پختگی آئے اور ان میں احساس ذمہ داری پیدا ہو۔

اس ضمن میں چند واضح لائحہ عمل جو والدین کو مناسب لگیں وہ اختیار کریں یا ان میں ترمیم و اضافہ کر لیں۔

💠01: گھر کا ہر فرد نماز وقت پر ادا کرے - ث

💠 02: "مہربانی" اور "جزاک اللہ " کے کلمات بنیادی ضوابط ہونگے جن سے کوئی بھی بری نہیں ہوگا۔

💠 03: مار پٹائی، گالم گلوچ یا لعن طعن نہیں ہوگی-

💠 04: اپنے محسوسات اور خیالات ادب و احترام کے ساتھ بتایئے۔

💠 05: جو جس چیز کو (دروازہ، کھڑکی، ڈبہ) کھولے گا اُسے بند بھی کرے گا - کچھ گر جائے تو اُسے اٹھائے گا اور صاف کر کے رکھے گا -

💠 06: آپ کا کمرہ خالص آپ کی ذمہ داری ہے۔

💠 07: بات ٹوکے بغیر سنی جائے گی اور درمیان میں سے کوئی نہیں کاٹے گا۔

💠 08: دوسروں کے سامنے اتنے دھیمے لہجہ میں ہرگز گفتگو نہیں کریں گے کہ کوئ سن نہ سکے-

💠 09: گھر کے بزرگ/ والدین کوئ بات/مشورہ یا حکم دیں اسے ماننا ہو گا -

💠 10: گھر میں سلام کرنا ہوگا۔

💠 11: گھر کا ہر فرد روزانہ قرآن مجید کی تلاوت کرے گا۔

💠 12: جو ملنے آئے وہ قوانین کا احترام کرے۔

💠 13: گھر کا کوئی بھی فرد کمروں میں کچھ نہیں کھائے گا۔

💠14: رات کو (10:00) کے بعد کوئی نہیں جاگے گا۔

💠 15: فجر سے پہلے ہر بچے اور بڑے جاگنا ہو گا-

💠 16: سمارٹ فون اور ڈیوائسز a.m 9 کے p.m 9 درمیان استعمال کی جا سکتی ہیں۔ اور 30 منٹ کے مسلسل استعمال کے بعد 1 گھنٹے کا وقفہ ضروری ہو گا-

💠17: والدین کا احترام ضروری ہوگا۔

💠 18: مل کر بیٹھنے کا وقت طے کیا جائے, کسی قسم کی مواصلاتی ڈیوائس (فون/پیڈ) کا استعمال منع ہوگا۔

💠 19: کھانے کے وقت سب کی حاضری اور شمولیت ضروری ہوگی۔

💠 20: رات کو (10 بجے) کے بعد کسی تعلیمی سرگرمی کی اجازت نہیں ہوگی۔

💠21: گھر کے افراد گھر اور گھر میں موجود ہر شئے کی حفاظت کے ذمہ دار ہیں۔

💠 22: اپنا کام ہر کوئی خود کرے گا، دوسرے پر حکم نہیں جھاڑے گا- گھر کے سربراہان اپنا کام کسی کو کہہ سکتے ہیں -

💠 23: خاندان کی ضروریات کسی دوسری ضرورت پر مقدم ہونگی۔

💠 24: کسی کے کمرے یا علیحدگی والی جگہ پر دروازہ کھٹکھٹائے یا اس کی اجازت کے بغیر داخل نہیں ہوگا۔

💠 25: مہمان کے آنے پر خوش اور انہیں خوش آمدید کہا جائے-

💠 26: مہمان کی خاطر مدارات کی جائے کیونکہ مہمان کے سامنے پیش کی جانے والی چیزوں کا اللہ کے ہاں حساب نہ ہو گا- مہمان اپنے ساتھ اللہ کی رحمت لاتا ہے -
💠 27 گھر میں روزانہ قرآنِ یا حدیث کے حوالے سے نشست ہوگئ جس میں گھر کے سب چھوٹے بڑے شریک ہونگے
*اس مضمون کو اہمیت دیں کیونکہ اولاد کی تربیت ایک* *مشکل کام ہے جسے ہفتے کے سات دن اور دن کے چوبیس گھنٹےکرنا ہے۔*

