Tayyab ki Baat

آج یہ منظر دیکھ کر دل کانپ گیا…
یاد رکھو! حالات بدلنے میں دیر نہیں لگتی، آج جو دوسروں کو ذلیل سمجھ رہا ہے، کل وہ خود اسی حال میں بھی آ سکتا ہے۔

دنیا کا نظام بدلتے دیر نہیں لگتی، دولت، طاقت اور رتبہ سب عارضی ہیں…
اصل عزت انسان کو انسان سمجھنے میں ہے۔
🙏 اپنے نوکروں، مزدوروں اور غریبوں کو حقیر نہ جانو، کیونکہ عزت دینا ہمارے ایمان کا حصہ ہے۔

لنگر خانے: بھیک کی عادت یا پھر نیکی؟
پاکستان کے شہروں میں آج جگہ جگہ "لنگر خانے" اور "مفت کھانے" کے بینرز لٹکے دکھائی دیتے ہیں۔ بظاہر یہ نیکی کا کام محسوس ہوتا ہے، مگر اگر اس کے اثرات پر غور کریں تو حقیقت اتنی خوشنما نہیں۔

کل تک جو مزدور صبح سویرے روزی کمانے کے لیے نکلتا تھا، آج وہ لنگر کی لائن میں کھڑا نظر آتا ہے۔ نتیجہ یہ نکلا کہ بازار میں ہنرمند مزدور، مستری، بڑھئی، باورچی اور کاریگر تیزی سے کم ہوتے جا رہے ہیں۔ محنت کی جگہ اب انتظار، اور کام کی جگہ اب خیرات نے لے لی ہے۔

رسول اللہ ﷺ کی تعلیم

ایک انصاری صحابی نے رسول اللہ ﷺ سے مدد مانگی۔ آپ ﷺ نے ان کے گھر کا حال پوچھا۔ انہوں نے بتایا کہ بس ایک کپڑا اور ایک لکڑی کا پیالہ ہے۔ آپ ﷺ نے وہ دونوں چیزیں نیلام کیں، پیسے دیے اور فرمایا:
"ایک درہم سے کھانا لو اور دوسرے سے کلہاڑی خریدو۔"

پھر کلہاڑی لا کر اس پر دستہ لگایا اور فرمایا:
"اب جنگل میں جا کر لکڑیاں کاٹو اور بیچو۔ پندرہ دن تک میرے پاس نہ آنا۔"

وہ صحابی محنت پر لگ گئے، کچھ ہی دنوں میں کھانا بھی تھا اور کپڑے بھی۔ رسول اللہ ﷺ نے فرمایا:
"یہ اس سے بہتر ہے کہ قیامت کے دن تمہارا چہرہ سوال کرنے کی وجہ سے داغ دار آئے۔"
(ابو داؤد)

یہ واقعہ بتاتا ہے کہ نبی کریم ﷺ نے بھیک کے بجائے محنت کو ترجیح دی۔ آپ ﷺ چاہتے تو روزانہ کھانا دے دیتے، مگر آپ نے ہنر اور محنت کو حل بنایا، نہ کہ مفت خوری کو۔

خلفائے راشدین کا اصول

حضرت عمرؓ کے دور میں بیت المال سے مدد صرف ان کو ملتی تھی جو واقعی مجبور ہوتے: یتیم، بیوہ یا معذور۔ جو صحت مند تھے انہیں کہا جاتا: "جاؤ، محنت کرو۔" اسی اصول نے اس وقت کے مسلمانوں کو دنیا کی سب سے خوددار قوم بنا دیا۔

آج کی حقیقت

آج ہم نے اس سنت کو الٹ دیا ہے۔ لنگر خانے عام ہو گئے، لیکن کاریگر نایاب۔ محنت کرنے والا رسوا، اور مفت خور ہیرو بنا دیا گیا۔ نتیجہ یہ ہے کہ ہمارے شہروں میں مزدور ملتے نہیں، کیونکہ ہم نے ان کے ہاتھ بھیک مانگنے کے عادی بنا دیے ہیں۔

بھکاری ذہنیت کے نقصانات

محنت کی عادت مر جاتی ہے۔

ہنر مند ختم، پیداوار رُک جاتی ہے۔

عزتِ نفس کا جنازہ نکلتا ہے۔

قوم غلامی کی راہ پر چل پڑتی ہے۔

حل کیا ہے؟

1. لنگر کے بجائے روزگار: جو کام کرے، اسی کو کھانا اور اجرت ملے۔

2. ہنر کی تعلیم: نوجوانوں کو فری ہنر سکھائے جائیں تاکہ وہ اپنے پیروں پر کھڑے ہوں۔

3. اصل مستحق کی پہچان: معذور، یتیم اور بیوہ کے لیے سہولت، باقی سب کو محنت کی طرف لگاؤ۔

4. عزت کے ساتھ مدد: بھیک کی بجائے قرضِ حسنہ اور چھوٹے کاروبار کے مواقع فراہم کرو۔

اصل نیکی

اصل نیکی یہ نہیں کہ ہم لوگوں کو لائنوں میں لگا کر روٹی بانٹیں، بلکہ یہ ہے کہ ہم ان کے ہاتھ میں اوزار دیں، ہنر دیں اور عزت دیں۔

پاکستان کے سب سے بڑے ہنر مند، مزدور اور کاریگر آج بیرونِ ملک ہیں۔ وہ دوسروں کے شہروں کو آباد کر رہے ہیں، دوسروں کے کارخانے چلا رہے ہیں۔ اور ہمارے حصے میں کیا آیا؟ مفت خوری کی عادت، اور لنگر کی قطاریں۔

یاد رکھو! قومیں بھیک سے نہیں، محنت سے ترقی کرتی ہیں۔
جس دن ہم نے مزدور کو عزت اور انصاف دیا، وہی دن اس ملک کی تقدیر بدلنے کا آغاز ہوگا۔۔