14/08/2026
یہ پرچمِ جاں۔۔۔
جنت میں بھڑک رہے تھے شعلے
پھولوں کی جبیں جھلس گئی تھی
شبنم کو ترس گئی تھیں شاخیں
گلزار میں آگ بس گئی تھی
نغموں کا جہاں تھا ریزہ ریزہ
اک وحشتِ درد کُو بکُو تھی
ہر دل تھا بجھا چراغ گویا
ہر چشمِ طلب لہو لہو تھی
میں اور میرے رفیق برسوں
خاموش و فسردہ دل کھڑے تھے
پر جاں کا زیاں قبول کس کو
منزل کے تو راستے بڑے تھے
لیکن یہ سکوتِ مرگ آسا
تادیر نہ رہ سکا فضا میں
اک شور سا چار سمت اٹھا
کچھ مشعلیں جل اٹھیں ہَوا میں
اک رقصِ جنوں ہُوا ہے جاری
یہ رقصِ جنوں نہ رک سکے گا
یہ شمعِ نوا نہ بجھ سکے گی
یہ پرچمِ جاں نہ جھک سکے گا
٭٭٭
احمد فراز