اسکے علاوہ اگر اولاد کو قرآن کی سورہ نبا، واقعہ،نور، یوسف اور کہف تفسیر کیساتھ حفظ کرادیں تو آپ انکی طرف سے بے فکر ہو سکتے ہیں۔

*صدقہ جاریہ کی نیت سے تحریر اپنے پیاروں تک پہنچاٸیں ان شاء اللہ بہترین صدقہ جاریہ ہو گا*

8⃣بچوں کی اسلامی تربيت WhatsApp Group Invite

ایک لومڑ کی دُم پہ پتھر آ گرا، دُم کٹ گئی۔
ایک دوسرے لومڑ نے جب اسے دیکھا تو پوچھا! یہ تم نے اپنی دُم کیوں کاٹی؟

دُم کٹا لومڑ بولا اس سے بڑی خوشی و فرحت محسوس ہوتی ھے۔ایسے لگتا ھے کہ جیسے ہواؤں میں اُڑ رھا ہوں۔واہ!! کیا تفریح ہے!
بس گھیر گھار کر اس دوسرے لومڑ کو اس نے دم کٹوانے پر راضی کر ہی لیا۔

اس نے جب یہ دم کٹائی کی مہم سر کرلی تو بجائے سکون کے شدید قسم کا درد محسوس ہونے لگا!!

پوچھا میاں!! جھوٹ کیوں بولا مجھ سے؟
پہلا کہنے لگا جو ہُوا سو ہُوا اب یہ درد کی داستان دوسرے لومڑوں کو سنائی تو انہوں نے دُمیں نہیں کٹوانی اور ہم دو دم کٹوں کا مذاق
بنتا رہے گا!

بات سمجھ میں آئی تو یہ دونوں دم کٹے پوری برادری کو یہ خوش کن تجربہ کرنے کا کہتے رہے۔

نتیجہ یہ نکلا کہ لومڑوں کی اکثریت دم کٹی ہوگئی۔ اب حالت یہ ہوگئی کہ جہاں کوئی دم والا لومڑ دکھلائی دیتا اسکا مذاق اُڑایا جاتا!

جب بھی فساد عام ہوکر پھیل جاتا ہے عوام نیکوکاروں کو انکی نیکی پہ طعنے دینے لگ جاتے
ہیں اور احمق لوگ انکا مذاق اڑاتے ہیں]

حضرت کعب رضی اللّٰه عنہ سے روایت ہے کہ فرمایا لوگوں پہ ایسا زمانہ آئے گا کہ مومن کو اسکے ایمان پہ ایسے ہی عار دلائی جائے گی جیسے کہ اَجکل بدکار کو اسکی بدکاری پہ عار دلائی جاتی ہے اور شرمندہ کِیا جاتا ہے۔ یہاں تک کہ آدمی کو طنزاً کہا جاےگا کہ واہ بھئی! تم تو بڑے ایمان دار فقیہہ بندے ہو!!

بگڑا ہوا معاشرہ جب نیکوکاروں میں کوئی قابلِ اعتراض بات نہیں تلاش کر پاتا تو انکی بہترین خوبی پہ ہی انکو عار دلانے لگ جاتا ہے!
کیا لوط علیہ السلام کی قوم نے نہیں کہا تھا نکال دو لوط کے گھر والوں کو اپنی بستی سے!! یہ تو بہت نیک بنے پھرتے ہیں۔

یہ ہمارے معاشرے کی حقیقت ہے، جس میں ہم جیتے ہیں۔

نیکی , حق اور پازیٹیوٹی positivity کا راستہ اپنائے رکھیں . اگر آپ کا ضمیر سچائی کی گواہی دے رہا ہے تو اس راستے میں لوگوں کے طعنے طنز اور تنقید دم کٹے لومڑوں کے حیلوں سے زیادہ حیثیت نہیں رکھتے۔ ان کی پرواہ نہ کرتے ہوئےاپنی منزل کی طرف بڑھتے رہیں۔
اللہ آپ کا حامئ و ناصر ہو۔آمین

کیا ہمیں سگے رشتے داروں سے اپنی نفرتیں اپنی اولاد میں ٹرانسفر کرنی چاہیں؟
کیا زیادتی کرنے والے سگے رشتے داروں کی بیٹیاں اپنے گھر لے آنی چاہیں یا ان کو بیٹیاں سونپ دینی چاہیں؟

اگر خاندان میں اختلافات ہوں تو اس کے متعلق اولاد کی تربیت کیسے کریں؟
اور اولاد کی شادیاں کہاں کریں؟

سب سے پہلے تو یہ جان لیں کہ اولاد ایک زمہ داری ھے ملکیت نہیں۔ اللہ تبارک تعالیٰ نے ہمیں اولاد اس لیے دی ھے کہ ہم اس کی اچھی تربیت کریں اور اسے معاشرے کا فعال رکن بنائیں۔ اولاد ملکیت نہیں ھے کہ ھم اس کے مالک بن کے اس کی زندگی کا کنٹرول اپنے ہاتھ میں رکھیں۔ کٹھ پتلیاں بنا کے ساری عمر اس کی ڈوریاں ہلاتے رہیں۔ اس کو اپنے اشاروں پہ نچاتے رہیں۔ ایموشنل بلیک میل یعنی ان کا جذباتی استحصال کرتے رہیں۔

یہ ذمہ داری ھے اس کے بارے میں سوال ہو گا اور اولاد سے سوال سے پہلے والدین سے سوال ہو گا کہ آیا ہم نے اپنی ذمہ داریاں احسن طریقے سے پوری کیں؟ اور کہاں تک پوری کیں؟

ہمارا مسئلہ یہ ھے کہ ہم اولاد کو اپنا فرمانبردار، تابعدار بنانا چاہتے ہیں ہر والدین کا مسئلہ ہے کہ اولاد فرمانبردار نہیں ہے ہر والدین کی دعا ھے کہ اولاد تابعدار ہو جائے ہم رات کو دن کہیں تو یہ دن کہے ہم رات کہیں تو یہ رات۔

یہ سب ہم اس لیے نہیں چاہتے کہ ہم اپنی اولاد کو حق کی تلقین کریں تو وہ ہماری طرف متوجہ ہو ہماری بات مانے بلکہ اس لیے کہ ہم اس کے ہر غلط صحیح کا فیصلہ کریں اور وہ سر تسلیم خم کرئے۔

ہم جو چاہیں یہ بن کے دیکھائیں ڈاکٹر یا انجینئر۔

ہم جہاں کہیں یہ وہاں شادی کریں خالہ ، پھوپی، ماموں ، چاچا کے گھر۔ یا ہمارے بزنس پارٹنر یا دوست کے بچے سے۔

اور یہیں پہ بس نہیں ہے بلکہ یہاں تک کہ ہماری اپنی ہی پسند کی ہوئی بہو سے جب ہم کہیں یہ جان چھڑا لے۔ اور اسے دفع کر کے ایک بار پھر ہماری ہی پسند کی ہوئی لڑکی سے ہماری ہی شرائط پہ دوبارہ شادی کر لے۔

افسوس کہ نسل در نسل یہی پریکٹس جاری ھے۔
افسوس کہ والدین تربیت پہ نہیں ملکیت پہ فوکس کیے ہوئے ھیں۔
اس چکر میں ہم نے اولاد کو انسان سمجھنا بھی چھوڑ دیا ھے۔ اسلام سے والدین کے حقوق کی ساری احادیث اکھٹی کر کے بچوں کو سنا سنا کے ایموشنل بلیک میل کر کر کے ان کے دماغ ماؤف کیے ہوئے ہیں ان کی زندگیاں برباد کی ہوئی ہیں ایسے میں اولاد کے پاس دو آپشن ہیں یا وہ اس بربادی پہ افف تک نا کہے اور آرام سے والدین کی دنیا سنوارے اور اپنی آخرت خراب کرتی رہے یا بغاوت کرئے اور والدین کی نافرمان کہلائے اور زندگی بھر ان کی بد دعائیں لیتی رہے۔

ضرورت ہے کہ والدین ہوش کے ناخن لیں اولاد کو انسان سمجھیں۔ اپنا مال نہیں۔

ان کی تربیت کریں
ان کو اچھا برا سمجھائیں
غلط صحیح کی تمیز سیکھائیں۔
لوگوں کی پہچان کرنا سیکھائیں۔
ان کو معاشرے کا فعال رکن بنائیں
انہیں لوگوں کے لیے نفع بخش بنائیں

اب آگئی بات رشتے داروں سے آپ کے معاملات کی تو اس کو سمجھنے کے لیے ہم حضرت علی کرم اللہ وجہہ کی مثال لیتے ہیں۔ حضرت علی رضی اللہ تعالیٰ عنہ کا طریقہ تھا کہ جب بھی کوئی معاملہ درپیش ہوتا وہ اپنی سب اولاد کو بیٹھاتے ان کے سامنے معاملہ رکھتے ان کو حقائق بتاتے اس معاملے سے متعلق اپنی رائے دیتے اور بیوی بچوں سے رائے طلب کرتے اور پھر اس معاملے کا مکمل جائزہ لے کے اس پہ اپنی حکمت عملی مرتب کرتے۔ فیصلہ کرتے اور اس فیصلے کے محرکات، وجوہات اور نتائج پہ کھل کے اظہار خیال کرتے۔
اسکا فائدہ یہ ہے کہ بچپن ہی سے بچوں کے سامنے ہر بات واضح ہوتی ہے اس بات کی گنجائش نہیں ہوتی کہ کل کو کوئی آٹھ کے ان کو ان کے والدین کے خلاف ورغلا سکے۔

دوسرا فائدہ بچوں میں ابتداء ہی سے معاملہ فہمی آتی ہے اور قوت فیصلہ مضبوط ہوتی ہے۔

تیسرا فائدہ والدین جب اپنی اولاد کے سامنے سب معاملات رکھتے ھیں تو ان کی کوشش ہوتی ھے کہ ان کا امیج اولاد کے سامنے خراب نا ہو ان کی اولاد ان کو غلط نا سمجھے اس لیے وہ زیادتی نہیں کرتے حد سے تجاوز نہیں کرتے اور خود کو مثبت رکھتے ہیں۔
غلط بیانی کرنے کا فائدہ کوئی نہیں اولاد شعور آتے ہی سمجھنے لگتی ہے کہ کون غلط ہے کون صحیح۔

یہی سب سے احسن طریقہ ھے کہ اپنے تمام معاملات اور اختلافات بچوں کے سامنے رکھیں اپنا نقظہ نظر سمجھائیں اپنے جذبات احساسات اور حکمت عملی سب ان سے ڈسکس کریں بچوں میں بچپن سے معاملہ فہمی پیدا کریں۔ اور یاد رکھیں ایسا کرتے ہوئے حد سے تجاوز نا کریں، خود کو روکیں کسی پہ جھوٹے الزماات، گندے القابات، بہتان تراشیاں اور گند اچھالنے سے گریز کریں۔

وہ زمانے لد گئے جب بڑے آپس میں بات کرتے ہوئے بچوں کو اٹھا دیا کرتے تھے۔ اور بعد میں ساری عمر یہی تکرار کرتے گزرتی تھی کہ تم غلط سمجھ رہے ہو جبکہ صحیح بات انہیں وقت پہ بتائی ہی نہیں گئی۔

تو دوستو یہ زندگی ھے یہ ہماری اپنی اولاد ھے ان کو raise کریں آگے بڑھائیں انہیں اپنا آلہ کار نا بنائیں۔ یہ انسان ھیں۔ مٹی کے مادھو نہیں ھیں گونگے، بہرے، اندھے، اپاہج نہیں ھیں۔ان کے پاس بھی دل ہے، دماغ ہے، جذبات ہیں، احساسات ہیں۔

سوال تھا اولاد کی شادی کہاں کریں تو شادی وہیں کریں جہاں ان کے دل خوش ہوں اور ان کے دلوں کو خوش کس بات پہ ہونا ہے اس کا انحصار آپ کی تربیت پہ ہے آپ نے ان کو کیا سیکھایا ہے کیا سمجھایا ہے۔ اور اپنے عمل سے کیا ثابت کیا ھے۔

ظاہریت ؟
خالی خوبصورتی پہ ریجھنا؟
مادیت پسندی ؟
دولت پہ جا کے سجدہ کرنا۔
سٹیٹس کے پجاری بننا۔
یا باطن کی آنکھ کھلی رکھ کے دوسرے کے باطن کو پہچاننا۔
یا اپنی صلاحیتوں پہ بھروسہ کرنا۔
یا دوسرے کی قدر کرنا۔
اور خود کو دوسرے ساتھی کے لیے نفع بخش بنانا۔

دوستو اصل میں سب رشتے اسی لیے ہیں کہ ہم انہیں raise کریں سپورٹ کریں آگے بڑھائیں ہم نے سمجھ لیا ھے کہ رشتے اس لیے ہیں کہ ہم انہیں استعمال کریں یا پھر ان کی زندگی میں روڑے اٹکائیں، ان کے راستے میں پتھر پھینکیں۔

دوستو! رشتے دار ایک سپورٹ سسٹم ہیں۔

تو اپنے بچوں کو معاملات بتائیں۔
اور جہاں اختلافات رہے ہوں وہاں بچوں کے رشتے نا کریں۔ جنہوں نے زیادتیاں کی ہوں وہاں بچوں کی شادیاں نا کریں۔
جن سے دل خراب رہے ھوں وہاں بچوں کی شادیاں نا کریں۔

اس لیے کہ ماضی کی تلخیاں بچوں کی زندگیوں پہ اثر انداز ہو سکتی ہیں۔

بچوں کو خاندان جوڑنے کا ٹول نا سمجھیں کہ میرے بھائی یا بہن کے گھر شادی کرو خاندان جڑا رہے گا۔
بچوں کو بدلہ لینے کا ہتھیار نا بنائیں کہ فلاں رشتے دار کی لڑکی لا کے زلیل کریں گے یا اپنی لڑکی بھیج کے بھاوج کو ناکوں چنے چبوائیں گے۔
بچوں کی شادیوں کو بزنس ڈیل نا بنائیں کہ بزنس پارٹنر کے گھر شادی کریں گے تو نفع ہوگا۔
نا ہی دوستی کی مضبوطی کے لیے آلہ کار بنائیں کہ دوست کی لڑکی لے آوں دوستی مضبوط ہو گی۔
بچوں کی شادی لالچ میں نا کریں کہ فلاں کی جائیداد ہمارے گھر آجائے گی۔

جس بچے کی شادی کر رہے ہیں اس کی طبیعت، مزاج، میلان کو سامنے رکھ کے اس کی بہتری کے لیے شادی کریں نا کہ اپنی بہتری۔
اور جس کو بہو بنا کے لائیں یا داماد بنائیں اس کی عزت کریں۔ اور اولاد کو ان کی زندگی میں آزاد چھوڑ دیں۔ اپنی تربیت پہ بھروسہ کریں۔( اگر تربیت کی ہو تو)

اولاد کا دم نا گھوٹیں انہیں جینے دیں۔

جویریہ ساجد
14 دسمبر 2022

والدین کے لیے ایک بہترین پوسٹ!!
❤️ بچے سے یہ مت کہیں کہ دیوار پر نقش و نگار بنا کر اسے گندا مت کرو، بلکہ کہیں پیپر پر یہ نقش و نگار بناو جب بنا لو گے تو ہم اسے دیوار فریج یا تختہ پر سجائیں گے۔
❤️ بچے سے ایسے نہ کہیں کہ نماز پڑھو ورنہ سیدھے جہنم میں جاو گے بلکہ کہیں کہ آؤ اکٹھے ایک ساتھ نماز پڑھیں تاکہ ہم جنت میں بھی اکٹھے ہو جائیں۔
❤️ بچے سے یہ نہ کہیں کہ اٹھو اور اپنا کمرہ صاف کرو کیا جنگل بنا رکھا ہے بلکہ یہ کہیں کہ بیٹا کیا کمرے کی صفائی میں کوئی مدد چاہییے کیوں کہ تم تو ہمیشہ صفائی اور سلیقہ کو پسند رکھتے ہو۔
❤️ بچے سے یہ مت کہیں کہ کھیل کود چھوڑو پڑھائی کرو، پڑھائی بہت اہم ہے بلکہ کہیں کہ اگر آپ نے آج پڑھائی جلدی مکمل کرلی تو میں آپ کے ساتھ کھیلوں گی یا ایسی کسی بھی سرگرمی کا حوالہ دیں جو اسے پسند ہو۔
❤️ بچے سے یہ نہ کہیں اٹھو اور دانت برش کرو، میں تمہیں حکم دے رہی/ رہا ہوں بلکہ کہیں کہ میں تم سے بہت خوش ہوں اس لیے کہ تم ہمیشہ میرے کہے بغیر دانت صاف کرلیا کرتے ہو۔
❤️ بچے سے یہ نہ کہیں کہ بائیں کروٹ مت سویا کرو بلکہ کہیں کہ ہمیں رسول اللہ ﷺ نے سکھایا ہے کہ ہم دائیں کروٹ سویا کریں۔
❤️ بچے سے مت کہیں کہ چاکلیٹ نہ کھایا کرو، تاکہ دانتوں میں کیڑا نہ لگے بلکہ کہیں کہ میں نے دن میں ایک بار چاکلیٹ کھانے کی اجازت اس لیے دی ہے کہ میں جانتی ہوں تم بہت سمجھدار ہو اپنے دانتوں کی صفائی کا خوب خیال رکھتے ہو
❤️ یاد رکھیے کہ ہر ہر لفظ اور ہر کام جو آپ کرتے ہیں وہ بچے کو بے حد متاثر کرتا ہے اور یہ بھی یاد رکھیں کہ آپ کا بچہ آپ کے سیرت واخلاق بلکہ آپ کا اپنا ہی عکس ھے۔
پلیز یہ اچھی بات شیئر بھی کریں۔۔۔

یہ گھر الجزائر میں ہے اس گھر کے مالک نے اپنی موت سے پہلے اپنی اولاد کو جمع کیا اور کہا کہ جب میں فوت ہو جاوں تو اس گھر کو گرا دینا کیوں کہ اس گھر کی بنیادوں میں ایک خزانہ دفن ہے کچھ دنوں بعد وہ شخص فوت ہوگیا اور اس کی اولاد جمع ہو کر اس خزانے کی تلاش کے لیے اپنے والد کی وصیت پر عمل کرنے کے لیے مشورہ کرنے لگی اور آخر کار اتفاق ہوا کہ گھر کو گرا دیا جائے گھر کو گرانے کے لیے مشینری منگوائی گئی اور گھر کو گرا دیا گیا ایک صندوق اس گھر کی بنیادوں سے ملا سب خوش تھے کہ خزانہ مل گیا ہے جب صندوق کو کھولا گیا تو اس میں سی ایک کاغذ کا ٹکڑا ملا اس پر لکھا تھا کہ تم سب اگر مرد و تو اس گھر کو دوبارہ تعمیر کر کے دکھاؤ ۔۔۔🙁
والدین اپنی زندگی کی انتھک محنت کر کے گھروں کو تعمیر کرتے ہیں اور اولاد اس جائیداد پر حق بھی جتاتے ہیں اور جھگڑے بھی کرتے ہیں اور پھر ساری زندگی ایک دوسرے سے جدا رہتے ہیؑ

اخلاقیات کے سنہرے اصول

اگر آپ کسی سے گاڑی ادھار مانگیں تو واپس کرتے وقت پٹرول کی ٹینکی فل کروا دیں۔۔یہ شکریہ کا ایک بہترین انداز ہے۔


اگر آپ کے اردگرد کوئی تمباکو نوشی سے پریشان ہوتا ہے تو ایسی جگہوں پر سگریٹ پینے سے گریز کریں۔


اگر کوئی آپ کی چائے یا کھانے کی دعوت کرتا ہے تو ایک ہفتے کے اندر اندر آپ بھی اس کی دعوت کریں۔


اگر آپ گھر کے کاموں کے لیے اپنے دوستوں کی مدد لیتے ہیں تو بعد میں انھیں کھانا ضرور کھلائیں۔


کسی سے ادھار لی گئی رقم جلد از جلد لوٹائیں چاہے یہ رقم کتنی ہی چھوٹی کیوں نا ہو۔ اور یہ مت سوچیں کہ انھیں اتنی چھوٹی رقم کی ضرورت نہ ہو گی۔


اگر آپ رات کو کسی دوست کے ہاں سو جاتے ہیں تو صبح اٹھ کر بستر درست کریں تکیے کو اس کی جگہ پر واپس رکھیں اور چادر کی سلوٹیں نکال کر اسے اچھے سے بچھائیں۔


کسی بھی عوامی مقام پر بحث سے گریز کریں ۔۔بحث کرنے کے لیے کوئی پرسکون اور خالی جگہ بہتر ہے۔


جب کوئی آپ کے لیے کھانا بنائے چاہے وہ ماں ہو یا بیوی یا کوئی دوست۔۔کھانے کے بعد برتن دھونے میں ان کی مدد کی کوشش کریں اگر ہو سکے تو۔


کسی بھی عوام مقام پر موبائل پر ویڈیو دیکھتے ہوئے یا گیم کھیلتے ہوئے آواز کم رکھیں ورنہ سب سے بہترین حل ہے کانوں میں ہیڈ فونز لگا لیں۔


کھانا کھاتے وقت آخری لقمہ ہمیشہ اس شخص کے لیے چھوڑیں جس نے یہ کھانا بنایا ہے یا خریدا ہے اگر وہ کھانا نا چاہے تو خود کھا لیں۔


ٹیکسٹ میسج پر کبھی کوئی تعلق ختم نہ کریں۔۔


کسی دوسرے کا موبائل اور کمپیوٹر استعمال کرتے وقت بنا اجازت ان کی ذاتی فائلز مت کھولیں۔


اگر آپ سے کسی کی کال مس ہو گئی ہے تو فورا اس کال بیک کریں یا میسج کریں اور کال مس کرنے کی وجہ بتائیں۔


اور کسی سے ادھار لی گئی کتاب واپس کرنے میں دیر مت لگائیں۔۔

عید قربان کی مناسبت سے ۔۔۔۔۔۔۔۔۔۔۔۔۔۔ بکرا خریداری کے اصول

آج کل لوگ قربانی کے جانور خریدنے میں مصروف ہونگے۔ میرا تجربہ چونکہ بکرا خریدنے کا ہے لہذا بکرے کی خریداری کے چند اصول گوش گزار کئے جاتے ہیں.

بکرے کی صفات
جاننا چاہئے کہ بکرے کی صفات کے لحاظ سے اس کی قیمت پر چھ چیزیں اثر انداز ہوتی ہیں. ان امور کو مد نظر رکھتے ہوئے بکرا خریدنا چاہیے:
- اولا بکرے کی نسل، سندھ و پنجاب (بالخصوص راجن پور) کا دیسی بکرا مہنگا ہوتا ہے کیونکہ اس کا گوشت پہاڑی بکرے کے مقابلے میں نرم و لذیذ ہوتا ہے
- ثانیا بکرے کا وزن، جو دو امور پر مبنی ہے. ایک بکرے کی اونچائی اور دوسرا اسکی لمبائی و چوڑائی (پنجابی میں اسے بکرے کی "ویل" کہتے ہیں). چوڑائی سے مراد موٹا ہونا نہیں بلکہ اسکی پیٹھ کی اوپری طرف سے پیٹ کی نیچی طرف کی اونچائی اور گردن سے لے کر دم تک لمبائی ہے۔ بعض بکرے اونچے ہوتے ہیں مگر انکی ویل کم ہوتی ہے لہذا انکا وزن کم ہوتا ہے
- ثالثا بکرے کے دانتوں کی تعداد۔ کھیرا (جس کے دو دانت نہیں) بکرا سب سے سستا، چوگا (چار دانت والا) اس سے مہنگا اور دوندا (دو دانت والا) سب سے مہنگا۔ لذت کے اعتبار سے پکے کھیرے (بغیر دو دانت ایک سال کا) اور دوندے کا گوشت اعلی ہوتا ہے
- رابعا اسکی خوبصورتی جس میں چہرے کی بناوٹ، رنگوں کے تنوع سے لے کر بالوں کی کٹائی تک متعدد جہات ہیں۔ البتہ سفیدی مائل اور چینے بکرے ہمارے ہاں بالعموم مہنگے ہوتے ہیں
- خامسا بکرے کا خصی یا آنڈر ہونا. خصی بکرا مہنگا ہوتا ہے۔ یہ خصی ہونا مشینی بھی ہوسکتا ہے اور پلاس والا بھی، اس کی تفصیل سے یہاں سہو نظر کیا جاتا ہے
- سادسا بکرے کا بے عیب ہونا، عیب دار بکرا سستا ہوتا ہے۔ بکرا خریدتے وقت اسکے سینگ، کان، آنکھ دیکھ لینی چاہئے. ذرا چلا پھرا کر بھی دیکھ لینا چاہئے کہ لنگڑاتا تو نہیں. باقی اللہ مالک

بکرے کا ریٹ بنانا
یہ بات یاد رکھئے کہ قربانی کے جانور جیسا تازہ گوشت کسی دکان، سپر سٹور یا مارٹ سے دستیاب ہونا ناممکن ہے۔ قربانی کے لئے دستیاب ہونے والے خصی دیسی بکرے، خصوصا بڑے سائز کے، پورا سال کہیں دستیاب نہیں ہوتے۔ اس کی وجہ یہ ہے کہ اعلی نسل کے ان بکروں کو لوگ گاؤں دیہاتوں یا فارم ھاؤسز میں اسی غرض سے پالتے ہیں کہ قربانی کے دنوں میں ان کا اچھا ریٹ مل سکے گا۔ کہنے کا مقصد یہ کہ قربانی کے جانور کا ریٹ کچھ زیادہ ہونا جائز بات ہے۔
اگر آپ کسی اچھے سٹور سے چھوٹا گوشت خریدیں تو وہ 1600 سے 2000 روپے فی کلو کے حساب سے بیچتے ہیں (اسلام آباد کی عام مارکیٹ میں بھی مکس گوشت کا ریٹ 1600 روپے کے آس پاس ہے)۔ اصول یہ ہے کہ دیسی بکرے میں سے اس کے وزن کا 50 فیصد صافی گوشت نکلتا ہے، تو اگر آپ 40 کلو زندہ بکرا خریدتے ہیں (جو مناسب سائز کا ہوتا ہے) تو اس میں سے 20 کلو صافی گوشت نکل آئے گا۔ چونکہ یہ دیسی بکرے خاص قسم کے ہوتے ہیں، اس اعتبار سے 40 کلو وزن کے بکرے کی قیمت 48 سے 52 ہزار روپے کے لگ بھگ ہونی چاہئے (یعنی 1200 سے 1300 روپے فی کلو زندہ کے آس پاس)۔ اگر اس میں رنگت، خوبصورتی و سائز کے چند پہلو بھی شامل ہوجائیں تو یہ ریٹ 1500 روپے فی کلو تک بھی جاسکتا ہے۔ بعض گاہک منڈیوں میں کھڑے ہوکر جانور کا ایسا ریٹ بولتے ہیں جو عام دنوں میں گوشت کے ریٹ سے بھی کم ہوتا ہے۔ عام دنوں میں بکرے کا جو گوشت ہم خریدتے ہیں، وہ جانور عموما 16 سے 25 کلو سائز کے ہوتے ہیں اور نسلا بھی کم تر ہوتے ہیں جبکہ منڈی میں آپ بڑے سائز کے جانور خریدنے کی کوشش کرتے ہیں، لہذا اسی حساب سے ریٹ کے لئے بھی تیار ہونا چاہئے۔

یہ بات بھی یاد رکھنا چاہئے کہ جانور کی قیمت میں اضافہ اس کے وزن میں اضافے کے ساتھ متناسب شرح کے ساتھ نہیں بڑھتا بلکہ ایک خاص سائز سے زیادہ بڑے جانور کا ریٹ غیر معمولی طور پر اضافی ہی ہوتا ہے کیونکہ وہ سائز غیر معمولی ہوتا ہے۔ مثلا اگر 50 کلو کے بکرے کا ریٹ 70 ھزار ہوگا تو جو بکرا 60 یا 70 کلو کا ہوگا، اس کا مالک ایک سوا لاکھ روپے مانگنے میں کسی حد تک حق بجانب ہوتا ہے کیونکہ یہ سائز ہی نایاب ہوتا ہے، جو کوئی شوقین و صاحب استطاعت ہوتا ہے وہ یہ اضافی قیمت ادا کرتا ہے۔

نشر مکرر